Ka Wai Ola - Office of Hawaiian Affairs, Volume 40, Number 6, 1 June 2023 — Keahualaka ma Ke'ē [ARTICLE+ILLUSTRATION]

Keahualaka ma Ke'ē

V KA NA'AUAO O NA KUPUNA V ^ THE WISDOM OF THE KŪPUNA *

Na Kalani Akana, Ph.D. Ika mahina 'o Malaki aku nei, ua huaka'i au me ka'u mau haumāna hula i Ke'ē e hula i hula pahu ma Keahualaka, kāhi kaulana loa no ke a'o 'ana i ka hula. He

mēheuheu kēia 'ano huaka'i kipa 'ana me ka hō'ike hula i ho'okuluma 'ia no nā moho e ho'omākaukau ana i ka uniki hula. Wahi a Henry Kekahuna, ka mea nāna i kaha ki'i i palapala 'āina o ia wahi pana kaulana o Kaua'i, ua kipa 'ia kēia wahi e nā po'e hula no waho e 'ailolo ma lalo o ka 'olohe hula o ia wahi. Aia a pau ke a'o 'ana, ua pono ke ho'ā'o 'ia 'o ia e kekahi mau hō'ike. 'O ka hō'ike nui ka 'au'au 'ana i ke kōā kai 'o Kohola ma kai o Ke'ē. Aia kekahi manō e kali ana ma waho o ka hāpapa a inā ua hehi kekahi moho hula i kekahi kapu a laila ua po'ipū 'ia 'o ia e ke kia'i manō a make. Laki no mākou, 'a'ole i pono ka hō'ike 'au'au kai!

'O Laka ke kumu hula mua o ia wahi kapu a he kumu ia no ke kapa 'ana i kēlā heiau pili pali 'o Keahualaka. Aia ma lalo o ia heiau hula, ke kahua 'o Kauluapaoa. A ma lalo o Kauluapaoa kekahi pōhaku nui 'o Kilioe ka inoa. Pa'apū ua pōhaku la 'o Kilioe me nā poho no nā piko o nā keiki i hānau 'ia o nā 'ohana o Hā'ena. Eia kekahi, Kilioe ka inoa o ka mo'o i kia'i i ke kupapa'u

o Lohi'au akā wahi a Wiliama Laiki, 'o Kilioe ke kaikuahine o Lohi'au a he kumu hula ho'i 'o ia. 'O ia paha ke kumu o ke kapa 'ana o ia wahi 'o Kauluakilioe ma mua e Thomas T. Thrum, ka mea kākau mo'olelo. Wahi a Henry Kekahuna, 'o Wahinekeoli (Wahineikeouli Pā) ke kumu hula hope o Keahualaka. 'O kēia Wahineikeouli kekahi o nā mea oli a Helen Roberts i ho'opa'a ai ma ka līpene. Eia kekahi, he wahine haku mele 'o ia a ua ho'ouna i kāna mau mele i nā nūpepa Hawai'i e ho'opuka. 'O Jacob Maka ke alaka'i no Kekahuna ma Ke e. 'O ia ho'i kekahi o nā haumāna hope loa ma Keahualaka i puka ma lalo paha o Wahinekeouli. Ua hele a kaulana na'e 'o Maka i pu'ukani a puni o Kaua'i. '0 E Ke Akua Ola kekahi o nā hīmeni āna i haku ai. Eia kekahi 'o kēia kanaka 'o Maka kekahi kamaaina i ha'i i nā mo'olelo Hawai'i iā Fred Wiehman, ka mea i kākau iā Kauai Tales.

I ka'u kipa mua i Keahualaka ma 1979, 'o Roselle Bailey me kāna haumāna nā kahu o ia wahi. I kēia kipa aku nei, 'o Kamealoha Forrest me kāna mau haumāna nā kahu. He mea nui kā lākou mālama 'ana iā Keahualaka me Kauluapaoa ma hope hō'ino 'ia e nā po'e 'ae'a e ho'ohauka'e i kēlā wahi u'i hanohano. Ua olelo 'o Kekahuna he "kula nui." Ma kēia ho'omana'o 'ana i nā kūpuna hula no'eau o ia wahi pana o Keahualaka, ua 'oia'i'o nō kā Kekahuna olelo. ■ ILalani Akana, Ph.D., is a kumu ofhula, oli and 'ōlelo Hawai'i, and a research analyst at the Office of Hawaiian Affairs. He has authored numerous articles on Indigenous ways ofknowing and doing.

To read an English translation of the article, go to kawaiola.news

Palapala 'aina a Kekahuno o Keahualaka lōua 'o Kouluapooa.

Keahualūkū lōua 'o Kauluapooa mai luna iho. - Courtesy Photo