Ka Oiaio, Volume I, Number 113, 5 Iune 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.   HONOLULU, IUNE 5, 1896   HELU 113

 

OIAIO PUKA LA

 

HAAWINA HELUHELU BAIBALA

NA ANELA KIAI

1. He ohana lani no anei kekahi?  Espeso 3:14, 15

            “No keia mea, ke kukuli nei no wau imua o ka Makua o ko kakou Haku o Iesu Karisto.  Nona hoi i kapaia mai ka inoa o ka ohana a pau ma ka lani, a ma ka honua.”

2. Ma ka inoa hea i ikea ai keia ohana?  Iob 1:6

            “A i kekahi la, i ka manawa i hele ai na keiki a ke Akua e hoike aku ia lakou iho imua o Iehova, i hele mai ai o Satana imua o lakou.”

3. Ma ka inoa hea kakou e ike nei i keia poe lani?  Hoik 5:11.  (na laina mua elua)

4. He anela no anei kekahi mamua aku o ka make ana o ka lahuikanaka?  Kin. 3:24 (hapa mua)

(e nana ia Heb. 2:6, 7, * * * 10)

5. Malaila no anei lakou i ka wa o ka honua i hana ia ai?  Iob. 38:6,7

            “Maluna o ke aha i hoonoho ia ai kona mau kumu?  Na wai la i hoonoho kona pohaku kihi.  I ka wa i mele pu ai na hoku ao, i hooho olioli ae ai hoi na keiki a pau a ke Akua?”

6. Heaha ka mea i oleloia no ka heluna o na anela?  Hoik 5:11 (Heb. 12:22)

            “Na na aku la au, a lohe iho la i ka leo o na aue la he nui loa, a me na mea ola, a me na lunakahiko e anaina ana me ka nohoalii; a o ka helu ana ia lakou he haneri miliona a me na tausani tausani.”

8. He poe kino maole no anei na anela, a he ai no anei lakou?  Kin. 19:3 (a e heluhelu hoi i ka pauku 1, me 2, me Hal. 78:24, 25)

            “Koi ikaika aku la ia ia laua; a kipa a e la laua i ona la, a komo aku la iloko o kona hale; a hana iho no i ahaaina na laua, pulehu iho la i ka palaoa huole, a ai iho la kaua.”

8. Heaha la ka na anela hana?  Luk. 1:19. (hapa mua) (Ha 103:20,21)

            “Olelo mai la ka anela, i mai la iaia.  Owau no o Gaberiela, ka mea e ku ana imua o ke Akua.”

            He mau kauwa lawelawe lakou imua o ke Akua e hana ana e like me kona makemake.

9. Ia wai lakou e lawelawe aku ai?  Heb. 1:14.

            “Aole anei lakou a pau he poe uhane lawelawe i hoouna ia, e kokua i ka poe e lilo ana i poe hooilina no ke ola.”

10. Pehea lakou e lawelawe ai no ko ke Akua poe kanaka?  Hal. 34:7.

            “Hoomoana mai ka anela o Iehova e puni ka poe weliweli iaia, a ua hoopakele hoi ia lakou.”

11. E hoike i kekahi alakai o ka lakou mau hana?  Dan. 6:22 (hapamua) 2 Kor. 6:8 – 17; Dan 9:21; 10:12; Oih 12:5 – 11)

            “Ua hoouna mai ko’u Akua i kona anela e hoopaa mai i ka waha o na liona, i ole e hoeha mai lakou ia’u; no ka mea imua ona aole hala iloko o’u, aole no hoi au i hana inoa aku ia oe, e ke alii.”

12. Nawai i haawi ka ikaika ia Elikai ma kana huakai loihi?  1 Nalii 19:7, 8.

            “Hele hou mai la ka anela o Iehoba, o ka lua ia, a hoopa mai ia ia, i mai la, E ala, e ai, no ka mea he loihi ka hele ana nou.  Ala ae la ia a ai iho la, a inu no hoi, a ma ka ikaika no ua ai la, i hele ai oia i na la he kanaha, a i na po he kanaha, i Horeba, ka mauna o ke Akua.”

13. He manao nui no anei na anela i ka huli mai o kanaka mai ka hewa?  Luk. 15:10

            “Pela hoi, ke olelo aku nei au ia oukou, He olioli no imua o ke alo o ko ke Akua poe anela i ke kanaka hewa hookahi e mihi ana.”

14. Owai ke hele mai ana me Karisto aia e hoakoakoa ai i kona poe haipule, i ka la hookolokolo?  Mat. 16:27

            “E hele mai no ke Keiki a ke kanaka iloko o ka nani o kona Makua me kona poe anela; alaila e uku aku ia i kela kanaka keia kanaka e like me kana hana ana.”

