Ka Oiaio, Volume I, Number 59, 24 March 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.         HONOLULU, MARAKI 24, 1896.  HELU 59

OIAIO PUKA LA -NA-

Keehina io Karisto La. -oo-

HAKUIA E MRS. E.G.WHITE.

KA MANAOIO A ME KA APONOIA'NA.

(Hoomau ia).

            E wiaho aku i ka manao kanalua i ko ke Akua haawi ana mai i kana mau olelo hoopomaikai nou.  No na lawehala mihi a pau ia mau pomaikai.  Ua hoomakaukauia ka ikaika a me ka lokomaikai ma o Karisto la, i lawe ia mai e na anela kokua no kela a me keia uhane manaoio.  Aole he lawehala i hiki ole ke loaa ka ikaika, ka maemae a me ka pono, iloko o Iesu, ka mea i make no kakou.  Ke kali nei oia e wehe ae i ko kakou mau kapa i lepo a paumaele me ka hewa, a hoaahu ia kakou me na kapa keokeo o ka pono; ke i mai nei ia ia kakou e ola aole e make.

            Aole e hana mai ke Akua me kakou e like me ka hana a kanaka kekahi i kekahi.  O kona mau manao he manao lokomaikai, aloha me ka menemene loa, Ke i mai nei oia, "E haalele ke kanaka hewa i kona aoao, a me ke kanaka lawehala, i kona mau manao; a hoi mai hoi oia io Iehova la, a e lokomaikai no oia ia ia, a i ko kakou Akua hoi, no ka mea, e kala nui loa auanei oia."  "E hoopau no wau i kou hewa e like me ke ao eleele, a me kou hala hoi, me he ohu la."  Isaia 15:7; 44:22.

            "Aole o'u oluolu i ka make o ka mea make, wahi a Iehova, ka Haku; nolaila, e huli mai oukou, a e ola."  Ezekeila 18:32.  Ua makaukau o Satana e aihue aku i na olelo hoopomaikai a ek Akua.  Ke makemake nei ia e hoopouli i kou manaolana, a e hoopio i kela a me keia kukuna malamalama mai ka Uhane mai; aole nae he pono ia oe ke ae aku ia ia e hana i keia mea.  Mai hoolohe i ka mea hoowalewale, aka e olelo, "Ua make o Iesu i ola au.  Ke aloha mai nei oia ia'u, aole hoi makemake ia ia'u e make.  He Akua menemene ko'u ma ka lani; a oiai ua hana ino aku au i kona aloha, oiai ua hoomaunaunaia na pomaikai ana i haawi mai ai no'u, e ala ae au, a hele i kuu makua, a e i aku, "Ua hana he wa aku wau i ka lani a ia oe; aole au e pono ke kapa hou ia mai he keiki nau; e hoohalike mai oe ia'u me kekahi o kau poe kauwa."  Ke hoike mai nei ka olelo nane i ke ano o ke kipa ana o ka mea auwana:  "A ia ia i kahi loihi aku, ike aku la kou makuakane ia ia, hu ae la kona aloha, holo aku la ia, apo aku la i kona a-i, a honi aku la ia ia."  Luka 15:18-20.

            Aka aole no i hoike ia keia olelo nane, oiai ka menemene a ehaeha,  i ke aloha paelan ole o ka Makua ma ka Lani.  Ke olelo mai nei ka Haku ma ka waha o kana kaula,  "Oiaio ua mau loa ko'u aloha aku ia oe; nolaila, ua hooloihi aku au i ka lokomaikai no'u."  Ier. 31:3.  Oiai ua mamao loa aku ka lawehala mai ka hale aku o ka Makua e hoomaunauna ana i kona waiwai ma ka aina e, ua mokumokuahua ka naau o ka Makua nona; o kela a me keia iini ana iloko o ka naau e hoi aku i ke Akua, oia no ke koi oluolu ana o kona Uhane, e koi ana, e kahea'na, e kauwo ana i ka mea auwana i ka naau aloha o kona Makua.

            E hiki anei ia oe ke kanalua, oiai aia imua ou na olelo hoomaikai waiwai a ka Baibala?  Ke manao nei anei oe, oiai ke makemake nei ka lawehale e hoi aku, oiai ua makemake e haalele i kona mau hewa, ua pale aku ka Makua i kona hele ana mai e mihi imua o kona mau wawae?  E kiola ae i ua mau manao la!  Aole mea e ae e hoehaeha ai i kou uhane e like me ia manao no ko kakou Makua Lani.  Ke inaina nei oia i ka hewa aka, ua aloha i ka lawehala, a ua haawi mai oia ia ia iho, ma o Karisto la, i ola na moa a pau i makemake ia, a i loaa i ka pomaikai mau ma ke aupuni nani.  He olelo ikaika ae anei a oi aku ka oluolu mamua ae o ka olelo ana i koho ai e hoike mai i kona aloha no kakou?  Ke i mai nei.  "E hiki anei i ka wahine ke hoopoina i kana keiki aiwaiu, i ole ia e aloha aku i ke keiki a kona opu?  Oia, e hiki no ia lakou e hoopoina, aka aole au e hoopoina ia oe."  Is. 19:15.

            E nana i luna, e na mea e kanalua nei, na mea e haalulu nei; no ka mea ke ola nei Iesu e uwao no kakou.  E aloha aku i ke Akua no ka haawina o kana keiki hiwahiwa, a e noi aku ia ia i ole e lilo kona make ana nou i mea ole.  Ke kono mai nei ka Uhane ia oe i keia la.  E hele mai me kou naau a pau io Iesu la, a e hiki no ia oe e koi i kona hoopomaikai ana.

            A heluhelu oe i na olelo hoopomaikai, e hoomanao oe i kana mau olelo aloha lua ole a me kona menemene palena ole.  Ua kauwo ia ka laau nui o ke aloha palena ole i ka lawehala me ke aloha menemene lua ole.  "Nona mai ke ola ia kakou ma kona koko, ke kala ana i na hala."  Epeso 1:7.  Oia, e manaoio i ke Akua kou kokua.  Ke makemake nei oia e hoihoi aku ia oe i kona alo.  E like me kou hookokoke ana ia ia me ka hai ana i ka hewa a me ka mihi, e hookokoke mai oia ia oe me ka lokomaikai a me ke kala ana i ka hala.

KA HOOIA ANA I KE ANO O NA HAUMANA.

            "Ina iloko o Karisto kekahi kanaka, he mea hou oia; ua hala aku la na mea kahiko; aia hoi, ua ano hou ae la na mea a pau."  2 Kor. 5:17.

            Aole paha i hiki i kekahi kanaka e hai maopopo mai i ka manawa a i kahi i noho ai i ka wa i huli mai ai oia, aole hoi i na mea a pau e pili ana; aole nae keia he mea i hoike mai i kona huli ole mai.  Olelo aku o Karisto ia Nikodemo,  "Ke pa nei ka makani i kana wahi i makemake ai, a lohe no oe i kona halulu, aole nae oe i ike i kana wahi i hele mai ai, aole hoi i kana wahi e hele aku ai: pela hoi na mea a pau i hanauia e ka Uhane."  Ioane 3:8.  E like me ka makani i ike ole ia, ua ike maopopo ia nae kona hana a me kona pa ana mai, pela ke ano o ka hana a ka Uhane a ke Akua iloko o ka naau o ke kanaka.  O ua mana hanau hou la, i ike ole ia e ka maka o kanaka, oia ke hoohanau hou nei he ola hou ma ka naau; ke hana nei oia ia he mea hou ku i ke ano o ke Akua.

Aole i pau.