Ka Oiaio, Volume I, Number 106, 27 May 1896 — Page 1

KA PUKA LA OIAIO

 

Hoopukaia i na la a pau koe ka la Sabati a me Lapule no 50 keneta o ka mahina.

 

BUKE 1                      HONOLULU, MEI 27, 1896             HELU 106

 

 

OIAIO PUKA LA

 

KA HULI PAU ANA I KA PONO AOLE

HE AO'NA BAIBALA.

 

He ano e loa ka milenia maloko o ka Baibala mai ka milenia a ka poe imi ano o ka ke Akua olelo e ao nui ia nei. O ka manao e paa nei i ka noonoo o na Karistiano lehulehu wale, e huli ana ko ke ao a pau mai ka hewa, a e noho ana lakou ma ia kulana no hookahi tausani makahiki mamua o ko Karisto hiki hou ana mai, ua hookumu mua ia e Daniela Whitby o Enelani, aneane i ka 1680. Aole i lohe ia keia ano ao'na iloko o ka ekalasia o na la mua, kekahi mea kamahao i na he olelo ao keia mai ka baibala mai. Ma kana mau olelo hoakaka no Mataio 24:30, ua olelo o Kalawina penei: "Aole hoi he kumu o kekahi mea e manao ai e huli ana ko ka honua i ka pono." Ia Lutera e kamailio ana no Ioane 10:11, 16, ua olelo ae penei: "I kekahi poe e wehewehe ana i keia wahi, e huli ana na kanaka a pau i poe Karistiano. He hoopunipuni keia i hana ia e Satana, i mea e hoopouliia i ke ao ana pololei, i mea e hiki pono ole ai ia kakou ke ike iho." Olelo hou ae la oia, "E ike aku ana hoi oukou i ka laulaha ana o ka hewa, i lilo aku ai hoi keia ola he mea ku ole i ka hoomanawanuiia, e lohe ia aku ai ka leo kanikau hoi e hapaiia ana, e ke Akua, e hele koke mai me kau kooko ana."

O ka mea oiaio maoli, he au wale no o ka nawa ka milenia o kela kowa o ka manawa mawaena o ka hiki alua ana mai o Karisto a me ke ala hou ana mai o ka poe make iloko o ka pono, a me ko ka manawa e lukuia ai o Satana i ka wa e hoola hou ia ai o ka poe make iloko o ka hewa. Mamua o ka hoopio pau loa ia ana o ke Satana, e loaa ana hoi he manawa o hookahi tausani makahiki e pokaa hele ai ma kela poepoe honua, a e ike pono ai hoi i ka poino o kana mau hana ma ke alakai ana i kanaka iloko o ka hewa. No kekahi mea i noho hana mau e like me Satana no eono tausani makahiki o ka moolelo o keia ao, aole hoi he hoopai i oi aku ke koikoi kupono e hookau ia maluna ona. Aka aole no keia hoopai e hoopau ana i kona kipi, no ka mea ia ia no i weheia ae ai mai ka hoopaa ia, mai ka paa o kona wahi hoopaa, mamuli o ka hoola hou ia ana ae o ka poe hewa, ua hoomaka koke hou ae la oia i kana hana weliweli o ka hoopunipuni, e hana ana hoi e puni hou aku no ka poe i hoola ia o na lahui he mea hiki loa ia lakou ke lawepio mai ma ka ikaika i ke kulanakauhale o ke Akua. Aka ua waiwai ole hoi kana mau hoao ana; no ka mea, e hooiho iho ana ke Akua i ke ahi mai ka lani mai a lukuia lakou a pau. Hoik. 20:7-9. Mai loko ae o keia auhulihia e pau ai o na mea a pau o ka honua i ke ahi, e hoea hou mai ai ka honua hou, kahi no ka manawa pau ole o na kanaka o ke Akua e noho ai me ke kaawale mai ka hoowalewale a ka diablo. E noho makaukau hoi oukou e ka poe e heluhelu ana i keia.

L. H. G.

KA HAAWINA HELUHELU BAIBALA.

 

Ka MILENIA.

 

1 Heaha ke ano o ka huaolelo "milenio"? "He tausani makahiki."

2 Heaha ka mea e hana ia ana i ka hiki ana mai o Karisto? 1 Tes. 4:16.

"No ka mea, e iho io mai no ka Haku mai ka lani mai, me ka hooho, a me ka leo o ka luna anela, a me ka pu a ke Akua; a o ka poe make iloko o Karisto ke ala e mai."

