Ka Oiaio, Volume VIII, Number 16, 19 June 1896 Edition 03 — NUI KA INO. [ARTICLE]

NUI KA INO.

Ma ka huakai aku nei a ke kuna "Ada" i Hawaii, ua loohia ia lakou me ka pilikia, i ka nui o ka ino o ka moana, a ua nele hoi lakou i ka waiinu ole. Ua holo ia 9 la mai Honolulu aku nei, a ku aku la ma Hakalau i ka la 11 o keia mahina, a hoouna koke ia aku la kekahi waapa me eha sela e holo iuka i wai no lakou, a oiai no hoi ka ino e pa ana, ua hulihia iho la ka waapa, a nalowale aku la hookahi sela, he haole farani, a o kekahi poe iho ekolu [ ] au aku la lakou no ka aina, a pae aku la me ke ano paupauaho, a no ka hiki ole ia lakou ke hoi hou i ka moku, nolaila, na telepopona ia aku la i Hilo i kokua. Ua hoouna ia mai ka mokuahi Hawaii e imi aole nae he loaa no ka nui o ka pouli a pii i ka ohu, a ua hoi hou aku oia. Ua loaa mai ia Kinau a ua kokua ia hoi e Moeheau, ka poe pilikia, oiai ua aneane e pilikia i ka make wai. Ua kolo ia aku e Kinau a Laupahoehoe, a loaa aku hoi o Kilauea Hou, a nana i kolo loa aku no Hilo. O na sela ekolu i Hakalau ua hele wawae aku lakou no Hilo, a loaa aku ka moku ilaila.