Ka Wai Ola - Office of Hawaiian Affairs, Volume 17, Number 8, 1 ʻAukake 2000 — Page 15 Advertisements Column 2 [ADVERTISEMENT]

'H0,PKQ W wBbHuK£īiPJP A Hawaiian SpeIIing Bee

Na Manu Boyd AIA NŌ ma ka lā 7 o 'Okakopa ma Ward Warehouse he ho'okūkū kūmakahiki ma waena o nā haumāna mākaukau i ka 'ōlelo Hawai'i. Ma lalo ia ho'okūkū o ka Aloha Festivals i mālama pū 'ia me ke kāko'o nui mai o ka Victoria Ward Centers. He pela a unuhi hua'ōlelo Hawai'i ke 'ano o ia ho'okūkū i ho'okumu 'ia i 'eono makahiki aku nei no ka hō'ike ākea 'ana aku i ka ulu pono a me ka holomua o ka 'ōlelo Hawai'i i kēia au. No nā haumāna mai ka papa 'ehā a ka 'ewalu ia ho'okūkū ma nā mokupuni like 'ole, a 'a'ole no nā kula kaiapuni Hawai'i wale nō. I kēlā makahiki aku nei, ua lanakila 'o Erica Kamalu mai ke kula 'o Kamehameha a ua loa'a ke kūlana 'elua i kona kaikaina no ke Kula Kaiapuni 'o Pū'ōhala mai. Inā e noho 'oe ma kekahi mokupuni 'ē a'e, na ka Aloha Festivals e ho'ouna i likiki mokulele iā 'oe. Ke hoihoi 'oe, e kauinoa ma mua o ka lā mua o Kepakemapa. A laila, e ho'ouna 'ia ana ka papa hua'ōlelo iā 'oe. Pono nō e ho'opa'ana'au i hiki iā 'oe ke pela a ununi ma ka 'ōlelo Hawai'i wale nō. La'ana — 'i aku ka waha puana: "Kākā'ōlelo. Kākā'ōlelo." Pane maila ka haumāna: "Kākā'ōlelo. Ke, a-kō, ke, akō, 'okina, o-kō, la, e, la, o. Kākā'ōlelo. He kanaka akamai i ka ha'i mo'olelo. Loa'a i ko ka mea lanakila kula he lolouila hou, a loa'a pū ka makana kālā nona iho, ma kahi o 'elima haneli kālā no ke kulana 'ekahi, a emi iho ana no nā kulana 'elua ma lalo ona. Mahalo nui i nā hoa kāko'o no nā makana maika'i. E kelepona i ke ke'ena Aloha Festivals no ke kauinoa 'ana ma 808-589-1771. Mai 'ūlōlohi. E ho'opa'ana'au pū kākou! ■