Nupepa Puka La Kuokoa, Volume I, Number 131, 11 September 1893 — Ua Moole ka Bana Aole e Holo i Kikako. [ARTICLE]

Ua Moole ka Bana Aole e Holo i Kikako .

I ke ahiahi Sabati nei, ua halawai pu na lala o ka Bana Lahui Hawaii me Mr. George C. Beckley, ma ka hale o Mr. E. W. Aylett ma Koleaka. Ma ia kuka ana, ua hooholo lakou e hoole i ka poloai ana mai a ka Hui Cyclorama ia lakou e hele e puhi ohe ma Kikako. Ua mahalo makou .i kela poa puhi ohe i ko lakou hoole ana, aohe o makou hoapono i na kumu apau'i hoopuka ia no ka hoole ana; aka, ma ko makou kanpaona ana, e aho no lakou e noho malie ma Hawaii nei me na wahine a me na keiki. He mamao loa kela wahi e hele malihini aku ai, he poe ilihune lakou, aole hoi i maopopo lea ka loaa ana o na dala e hoolako pono ia ai me na kapa mehana a me na mea kupono e ae no na la anu loa e kokoke nei malaila. I ko lakou hoi hou ana mai ma ke alahao ma Mauna Pohaku, e paa paha auanei i ka hau me ka pilikia loa ike anu. Aole pono i kekahi mea e hele ma ka huakai kaahele ma na aina anu i ke kau hooilo, ke ole e hoolako ia rae na mea apau e pono ai. He maikai no ka manao o -Kakina ma i ke kono ana mai i ka poe puhi ohe e hele ma Kikako e ike i na mea nani loa o kela wahi. He lehulehu kakou ka poe i ake nui e hele ilaila e ike, aole nae e hiki ke haalele i na ohana me ko lakou nele. Aole hoi i maopopo ko lakou lako no kela noho malihini ana. E noho pu kakou ma Hawaii nei ma kahi pumehana, a na ka poe puhi ohe e hoolioli mai me ka lakou mauleo ohe hoonanea maanei.