Ka Wai Ola - Office of Hawaiian Affairs, Volume 38, Number 12, 1 December 2021 — Ka Mo'olelo o Kamehameha I [ARTICLE]

Ka Mo'olelo o Kamehameha I

Throughout the year, we have been featuring various success stories and interviews with both archiving partners and users of OHA's Papakilo Database. As we enter the season ofgratitude, we would like to share an article on Makahikifrom our Hawaiian newspaper collection written by renowned Native Hawaiian historian and scholar Samuel Mānaiakalani Kamakau, published in Ka Nūpepa Ku'oko'a on July 6, 1867, with the translation provided to us by ourpartner, Awaiaulu. Awaiaulu perpetuates and advances the use ofHawaiian language and trains Hawaiian language translators and editors.

NaSamuelM. Kamakau Kūkulu ihola 'o Kamehameha he mau 'aha'aina makahiki, a ua kapa 'ia he mau 'aha'aina ho'omaha i ka luhi i ka hana 'ana i kēlā a me kēia mea i hana 'ia e ke kanaka; a i mea ho'i e ho'oikaika ai i ke kino o kēlā kanaka, kēia kanaka. I ka hala 'ana o nā malama 'eiwa o ka makahiki, no laila, ua ho'okapu 'ia ka 'i'o o nā holoholona a me ka niu; a i ka puni o ka makahiki, kau ka pua'a i ka lele, a wāhi 'ia ka niu, a laila, 'aha'aina ihola 'ehiku lā, me ka ho'olako 'ana i nā mea a pau. I ia wā, ho'omaka ke akua pā'ani e ka'apuni. 'O nā hana le'ale'a kāna hana: 'o ka pā'ani, 'o ka hulahula, 'o ke ku'i, ka mokomoko, ka palepale, ka honuhonu, ka pinao, ka lua, ke kulakula'i a me nā hana ho'oikaika kino a pau. Aia nō ka 'ai i ke aupuni, 'o ia ho'i ka 'ai i loa'a i kēlā konohiki, kēia konohiki ma ko ke ali'i mau lā hana, a e hā'awi koke aku na ka po'e hana le'ale'a. 'O ke akua Kāpala'alaea a me ke akua Kihawahine, he mau akua lawe 'ia, a ho'okahi 'ao'ao kapu, 'o ka 'ao'ao ma ke kai, a ho'okahi 'ao'ao noa, 'o ka 'ao'ao ma uka. A 'o ka po'e i pili i ka 'ao'ao kapu, he uku waiwai ka ho'opa'i, a inā ua 'ike aku a moe iho i lalo, a laila, pakele, 'a'ole e ho'opa'i 'ia. Hele mai nā akua makahiki, 'o ia ho'i 'o Kapuni, 'Oulu, Ka'ohumalu, Lono, Kahoali'i a me kekahi po'e akua e a'e, a 'o ke ka'upu, ua kau 'ia i luna o ka lā'au, a 'o ia ka hae e amo ai. 'O Lono, ua haku 'ia i ka lā'au lō'ihi,

pēlā nō ho'i 'o Kapuni a me nā akua a pau o ke 'ano makahiki, ua 'auamo hele 'ia a hiki i ka palena o ke ahupua'a, a 'okana, a moku paha, a laila, hoala 'ia ke akua i luna, a laila, ho'okupu ke ahupua'a, ka 'okana, a moku aina paha, i kēlā a me kēia waiwai; a inā ua nui ka waiwai, a ua pono nā waiwai a pau loa, a ua kūpono i ka makemake o ke kahu ali'i nui o nā akua, a laila, pāpio ke akua, a hā'awi 'ia ka waiwai i ka po'e kahu akua, a 'o ke koena, hā'awi 'ia i kānaka a pau loa. 'Ōlelo ihola kānaka, "Ola kēia 'ilihune a me ka nohona pōloli o kahi ali'i; eia ka 'ai, ka i'a, ke kapa a me ka malo, ka pāu, ka moena, ke olonā, ka 'upena, ka hulu, ka waiwai loa'a wale i ka lā ho'okahi." 'O ka aina ho'okupu 'ole mai i loko o kēia hele ka'apuni 'ana o ke akua, a laila, ho'ohalahala ke akua, 'a'ole e pāpio, 'a'ole nō ho'i e kula'i i ke akua i lalo. A 'o ka hope ho'i o ia mea, he pau i ka hao 'ia, he hemo ka aina, a inā he ahupua'a, he 'okana a moku aina paha, ua pau i ka hao 'ia. A eia ho'i kekahi mea kupanaha, e nānā pono ka po'e e hao ana i kahi e kū ana ke akua, inā ua pāpio ke kū 'ana o ke akua, e holo 'oe me ka māmā loa, o loa'a mai 'oe i ka po'e nāna ka waiwai, a pau hou kēlā waiwai i ka hao 'ia, no ka mea, ua pau ka mana o ke akua, ua pāpio, a ua owili ke akua. He 15 lā e hele ai ke akua loa a hālāwai me ke akua poko, a laila, owili ke akua loa me ke akua poko, a 'o ka ho'i nō ia o ke akua i kahi e noho ana 'o ka 11101". A komo ke akua i loko 0 nā heiau a me nā mua, a laila, ua kapu hou ke akua, 'a'ole e 'ike nā kānaka. -Ka Nupepa Kuokoa, 6 Iulai 1867, paragraphs 7-10 ■