Ka Oiaio, Volume I, Number 55, 18 March 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.         HONOLULU, MARAKI 18, 1896.  HELU. 55

OIAIO PUKA LA

NA

Keehina io Karisto La.

HAKUIA E MRS. E. G. WHITE

KA HOOLAA ANA.

(Hoomau ia).

            Penei ka ninau a kekahi mau naau hookiekie he lehulehu, "No ke aha la he pono anei ia'u ke mihi a hoohaahaa ia'u iho mamua o ko'u ae ia ana e ke Akua? Ke kuhikuhi aku nei au ia oe io Karisto la. Aole ona hewa, oia hoi ke alii o ka lani; ua auamo nae oia i ka hewa no kanaka. "Ua helu pu ia oia me ka poe lawehala; a halihali no oia i ka hewa o na mea he nui, a nonoi aku la oia no ka poe i lawehalaia." Isaia 53:12.

            Aka nae heaha ko kakou mea i haawi aku ai, ina i haawi lilo aku ina mea a pau? Ha naau paumaele na Iesu e hoomaemae mai nana e holoi iloko o kona koko ponoi, nana hoi e hoola me kona aloha Ina ole. Eia nae, ke manao nei kanaka, he mea paakiki ka haawi ana aku i na mea a pau! Hilahila a a ke lohe, hilahila ke kakau ia mea.

            Aole makemake ke Akua ia kakou e haawi aku i na mea kupono i ko kakou ola ke koe mai. Ma na mea a pau ana e hana ai, ua imi oia i ka pomaikai o kana mau keiki. Ina hoi e hoomaopopo na mea a pau i koho iho ia Karisto, he oi loa aku na mea ana e haawi mai ai mamua o na mea a lakou e imi nei no lakou iho. Ke hana ino loa nei a ke hoopilikia nei ke kanaka i kona uhane iho oiaio e noonoo kue ana a e hana kue ana i ko ke Akua makemake. Aole he olioli oiaio me ke ala i papaia e ka mea ike i ka mea kupono, ka mea hoi i imi i ka pomaikai o kana mau mea i hana'i. O ke ala o ka hewa oia ke ala o ka pilikia a me ka poino.

            He kuhihewa ka manao ua oluolu ke Akua i ka ike ana i ka ehaeha o kana mau keiki. Ua makemake nui ka lani holookoa i ka pomaikai o kanaka. Aole pani aku ka makua lani i ke alanui o ka olioli imua o kekahi mea ana i hana ai. Ke kahea mai nei ke Akua ia kakou e haalele i na mea e loaa ai ka ehaeha a me ka hoka o ka manao, na mea e pani ana i ka ipuka o ka pomaikai o ka lani. Ke ae nei ka Hoola o ke ao nei i na kanaka e like me ko lakou ano i keia wa, me ko lakou iini ana, ko lakou mau kina a me ko lakou mau nawaliwali a pau; aole o ka holoi ana mai i ka hewa a me ke ola ana o kona koko wale no kana e haawi mai ai, aka e hooko no ia i ka iina ana o ka naau a pau e ae ana e auamo a e hilahila i kona haawe. Eia kona makemake, e haawi mai i ka malu a me ka maha i ma mea a pau i hel@ mai i ona ala no ka berena o ke ola. O kona manao e hana aku kakou i na mea e alakai aku ai ia kakou i ka pomaikai kiekie, kahi e hiki ole aku ai o ka poe hoolohe ole. O ka olioli oiaio o ka uhane, oia no ka noho ana o Karisto iloko, ka manaolana no ka pomaikai.

            He nui na mea e ninau nei, "Pehea la wau e haawi lilo aku ai ia'u iho io ke Akua la?" Ke makemake nei oe e haawi aku ia oe iho ia ia, aka he nawaliwali kou manao, he kauwa no ke kanalua, a ua maa loa i ka hana hewa. Ua like kou mau hoohalike ana me na kaula ona.

            Aole e hiki ia oe ke hoomalu i kou mau noono, kou mau makemake, a me kou ano aloha. No kou ike ana i kou hoohiki ana a i kou ae ana e uhakii@, nolaila ua nawaliwali kou hilinai ana i kou oiaio, a nolaila ua manao oe aloe e hiki i ke Akua e ae aku ia oe; aole nae he pono ia oe ke hoopoho i ka manao. He pono ia oe ke hoomaopopo i ka mana oiaio o ke koho ana. Oia ka mana e noho alii ana iloko o ke kanaka, ka mana e hooholo ai, ka mana e koho ai. A maluna o keia mana ke kau nei kou pomaikai. Ua haawi mai ke Akua i kanaka i ka mana koho; o ko lakou hana ia ana: Aole hiki ia oe ke hoololi i kou naau, aole e hiki ia oe ke haawi aku i ke Akua kou aloha; aka ua hiki no ia oe e koho e hookauwa aku nona. Ua hiki no ia oe e haawi aku ia ia i kou ano koho, a nana e hana iloko ou, i ka makemake a me ka hana e like me kona manao aloha. Pela e hooliloia ai kou ano a pau malalo o ka mana o ka Uhane o Karisto; e hookumuia kou aloha maluna ona, a e like kou noonoo me kona.

            Ua maikai no na iini ana no ka pono a me ka hemolele e like me ka hiki ana; aka ina o ka iini wale no, aole e waiwai. He nui na mea e poino ana e makemake ana e lilo i Karistiano. Aole i koho pono i lakou i ke Akua. Aole i koho lakou e lilo i mau Karistiano oiaio.

            Ma ke koho pono ana, e hoolilo loa ia ke ano o kou noho ana. Ma kou koho ana ia Karisto i alakai nou, ua hoohui aku oe ia oe iho me ka mana maluna ae o na alii a me na mea mana. E loaa ia oe ka ikaika mai luna mai e kupaa ai, a pela ma ka hoolilo mau ana ia oe iho no ke Akua e hiki ai ia oe ke ola me ke ola hou, oia hoi ke ola o ka manaoio.

KA MANAOIO A ME KA APONOIA'NA.

            I ka hoolaia'na o kou lunaikehala e ka Uhane Hemolele, ua ike oe i kekahi hapa ino o ka hewa, i kona mana, kona bala a me kona poino: a ua nana ae i ka hewa me ka hoopailua loa. I ka ike ana ae o ka hewa kai hookaawale ia ae mai ke Akua mai, a he pio ia no ka mana o ka hewa. E like me ka uilani ana e pakele ai, pela e ike ai oe i kou nawaliwali. He pelapela kou mau makemake; he paumaele kou naau. E ike ana oe ua piha kou noho ana me ka alunu a me ka hewa. Ua iini loa oe e kalaia mai, e hoomaemaeia, a e hookuuia. Pehea la e loaa ai ia oe ka lokahi ana me ke Akua, ke ano like me ia?

            O ka malu kou mea e pono ai, o ke kalaia na a me ka malu a me ke aloha o ka lani ma ka uhane. Aole e hiki ke kuai ia me ke kala, aole e loaa ma ka noonoo ana, aole e lilo mai me ka naauao; aole e loaa ana ma kou hooikaikia ana. Aka ke haawi mai nei ke Akua ia oe me he makana la, "me ke kala ole, a me ke kumu ole." Isaia 55:1. Nou no ia, i na e kikoo ae oe i kou lima a lalau aku. Ke i mai nei ka Haku, "Ina paha i like ko oukou hewa me na kapa ula, e keokeo auanei ia me he hau la; ina paha i ula loa e like me ka mea ulaula, e like auanei ia me he hulu hipa la" Isa. 1:18.

            Aole i pau.