Ka Oiaio, Volume I, Number 127, 25 June 1896 — Page 1
| This text was transcribed by: | D Hable |
| This work is dedicated to: | Awaiaulu |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA
PUKALA OIAIO
Hoopukaia i na la a pau koe ka la Sabati a me Lapale no 60 keneta o ka mahina.
BUKE I. HONOLULU, IUNE 25, 1896. HELU 127
OIAIO PUKA LA
KA HAAWINA HELUHELU BAIBALA.
HOONOHONOHO UHANE I KUKULU IA MA KA HOOPUNIPUNI.
1 Mahope o ka make ana o Adamu ua ike ia aole he oiaio o ka Satana olelo no ka make o ke kanaka, (Kin 3:4), heaha kana mea hou e hana ai?
Haina--E hoao ana oia e hoike aku i kanaka, he wahi make ole no kekahi o ke kanaka.
2 Pehea la e hiki ai iaia ke hana mai i kanaka i puni ia aku ai kana hoopunipuni?
Haina--Ma o ka hooura ana i kona mau anela e ku ano mai ma kahi o kekahi mea i make.
3 He mea hiki no anei ia Satana ke hoohalike ae ia ia me kekahi mea e? 2 Kor 11:14.
"Aole ia he mea kupanaha, no ka mea ua hoano hou ae la o Satana ia ia iho me he anela la o ka malamalama."
4 Ua hoano hou ae @ nei o Satana e like me kekahi kaula kahiko? 1 Sam 28:11, 12. Heluhelu i na pauku 1-15.
"Alaila i aku la ka wahine owai la ka'u e hoala mai ai nou? I mai la oia o Samuela kau e hoala mai ai no'u. A ike aku la ka wahine ia Samuela hooho aku la ia me ka leo nui i olelo aku la ka wahine ia Saulo i aku la, no keaha la oe i hoopuni puni mai ai ia'u? no ka mea o Saulo ka oe."
He uhane launa ko keia wahine me na daimonio, (pauku 7, 8) ka mea i papa ia e ke Akua (Kanl. 18:10-13) ka mea i loaa ia kakou ma ka imi ana, he poe kamailio me na daimonio. Ua hoano hou o Satana ia ia e like me Samuela.
5 Ua hoike mua mai anei o Satana ia Saulo i kekahi mea i ko mahope mai? 1 Sam 28:19. E nana i ka mokuna 31:1-6
"A e hoolilo hoi o Iehova i ka Iseraela me oe i ka lima o ka Pilisetia i a oe pu me kau mau keiki me au i ka la apopoi a e hoolilo hoi o Iehovai ka poe koa o Iseraela iloko o ka lima o ko Pilisetia."
He hiki hoi ia Satana i kekahi manawa ke ike i na mea e hiki mai ana i kekahi maanwa. Ma keia ano ua hiki ke puni ia ia kekahi poe, he hiki i ka poe ola ke launa me ka poe make. Ma keia ano i loaa ai ko lakou maliu aku, alaila alakai ia lakou iloko o ka pilikia a me ka make.
6 Ua loaa anei ia manao i ka nui kanaka he mea kekahi iloko o lakou e ola mau loa ana ke make ke kino?
Haina--Ua manao kekahi poe lahui pegana e komo ana ka uhaue i ka make ana iloko o ke kino o kekahi holoholona, a i kona make ana i kekahi holoholona e aku, a mahope o hookahi tausani makahiki e hui aku ana oia me ka Akua. Aneane na mea a pau ua manao e ola mau loa ana ka uhane mahope o ka make ana.
7 I ka manawa o na uhane e hookohukohu ana i ka uhane o ko kakou mau hoaloha, a e hoike ana i na mea huna, heaha la ka manao o ka nui o na kanaka i keia poe uhane?
Haina--E manaoio koke ana no ka nui o lakou ia wa he poe uhane io maoli no lakou no ka poe i make mai ka aina uhane mai, a e manao ana he oiaio ka lakou mau olelo.
