Ka Oiaio, Volume I, Number 121, 17 June 1896 — Page 2
| This text was transcribed by: | Kaui Sai-dudoit |
| This work is dedicated to: | No ku'u mo'o a lua: Pualani Kauikeaokupaianaha Estocado |
Ka Oiaio Puka La
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E. BUSH, Luna Hooponopono a me Puuku
HONOLULU, : : : : : iune 15, 1896.
-----------------------
LIKE OLE NA MANAO.
--------
O ka eiwa poe i koho ma ka hooholo ana i ka bila e hoopau ana i ke dute maluna o ka uwaina i vito ia e ka Peresidena, he ewalu ma ka aoao e hooholo loa ana i ka bila maluna o ka vito, hookahi ma ke kakoo i ka vito, oia o Peresidena Naone o ka Hale Makaainana. Ma na hoike manao ana ua ulu ae he mau olelo mahananahana mawaena o Hon. J. Hanuna a me Hon. D.L. Naone, i hele ano pilikino aku.
---------------------
HE MEA HUNA.
---------
ma ka D.L. Naone kamailio ana ua olelo ae oia ma ka aoao e kakoo ana i ke kumu o ka vito ana i ka bila hoopau dute uwaena, ua hopohopo o Peresidena Dole, no ka hoomau ia o ke dute maluna o ka sake, e hoohalahala mai ana ke aupuni Iapana no kona poe kanaka ma Hawaii nei, oiai he hana kaulike ole ia hana a he kue hoi i na olelo ma na kuikahi.
--------------------
KELA A ME KEIA.
--------
I kela mau la aku nei ua hina pu iho la kekahi hoki e huki ana i ke kaa hapaumi, a ua eha loa ia. ua ku kapakahi ke kaa no kekahi manawa, a hiki hoi i ka loaa hou an amai o kekahi mau hoki hou.
No ka nui o ka poe i ike ole, a me ka nui makemake o ka poe i ike mua i na hana keaha a na keiki o Saba Lui, nolaila, ua hooholoia e haawi hou ana lakou mau hoikeike hou i keia mau la aku.
He manawa ku wale mai no keia no ka mokuahi Peru; mai Kapalakiko mai.
E holo aku ana ka moku Hakapila no ka aina lepo "nanu, no ka lawe hou ana mai i piha lepo manu i Hawaii nei."
He nui ka poe i haohao i ka nalowale honua o ko lakou poe kaa hehihehi wawae, a ua hiki aku hoi i ka elima i nalowale, ai aihue ia paha. Ua manao wale ia na ka poe sela o na moku kalepa keia mau hana.
Aole he rumi kaawale o ke Kinau ma keia huakai aku nei ana, oiai hoi na hoa Senate, na kahunapule, a me na malihini makaikai luaopule, i kau aku la no ko lakou mau home.
I keia kakahiaka, la 16 i ku mai ai ka mokuahi Peru mai Kapalakiko, a holo loa aku no Kina i ka la apopo, la 17.
Ke haohao nei ka poe e noho kokoke aku ana i ka paalii, i ka lohe ole ia o ke kani o ka bele hai manawa a na koa. I kela mau la aku nei, ua owa ae ka bele, a ua pau ke kani maikai ana, a nolaila, ua hele huli aku o Conela McLean, i bele hou, aole nae he loaa iki. E hoouna ia ana paha i Geremania a i ole i Pelekane, i pani no keia Bele.
Ua haawi ia aka la ia J.F. de Bolt ka mana lawelawe kanawai, ma na aha a pau o keia aupuni. He malihini oia mai Wasinetona mai.
Ua papa aku ke aupuni Tureke i ke oki wale ia o na laau; e kokoke la i Ierusalema.
Ua hoopai ia o Kawai, he ekolu mahina ma ka hana oolea, no ka aihue ana i ke pine omou o kona makuahine ponoi. O ke kanawai ka mea nana ao mai, o na keiki hana lapuwale o keia ano.
E haawi hou aku ana na keiki o Kamehameha i Aha Mele hou, ma ka la 20 o keia mahina.
I ka la 9 o Iulai e hoike ai ke kula nui o Iolani, a e komo hou ana no hoi i ka la 7 o Sept.
He 213 limahana Iapana, i hoi aku no ko lakou one hanau, maluna o Toyo--Maru, i ka Poalua nei, la 16.
Ua hana ino iho kekahi mau kanak ai kekahi Pake ma Kapalama ae nei, i ka po Poakahi nei ma o ko huki hele ana iaia ma kona lauoho. Ua lawe ia ae laua i ka halewai, e ka makai Pake.
Ua hala aku o Joseph Marsden, Komisina Oihana Mahiai e kaapuni makaikai ia Hawaii, ma ka pekipeki wawae. He kino nui kona, a he hana nui keia.
