Ka Oiaio, Volume I, Number 119, 15 Iune 1896 — Page 2
| This text was transcribed by: | Kaui Sai-dudoit |
| This work is dedicated to: | No ku'u mo'o i mua: Pua'ena Kauikeaomalie Estocado |
Ka Oiaio Puka La
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E. BUSH, Luna Hooponopono a me Puuku
HONOLULU, : : : : : iune 15, 1896.
-------------------------
HOOPAU IA.
-------
Ua lawe mai o Kuhina Cooper i kekahi bila kanawai e hoopau ana i ke kanawai kakau inoa i hooholoia i na la mua o ke kau. Ua hana ia keia mamuli o ka nui kue ia o ka hoailona lima a me na ano e ae a ke kanawai ma o na iho a ma o ka mana i haawiia i ke Kuhina Kalaiaina. Ua nui ka hoohalahalaia o keia kanawai e na kanaka o kela ame keia papa o ka noho ana. Ma keia mau ano hana, ua hoomanao ae la hoi makou i na olelo ma Hoikeana, e i ana, e "sila" ia ko ke Akua, a e "hoailona ia" hoi ko Satana; a ua waihoia hoi a i keia mau la, na ke aupuni Hawaii e hoailona kuni ia ko ke Akua a me ko Satana ma ka manalima nui, me ka hoopunahele ole i kekahi, ma kona ano hoopono a kaulike.
------------------------
KANI-KA-WI.
-------
Ma ka olelo o ka wa kahiko, o kani-ka-wi, ka puana o ke ano o ke au make a wi o ka noho ana o kanaka o ka aina. Ua pili keia olelo a hiki i keia manawa i ka lahui Hawaii. Ano ke lohe ia nei ka leo ka kanikawi iloko o ka aina. Ua wi a ua hune hoi ka noho ana o na kanaka Hawaii i keia wa. Ua hiki ka olelo kani, kaniuhu a kanileo, no ka mea i hala a no ka mea i hiki mai. Ke ana ia na au elua o ka noho ana, ua pololei ka leo o ka Hawaii e i ana, ua oi aku ka lakou, ka oluolu, a me ka pomaikai o ke au o na kupuna, mamua o ke au i hookumuia e na haole no lakou iho, ma ke aho o keia noho ana, a anelike no palia ma ke ano o ka noho ana hoopono. Ma na kuaaina a ma ke taona nei, ke ike ia nei, a ke lohe ia nei ka leo o Kanikawi; a i ka wa hea la ia leo e oki ai? I ka hale hope loa paha o ke kanaka, kahi e waiho like ai kela a me keia me ka helu ole ia o ke kulana ma ka nui waiwai.
--------------------
KELA A ME KEIA.
--------
Ua loaa aku kekahi Iapana mauka ae nei o Kapalama, e waiho ana iloko o kekahi kie koko, me na moku pahi he nui ma kona kino. Ua manaoia nana no i lawe i kona ola, oiai ua hoao no oia mamua a hiki ole a keia hana ana ko. Ua hiki aku oia i ka la mamua iho imua o ke Kanikela Iapana no kona manao e holo no Iapana, a ua loaa no hoi kona palapala ae holo, a make e iho la nae.
Nui ka poe i akoakoa ae ma ka halawai me ka la nui Liliha, i ka po lapule nei, la 14.
Eia hou o Hon. H.P. Balauwini i @@@ nei, mai Maui mai, ma ke Keauhou o ka P@@@ nei, la 13.
Ua hopu ia e Kapena Evans ke kuke mahuka o ka moku Comodoa, a ua hoihoi hou ia aku no ka moku.
Mawaena ona ohua i ku mai ma ke Calaudine o ka lapule nei oia o L.A. Kakina, a me kekahi poe e iho.
Mamua o ka holo ana o ka moku Thomas i ka Poaono nei, ua hoihoi ia aku la na sela mahuka i paa ia iho nei ma ka halewai.
Ma ka la 17 o keia mahine, e piha ai ka 25 makahiki o ke kula kaikamahine o Maunaolu.
Ua pani ia ae ke kula o haiku, Maui, no ka nui o ka mai ulalii a me ke kunu kalea mawaena o na haumana.
------------------------------------
NO NA AINA KAHIKO.
