Ka Oiaio, Volume I, Number 97, 15 Mei 1896 — Page 2

Ka Oiaio/Ka Oiaio Puka La

 

JOHN E. BUSH, Luna Hooponopono a me Puuka

HONOLULU. : : : : MEI 15, 1896.

 

NA PUKIKI.

            He halawai ka na Pukiki malama aku nei ma Hilo ma ka la Kapule i hala. O keia kekahi o na hana i helu nui ia e kekahi poe he mau hoailona ke haalele nei ka iole i ka moku a ma ia mau hana ke ulu nei ke kiko manaolana o kekahi poe iole e lilo aku ana ia lakou ka moku. He oiaio ka makou e olelo aku nei o keia kekahi o na lahui ma Hawaii nei, i emi iho malalo o na lahui e ae ma ke ano hoopono a ma na ano hiki ke hilinai ia aku. O keia mau hana a na Pukiki, mamuli o ke alakai ia, ua like no ia me ka hana a na aoao kalaiaina, malalo o ke aupuni repubalika, he mau hana hoopuupu a loaa ko lakou makemake pau ka hoohana ana. O ka koe Hawaii e kuhihewa noi he mau hana oiaio keia a na Pukiki, e lilo ana lakou he poe keiki i hanauia no ka la 1 o Aperila. Kehoohauwawa nei kekahi poe Pukiki ma na halawai, ke noho koa nei no hoi ke kahi poe o lakou no ke kenikeni a me ka hapaumi, a na na mea e loaa mai ia lakou. O keia ano kanaka ua like lakou me ka mea manao maikai ole iloko ona.

 

KA PONO A ME KA HEWA.

            E like me ka hele ana mai a ka pono pela no i ukali mai ai ka hewa. Pela no hoi e ikea nei ma na ano a pau ma Hawaii nei. He oiaio ua hiki mai ka malamalama, ka ike, a me ka naauao., mai ke kumu mai o keia mau mea a pau, ka olelo a ke Akua, eia hoi, ke hahai mau nei no na hana uhiuhi, hoopowehiwehi i keia mau mea a pau, a ka Hawe.

            E paio mau ana keia mau mana elua. E hoomalamalama mai ana ka naauao mai ka lani mai, e hoopouli mau ana hoi ka mana o ka honua nei. Mawaena o keia mau alakai ana ua pohihihi a lauwiliia ka naau o ka mea e noho hemahema ana, i apo ole aku a paa a paa i ka huaolelo mai luna mai.

            He mea maopopo ua poha mai na kukuna malamalama o ka oiaio maluna o ka honua, a ua hoopomaikai ia keia lahui ma ia ano, aka, mamuli o na hana haumia a Satana, ua pahua no ka manawa keia pomaikai nui i lawe ia mai a i kuai ia hoi me ke koko makamae lua ole o ka Mesia.

            A no keaha la na lahui kanaka e ike ole nei i ko lakou manawa, i ko lakou ola, eia imua o lakou. E hoomaloka a e pani anei lakou i ka ike ana aku i ka hewa o ka lakou mau hana hewa, me na makana hookamani, i na ai ko ke Akua hoowahawaha, ke hiki mai i ka la e oki mai ka lakou mau hana hewa i keia ola ana o lakou.

            E ke kanaka, e mihi oe oiai ka la e pa iho ana me ka mehana maluna ou, a e huli mai ka hoonanea a hoowalewale a ka hewa a e maliu aku i ko ke Akua lokomaikai ma o Kana. Keiki ia lakou.

 

HE HUI HAWAII.

            Ua lohe mai makou he hui kalepa ke kukuluia nei e kekahi poe kakaikahi ma Kawaiahao. Ua loaa ko lakou hale kuai ma ke Alanui moi e kokoke ana i ka luakini ma ka inoa o keia apana.

