Ka Oiaio, Volume I, Number 125, 23 June 1896 — Page 2
| This text was transcribed by: | Kaui Sai-dudoit |
| This work is dedicated to: | No ku'u mo'o akolu: 'Imaikalani Kahuapono Kamaka Goodhue |
Ka Oiaio Puka La
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E. BUSH, Luna Hooponopono a me Puuku
HONOLULU, : : : : : IUNE 23, 1896.
-----------------------
W.H. DAIMANA.
--------
Ua hiki mai ka lono mai Nu Ioka mai aia ke waiho la o Generala Dimond, ma ke kae o ka luakupapau, ua pau ka ike, ma kekahi hotele ma ia kulanakauhale. ua ike oia i kona nawaliwali a no ia kumu oia i holo ai ma keia huakai imi ola, me kana keiki, Harry Daimana, e holo ana no na wahi hoolana ma'i ma na wai mapuna minerala o Geremania. Wahi a ka nupepa Examiner o Kapalakiko i kinohi, ua pee mai ka lono ua make o Mr, Daimana, aka, i ka hiki hope ana mai o ka lono aia hoi aole oia i make. ma na leta hope loa mai ke kaikaina i ke kaikuaana maanei nei, ua maopopo loa, ua pau ke ana o kona noho ola ana ma keia ao. mamua aku hoi kona mau makua, ka lua o kana wahine ka makuahonowai Mr. J.T. Waterhouse makua a me kaikoeke, J.T. Waterhouse opio.
I ka wa e nana ia aku ana na lono e pili ana i ka hana a ka Ahaolelo o Amefika no hawaii nei a me ka pono o ka lahui hawaii ponoi, ua holo mai oia maluna o ka mokumahu Kina, no keia wahi, a ke hoomanao nei makou, i ka ike hope ana ia ia, a me ka lohe hope ana i kona leo, e i mai ana ia Hanale Waterhouse, ma ka uwapo, i keia mau olelo hoolana ia ia, "Everything O.K." Oia hoi, ua maikai no ke kulana, (no ka aoao hookahuli aupuni). He mea kupanaha no hoi, aka me he la ko ke Akua nani e hoike ia ana ma na mea e ilihia ana i kela a me keia mea, i hanau mai a make aku, aole mamuli o kona ake e make, aka, ma ka haule ole o kana olelo, kana kauoha, aia no i ke kanaka kona ola loihi a me kona make pahupu. Ke ai nei ka make, a ke loli nei kulana, o ke kanaka, aka, he oia mau ke Akua i na wa a pau. Ua pa ka waha i ka hua a ka naau i manao ai, aka, aole i mikomiko iho i ai ana ua haalele mai la ke ola. Pela iho la kakou. He mauu, a he pua mauu ke kanaka e ulu ae a e mae iho. Pomaikai ka poe i make iloko o ka haawina e mohala hou ae ai, lakou e like me ka Haku a noho pu aku mne ia i ke au mau loa.
----------------------------
Ua paa ae ko Keliipio hale i keia wa, aia ma ke kihi makai o ka Makeke hou. I kukulu ia i kokoke iaia ke makaala mai i kana hana oia hoi ke kia ana i na ia ino o ka makeke, e kuai ia ai i ka lehulehu. Pau ka noho ana iloko o ka hale pea.
Ua haalele o Kauka J.S. McGrew a me S.V. Gear i ka Komite La 4 o Iulai, no ka hoohui ia o ka la kulaia Hawaii me ka la Amerika.
--------------
KE KUHINA WAIWAI.
-----------
Mahope o ka ukali ana a ke Kuhina D@@@ i kona ohana a hala no ka hikina o Amerika, ua huli hou mai la oia no kona home mokupuni a e komo hou iloko o kana mau oihana a e mokomoko me na ninau o ka la. He maikai hoi ke ola kino o ke Kuhina, a ua hehi hou iho kona mau kapuai wawae i ke one o na kupuna alii ona o Kakuikewa, me na minoaka waipahee ma kona helehelena Ina paha he mea hiki i na kupuna alii ona ke ike ia ia me keia mau hiona olu, ua puana koke ae lakou i ka olelo mahalo no ka lakou pua, ua iuka aku nei hoi oia i kona hoahele imi dala hoaie lahui. Aka, he mea maikai ole hoi ka hapai nui ana ae i ke Kuhina o kuhihewa la mai anei e ake ana makou e liko i misionari no ka apana o Moanalua. Aka aole nae me ia.
Ua lohe iki mai hoi makou o ke kumu o keia mahiehie o ke Kuhina mamuli no ia o kona hookipa ohohie ia ana mai e ka poe waiwai o Kaleponi ia ia aku nei malaila, no kona lawe ana mai i ke kanawai e wehe ana i ke dute maluna o ka uwaina.
----------------------------
KELA A ME KEIA.
----------
I keia auina la 23, e ka mai ai ke Kinau mai hawaii mai, a malia o lohe hou ia mai na hana a ke kai hoee.