Ua hala aku o Samuel Parker, F.A. Schaefer a me Kapena Ross ma ke Kinau i ka Poalua nei no Waimea Hawaii.
Ua hookohoia o W.H. Conuwela a me D. Makapolena he mau luna hooko kauoha no ka waiwai o Mrs. Conuwela i make, malalo o ka bona o $58,000.
No ka poe pena a pia i ka helehelena e loa ano ka pia aala 'Roma ma kahi o Hobron ma.
---------------------
Kastola
HE LAAU HOONOHA KUPONO MAOLI.
---------
Aole ke Kastola he mea okoa, aka o ka aila hoonoha no, me kona maikai ole i lawe ia ae. ua hiki keia ma ka makou hana hou ana a me ka hoomomona ana. Ua like hoi me ka ai ana o ka waimeli. Ua like no ka hopena me ko ka aila hoonoha.
Ua ike hoi na Kauka i ke ano nui o ka aila hoonoha, ma kona ano he laau hoonoha maikai. Hookahi wale no ona kumu i kuihe ia ai, oia ke okaikai mai, a oia wahi ano ka makou i hoopau ae, a ma o ke Kastola hoi ke waiho aku nei makou i kekahi laau hoonoha i hiki ole ke ike ia iho kekahi ano.
NA KUHIKUHI.
No na Keiki--- 1 a ka 6 mahina 1-4 a 1-2 punaki
" " " 6 a ka 8 " 1-2 1 "
" " " 1 a ka 5 mak. 1 a 2 "
" " " 5 a ka 15 " 1 a 3 "
No ka poe oo, hookahi puna nui.
No ka hoonoha oluolu keia mau ana.
Kuaiia ma na wahi kuai a pau.
Hoomakaukauia e
Ka Hui Kuai Laau o Hobrona Ma.
Alanui Moi, Honolulu.
-----------------------------------------
NO NA AINA KAHIKO.
----------
NA KULANAKAUHALE NALOWALE A I LOAA HOU AKU.
------------
MAHELE II.
---OO---
MOKUNA IV.
---------
NA AINA MA KA BAIBALA.
Ua hao ia hoi na waiwai a pau o ka Luakini, a wawahiia hoi kekahi hapa e ka poe Peresia, A.D. 614, aka ua kukulu koke hou ia iho no mahope maluna o kona kahua kahiko no. Ua luku hou ia no e ka poe Mahometa i ka A.D. 1010, a ua kukulu hou ia no hoi mahope mai, a eia ke ku nei a keia la e like me ia i kukulu ia ai. ua a ia e ke ahi i ka 1808 aole nae i loli ae kona mau ano nui.
O ka Luakini i keia la, oia no na halepule i hoohuihui ia he ekolu haneri a me kanalima kapuai ka loihi ma elua haneri a me kanawalu kapuai ka laula, malalo o hookahi kaupoku. O ka lua, he ilina luakupapau no ia o ke ano kahiko o na Iudaio i waena konu o ka luakini, i uhipaa ia maloko a mawaho me ka mabala mai ka eha a ka elima iniha manoanoa, a i kahikohiko nani e i ae hoi; aia iho nae malalo o keia mabala kekahi lua kahiko maoli, aneane eono a me hapa kapuai kuea, i oki ia iloko o ka pohaku-puna kumu. Oia hoi ma ka aoao akau kekahi hikiee no ka hoomoe ana i ke kupapau, he ekolu kapuai akea, a he hookahi kapuai a me ka hapa ke kiekie mai ka papa hele ae, i ihiia me kekahi apana mabala. he ekolu wale no kapuai ke kiekie o ka ipuka komo, a aia me ke kulou e nana aku ai ia loko o ke lua ana, i hiki ai ke ike aku i ke kino o ka mea make, e like loa hoi me ka moolelo ma ka baibala; a aole loa hoi he kumu kanalua o keia maoli no ka lua ana i waiho ai ke kino o ka Haku Iesu Karisto.
Ua kamailio hoi o Cyril, he kanaka no Palesetine, a he Bihopa no Ierusalena i ka A.D. 350, e pili ana no na pohaku a me ka lua-kupapau ua like loa no me ia e ike ia nei i keia wa. Pela no hoi ka hoike a ua Makua a pau o ka Ekalesia, a aole hoi a hiki wale i ke keneturia umikumamawalu i lohe ia aku ai ka olelo kanalua e pili ana i kahi e kamailio ia nei. A no kekahi e kanalua ai i ka pololei o keia wahi? he ana akahele loa ia ka aina o ua Roma, a ua hoopaa ia ke ana o kela a me keia palena o na wahi i ana ia.