            E hookumuia ana ka hana a ka hui ma na mea pili i ke ola o ke kino, a mahope aku ke ike ia ka pono, e hoomohala ia aku ai ka lakou hana. Ua ohohie kekahi poe, a ua nui hoomaloka no hoi ka poe i hiki ole ke hoomaopopo i ke ano a me ka pomaikai o ke kukulu ano i na hana malalo o ka huihui ana.

            Ua ike ia ka pono o keia ano hana ma na aina e, ua hala ka wa o ka hoao ana. Ua kupono loa no hoi keia i ka poe uuku o na wahi loaa, a oia poe o ka lahui Hawaii kekahi.

            Me ka hoohuihui i hiki ai i na lahui kanaka a pau ke kukulu i na hana nui, a ina e like a e maikai ka noonoo a hoopono ka lawelawe ana o na hoa ma ko lakou aoao, he mea maopopo, aole he kumu o na lahui e ae e lilo ai he poe nana e hookeke a e kinai i keia lahui.

            Aka, o ka lili a me ka hoakamai kamailio ka hewa o keia lahui, aole o ka lokahi, ka hana, a me ka hoomanawanui.

 

NA NU HOU HOPE LOA.

            He elua minute mahope iho o ke ku ana o ka Shah o Peresia i ka pu, ua make loa iho la ia i ka la 1 o Mei.

            Ua ike aku o Rusia a me Enelani i ka hoilina o ke Shah, ia Mauffe Ed-Din, oia ka moi.

            Ke olelo nei ka mea kakau o ka nupepa Rusia Novosti o Sana Peteteboro, ma Ladana, ka mea i hooia ae, mai kekahi Kuhina ae o Beritania mai kona lohe:-Ma ke kaua ana ka Soudana e hoomau aku ai o Enelani i kona noho ana i na aina mau ka pohai-waena honua, a i kona wa e kupaa mai ma ka Nile Luna e haalele ai oia ia Nile Lalo a me Kairo. E hoomau ia aku ana hoi ke kaua e Enelani me ke aupuni o Congo, a me Italia mai Dougola, Suakima a me Uganda mai. E hooholoia ana he alahao maluna o ka waoakua mai Suakima, a ma ia mea e ike ia ai e hoomau aku ana no o Enelani i kona paa ana, maluna o Aikupika ma kona noho ana ma Nile Luna, ina ana no e koi aku o Europa e haalele oia ia Aikupika. A ua olelo ia no hoi, aole o Enelani e kue ana i ka noa ana o ko Aikupika noho ana, aka, aole nae oia e ae ana i kekahi aupuni e ae e kookohu iho ma Aikupika.

            Ua hoi mai ka Moiwahine Vitoria ma Kakela Windsor mai ka hele hooluolu ana ma na aina o Europa, ma ka la 2 o Mei.

            Ua lanakila na koa Enelani ma Matabele, a ua hiki i ko Buluwayo kanaka ke oleloia ua maha mai na hooweli ana a na koa Matabele. I ka hiki ana aku o Earl Grey, oia ka wa e hoonee piha ai ka hooili kaua a hiki aku i kahi o na kipi e hoopunana la ma ka puu o Matopo.

            Ua paumeume ka pono o ke kaua ma na aoao paio ma Cuba.

            Ua oleloia he ola pokole loa ko ka Aha Kuhina ma Farani.

            Ua hiki aku o Li Hang Chung ma Sana Petereboro, he elele mai ka Emepera aku o Kina, me na makana.

 

KUAI HOOPAU NUI.

Ma na Mahele a pau o na ano mea kuai

ma ka Halekuai o

L.B. KERR,

ALANUI MOIWAHINE

-

He 30 i`a Kalakoa no $1

Papale Ie Laiki 25 keneta pakahi.

12 Ia Lole Huluhulu Pulupulu no $1

Na Lipine 18 ia no 25 keneta.

Na Lole Makalena Keokeo kikokiko a

            me pohaka, 15 ia no $1

E hele a e makaala mai, a e lawe ae i

na kuai holopono ana.

L.B. Kerr.

ALANUI MOIWAHINE.