8 I ka wa koke e maliu ia aku ai keia uhane o na daimonio, heaha la ka kanaka hana?
Haina--E hoao mau ana lakou e kulai i ka hilinai o ke kanaka maluna o ka Bai@ la a ia Iesu Karisto.
E. H. G.
NA MANAO HOOMANAMANA AME KA POPE
"He mea oiaio loa he huakai ano e maoli kela a ka Pope," wahi a ke "Christian Work," o Mai 14, "i maki ae ma ke alanui o Madrida i kekahi la o ka pule i hala." Ua noho o Sepania iloko o kekahi pilikia kau la loihi. Hoohuiia aku me keia ka pilikia kaua e omo aha i kona mau loaa a me na kanaka no ke kaua Cuba, me ka haawina pouli o ka lilo o kona panalaau hope loa ma America. Iloko o keia haawina ua komo mai, e like me ke ano maa mau, na ao a ka hoomana pope e hoopii aku i kekahi "haipule" make. O keia huakai, wahi a ko makou olelo ia mai, "ua kukuluia hoi no ke kiai haipule o ke kulanakauhale, Sana Isidore, e hoopau aku i ka pa-maloo i hoopilikia ino ia Sepania, a ia wa hoo kahi e hoopau i ke kaua kipi ma Cuba. He hana kelakela keia. Ua komohia pu na oihana civila a me na lala o ka oihana kaua, a he aneane hookahi tausani ka nui o na kahunapule iloko o kaoo huakai me na ihoiho e a ana ma ko lakou lima. Ua piha pono na wahi a pau o na alanui i kanaka i ulumahiehie, i hoolua aku hoi i na poke pua a paapono ke alahele. Ma ke poo o ka huakai i manele ia ai ka lehu o keia haipule, i make he eono haneri makahiki mamua loa."
He kii keia mau hana i kuluma i ka hoomana pope. Ua kukuluia hoi ia hoomana maluna o ka manao e nana aku kakou i ka poe make no na kokua i kaa aku inawaho o ka mana hiki i na kanaka ke kokua. He pegana maopopo keia manao, i hoike ia e na imi ana i ke ano o na hoomana pegana a pau. Ua ike ia na olelo hoike a ka Haku e pili ana i keia mea ma na olelo a Isaia 8:10: "A olelo mai lakou ia oukou e hele i ka poe ninau kupapau, a i na kupua hoi, i ka poe mukiki, a me ka mea namu liilii: aole anei e hele na kanaka i ko lakou Akua? E hele anei i ka poe make no na mea e ola ana?"
Aole he wahi i olelo ia ma ka palapala hemolele, e imi aku kakou i ka mea make no na kokua ana. Ua kukala akea ponoi mai ke Akua Mana oia maoli no ne kumu o ko kakou ikaika a me ko kakou naauao a me ko kakou pono, a ua ao mai hoi ia ia e imi aku ai. Mai na olelo he lehulehu iloko o kana Olelo ua ao ia kakou he mea makehewa loa ka imi ana i na kokua mai ka poe make no kekahi mea hookahi, oiai aole lakou i ike no kekahi mea hookahi--ua nalo aku ko lakou noonoo, ua pio (Kek. 9:5), a "ua nele mau loa lakou i ka haawina ole, ma na mea a pau i hanaia malalo iho o ka la" (pauku 6) oia hoi ua make ko lakou noonoo (Hal 146:3, 4) a pele aku. Nolaila, o na hana hookelakela e like ae la me ia e pule a hoomanamaa aku ana i loaa ke kokua mai kekahi mea i make nona na iwi e paialewa ia ana ma ke poo o kekahi huakai, aole loa hoi he mau hana e ae aka he mau hana pegana ma na ano a pau.
Ma Geremania, i ka 1888, he 200,000 ka nui o na wahine moekolohe, wahi a ka hoike a kekahi mea i ike i kana mea e kamailio ana. Ma Berelina hoi ua like ka nui o na wahine auwana me ka nui o na wahi noho o na hoahanau ma na luakini o ia wahi. Ke ano keia o na lahui hooakamai kanaka.