----------
NA KULANAKAUHALE NALOWALE A I
LOAA HOU AKU.
---------
MAHELE III.
---OO---
MOKUNA V.
-------------------
Mauna Kalivari,--Ka Lua o Karisto--Na olelo e pili ana--Ka Luakini o ka Ilina Hemolele--ka Basilica a Constantine---Ka Luakupapau
o Adamu---Na mea i loaa hou aku.
----------
NA AINA MA KA BAIBALA.
-------
Uula minamina ia keia mau hana hoomaemaewa ma keia wahi laahia, aka, aole nae keia i pili i ka hooiaio ana i keia mau wahi elua e oleloia nei. Mahope iho o ka noho ana he mau makahiki lehulehu a imi nowelo ana i ke ano o ka aina a me na mea hoi i loaa mahope iho nei, ua aneane loa makou e manaoio a hiki ke olelo ae o keia maoli no ke Golgotha kahi i molia ia ai o Karisto, a o ke ana pohaku kahi ona i waiho ai a ala hou mai i ke kola o ka la.
Oiai he lehulehu na manao i laweia mai e kekahi poe i kakau maluna o keia ninau, ua hiki wale no ia makou ke lawe mai i na manao o Mr. Williams, De Vogue, a me kekahi poe e iho, e kakoo i ka pololei o keia mau wahi maoli io no kahi o ka haku i kaumaha ai a i molia ia ai. Aole he kumu e kanalua ia ai ka maopopo o kahi i make a i waiho ai ke kino o ka haku i na apokolo; a he nui aku no hoi o ka poe i komo pu mai me ia iloko o Ierusalema, i kona la i hele mai ai me ka lanakila maluna o ka holoholona ekake, a i ike hoi i ka pouli ana o ka lani i kona kau ia ana hoi ma ke kea, ua maopopo ua ike pololei lakou i kahi i kapaia o Gologothia. Iloko o kekahi mau pule pokole mahope iho o ka molia ia ana o ka Haku, a me na mea kamahao e ae i hana ia ia wa, mahope iho o ka noho ana o ka Uhane Hemolele, ma ka la Pineketoka, he ekolu tausani ka nui o na karistiano ma Ierusalema ia wa. he poe e ae kekahi e komno mau ana ia mau la, a ua kukulu koke ia hoi ka Ekalesia ia manawa, a o iakoba hoi, he mau makahiki pojkole mahope iho kai kohoia i oia ka Bihopa mua; a mai ia manawa mai a hiki i ka paa ana o ka Luakini o Ka Ola Hou0ana" a Constantine, A.D. 335, aole loa he manawa ha'o o ka noho ana o na Karistiano a me ke ku ana o ka ekalesia ma Ierusalema, me kona mau kahuna, na hoahanau, a me na hana a pau e pili ana i ka hoomana ana. A he mea hiki anei i kekahi mea ke manaowale iho aia hoi iloko o keia manawa, ka wa a ka ekalesia o ke kea e hele lanakila ana ma ka honua nei, a he mau tausani hoi o na aina e mai e hele ana i keia kulanakauhale Hemolele, e poina ia ana hoi keia mau wahi kaulana loa o ia au, kahi i kau ia ai ke Keiki a ke Akua ma ke Kea, a me ka Lua-ana o Iosepa o Arimatea, i waihoia ai hoi kona kino? He mea oiaio, iloko o ka wa a Tito e hoopuni ana i ke kulanakauhale he nui no na Karistiano i holo aku no kela kaulanakauhale uuku i kapaia o Pella, ma kekahi aoao aku o ka muliwai Ioredana, a ua pee aku hoi kekahi iloko o na ana a me na lua-ilina ma Kederona; aka he nbui no nae ka poe elemakule a me ka poe onawaliwali i koe iho iloko o ke kulanakauhale.
------------------------------
L.B. KERR
He 30 i-a kalakoa no $1.
Papale ie Laiki 25 keneta pakahi.
12 ia Lole Huluhulu Palupalu no $1.
Na Lipine 18 ia no 25 keneta.
Na Lole Makalena Keokeo kikokiko a me pohaka, 15 ia no $1.
E hele a e makaala mai, a e lawe ae i na kuai holopono ana.
L.B. Kerr.
ALANUI MOIWAHINE.