3 A ihea na keiki a Karisto e lawe ia aku ai? Ioane 14:2, 3.

"Ma ka hale oko'u Makua he nui loa na wahi e noho ai: ina aole pela, ina ua hai aku au ia oukou. Ke hele aku nei au e hoomakaukau i wahi no oukou, e hoi hou mai no wau, a e lawe ia oukou io'u la i noho ai oukou kekahi ma ko'u wahi e noho ai."

4 Pehea la ke ano o ka honua nei mahope o ko Karisto hiki ana mai? Ier. 4:23, 26 (Isa. 24: 1-3.

"Nana aela au i ka honua, aia hoi, ua neoneo a olohelohe hoi; i ka lani kekahi, aohe ona malamalama. Nana aku la au, aia hoi, o kahi i nui ka ai ua waonahele; a ua hoohioloia ko laila kulanakauhale a pau imua o ke alo o Iehova, imua hoi o kona ukiuki nui."

5 He kanaka no anei kekahi e ola ana maluna o ka honua ia wa? Ier. 4:26 (Zep. 1:3.)

"Nana aku la au, aia hoi, aohe kanaka, a ua hee aku la na manu a pau o ka lani"

6 Heaha aku ana la ka hopena o ka poe i lawe ole ia i ka Lani i ka hiki hou ana mai o Karisto? Ier. 25:31 (2 Tesa. 1:7, 8; Hoik. 19:11.)

"E hiki mai no ka uwalaau, mai na kukulu mai o ka honua; no ka mea, he paio no ka Iehova me ko na aina, e hooponopono no oia maluna o na mea io a pau; e haawi no hoi oia i ka poe hewa i ka pahikaua, wahi a Iehova."

7 Pehea ka loihi o na haipule i hoolaia e noho ai me Karisto ma ka Lani? Hoik. 10:4, hapa hope.

" * * A ike aku la au i na uhane o ka poe i okiia ke poo no ka hoike ana ia Iesu, a no ka olelo a ke Akua, a me ka poe i hoomana ole i ka holoholona a me kona kii, aole hoi i loaa kona hoailona ma ko lakou lae, aole hoi ma ko lakou lima; ola pua lakou me Karisto a hoomalu pu me ia ina makahiki hookahi tausani."

Ua make ia hoi keia poe, no ka mea e olelo ana a "ua ola hoi lakou." E haawi ana hoi lakou i na hoopai maluna o ka poo hana hewa. (1Cor.6:2,3).

8 I ka manawa hea la lakou i hoola ia ai? Hoik. 20:6.

"Pomaikai a hoano hoi ke kanaka ke loaa ia ia ke ala mua ana; aole e lanakila ka make alua maluna o lakou, aka, e lilo no lakou i poe kahuna no ke Akua a no Karisto, a na lakou e hoomalu pu me ia i na makahiki hookahi tausani."

9 Pehea la ka loihi o ka manawa o ka poe hewa e waiho ai i ka lua, mahope aku o ka hoola ia ana o na haipule? Hoik. 20:5

"Aole i ola ke koena o ka poe make a pau ia mau makahiki hookahi tausani."

10 Heaha la ko Satana kulana iloko o ke tausani makahiki? Hoik. 20:2

"A lalau aku la i ai ka deregona, kela moo kahiko, oia hoi o ka diablo, a o Satana hoi, a nakinaki iho la ia ia a paa i na makahiki hoookahi tausani:

11 Ihea la oia e hoopaa ia ai? Hoik 20:3, hapa mua.

"A kiola aku la ia ia iloko o ka luahohounu."

12 Aia la ihea ka lua hohonu? Hoik. 9:2

 

"Wehe ae la oia i ka lua hohonu; punohu aku la ka uhai, mai ka lua aku, e like me ka uahi o ka umu nui hooheehe hao; pouli iho la ka la a me ka lewa no ka uhai o ka lua."

Oiai ka uahi o ka lua hohonu e hoopouli ana i ke ea, alaila aia no hoi ka lua hohonu ma keia honua. Ua piil hoi keia i ka honua i kona wa i hooneoneo ia ai mahope o ko Kristo hele ana mai e kinai i ka hewa a me kana hana.         E. H. G.