Ka Wai Ola - Office of Hawaiian Affairs, Volume 40, Number 1, 1 January 2023 — Nou e ka 'Iwa Kū Moku [ARTICLE]

Nou e ka 'Iwa Kū Moku

He mele kūmākena no Noa Emmett 'Auwae Aluli

I Kūheia, heia e ka 'iwa, Ka 'iwa kīlou moku, Mokumoku-ā-hua lā ē, Moku au lā, moku au lā! Heia ku'u haku i ka lani. I Kaulana ka puō a kānaka, A kānaka nui, a kānaka iki, Kūpina'i makena ka leo, Moku au lā, moku au lā! Heia ku'u haku i ka lani. I Pāpakanui, I Pāpakaiki, Pakapaka ua a Lono, Hala i ka uka o Moa'ulaiki, Moku au lā, moku au lā! Heia ku'u haku i ka lani. I Moa'ulanui, moa ka'alele, Lele i Pu'uhuluhulu, Hului ke kupu, ka 'eu o nā moku, Moku au lā, moku au lā! Heia ku'u haku i ka lani. I Wa'anui, i Wa'aiki, Wa'awa'a ka pele, I Moku'āweoweo lā ē, Moku au lā, moku au lā! Heia ku'u haku i ka lani. I ka lae o Kuikui, Ku'iku'i kukui lamalama i ka pō, Pō ke ao, ao auane'i ka pō, Moku au lā, moku au lā! Heia ku'u haku i ka lani. 'O Lono nui 'oe, 'o Lono iki, 'O Lonoikamakahiki 'oe, 'o Lonomakua, 'O Lonomakaihe 'oe, 'o Lonoikamakaoka'ōpua,

Moku au lā, moku au lā! Heia ku'u haku i ka lani. 'Āluli ke akua loa, 'Ālawa ke akua poko, Ānehe ke akua i uka, i kai, Moku au lā, moku au lā! Heia ku'u haku i ka lani. 'Āiwa nā Mo'o Lono, 'Āiwa nā kupu, Āiwaiwa hale Kanaka'ole, Moku au lā, moku au lā! Heia ku'u haku i ka lani. Kīhāpai kapu, Kapu i ke akua loa, Iā Lonomakua, Moku au lā, moku au lā! Heia ku'u haku i ka lani. Ua lono 'oe ē, ua lono mākou, Ua lono kākou i ke kapu, Kapu Mo'o Lono ē, Moku au lā, moku au lā! Heia ku'u haku i ka lani. 'O Nānāmua 'oe, 'o Nānāhope, 'O nā māhoe kapu i ka lewa, Lewa lapa'au, lā'au ola, Moku au lā, moku au lā! Heia ku'u haku i ka lani. 'O 'Ikuā 'oe, 'o 'Ikuā au, 'Ikuā kūmākena ka puō, Ka pihe uē i ka lani, Moku au lā, moku au lā! Heia ku'u haku i ka lani. 'O Weleehu 'oe, ehuehu ke aloha,

Aloha kānaka nui, kānaka iki, Aloha lāhui ē, Moku au lā, moku au lā! Heia ku 'u haku i ka lani. 'O Makali'i nō 'oe, 'O ke ali'i kōkō lani, Helele'i 'ai a ke akua, Moku au lā, moku au lā! Heia ku'u haku i ka lani. 'O ka Huihui 'oe o Makali'i, Hui ka 'ī, hui ka mahi, hui ka palena, Huihui ka lāhui iā 'oe, Moku au lā, moku au lā! Heia ku'u haku i ka lani. He kupua 'oe, he kama, Kamaakamahi'ai, Ka niuhi hele lā o Kahului, Moku au lā, moku au lā! Heia ku'u haku i ka lani. 'O Makali'i ka malama, 'O Kūpau ka lā, Pau 'ole ke aloha ē, Moku au lā, moku au lā! Lele ku'u haku i ka lani. Kani ka moa kuakahi, mokuāhana, Kani ka moa kualua, mokuāhua, Kani ka moa kuakolu, maha ka uhane, Moku ka pawa, Momoku ke ahi a Lonomakua! Lele ku'u haku i ka lani ē. Maha au lā, maha au lā! Mahamaha ku'u akua i ka lani.

Haku 'ia e Dr. C.M. Kaliko Baker, Mo'o Lono, Kanaloa Kaho'olawe