Me he la, o ke Kope Hawaii ka mea makemake nui ia, e ko na aina e, a he hoike ana mai no hoi ia i ka hoopapau nui o ko hawaii poe i ka mahi ma ia hua dala.
Mai poina i ka Hale Kuai o L.B.Kerr. He oia mau na mea emi a makamaka hou hoi o na mea kuai ma kona halekuai.
No ka poe pena a pia i ka helehelena e loa ano ka pia aala Roma ma kahi o Hobron ma.
------------------------------------
Kastola
HE LAAU HOONOHA KUPONO MAOLI.
---------
Aole ke Kastola he mea okoa, aka o ka aila hoonoha no, me kona maikai ole i lawe ia ae. ua hiki keia ma ka makou hana hou ana a me ka hoomomona ana. Ua like hoi me ka ai ana o ka waimeli. Ua like no ka hopena me ko ka aila hoonoha.
Ua ike hoi na Kauka i ke ano nui o ka aila hoonoha, ma kona ano he laau hoonoha maikai. Hookahi wale no ona kumu i kuihe ia ai, oia ke okaikai mai, a oia wahi ano ka makou i hoopau ae, a ma o ke Kastola hoi ke waiho aku nei makou i kekahi laau hoonoha i hiki ole ke ike ia iho kekahi ano.
NA KUHIKUHI.
No na Keiki--- 1 a ka 6 mahina 1-4 a 1-2 punaki
" " " 6 a ka 8 " 1-2 1 "
" " " 1 a ka 5 mak. 1 a 2 "
" " " 5 a ka 15 " 1 a 3 "
No ka poe oo, hookahi puna nui.
No ka hoonoha oluolu keia mau ana.
Kuaiia ma na wahi kuai a pau.
Hoomakaukauia e
Ka Hui Kuai Laau o Hobrona Ma.
Alanui Moi, Honolulu.
-----------------------------------------
NO NA AINA KAHIKO
---------
NA KULANAKAUHALE NALOWALE A I LOAA HOU AKU.
----------
MAHALE II.
---OO---
MOKUNA IV.
-------
NA AINA MA KA BAIBALA.
E hoike pau ana hoi a e hooia maopop me ka ninau hou ole ana aku, aia keia wahi kanu kupapau mawaho o ke kulanakauhale i ka wa o ka moria ia ana o ka Haku, oiai aole he ae ia na Iudaio e kanu iloko o ke kulanakauhale, a he mea maopopo mamua aku keia mau lua kupapau o ko ka Haku make ana aia eia hou hoi kekahi me he la mai ke kukulu ia ana o ka pa e Agarippa, A.D. 45, a hiki wale mai ke kukulu ia ana o na hale o ka Luakini o ka Hoola ana e ku nei, a no kekahi kumu hoi ua kiai makaala loa ia, ina aole hoi i kanuia a paa e ka lepo, i hiki ai keia mau lua ke mau no ekolu keneturia iloko o ka pa o ke kulanakauhale o keia manawa.
Ua hoike hou mai na imi ana aole loa hoi e hiki ke hoopuni ia kahi o ka Luakupapau Hemolele me ka holokea ole ana ma na aoao kamoe o ka mauna Akra; a ina hoi ua holo aku ka pa ma keia kuamoo, e like me ka Kauka Robinson e olelo nei, he mea maopopo loa, e loaa ana na meheu o keia pa ma na pohaku i kalai ku pololei ia, a e loaa aku ana hoi he lua ma ka aoao mawaho iho, e like me ia ma na wahi a pau o ka pa kahiko, ina aole alaila ua hiki i ka pu ma ka komohana ke hooweli mai ma ia huli; aka aole loa hoi he mea kekahi e hoike ana he pa kekahi ikukulu ia ma keia moe ana. me he la ka ipuka o Gennath, kahi o ka lua o pa i hoomaka ai, aia mawaena na o ke Towera o Hippieus a me ka pa ponoi o ka Luakini, e like me ka mea e ike ia ana ma ka makou mau hoonohonoho ana i ke kulana o Ierusalema. Aole hoi he hoike na ka moi Hezekia ka lokowai e ku la i kaulana ma kona inoa. me he la ka pololei aku na Herode ka Nui i kukulu a aole hoi he wahi lihi kuleana iki i ka hoopololei ana i kahi o ke kahua o ka Luakini, ka mea i moakaka pono loa e like me ka hiki ke hoomaopopoia kekahi mea koe aku ke ike maka. He mea hookiekie paha ka hoonoho ana i kahi ponoi i ku ai ke Kea; aka o ke kanalua ana i kahi o ka luakupapu he like loa ia me ka hoike wahahee ana i na mea pili moolelo, a hoolilo hoi he mea hoohenehene ia na manao a hana haipule a na miliona i kukuli, i pule, a i uwe ma keia wahi hoomanao laahia. ua oi aku mamua umikumamawalu mau keneturia i hala aku i hele aku ai ka poe makaikai mai na aina e e ike i keia luakupapau.