Ka Oiaio, Volume I, Number 101, 21 Mei 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

OIAIO PUKA LA

KA MANAOLANA POMAIKAI

            O ka manao e hiki hou mai ana ka Haku o ia no kekahi o na manaolana pomaikai i loaa i kana mau haumana oiaio i na manawa a pau.  O ka olelo hope a Karisto i kana mau haumana mamua o kona kaawale ana mai a lakou aku ma Oliveta, e hiki hou mai ana oia ma keia ao, oia hoi na olelo n@na i hoomalamalama mai ia mua o ko lakou noho ana, e hoopiha ana ia lakou i ka manaolana a me ka hauoli, i hiki ole ke kinai ia e na kaumaha a me na popilikia i ilihia iho ia lakou mahope aku.  Iwaena o na haawina pilikia a hoinoia, o keia hiki hou ana mai o ke Akua Nui a me ko kakou Hoola o Iesu Karisto, oia hoi ka "manaolana pomaikai" nana i hoolana ia lakou.  Maluna hoi o kela ahua pohaku o Patamosa i lohe aku ai o Ioane i ka leo o ka hoopomaikai, "He oiaio, e hele koke mai no au," a me kana pane kaunui e i aku ana "E hele mai oe e ka Haku e Iesu." Hoik. 22:20.  I kamahaoole ai hoi ha ka ninau a na haumana a Karisto, ka poe i ike mai ka lakou kumu no na makahiki e hoao a e hoopilikia ia ai na haipule, i ui aku ai ia ia, i kona wa i hoike aku ai e hiki mai ana ko ke Akua inaina maluna o Ierusalema, "I ka manawa hea e hiki mai ai ia mau mea; a heaha hoi ka hoailona no kou hiki ana mai, a me ka hope o keia ao?" Mat. 24:1-3.

            Aole hoi i papa aku o Karisto ia lakou no ka ninau ana mai i na hoailona o kona hoi hou ana mai, no ka mea ua hoomaopopo iho oia ma ka ninau he makemake ko lakou e noho pu me ia ma ka home ana e hele aku ai e hoomakaukau no lakou.

            Me he la ua komohia aku hoi ka manao i na haumana mua a Karisto ma kekahi ano e huli hoi koke hou mai ana hoi ka lakou Kumu i keia ao, a pela hoi o Paulo i hoao aku ai e hoopololei i na haumana, ma kana epesetole i ka poe o Tesalonica. "Ua olelo aku hoi ka Apokolo penei: mokuna 2 pauku 1 a hiki i ke 4 (2 Tesa.

Ma keia i hoike ia ae ai ka hoomana pope, e like ma ka ike iho a ka poe hoole - pope a pau; ka mea hoi i hoailona ia e kahi pepeiaohao uuku ma Daniela 7.  Ua hoike mua mai na wanana o Daniela a me Hoikeana e noho ana keia mana maluna o ke kanawai o ke Akua, a e hoomainoino ana hoi i na haipule, a e hoololi ana i ka manawa, "no kekahi manawa, na manawa, a me mahele o ka manawa," a no 1260 makahiki hoi, e like me ia i hoike mua ia aku ma kekahi haawina heluhelu i kela pule aku nei.  Pela hoi ma ka wanana kamahao a Karisto, i hoopaa ia e Mataio, ma ka mokuna 24, e kamailio ana ka Haku i ka wa e noho loihi ai keia mana, i pio ai i ka M.H. 1798, a e olelo ana no hoi i kana mau haumana a pau aole e hiki mai kona wa e hoi hou mai ai a pau keia mau mea ana i olelo ai ka hookoia e kekahi mana ane - Karisto, ka hana alakai hewa a me ka luku aku alaila hoi hoike maopopo mai la ia wa na hoailona o kona hiki hou ana mai e haawi ia mai ai.  O keia mahele o ka haawina e hoopuka ia aku no ma kekahi heluhelu hou aku.

E. G. H.

 

HAAWINA HELUHELU BAIBALA.

