Ka Oiaio, Volume I, Number 94, 12 May 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA PUKA LA OIAIO

Hoopukaia i na la a pau koe ka la Sabati a me Lapule no 50 keneta o ka mahina.

BUKE 1.         HONOLULU, MEI 12, 1896.            HELU 94

 

OIAIO PUKA LA

HE

Moolelo na Aina Kahiko

NA KULANAKAUHALE NALOWALE I LOAA HOU AKU.

 

Mahele II.

 

MOKUNA 1.

MAI JAFA A IERUSALEMA.

Ke Awa Kahiko loa o ka honua nei -- Pilikia o ka pae ana aku -- Ke ano o ka noho ana o ke au kahiko ma na Aina Hikina -- Ke Kula o Sarona -- Ke Kulanakauhale o ke 'lii Nui -- Na manao mua o ka ike ana aku i ka aina -- Kahi e kumakena ai na Iudaio -- Kuanea a anoano ke nana aku -- Na Manao aloha no ka Aina Hemolele.

 

            Aia koke aku no ma kela huli aku o ka lapa-pali mamua pono o makou, kahi o ka iini o ko makou naau, ke alina lapa-pali kiekie loa o lakou o keia pae lapa-pali.  Hooikaika hou ae la makou i na lio o makou, a he wa pokole i kaalo aku la mahope ka lapa-pali kiekie nana i kaupale mawaena o ke Kaimake a me ke Kai Waenakonuhonua, a ia manawa, aia hoi! o Ierusalema, e anapanapa mai ana imua o ko makou mau maka i ka la e papa ana maluna iho ona iaia e iho ana e napoo aku, a me ka naau i hooniia e na manao i hiki ole ka puana leo ia ae ia makou e holo ana a komo aku ma ka ipuka o Ziona, a lele iho la mai na lio iho iloko o ke "Kulanakauhale o ke Akua."

            Ina hoi iloko o ka makaikai ana a ke kanaka i na kahua kaua a me na wahi kaulana o kona aina, ua loaa ia ia na imi manao aloha no kona one hanau, aole anei he mau anoai puanuanu ko loko o kona hoomana i hanaiia ai oia i hiki ai ke kaomi iho i ko ke kanaka mau manao haipule i kona wa e kipa aku ai a ike hoi i kahi i hoike ia ae ai ka lanakila ana o ko kakou Haku maluna o ka make a me ka luakupapau?  Ua hoohoihoi ia mai hoi ko kakou mau manaolana, a ua hoopumehana ia mai ko kakou mau puuwai i ka wa e ike aku ai i ko Bethany a me Golototha a me Gesemana.  He oiaio, aole no paha e hiki ia kakou ke koho iho, ina wahi ponoi kahi o na hana i oleloia e pili ana i ko kakou Haku, i lilo ai i wahi laahia ia mau wahi, aka, ma ka mana maoli no o ka inoa o Iesu, me ka nani o kona hiki kino ana, ua hoopuni ia keia aina holookoa, me he la me ke ala no na hoomanao ana nona.  Ua hooala ia mai hoi na hoomanao ana hoano, ke nana aku ina paia a me na towera o Ziona!  He nui na kumu hana mana i hele aku mai keia kiko waena aku!  Eia hoi ke huli nei na naau o na miliona kanaka, e loaa ia lakou ka hiohiona i o na mea i hana ia maluna o ka puu o Calivari, a i ko kakou wa hoi e poina ai ina mea i hana ia iloko o ko kakou au, aole kakou e poina iki ana i ke Kea a me ka Mohai, me kona koko e kahe ana no kakou.  Aole no hoi kakou e hoopoina i ka luakupapau o Iosepa o Arematea, i puia me ke onaona o ke ola mau loa, a aole no hoi kakou e poina ia mauna Oliveta, me he la e anapanapa mai ana me ka nani o ko kakou alii aloha, iaia e hoi ana i ka lani. -- Na mea e ae a pau e poina ana, aka, o keia mau mea aole ia e poina.

            He oiaio, aole ka hele makaikai ana i keia mau wahi he haipule ana ia, aole no hoi e hoolilo ana ia kakou i mea maikai a naauao ae, aka nae, e like me ka hoohoihoi a hoolealea ana ona leo mele o na pila ia kakou, a e like hoi me ka oluolu i loaa i ke kanaka i kona wa e launa ai me kona hoaloha, pela iho la hoi e loaa ai i ke kanaka ka nanea, ka oluolu, a me ka hauoli i kona wa e ike aku ai i keia mau wahi laahia i hiki ole ke hoakaka ia ma na huaolelo.

            "Ua lilo na pohaku leo ole,

            O ke ala i hele ia e ia,

            I mea hoomanao na kamahele,

            Nona i make no kakou."

            E uwe ae au no ka lahui kanaka, ina aia a ma ka hele kino ana e bapetizo ia ma Ioredane a i Ierusalema paha e hoomana ai, oia la ke kauoha o ke ola!  Aole nae.  E hauoli iho hoi kakou aole loa me ia, aka ua waiho ia mai ke a'o e hana kakou i keia mau mea me ka hele ole ana ma i kahi mamo aku; me ka manaoio wale no iloko o kakou iho ia Karisto a me ka hooko ana i kana mau kauoha, me keia mau hana mama wale no ua loaa hoi ia kakou a pau ke ola mau ma ona la, me ka luhi ole.

            Aole mau kauoha kua nui, aole mau hana hoomanamana, aole he mau hana kuanui, a he mau kauoha kaumaha i hiki ole i ka mea nele loa ke hooko.  E hoomaikai kakou i ka Lani no keia mau hana mama no ko kakou ola mau loa, ka makana kumukuai ole a ke Akua i ke kanaka!

            O ke kumu o ko Akua koho ana i keia kulanakauhale mamua o na wahi e ae i wahi o kona hemolele e ikea ai me kanaka, aole loa paha, e ike ia ana; aka, e like me ka loihi o ka noho ana o ke kanaka maluna iho o keia poepoe honua pela iho la no hoi ka loihi o ka manawa e hoomanaoia ai ka inoa o Ierusalema me ka laahia.  E hoomaopopo io ana oia i na wa a pau, oia no ke kapitala o ko Karisto poe, ke kiko oi hookahi o na hoomanao haipule, a me kahi oi aku o ke kaulana ma keia ao.  Ua manao nui ia ko keia kulanakauhale e ka poe i like ole ka hoomana me ko kakou, ma kona moolelo a me kona kahiko.  He manawa loihi hoi kona mau towera i ikea ai mai Ziona ae mamua o ko Roma, Atena, Thebe, kukulu ia ana.  Oiai ua hookahuliia a hoilihune ia hoi oia, eia nae ke mau nei no kona kulana hanohano.  I ko Solomona manawa oia no "ka oi o ka nani," ka "hauoli o ke ao a pau," kelakela ma ka waiwai, ikaika ma ke kaua, a ulakolako iloko o ka wa maluhia.  Ma ka nani o kona Luakini -- ka hale mua hoi i kukulu lima ia no Iehova ke Akua ikemaka ole ia -- a me ka hiwahiwa o kona mau hale alii, aole hoi he mea nana i hoohalike a hooi ae ia ia.  I ko Tito, ka alihikaua Roma ike ana i kona mau hiohiona nani ua hoeha nui ia kona naau i kona lilo ana he mea nana e hoohiolo ia mau mea nani kamahao me ka pahikaua a me ka lapa a ke ahi.

            Aole i pau.