Ka Oiaio, Volume I, Number 59, 24 March 1896 — Page 2

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA OIAIO PUUKA LA.

 

JOHN E. BUSH, Luna Hooponopono a me Puuku

 

HONOLULU, : : MARAKI 24, 1896.

 

HE LAINA MOKUMAHU HOU.

 

            Eia ke hoolalaia nei e hooholoia kekahi Mokumahu hou e like ka nui me Malulani, no Kona a me Kau. I ka nana aku ua hiki io mai hoi ka wa e hiki ai ke hooholoia kekahi moku hou no keia ala holo moana piliaina. Ina e hoomanaoia ka piha mau o ka Malulani i ka ohua a me ka ukana i na la i hala, ua maopopo e oi aku ana ka ohua a me ka ukana o keia mua aku, oiai na haole a me na lahui e ae e hookuonoono la ma keia mau apana ma na hana mahi kope, a pela aku.

            Pomaikai ka lehulehu ina e ku io ae ana he laina moku kuokoa hou ae. Ua manaoia iloko o Okatoba ae e hookumu ai keia laina; o ka Mahi-ko Hutchison ana ka ona o keia moku.

 

MAKE O W. JAS. SMITH.

 

            Ua kuu iho hoi ka luhi o keia kamaaina i ka Poakahi nei, mahope o kona kaa ma'i ana no eono mahina, i ke kakahiaka hora 9:45, i ke 57 o kona mau makahiki. He ma'i i ka puuwai ke kumu o kona make ana.

            Ua hanau ia o Mr. Smith ma Papaoia Tahiti, i ka la 24 o Augate, 1839. Ua hiki mai oia me kona mau Makua, Mr. Joseph H. Smith me kana wahine, i ka makahiki 1845. Mahope o kona hoonaauao ia ana ma ke Kula Alii o Kehehuna, a me ka noho ana ma ka oihana kalepa nona iho, a he kupakako i kekahi manawa, a ua lilo hoi oia he Kakauolelo o ka Papa Hoonaauao a hiki hoi i kona hoopau ia ana no kona hiki ole e lilo i kupa no ke aupuni repubalika. He hoa hoi oia a he kakauolelo no ka Aha Kukamalu mai ke au mai o Kamehameha.

            He kanaka oluolu o Mr. Smith iloko o kona mau la e ola ana, a he mea i ike nui ia a puni ka Paeaina. Ua waiho iho la oia i kona mau kaikuahine ekolu e ola nei, Mrs. J. H. Turton, Mrs. J. A. Hassinzer a me Mrs. Geo. Ross. Ua nalo aku la oia i ka hora 3 p. m. o kona la i make ai.

 

            He mau ahiahi puanuanu hoi keia o kakou.

            Eia ke hana ia nei kekahi bila kanawai auhau hou, i pii ae ai ka loaa o ke aupuni, a i hiki ai ke hookele ia hoi me ka hiki pono o kona mau lilo ke hookaa ia.

 

KELA ME KEIA.

 

            He mau po paani ohe keia o ka Bana aupuni repubalika.

            Mai poino i ka piano loaa wale ma kahi o L B. Kerr ma ke koho ana.

            He 30 ka nui o ka poe i ae ia he mau hoahanau no ka ekalesia Enelani.

            Pomaikai ka lahui kalavina ma Hilo ke kuai ole i ko lakou aina, e pii aku ana mahope koke aku nei.

            He 75 hapahaneri o na pephi kanaka, wahi a Mr. Romig, ma Amerika, ua ulu ae no ia mai ka inu rama. E ike e na Hawaii a noonoo.

            E kai ana na Pukiki no ka Hale Aupuni e waiho aku he Palapala Hoopii, mawaena o ka hora 9 a me 12 o ka Poakolu.

            He mau bapetizo hooluu ko ka ekalesia Karistiano, Alanui Alakea, hooluu e like me ka Karisto i ao ai a i hana ai ma kona mau haumana.

            Ke hoouna pololei nei kekahi mau mahiko o na mokupuni i ka lakou ko mai ko lakou awa ponoi aku no Kapalakiko. Pololei keia.

            Ua kauoka aku ka Aha Hookolokolo ia Mr. Hayne o ka buke puka mahina, aole e kamailio no ka hihia mawaena o ka ohana o Afona.

            Ke nana aku nei makou o ka lohe aku i na nuhou ano nui ma na aina e, ma ke ku ana mai o ka mokumahu lawe leta mai Kaleponi mai.

            E male ana o Miss Fannie Leleo Kinimaka me Mr Metcalf o Kahului wahi a ka lohe mai. Pomaikai ka poe mare, ina i mare me ka manaoio.

            Ke olelo nei kekahi Kahunapule he pane no ka bapetizo a me ka apipi-wai no ka hoailona hoohalike o ka make a me ke ola hou ana mai o ka Haku.

            He ekolu mano i hei i na koa P G ma ka Poakahi, mawaho aku o Mamala. He hookahi, he 11 kapuai 8 iniha ka loa, a he 8 a me 9 kekahi mau i'a iho.

            Ua mare o Mr. Wm. Lindsey o Waimea ia Miss Mary Rose o Hilo, a o Mr. F. Spencer o Waimea ia Miss Christiana See Loi no Hilo, i ka la 19 iho nei.

            Ua loaa ia o Hon. G. P. Kamauoha i ke kunu, aka, aohe nae he pio o ka leo paio o ka mea hanohano iloko o ka Ahaolelo. He oia mau no oia ia i ke alo pali.

            Ua loaa aku ia makou, ka Hon Godfrey Phokea, o ke au noho moi, mahope o ka nalowale ana aku ma Kaleponi he mau makahiki. Ua emi mai ka puipui kino, aka, he oia mau no ma na ano e ae a pau.

            He halawai hui opiopio kai malama ia ma ka ahiahi onehinei ma ka luakini o ka Hoomana Karistiano Naauao, ma ka nana aku me he la ua aneane haele like no laua maluna o ka ninau i paholaia ae i na opio, oia hoi "Heaha la ka mea i oi o ka Amala anei?" o ke Kamana anei?

 

L. B. KERR,

ma

NAE O KA HALEKUAI O MOGAN.

Alanui Moiwahine, : : : : Honolulu H., @.

 

KE KALEPA POLOLEI MAI NA HALE HANA MAI.

@

 

            E kuai ana i kekahi mea okoa a e kuai ai ma ka ma a ke kumu-kuai kukaa.

 

            He kupono i na lede e hele mai e nana mua maanei i ko makou puu waiwai nui mamua o ke kua

 

O KA HOOKAHI DALA I KUAI IA MA KAHI O L. B. KERR UA LIKE IA ME ELUA MA NA HALEKUAI E AE.

 

OIA HOI, UA LOAA IA OE NA LOLE

nona ke kumukuai Elua Dala HOOKAHI DALA WALE NO.

            NA PAPALE,

            Na Lipine

            Na Pua Papale

            Na Hulu

            Na Lihilihi.

            Na Mikinilima

            Na Lole

            Na Paku

            Na Keokeo Uhi-moe

            Na Kihei Huluhulu

            ECT ECT.

L. B. Kerr,

ALANUI MOIWAHINE.

Waikiki iho o ka Hale Kudala o Mogan.