Ka Oiaio, Volume I, Number 78, 20 ʻApelila 1896 — Page 2

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA OIAIO PUKA LA.

 

HOOLAHA AINA AUPUNI.

            MA KEIA, ke hoolaha ia aku nei, o na aina a pau i hoakaka ia ma ka Papa Kuhikuhi malalo iho, e wehe ia aku ana no ka poe makemake e noho ma na aina malalo o na hoakaka ana o Mahele VI o ke Kanawai Aina, 1895, no na Hoolimalima Home Liilii, mai a mahope aku o Mei 3, 1896.

PAPA KUHIKUHI.

            He 10 apana aina ma ka Ili o Pouhala, Waikele, Apana o Ewa, Oahu, nona ka ilihonua mai ka 1 3/4 a 3 1/2 eka pakahi, a e hui puia ana me kela a me keia apana aina kula kekahi apana aina-wai (aina loi kalo), o aneane 1/4 eka.

            Aia hoi keia mau apana aina e pili la me ke alanui kaamahu o ka Hui Kaamahu ame Aina o Oahu, a he kokoke wale no i ke alaloa Aupuni.

            O na palapala nonoi a pau no keia mau apana aina e noi ponoi ia mai no ia e ka mea makemake, ma ke Keena Oihana o ka Hope-Agena, ma ka Hale Hookolokolo, Honolulu, kahi hoi o na palapala kii aina e ikea ai a me kahi e loaa ai na olelo hoakaka hou aku.

            E hamama ana ke Keena no ka lawe ana aku i na palapala nonoi ma ka hora 9 kakahiaka o ka Poakahi Mei 3.

            J, F..Brown,

tf Agena Aina Aupuni.

 

JOHN E. BUSH, Luna Hooponopono a me Puuku

HONOLULU. : : APERILA 20. 1896.

 

KA WILI A ME MAHI KO A KA HUI PUKIKI

            Eia ma Hilo kekahi wili a me mahiko e hookeleia nei, e kekahi hui o na Pukiki ma ia wahi. Ma na hoike i loaa mai eia ke holomua nei ka lakou hana, a he mau makahiki pokole wale no koe a e lilo aku ana keia hui i poe kuonoono ma keia hope aku. He mea oiaio hoi, aole ko lakou alahele ma keia hana he alanui oluolu, aka, ma ka lokahi, me ka luhi, me ka hoomanawanui a me ka hou o ka lae i holopono ai ka lakou hooikaika ana. Nui ko makou mahalo i keia hui, oiai ua hooia mai lakou i ka holopono a me ka pomaikai o ka mea a makou i hooikaika ai i keia lahui Hawaii e hoohana aku, me ko makou hilinai no a hiki i keia la, i na no e hana hoopololei kekahi poe Hawaii i hoohui ia lakou iho e lilo ana no ka lakou hana hoohuihui ana he mea e pomaikai ai lakou, e like me keia hui o na Pukiki. Pela no, a hiki i keia wa, aole i pio ko makou manaolana no ka hiki loa i na Hawaii ke hana i kekahi hana hoohuihui ke loaa na hoa kupono i aa a i makau ole i ka hana, ke hooko a hiki i ka lanakila ana i kekahi hana no lakou iho.

 

            He 25 ia o ke dala no na lole—pio kalakoa ma kahi o L. B. Kerr.

 

HOOLOLI KUMUKANAWAI.

            Mamua aku nei ua lawe ia ae kekahi hoololi, i manaoio e hoololi ai i ke Kumukanawai o Amerika imua o ka Hale Ahaolelo. Ua waiho ia aku hoi i ke Komite Hookolokolo. I ka la 11 o Maraki, ua hooholo ke Komite e kapae loa ia ua bila hoololi la. He poe Kahunapule ka poe nana ka hoololi i lawe mai a o ka manao o keia hoololi, e hana kanawai ia e hoike ana he aupuni "Karistiano" o Amerika Huipuia. He mea kupanaha loa keia, ka lawe ia ana ma ke kanawai o kanaka malaila e ike ia ai ke Karistiano o kekahi lahui. He hana maopopo keia e hoala hou mai ai i na hana hoino a luku i ka poe manaoio a kupaa mahope o ko lakou lunaike hala ma ka hoomana ana.

