Ka Oiaio, Volume I, Number 112, 4 June 1896 — Page 1
| This text was transcribed by: | Chantrelle Waialae |
| This work is dedicated to: | Wai'alae 'Ohana |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
OIAIO PUKA LA
KA HAAWINA HELUHELU BAIBALA.
KAPAKIKO MA KA EUANELIO.
1. Me na haawina hea la o ka Baibala i helu pu ia ai ka pakiko? Gal 5:22, 23. "Aka o ka hua na ka Uhane oia ke aloha, ka olioli, ke kuikahi, ka lokomaikai, ka maikai ka manaoio, ke akahai, ka pakiko; aohe kanawai papa mai ia mau mea."
2 Heaha ka ka Baibala olelo no ka mea i lanakila ma ka hooikaika ana me kekahi poe e aku? 1 Kor 9:25 hapa mua, "O ka poe a pau i hooikaika no ka uku ua pakiko no lakou ma na mea a pau."
3 Ma ka hooikaika e lilo i Karistiano heaha ka mea e lanakila ai? Pauku 27. "Ke uumi nei au i kuu kino a lanakila maluna iho o lilo paha wau i ke apono ole ia, mahope o kuu ao ana aku ia hai."
4 Heaha la na hopena maikai ole o ka ailaukua? Na Sol 23:29, 30. "Ia wai la ka uwe ana? Ia wai la ka poino? Ia wai la ka hakaka? Ia wai la ka nuku wale ana? Ia wai la na palapu loaa wale? Ia wai la na maka ulaula? I ka poe e hoomau ana ma ka uwaina, i ka poe e hele ana e imi i ka uwaina, i ka poe e hele ana e imi i ka uwaina i kawiliia,"
5 No keaha la i papa ia ai na lii aole e inu i na wai ikaika? Na Sol 31:4,5. "Aole na na'ili, e Lemuela e, aole na na'lii e inu i ka uwaina aole hoi na ka poe aialo e inu i ka mea ikaika; o inu lakou a hoopoina i ke kanawai, a kapae i ka pono o ka poe pilikia."
6 No keaha la ko ke Akua poe kahuna i papa ia ai aole e inu i ka wai ikaika? Oih 10:9, 10. "Mai inu i ka uwaina a me ka mea ona o oe a me kau mau keiki me oe, i ka wa e hele aku ai oukou iloko o ka halelewa o ke anaina, o make oukou. *** I hiki hoi ia oukou ke hookaawale iwaena o ka haumia a me ka maemae."
8 No keaha o Daniela i hoole ai i ka inu uwaina? Dan 1:8 hapa mua. "Ua paa ko Daniela manao aole e hoohaumia ia ia iho ma ka ai a ke alii, a me ka uwaina ana i inu ai."
8 Heaha kana i noi aku ai ma kahi o keia mau mea elua? Pauku 12. "E hoao mai i kau mau kauwa i na la he umi, a e haawi mai oe na makou i na laauikiai e ai, a i ka wai e inu."
9 Heaha la ka hopena o na hoao o umi la? Pauku 15. "A i ka hope o ua mau la la he umi ua ikeia ko lakou mau maka ua maikai, ua momona ka io mamua o ko na kamalii a pau i ai i ka ai a ke alii."
10. Heaha hoi ka hope o ko lakou nohona ai pakiko mahope o na makahiki hoao ekolu? Pauku 20. "Ma na mea naauao a pau loa a me na mea e akamai ai a ke alii i imi ai ia lakou, ua maopopo ia ua oi pa-umi aku ko lakou naauao manao o na magoi a pau a me na kilo ma kona aupuni a pau." E heluhelu i ka Pauku 16-19.
11 Me na hana hewa hea e ae la i heluia ai ka uhaai? Gal 5:19-21. "A ua akaka ae la na hana o ke kino: 'Oia ka moekolohe, ka hookamakama, ka hoohaumia, ka makaleho, ka hoomanakii, ka hoopiopio, ka inaina, ka hakaka, ka ukiuki, ka huhu, ka hoopaapaa, ka mokuahana ka manao kue, ka huahua, ka pepehikanaka, ka ona ana, ka uhauha ana, a me na mea like; na mea au e hai e aku nei ia oukou me au i hai e aku ai ia oukou mamua, o ka poe e hana i ua mau mea la aole e hooiliia no lakou ke aupuni."
