Ka Wai Ola - Office of Hawaiian Affairs, Volume 40, Number 5, 1 May 2023 — Nā Pa'akaula [ARTICLE+ILLUSTRATION]
Nā Pa'akaula
J KA NA'AUAO O NA KUPUNA V ^ THE WISDOM OFTHE KŪPUNA *
Na Kalani Akana, Ph.D. He mo'olelo kaumaha kēia e pili ana i nā kānaka Hawai'i i ho'oma'au 'ia ma muli o ko lākou 'ano ho'omana. Ua pili ia mo'olelo iā Helio Koa'eloa no Wailua, Maui Hikina. Ua ho'ololi 'o ia i kona ho'omana 'ana i ke Akua mai ka ho'omana Kalawina i ka ho'omana Katolika. Ma hope pono o kona huli 'ana, ua hele 'o ia i Honolulu e a'o e pili ana i kona ho'omana hou. A ho'i 'o ia i Maui , ua ho'ohuli mana'o 'o ia i kona kaikaina 'o Petero Mahoe ma mua o kona komo 'ana i ka ho'omana Kalawina ma Wailuku. Nui na'e Katolika ma Wailuku i kēlā manawa. Ua kauoha 'ia lākou e ke aupuni e kūkulu i kekahi hale pule Kalawina akā ua hō'ole lākou. Akā na'e, ua 'ae lākou e ho'oponopono i nā alanui. Ma ke kauoha hou na'e a ke aupuni i nā Katolika e ho'ouna i kā lākou kamali'i i nā kula o nā mikioneli Kalawina, ua hō'ole hou lākou. No laila, ua hopu a ho'opa'ahao 'ia ia mau kānaka hō'ole a lawe 'ia i Lāhaina. Pa'akikī a lu'ulu'u ka hele 'ana i ka lā welawela. Ma kahi o 22 mile ka loa. He hua noni a me ka wai wale nō ka 'ai a nā pa'ahao. A hiki nā pa'ahao Katolika i Lāhainā ua 'ike 'o Kauikeaouli, ka mōī 'o Kamehameha III, i nā "pa'ahao" mai Wailuku a ua ho'oku'u koke 'ia lākou e ia. A laila ua ho'opuka 'o ia 'o Kauikeaouli i kānāwai hou no ka 'ae aloha i nā ho'omana like 'ole. Ma muli na'e o ua ho'omāinoino lā, ua ho'oholo nā Katolika e komo pū i ka hana inā ho'oma'au a ho'ope'a hou 'ia kekahi Katoliko e ke aupuni. I kekahi manawa a'e, ua koi nā mikioneli Kalawina i kekahi luna kānāwai ma Wailuku, 'o Mahune kona inoa, e ho'opuka i palapala hopu no kekahi mau Kaīolika ma Kahikinui. No laila, ua ho'ouna 'ia nā māka'i e ka 'aha ho'okolokolo e hopu iā Helio me nā kānaka i ho'ohuli 'ia e ia. Ua ho'omaka nā māka'i ma Kahikinui me ka ho'opa'a 'ana i nā kānaka Katolika - ua ho'opa'a a nākiki'i 'ia nā kānaka Kaīolika, pālua a pālua, ma ke kaula ho'okahi. Oi noke ka huli 'ana i po'e Kaīolika ma Hāna, ma Ko'olau, Hāmākua, ā hiki i Wailuku, he 90 mau mile ka loa. Pa'akikī a kāpekepeke ka hele 'ana ma nā alanui kīke'eke'e a kūnihinihi. Ma muli na'e o ke aloha menemene o nā kupa o ka aina, ua
hānai 'ia nā kānaka i hopu 'ia me ka 'ai a me ka wai iā lākou e ka'alo ana. 'O ka 'oiā'i'o, he po'e 'ohana kēia no ua mau kānaka lā i hopu 'ia. No laila, ua komo nā 'ohana i ka laina pa'akaula. Ua aloha menemene kekahi mau kānaka a'e a kū i mua e ho'ololi i ko lākou ho'omana a lilo lākou i ukali o ka ho'omana Katolika. 'O kekahi a'e, ua 'a'a lākou e komo i ka huaka'i loa o nā pa'akaula. Ua komo lākou i ka lole maika'i no ka hele 'ana i ka hale pule a ua lei 'ia me nā papahi lei like 'ole me he mea lā he ho'olaule'a ka huaka'i pa'akaula. Ma ka hiki 'ana i Wailuku ma hope o ho'okahi mahina, ua hū ka nui o nā kānaka. 'A'ole i hiki i ka 'aha ke ho'opa'ahao iā lākou a pau. Ua lo'ohia ka luna kānāwai a no laila, ua ho'oku'u 'ia nā pa'akaula a pau me ka ho'opa'i 'ole. Ua makemake nā mikioneli e ho'okū i ka hana 'euanelio a Koa'eloa akā ma muli o kā lākou hana ho'āhewa, ua ho'onui 'ia a'e ka heluna o nā Katolika ma Maui. Ma kahi o 4,000 mau kānaka ma Maui i komo i ka ho'omana Katolika ma muli o Koa'eloa. No ia mea, ua kapa 'ia 'o Helio 'o ia ka Lunaolelo ('Apokekolo) o Maui. Ua kākau 'ia nā olelo a Iesu o Nazareta ma Mataio 5:10, "Pōmaika'i ka po'e i ho'oma'au 'ia mai no ka pono; no ka mea, no lākou ke aupuni o ka lani." ■ Kalani Akana, Ph.D., is a kumu ofhula, oli and 'ōlelo Hawai'i, and a research analyst at the Office of Hawaiian Affairs. He has authored numerous articles on Indigenous ways ofknowing and doing.
Aerial view of o portion of the road to Hāna. In the mid-19th century, Hawaiian Catholics were frequently persecuted for their faith. One story recalls how Hawaiians in Kahikinui were rounded up by sheriffs, bound to one another in ropes, and marched along the Hāna coastline 90 miles to Wailuku. - (ourtesy Photo