            I na e komo ana kekahi olelo mana ma kekahi kanawai e ae ana na na Aha Hookolokolo e hooholo ka manao o ka ke Akua olelo, aole o ka ike o kela a me keia kanaka nona iho, he mea maopopo e hoi hou ana kakou i ke au pouli o Aigupika a me na hana hookauwa kuapaaia o kanaka a e like hoi me ia, i ke au o 1260 mahiko i lukuia ai na haipule e ka mana o ka hoomana katolika

            I keia wa, ua hoomaka mai ka hoopaahao ia o ka poe e hoomana ana ma ka la ehiku o ka hebedoma e like me ke kauoha a ke Akua, o kona Sabati ia a o kona la ia e hoomanaoia ai.

            Ua hooholo iho hoi ka Aha Hookolokolo Kiekie o Canada, e hoopaahaoia ma ka hana oolea, na Kahunapule Howe a me Simpson he kanaha la, a o Burill, he kanaono.

            He mau hana hoomaemae ka euanelio e hookikina ana na ke diabolo, me ka nana ole ia o ko ke kanaka makemake ponoi iho.

            Ke kaapuni nei keia ninau a puni ka honua, a eia hoi ke hoea ae nei ma Hawaii nei.

 

KELA A ME KEIA.

 

            Ua papa ia na wahine a na koa aole e kamailio me na kane ma ka hakahaka o ka pa-hao, aka, e komo iloko o ka pa e ike ai.

 

            Ua hoopii aku o Mrs L. Kainana Puahi i ka Moiwahine Kane-make. Pela na punahele a me na hoaloha e kue ai.

 

            Ma ka mokukiapa Albert i holo aku ai o John A. Hassinger, e hoomaha ma Kaleponi, no eono mahina.

 

            Ua hoopii o John Francis no ka hakaka ana me ka makai, a o na sela o ka manuwa Amerika ua hookuu wale ia no ia ano hihia hookahi. Pela iho la na hana o keia ao.

 

            Ua hooemiia na lole merino a me halua ma kahi o B. F Ehlers (Bainaba.)

 

            Ke auhau piha ia nei ka poe ilihune a ukku o ka waiwai, a o ka poe waiwai ka poe auhau hapaia.

 

            He 9200 ahui maia i lawe ia aku ma ka Australia a he 1150 eke raiki; a he 5400 ka huina nui o na eke kopaa no ka pule i hala i lawe ia aku no na makeke o na aina e.

 

            Mai poina e na hoa'loha i ke kipa ana ae ma ka halekuai o N. S. Sach.

 

            Mai poina i na kuai hoemi ma kahi o B. F. Ehlers (Bainaba).

 

Na Lole : :

            : : Kohukohu!

Oia hoi ka mea a na lede a pau e ake ana e loaa a he meahiki wale no ke hookoia.

E HELE MAI OUKOU ILOKO O KOU HALEKUAI A E HANA AKU AU I KA KA MEA KUPONO I KO OUKOU MAKEMAKE.

Ua loaa mai nei a'u kekahi ano piha o na

LOLE AAHU HOU LOA.

Crepon, (he like me kanikau)

Na Lole Farani

Na Lole Ulana Waihooluu Like Ole

Na Lole Awiliwili Lopi Silika me Huluhulu.

Na Lole Alabatosa,

Na Lole Casamia a me Huluhulu

Na Lole Hulu Kao Lama

Na Makalena.

Na Lole Diminite

Na Lole Pongi,

Na Lole Satina

Na Peersucker,

Na Rliss,

Na Lole Anuunuu Crepe

Na Keokeo Manoanoa o na ano a pau, etc, etc.

Aia no hoi ma ko'u Halekuai ka

LOLE FIBFRELABRICA.

He mea i oi aku ka maikai ko ka OLE NAAUHULU.

Aole no oe i kahiko piha ke ole i hoi loaa ia oe kekahi o kuu

PALEKOKI KOHU MAMALU.

A e halo iho hoi i ke Kaliki (Trilby) ano hou, kupono i kau e iini nui nei.

Aia hoi ma ko'u halekuai na Lole Moepoli i ka hikonoeau ia, a kupono o ka hana ana iho m Adamu

Na Pale ili o na kane i kupono hoi i ko Eva makemake, i huki ai ka Ulua i Malamanui. Uwese oe.

Na Kaliki o na ano maikai loa, i hiki ke hoopuanikiia ka poe aluhee, na kakini kupono no ka poe paiho a me ka poe pauhananuu o na a-u, na mikina lima na hainaka, a pela aku

E hauoli loa au e hoomakaikai aku i keia mau mea nani i na Lede o Honolul

J. J. Egan.

Alanui Papu Mei 21, 1895. meilt 12