Ka Oiaio, Volume I, Number 65, 1 April 1896 — Page 2

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA OIAIO PUKA LA

JOHN E. BUSH, Luna Hooponopono a me Puuku

HONOLULU  @  APERILA. 1, 1896.

 

HE PONO ANEI?

 

            Ke hooholoia nei na laikini uku kiekie no ka poe kahi umiumi, a me na hana a pau e komo ia nei e na Asia. He mau hana keia i makemakeia e na mekanika haole i me e kinai ai i na lahui e ae mai ka imi ana i ola no lakou iho malalo o na kuleana paa o ke kanaka. Ua haawi ia ke kuleana i na lahui a pau, e like me ia mai ke Akua mai, e imi kela a me keia kanaka i ola nona a i o kona ohana paha me kona ikaika, a me ka hou o kona lae, me ka noonoo maikai a me ka hana ana me ka maluhia. Aka eia kakou ke ike nei, ke ko ia aku nei ke aupuni, e ka manao o kela a me keia mahele o na lahui e kakoo ana ia ia e hana i na hana kue i na pono pilipaa o ke kanaka. He minamina makou i ka ike i keia kulana o na manao o kekahi mau mahele o na kanaka e noho nei ma keia aina oluolu.

             O keia mau ano hana e hana ia aku nei maluna o ke aupuni, ma o kekahi o na hoa o ka Ahaolelo, e hoohoihoi wale ana i kekahi poe e imi ana i ola no lakou ma ko lakou hoomanawanui, aole i ku i ka naauao a me ka noonoo maika'i.

            E hana kakou i ka pono a haule mai na lani, a e hoomanao, he la e hiki mai ana e helu ia ana ka kakou mau hana ma keia ao, no ke ola a no ka make.

 

KELA ME KEIA.

 

            O ka la mua keia o Aperila eepa.

            Maikai hoi keia kakahiaka o kakou, aohe leleao iki.

            E wehe ana o Pauahi Judd i wahi ao kamalii ma kahi noho o F. M. Swanzy, ma keia poakahi ae.

            Ua hoouna ia aku he 700 tona lepohoomomona no ka hui Mahiko Ewa, mai ka hui hana lepo aku o Frank Cook.

            E pani ia aku ana ka halekuailole o J. T. Waterhouse ma alanui Moiwahine, no ka helu ana i na waiwai o loko, ma ka Poakolu a me Poaha.

            Ua hoi ae o Lunamakai Hammer ma kana hana, mahope o ka waiho ma'i ana no kekahi mau pule.

            Ua make aku hoi ke keiki opiopio a James R. Holt i ka Poakahi nei, i ka 9 o kona mau mahina a hoolewa ia aku no ka ilina o Kawaiahao.

            He Keaka kai malama ia ma ka ponei e na kaeaea oia ano hana.

            E malama ia ana ka halawai a ka hui kanu ko o Ewa i keia la.

            I keia la e niau aku ai ka mokuahi Malulani no Maui a me Hawaii.

            E holo ana o Rev. V. H. Kitcat no Enelani, no ka hanu ana i na ea huihui oia aina, a huli hoi mai no i o kakou nei.

            I keia la e niau aku ai ka mokuahi Keoni Kamaki no kona mau awa mau.

            I keia mau la e nue pau aku ai na mokuahi pili aina o kakou no ko lakou mau awa mau.

            Ma ke kakahiaka o nehinei i hoolewa ia aku ai kela pake i li ai ia iho.

            E malama ia ana ka halawai a na hui Kinipopo e manao ia ana no keia kikina e hiki mai ana.

            Mai poina i ka hele ae ma ka halekuai o Kerr, e kuai ai i mau l@ko no ke kino, oia he emi na mea kuai ma ia halekuai.

            I keia kakahiaka i ku mai ai ka mokuahi Kinau me na mea hou o na kuaina.

            E ao ia aku ana kekahi mau kaikamahine Hawaii i ka holo lio e na haole Keaka.

            Mai poina i na kuai hoemi ma kahi o B. F. Ehlers (Bainaba).

            Ua hul@ pu ia kekahi kaa kenikeni i ka la i nehinei, mamuli o ka hemopu ana o kekahi huwila, aohe ola poino.

            Ua holo pupule ae kekahi lio o kekahi Pukiki kalaiwa kaa ukana i ka la inehinei, makai iho o ke alanui Moiwahine, aohe no he poino.

            Ua lawe mai o L. M. Bond i kekahi Bila e papa ana i ke kikipu ana ma ka la Kapule iloko o kekahi mau palena mai na kulanakauhale aku o Honolulu, Lahaina, Wailuku, a me Hilo. Pololei keia.

            Ua hoike aku ka Hale Ahaolelo i ka hooholo ana i ke ana o ka Hae o ka Repubalika ma keia hope aku.

            Ua waihoia i ke Komite Kaua e nana ke kupono o ka hoonee ia ana o ka waihona o ka pauda a me na poka e waiho nei ma ka hikina o Puowaina.

            Ua hoopauia ke kuleana kuee mawaena o Enelani a me Farani ma ko laua mau kulana ma Siama. Ua kau ia iho hoi ka palena mawaena o laua ma ka muliwai Mekong.

            Ua huhu loa kekahi poe i ka aie he mau miliona ekolu a oi aku, a he kumu ko keia ahewa ana i ke aupuni.

            Ma ka rula hou o na kaa pio lawe ohua, he 10 keneta ka uku o ka ohua hookahi makai o Alanui Beritania a na uwapo, a mai ke alanui Puowaina a me alanui Maunakea ma ka hikina a me ke komohana o ke Kaona.

            Ua loaa hoi he lapaau a he laau e ola ai ka ma'i akepau. Ua aie ke ao holookoa ia Kauka Edson, no keia pomaikai. Me ka hooki e pauma ia aku ai ka wai-laau (carbolicacid) i kapaia he aseplolin, malalo o ka ili ma ka umauma ponoi iho.

 

L. B. KERR,

ma

NAE O KA HALEKUAI O MOGAN.

Alanui Moiwahine  Honolulu H., I.

KE KALEPA POLOLEI MAI NA HALE HANA MAI.

 

            E kuai ana i kekahi mea okoa a e kuai ai ma ka m@ a ke kumu-kuai kukaa.

            He kupono i na lede e hele mai e nana mua maanei i ko makou puu waiwai nui mamua o ke kua

O KA HOOKAHI DALA I KUAI IA MA KAHI O L. B. KERR UA LIKE IA ME ELUA MA NA HALEKUAI E AE.

OIA HOI, UA LOAA IA OE NA LOLE nona ke kumu kuai Elua Dala HOOKAHI DALA WALE NO.

NA PAPALE,

Na Lipine

Na Pua Papale

Na Hulu

Na Lihilihi

Na Mikinilima

Na Lole

Na Paku

Na Keokeo Uhi-moe

Na Kihei Huluhulu

ECT  ECT.

L. B. Kerr,

ALANUI MOIWAHINE.

Waikiki iho o ka Hale Kudala o Mogan