15. Ma ka aoao hea hoi lakou e lawelawe ai ia manawa?  Mat. 24:31

            “A e hoouna aku ia i kana poe anela me ka pukani nui, a e hoakoakoa mai lakou i kona poe i waeia, mai na makani eha, a mai kela aoao o ka lani a mai keia aoao hoi.”

 

NA ANELA KIAI.

            Ua hoike maopopo loa mai ka palapala hemolele i ka pili ana o ka nohoana o ke ao i ike ia me ko ke ao i ike ole ia, ka hana a na anela kiai o ke Akua, a me na limahana o na uhane hewa.  Eia ke ulu nei na manao e hoole ana i keia mea he uhane ino, oiai hoi na anela hemolele “ka poe uhane lawelawe” i hoounaia e kokua i ka poe e lilo ana he poe hooilima o keola,” (Heb 1:14) ua hoomaopopoia e kekahi poe he poe uhane o na mea make.

            Aole wale hoi ka palapala hemolele i ao mai ua ike ia no na anela, maikai a me maikai ole, aka ua hoike pu ia mai me na hoiaio aole hoi lakou he poe uhane o ka poe make.  Mamua o ko ke kanaka hana ia ana na hana mua ia aku hoi ka anela, no ka mea, i ka manawa o na kumu o ka honua i hoomoe ia ai, ua “mele pu hoi na hoku ao, i hooho olioli ae hoi na keika a pau a ke Akua.” (Ioba 38:7)  Mahope o ko ke kanaka haule ana i ka hewa, ua hoouna ia na anela e kiai i ke kumu laau o ke ola, a mamua iho keia o ka make ana o kekahi kanaka.  Ua oi aku hoi oia mamua o ko ke kanaka ano.  Ua olelo o Davida, ua hana ia oia “malalo iho o na anela.”  Pela no i oleloia ai ma Heb. 2:6, 7, 16.
            Ma ko lakou ano elele na ke Akua e hele ana hoi lakou “me ha anapu ana la o ka uwila i ka nana aku.”  Eze 1:14.  Ua like ka helehelena o ka anela ma ke ana lua o ka Haku “me ka uwila, a ua huali kona kapa e like me ka hau; haalulu iho l aka poe kiai i ka makau ia ia, a ua like lakau me na kanaka make.”  Mat. 28:3, 4.  I ka manawa o Senakeriba, kelii o Asuria, i hoohiki ino ai i ke Akua, a hooweliweli ai i ka poe Iseraela e luku aku ua lukuia aku hoi kona puali kaua e ka anela o ke Akua iloko o hookahi po.  2 Nal. 19:35.

            Ua hoopohoia he anela kiai no kela me keia mea i hahai mahope o Karisto.  Na keia poe kiai mai ka lani mai e pele aku i ka poe pono mai ka mana o ka mea hewa.  Ua ike hoi o Satana i keia ia ia i olelo ae ai, “He makau kumu ole la anei ko Ioba i ke Akua?  Aole anei oe i hoopuni ia ia, a me kona hale, a me kona mea a pau i ka pa ma na aoao a pau?”  Ioba 1:9, 10.  O ka mana nana i malama ka ke Akua poe kanaka oia kai hoike ia mai e Davida, e i ana, “hoomoana mai na anela o Iehova a puni ka poe weliweli ia ia, a na hoopakele hoi ia lakou.”  Hal. 34:7.  Ua olelo o Karisto i ka poe manaoio, “no ka mea, ke olelo aku nei au ia oukou, e nana mau ana ko lakou poe anela i ka lani i ka helehelena o ko’u Makua i ka lani.”  Mat. 18:10.  Ua hiki i na anela kiai o na keika a ke Akua ke kele aku imua ona i na manawa a pau.  Pela iho la ko ke Akua poe kanaka, i hamama i ka mana hoowalewale o ke alii o ka pouli, a e hookui ana me na ikaika o ka hewa i hooia mua ia mai i na kiai mau a na anela a ka lani.

 

NA AUMAKUA

            O na anela kiai i ka lahui Hawaii o ke au kahiko oia no na aumakua, ka uhane o kekahi o ko lakou ohana i make.  Eia no ke mau nei keia manao kuhihewa i na lahui i kanaka a pau o ke ao.  O na hana alakai hewa keia a satana a me kona mau anela.  O keia hoi kekahi o kona mau hana hoopoluo i ke kanaka i na la hope, i kumu e alakai hewa ia ai ko ke ao iloko o na hana hoopunipuni e make mau loa ai.