Ka Wai Ola - Office of Hawaiian Affairs, Volume 35, Number 2, 1 Pepeluali 2018 — No ka 'Ahahui 'Ōlelo Hawai'i [ARTICLE+ILLUSTRATION]

No ka 'Ahahui 'Ōlelo Hawai'i

Eku'i ka lono, e ho'olaha a laha, ua ola ka 'Ahahui 'Ōlelo Hawai'i! Aloha nui kākou e nā makamaka o ka 'ōlelo makuahine, mai ka lā hiki i Ha'eha'e a i ka lā kau i ka mole 'olu o Lehua, welina mai me ke aloha. Ke pāhola 'ia nei kēia nūhou 'oli'oli ma ke kino lahilahi o Ka Wai Ola, ua ola ka 'ahahui hiwahiwa o kākou, 'o ia ho'i ka 'Ahahui 'Ōlelo Hawai'i. Ma Nowemapa o kēlā makahiki aku nei, ua kāhea 'ia nā lālā a me nā makamaka o ke kaiāulu e 'ākoakoa ma ka hālāwai kū makahiki no ke kama'ilio 'ana e pili ana i nā hana a ka 'ahahui mai kēia mua aku, a no ke koho pāloka 'ana i ka Papa Alaka'i

hou e ho'okele i ia wa'a nui. Ma kahi o 30 mau kānaka i kū mai. Eia nā lālā hou o ka Papa Alaka'i o ka 'Ahahui 'Ōlelo Hawai'i: • Pelekikena - Noah Ha'alilio Solomon, no Maunalua, O'ahu, mai • Hope Pelekikena - Frank Ka'iuokalani Damas, no Wai'anae, O'ahu, mai • Pu'ukū - Keli'i Ruth, no 'Aiea, O'ahu, mai • Kākau 'Ōlelo - Paige Miki Kalāokananiki'eki'e Okamura, no Waialua, O'ahu, mai • Lālā - Zachary Alaka'i Lum, no Ha'ikū, O'ahu, mai • Lālā - Manakō Tanaka, no Āliamanu, O'ahu, mai • Lālā - Keawe Goodhue, no Kahalu'u, O'ahu, mai E nā kupa o ka 'ōlelo, ke ho'okumu hou 'ia nei nā papahana me nā pahuhopu no ka wā e hiki koke mai ana. Ke pa'a nā 'ike pili, e ho'olaha 'ia ana nō i laha no nā kānaka e hoihoi ana e komo pū i nā hana me mākou. ■

Na Paige Miki K. Okamura ■ /