Ka Oiaio, Volume I, Number 97, 15 May 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.  HONOLULU, MEI 15, 1896.  HELU 97

 

OIAIO PUKA LA

NO NA AINA KAHIKO

NA LUKANAKAUHALE I NALOWALE A LOAA HOU AKU.

Mahele II.

MOKUNA I

Ka Awa Kahiko loa o ka honua nei—Pilikia o ka pae ana aku—Ke ano o ka noho ana o ke au kahiko ma na Aina Hikina—Ke Kula o Sarona—Ke Kulanakauhale o ke 'lii Nui—Na manao mua o ka ike ana aku i ka aina—Kahi e kumakena ai na Iudaio—Kuanea a anoano ke nana aku—Na Manao aloha no ka Aina Hemolele.

 

I ka wa i eliia ai o ke kahua no ke Kula Misiona ma Mauna Ziona, a hiki i ka iwakalua kapuai ua loaa aku la hoi kekahi kia pou pohaku e ku ana pololei ana, a hooiloia iho la ke poo o ua kia pou la oia ke kumu a pohaku kihi hoi o ka hale; a i ka paa ana o ka hale ua eli hou ia aku la he lua-wai ma kahi e aku o ka pahale, a ia pa hoi i loaa aku ai o kekahi towera paia manoanoa, e ku ana, no ka hale hookahi no ome ke kia pou pohaku, ka mea a lakou i manao ai he wahi kupono loa hoi e hooliloia i punawai; i ka wa nae i hoomaemae ia iho ai mamua o ka palaniia ana me ka puna eleele, na loaa aku la hoi ua piha keia wahi i na iwi poo a me na iwi kanaka, me he la hoi o na iwi keia o na kanaka paha i pau i ka lukuia oiai lakou e kaua ana ma ke towera, ka puuhonua o na aina a me na hale o ka hikina, a ua towera la o keia kahiko ka punawai hookio wai o ke Kuia i keia manawa.

O ka oe a pau i kuhalahala i ka ike ana iho ia Ierusalema e like me ia e ku nei ua poina hoi, i mea e kulike ai me ka wanana nona, e hooliloia ana keia kulanakauhale "he waihona kuanea" a "he ahua opala," a ina hoi e like ole ana kona ano me ia i olelo mua ia ai, e haule ana kona hiohiona ano nui i ke Karistiano, no ka mea, e hoole ana hoi ia i ke ano o ka wanana, ika aole e like me ia e ku kuanea nei a he puu opala hoi.

Maluna hoi o keia ahu a me keia wahi kuanea na Iudaio e hoohanini nei i ko lakou mau waimaka me na leo kanikau, a aole paha he mea e ae i oi aku o ka eehia, mamua o ka i ike a i loheia o na leo kanikau o keia lahui e kuo paumako ana mawaho mai o ka paia pa o ka luakini kahiko, oiai aole hoi lakou i ae ia e komo aku iloko o ka pa o ka lakou wahi hoano ponoi. Maanei, o ka aluna ahiahi o ko lakou Sabati (La Ehiku) e ike ia ana hoi he mau haneri o na keiki a Aberahama e honi ana i na pohaku huihui e pule ana hoi kekahi, e heluhelu ana kekahi mahele i ka Palapala Hemolele, a o kekahi poe hoi e kumakena ana me he la e pahu ae ana ko lakou puuwai i ke aloha paumako no ko lakou Ziona, a me kona lilo ana he kuanea a he ahu opala.

Ua hele mai lakou mai na aina a pau—he poe lehulehu o ka heluna makahiki like ole o ke ola ana, mai ka opio a i ke kanikoo; a o kea @naina nui e hele nei, e kanikau a e kuo ana, ua hele mau mai lakou iloko o na keneturia loihi i hala, mai ka manawa loa mai i lukuia ai ko lakou luakini a me ko lakou kulanakauhale e na puali koa o Roma. He mea e keia manao wale ana, keia moepoo ana a me keia manaoio ana! Iwaena o ka leo o ka lakou mau kanikau e lohe ia ana keia helu kumakena. E, e ko makou Makua iloko o kou oluolu palena ole, e aloha mai i kau poe keiki makua ole a e hoakoakoa aku hoi i kau mau keiki a pau i ka aina hemolele! E ka Haku, e hoi mai i kou kulanakauhale! e kukulu hou ae hoi i ko mau kuahu hemolele, e noho iloko o kou hale, a e hoakoakoa mai i kau pua i hoauhee ia! E lilo hoi i mea oluolu i ke Akua, ka Mea ikaika ma na hana, pela e kauoha iho ai!  Aole i pau.

 

O ka hihi o J. L. Osmer, no ke kuai waiona meka laikini ole, oka la keia e hoolohe ai o kona hihi a.

 

KA HULIHIA ANA O ANE-KARISTO.

O ka mea nui mahope aku o ka lawe pio ia ana o ka mana ane-Karisto, a Daniela, ke kaula i ike aku ai, oia no ka Hookoikoio ana. a me ka luku a hooleiia ana o ke kino o keia mea hookiekie a hoomainoino iloko o ke ahi. Dan. 7:9-11, 26. I ka manawa e hiki mai ai ia ia, oia ka wa o na haipule o ka Mea Kiekie Loa e lawe ai i ke aupuni a noho pume Karisto no ka wa mau loa. E ka Haku e awiawi mai i na la hauoli la.  E. H. G.

 

KELA A ME KEIA

Make ulia iho la ke kaikamahine opio a Makaleka o Hilo, ooia o Anoi Makaleka, i hauleia e ka paila papa.

Ua hoopii ia ka auhau o ka illo wahine. O ke kumu a keia, i mea e emi ai mai ai na kumulau hooulu ilio. Kue loa o Hon. Kamauoha, aka e haule mau ana kana mau noi.

Ua hoea hou mai nei he bila hoaie auduni. Me he ala, he wahi nika maloko o ka pa, ke hoea mau nei kahi nika i ke awakea. Ua pau mua paha ke dala, a i mea e kaa ai ka poe i hoaie mai no na mea i pau mua; keia koi e hoaie. Auwe, ka aie he haku hana mau ka aie, e—.

Mai poina na makamaka i ke kuai hoopau ma ka hale kuai o L. B. Kerr. He 30 i-a kalakoa paa no hookahi dala.

No ka poe pena a pia i ka helehelena e loaa no ka pia aala "Ramona" ma kahi o Hobron ma.

He heluna o na poe e haalele ana ia Honolulu nei no ka makaikai i ka iua o Pele maluna o ke Kinan i keia la.

E holo ana ka mokuahi Kauai no kona mau awa ku mau i keia la, hora 4 p.m.

Ke hoole loa nei na haole kalepa, aole lakou e ae e hele e hoopaa ia lakou iho, a e kau i ko lakou hoailona e like me na kauwa kuapaa o ka wa kahiko. He Kupaianaha keia kue ana mahope oka ku ukuu ana a holo ke kanawai.