Ka Wai Ola - Office of Hawaiian Affairs, Volume 38, Number 8, 1 ʻAukake 2021 — PAPANUI DAVID NU'UHIWA ENOKA KA'OHELAULI'I PEPELUALI 25, 1930 - MEI 4, 2021 [ARTICLE+ILLUSTRATION]

PAPANUI DAVID NU'UHIWA ENOKA KA'OHELAULI'I PEPELUALI 25, 1930 - MEI 4, 2021

(Honolulu, Hawai'i) - He mea kaumaha ka ho'olaha 'ana aku i ka hala 'ana 'o David Nu'uhiwa Enoka Kaohelaulii, i ke ala ho'i 'ole mai. He 91 ona makahiki. Ua ku'u aku kona hanu ma ka home aloha 'o Lunalilo Home, kahi ho'i āna i noho ai no 'umi mau makahiki

a hiki i kona hala 'ana. Ua hānau 'ia 'o Papanui Kawika ma Waiaka Ni'ihau. 'O Ernest Enoka Nu'uhiwa Ka'ohelauli'i lāua 'o Rowena Bonikani Ka'ohelauli'i kona mau mākua. 'O ka olelo Kanaka nō ka olelo mua i pū a 'ia ai i kona waha a 'o ia pa'a nō a hiki i kona ha'alele 'ana i kēia ola 'ana. Ua ne'e mai 'o ia i O'ahu nei me kona kupunawahine 'o Nā'apuwai i kona makahiki he 14. A ma O'ahu nei nō 'o ia i ho'ona'auao 'ia ai ma ke kula Kamali'i 'o Ka'iulani. I ka piha 'ana iā ia nā makahiki he 18, ua komo aku 'o ia i ka pū'ali koa i ka makahiki 1948 a mamuli o kona lawelawe 'ana i ka 'oihana koa me ka 'oia'i'o i koho 'ia 'o ia i lālā ma lalo o ka hui "Special Forces" no ka "green beret" ma ke 'ano he kanaka kāko'o no nā kauka i lapa'au aku i nā koa i pilikia i loko o ka 'oihana koa. He kanaka i lawelawe i kāna 'oihana me ka 'oia'i'o a hiki i kona wā i ho'omaha loa ai mai ka 'oihana koa aku. Ma hope o kona ho'omaha loa 'ana mai ka pū'ali koa aku, ua hai 'ia 'o ia e ka hui 'oihana Stevedore no Young Brothers. He mau makahiki kona hana 'ana ma laila a ho'omaha loa 'o ia mai ia 'oihana mai. Ua lilo ho'i kona wā ho'omaha loa i ka hana manawale'a ma lalo o ka hui Masonic. I ka makahiki 2010, ua ne'e aku 'o ia a noho ma ka Home Aloha a ka Mōt Lunalilo i ho'okumu ai no nā kūpuna Hawai'i, a ma laila 'o ia i noho ai a pau kēia ola honua 'ana. Me ke aloha nō ho'i ka 'ohana Ka'ohelauli'i e ku'u pau aku nei iā ia mai kēia honua aku a e ho'i 'o ia i ka home a ka Makua Lani i waele ai nona a me kona mau kūpuna, mākua, a pēlā pū me kona mau kaikuahine i ho'i

e i ka poli o Apelahama. Ma laila ho'i 'o ia e noho pū nei a hau'oli pū ho'i me kona 'ohana no ke ao mau loa, Amene. Na Kauka Kuuipolani Kanahele Wong ■