KA WANANA NUI NO KARISTO.

1.         Ua ae anei o Karisto e hoi hou mai i keia honua?  Ioane 4:2, hapa hope a me pauku 3.

"O kana poe haumana.  Haalele iho la ia ia Iudea, a hoi aku la i Galilaia."

2.         Heaha ka mea e hookoia ana mamua o kona hiki ana mai? Ioela 2:3.

"E hai aku oukou i keia i ko oukou poe keiki, a o ka oukou poe keiki i ka lakou poe keiki, a o ka lakou mau keiki i ka hanauna mahope.

3.         I ka wa a Karisto i olelo ai i kona mau haumana no ka hoopio ia ana o ka luakini, heaha ka mea a na haumana i ninau ai ia ia? Mat. 24:3 hapa hope

"Heaha hoi ka hoailona no kou hiki ana mai, a me ka hope o keoa ao?"

4.         Ua hoike aku anei oia, ua kokoke mai ka hopena? Mat 24:4, hapa hope a me 6.

"E malama ia oukou o hoopunipuni mai kekahi ia oukou?

"E lohe auanei oukou i na kaua, a me na lono no kaua: e ao iu oukou iho, mai hopohopo: no ka mea, e hiki io mai ia mau mea a pau, aole nae ia ka hopena."

5.         Mahope o kona hoike ana mai no na kaua, no na wi no na olai a pela aku heaha kaha olelo no keia mau nea? Mat 24:8

"O keia mau mea ka hoomaa ana o na popilikia."

6.         Pehea ka nui o ka manawa e hoolaha ia ai o ka euanelio mamua o ka hopena? Mat. 24:4.

"A e hai ia aku no keia euanelio o ke aupuni ma na wahi a pau, i mea e ike ai ua lahui kanaka a pau alaila iho e hiki mai ai ka hopena."

7.         Heaha ka hoailona o ka hoopio ia ana o Ierusalema? Mat.24:15.

"Aia a ike oukou i ka mea ino e hooneoneo ai e ku ana ma kahi hoano, ka mea i oleloia mai e ka Kaula, e Daniela; (o ka mea heluhelu e pono e hoomaopopo iho ai.)"

8.         Heaha ke ano o "ka mea ino e hooneoneo ai?" Luka 21:20

"A i ka wa e ike ai oukou ia Ierusalema e hoopuniia e na kaua, alaila e ike oukou ua kokoke mai kona neoneo ana"

9.         Heaha ka mea nui e hiki hope mai ana? Mat.24:21.

"Alaila e nui loa mai no ka popilikia, aole popilikia e like me neia mai ke kumu mai o ka honua, aole hoi ma ia hope aku."

O keia popilikia ka hoomaau nui ana o ka mana pope, ka mea a kakou i heluhelu ai ma ka haawina mua ai, ka M.H.538 a hiki i ka M.H. 1798 aole pili keia i ka hoopio ia ana o Ierusalema.

Ua kue pia i ka "poe i waeia" (pauku 22) ko Karisto poe haumana aole pili i na Iudaio manaoio ole.  O ka wa o ka mana o ka pope, no na makahiki he 1260 (Dan. 7:25, Hoik. 12:14,6,) oia ka wa i oi ai ka popilikia mai ka hoopokole mai ka hookumu ana mai o ke ao nei.

10. No keaha ka hoopokoleia ana o keia hoomaau ana? Mat 24:22.

"I na e hoopololei ole ia ua mau la, i na aole loa e ola kekahi kanaka, aka, no ka poe i waeia, e hoopokoleia ua mau la la."

E mau ana ka mana o ke aupuni pope a hiki i ka M. H. 1798, aka, e hoemiia iho ana kona hoomau ana.  Ua hookoia keia mamuli o ka haiolelo ana a Lutera a me na mea hoole pope e ae, ka mea nana i hoohuli i ka manao o kanaka, a i kue aku i ke kinai loa ia ana o ka poe hahai ia Karisto.

E. H. G.