Ka Oiaio, Volume I, Number 60, 25 March 1896 — Page 1
| This text was transcribed by: | Kekaianiani Irwin |
| This work is dedicated to: | Lolena Nicholas |
KA PUKA LA OIAIO
Hoopukaia i na la a pau koe ka la Sabati a me Lapule no 50 keneta o ka mahina.
BUKE 1 HONOLULU, MARAKI 25, 1896 HELU 60
OIAIO PUKA LA
NA
Keehina io Karisto La.
HAKUIA E MRS E. G. WHITE.
KA HOOIA ANA I KE ANO O NA HOOMANA.
(Hoomau ia).
Oiai he leo ole a ike ole ia ma ka maka ka hana a ka Uhane, ua ike maopopo ia kona hua. Ina ua hoohanau hou ia ka naau e ka Uhane a ke Akua, e hoike ana no ka noho ana oia mea. Oiai aole e hiki ia kakou e hoololi i ko kakou mau naau iho, aole no hoi e hiki ke lokahi ia kakou iho me ke Akua; oiai aole e hiki ia kakou e hilinai i ka kakou mau hana pono, e hoike aku no ka kakou mau hana i ka lokomaikai o ke Akua e noho ana iloko o kakou. E ike ia he okoa ke ano, he okoa na aoao, he okoa ka noho ana. E maopopolea ke ano o ka noho mua ana a me ke ano o keia wa. Ua ike ia ke ano o ke kanaka ma ke ano nui, ke ano mau, o kana olelo a me kana hana, aole hoi ma na hana maikai, aole hoi ma na hana hewa.
He oiaio no ua hiki ke hoomaikai i ko waho oiai aole i hoohanau hou ia e ka mana o Karisto. Ke hoohua nei ka makemake i ka mana a i ka mahalo o kanaka i ka noho pono ana. E alakai ana paha ka makee i ka inoa maikai e huli ae mai na mea i manaoia he hewa. E hana no paha ka naau alunu i na hana aloha. Ina pela, pehea e maopopo ai ko kakou aoao, ma ko wai aoao kakou?
No wai ka naau? Me wai ko kakou noonoo ana? No wai ko kakou noonoo? No wai ko kakou hooikaika nui ana me ka eleu? Ina no Karisto kakou, aia ko kakou noonoo me ia, a nona ko kakou mau noonoo maikai. O ko kakou mau mea a pau ua hoolaaia nona. Ke imi nei kakou e hoohalike me kona ano, e hanu i kona uhane, a e hooko i kona makemake ma na mea a pau me ka hooluolu aku ia ia.
E hoohua mai na mea ano hou iloko o Karisto Iesu i ka hua o ka Uhane, oia hoi "ke aloha, ka hauoli, ka maha, ke kuikahi, ke ahonui, ka lokomaikai, ka hoopono, ka manaoio, ke akahai, ka pakiko." Galatia 5:22,23. Aole lakou e noho hou aku mamuli o na kuko mua, aka ma ka manaoio o ke Keiki a ke Akua e hahai ai lakou i kona mau keehina wawae, e hoike i kona ano, a e hoomaemae ia lakou iho e like me ko ia la hoomaemae ana. I keia wa ua aloha aku lakou i na mea a lakou i aloha ai. E lilo ana na poe haanui a hookano i poe noho malie a mahaoi ole. E lilo ana ka poe ona i poe ona ole, ka poe uhauha i poe maemae. Ua kapaeia na hana waiwai ole o ke ao nei. Aole e imi na Karistiano i ke kahiko o waho, "Aka, e kahiko oukou i ke kino ike ole ia o ka naau, me ka palaho ole, o ka manao akahai a me ka noho malie." 1 Petero 3:4. Aole he mihi io, ina aole i ano hou ka noho ana.
Ina e hoihoi oia i ka waiwai panai, a me ka mea ana i kaili ai, hai aku i kona hewa, a e aloha aku i ke Akua a me ke kanaka, e hoomaopopo e ka lawehala ua hal a'ku ka make a ua komo aku iloko o ke ola.
Aia a hele aku kakou i ka poe auwana a hele hewa io Karisto la, a komo aku iloko o kona lokomaikai e kala ana, alaila ulu mai ke aloha ma ka naau. Mama ae la na mea kaumaha; no ka mea he oluolu ko Karisto auamo. Ua hauoli ma ka hana pono, a he lealea ke mohai aku. O ke alanui ano pouli mamua, ua malamalama i keia wa me na kukuna o ka La o ka pono.
E ike ia ka ano aloha o Karisto iloko o na mea hahai ia ia. O kona olioli e hana i ka makemake o ke Akua. O ka mea mana ma ke ola ana o ko kakou Hoola oia no ke aloha i ke Akua a me ka imi ikaika ana i kona nani. Ua hoonani a hoohanohano ke aloha i kana mau hana a pau. No ke Akua mai ke aloha. Aole hiki i ka naau i hoolaa ole ia ke hooulu a hoohua mai i ia mea. Ua loaa wale no iloko o ka naau kahi a Iesu e noho alii ai. "Ke aloha aku nei kakou ia ia, no ka mea, ua aloha mua mai kela ia kakou." 1 Ioane 4:19. Iloko o ka naau i hanau hou ia e ke aloha o ke Akua mai, o ke aloha ke kumu o ka La hana. Ke hooano e nei i ke ano maoli, ke noho alii nei maluna o ka makemake, ke hoomalu nei i na kuko, ke hoopio nei i ke kue, a ke hoohanohano nei i na mea mailoko mai o ka naau. O keia aloha, ke malama ia iloko o ka naau, ua hooluolu i ka noho ana, a hoomaikai i na mea a pau e puni ana.
He pono i ke keiki a ke Akua e makaala i ina kuhihewa elua—e pili loa ana i na mea i komo ma hope mai e hilinai i kona aloha. Eia ka mua, i kakau mua ia, oia hoi ka hilinai ana i ka lakou mau hana ponoi, i mea e hoolokahi ia lakou iho me ke Akua. O ka mea e imi ana i ka hemolele mamuli o kona hooikaika ana e malama i ke kanawai a ke Akua, ua hooikaika oia i ka mea hiki ole. O na mea a pau a ke kanaka e hana ai, ke ole o Karisto, ua paumaele me ka alunu a me ka hewa. O ka lokomaikai a Karisto wale no, ma ka manaoio wale no e hiki ai ke hoohemolele mai ia kakou. O ke kuhihewa ana ma kela aoao e pilikia ai, oia keia, o ka manao, ua hookuu ka manaoio ia Karisto mai ka malama ana i na kanawai o ke Akua; oiai ma ka manaoio wale no e lilo ai kakou i poe hoa ai i ka lokomaikai o Karisto, aole waiwai ka kakou mau hana e ola ai.
E hoomanao nae ma keia wahi, o ka hoolohe ana he hua ia na ke aloha, aole he mea mawaho wale no. Ua hoike mai ke kanawai o ke Akua i kona ano maoli; oia no ka hoike ana i ke ano maoli o ke aloha, a nolaila oia no ke kahua o kona aupuni ma ka lani a ma ka honua. Ina i hanau hou ia ko kakou mau naau ma ke ano o ke Akua, ina ua kanu ia ke aloha mai ke Akua mai iloko o ka uhane, aole anei e hookoia ko e Akua kanawai ma ko kakou noho ana? Ina ua kanuia ke ano maoli o ke aloha iloko o ka naau, ina ua hoohanau hou ia ke kanaka mamuli o ke ano o ka mea nana i hana ia ia, alaila ua hooko ia ka berita hou.
Aole i pau.