12 He hiki no anei i ke kanaka ona ke komo i ka lani ke ole oia e hooki? 1 Kor 6:10. "Aole ka poe aihue, aole ka poe makee, aole ka poe ona, aole ka poe akiaki, aole ka poe alunu, aole e loaa ia lakou ke aupuni o ke Akua."
13 Pehea la ka ekalesia e nana ai i ka mea hoomau i ka ona? 1 Kor 5:11. "Ke palapala aku nei au ia oukou in a i kapaia aku kekahi he hoahanau a ua moekolohe oia, a ua makee a ua hoomanakii, a ua ahiahi, a ua ona ua alunu: mai hoolauna aku oukou aole hoi e ai pu me ka mea hana pela."
E.H G.
O ka Kosaja ko Rusia moku kaua nui hou i paa i keia mau la. He 12 tausani tona kona uui a he 24 mile holo o ka hosa. Mamuli o ke kapu ua hiki ole ke ike ia kona ano, kona mau lako kaua, a me na mea e e pili ana nona. Ke olelo ia nei oia ke alii ma ka moana.
NO NA AINA KA HIKO
NA KULANAKAUHALE NALOWALE A I LOAA HOU AKU.
MAHELE II.
MOKUNA IV.
MORIA KA MAUNA O KA HALE O KE AKUA.
Ua hoike pololei ia maloko o ka buke "Talnud" a na Rabi, maluna pono o ka "Pohaku o ke Kahua" kahi o ka Pahu-Berita i ku ai. Ua pu ia iho no hoi, i ka wa a Davida e eli ana i ke kahua no ka Luakini, ua loaa iho la iaia keia pohaku maluna pono o ke ano me ka inoa pau ole o ke Akua maluna e kau ana maluna iho. Nolaila na keia pohaku a me ka helehelena-aina o ka Luakini na mea nana e hooia mai i ke kahua i kukuluia ai o ka Luakini o ke Akua, me kona mau kuahu-mohai, na rumi, a me na mea e ae i pili i keia mau mea. Mai ka moolelo o ke Talamuda ua ike ia iho hoi malaila o keia ka "Pohaku o ke Kahua" oia no ka pohaku-paa a wahi kiekie loa o ka mauua, e puka ae ana maluna o ka papa hele o kahi Hoano o na Hoano loa, a maluna o keia ohu ka pohaku i kau ai ka Pahu-Berita; a mai keia pohaku i moe iho ai ua keehina e iho ai i ke kahua-mabala o ka Luakini, e ku ana ma he kahua pohaku paa o eono cubita maluna ae o ka waiho ana ano nui o ka mahuna, a o keia kahua moe kahi ua pakeo aku a puni ka Hale maoli o ka luakini, me kekahi alapii ma ka aoao hikina e hooiho hou iho ai ilalo aku. O ke ku ana o ke Sekhra, ua like loa hoi me ia i hoike ia ma ka Talmuda, a oia hoi kahi hookahi e hoopiha ana i na olelo kuhikuhi a pau. Ma ke kukulu ana iho i ke kahua i ku ai, kahi Hoano o na Hoano loa, ma ke kiko waena o keia pohaku, a ua like loa me na ana a me na ano a pau i hoopaa molelo ia e na Rabi Iudaio. A o ka mea kamahao loa aku, me ka Luakini ma keia wahi e ku ai e like me ke kuhikuhi, ua hiki i kekahi laina ke hoomoe ia mai ka hikina a ke komohana pololei loa, e hoohui ana i keia piko mauna me ka piko o Mauna Oliveta. Ma kahi ponoi hoi i mohai ia ai ka bipi ulaula, a o ka mea e ku ana ma ia wahi o Oliveta ua hiki hoi ke nana pololei mai maluna o ka pa mawaho o ke kahua o ka luakini, maloko aku o ka puoahale o kahi noho hookolokolo o Davida a me ka ipuka hikina o ka Luakini o Omar, a e ike pono ana hoi i ka a ana a ka lamalama maluna o keia poliaku.