Ka Oiaio, Volume I, Number 54, 17 March 1896 — Page 2
| This text was transcribed by: | Melissa Eskaran |
| This work is dedicated to: | Awaiaulu |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA
JOHN E. BUSH, Luna Hooponopono a me @
HONOLULU, MARAKI 17, 1896
PIHA HAUOLI
Mamuli o ka manao kuko o kanaka, i ko lakou wa i lohe ai e hiki mai ana he elua mau moku manawa Beritania i Hawaii nei, ua olelo koke ae la hoi lakou e hele mai ana ia mau moku e hoihoi i ke aupuni moi. Aole makou i ike he kumu io maoli kekahi e ku ai keia kuko. Ma na mea i ike ia, a i lohe ia, me he la paha e holo mai ana laua e kakoo aku i ke koi poho a ke aupuni Enelani no kona mau kupa i hoopaahao ia me ka hookolokolo ole ia ana iloko o ke kau kipi a na kamalii i hoolaha ai i ka la 6 o Ianuari 1895.
NA NU HOU HOPE LOA
Ua ano like no na nuhou hope loa mai nei ma ka mokumaha Auseteralia o ka Poakolu me ko ka Monowai o ka Poaono nei. He okalakala ka manao o kekahi hapanui o na lahui kanaka. Me he lai ka nana aku, ke ulu nui nei ka pohihihi o na hana a ka hewa iwaena o na lahuikanaka, e like me ka olelo a ke Akua, eia ke hana nei a e kuu ia ana hoi e hana a hiki i ka manawa e pau ai o ko ke Akua hoomanawanui ana i na hana ino kue i ka pono a na kanaka. Pela iho la ke kulana o na aupuni a me na lahuikanaka, he anoe maoli no, a ua lilo he mea pohihihi i na kilo aupuni ke hoomaopopo i ke kumu o keia mau kuee o ko ke ao e noho nei. Ua komo ka hopohopo iloko o na loea kalai aupuni no na mea e hiki mai ana, a he hookahi wale no hana nui a lakou o keia wa, he hoomakaukau no ke kaua. Wahi a na haku manao mea hou no na nupepa, ua like o Europa me kekahi kahua hoomoana o na pualikaua o kela a me keia lahui, e pahola ana hoi keia uhane ma ka Hikina ma Asia, ma ke komohana i Amerika, a ma ka hema i na Repubalika o Amerika Hema.
Ua wanana mua mai ka Haku e hiki mai ana keia mau mea e ikea nei i keia mau la, he mau hoailona keia no kokoke kona wa e hiki hou mai ai i keia ao. Nana ia Mataio 24, Mareko 14, a me Luka 21, aia malaila ka moolelo oiaio, ke ki nana e wehewehe i ke kulana o na mea a pau e hoea mai ana ma keia honua a hiki i ka hopena o keia noho ana o ka lahuikanaka o ke ao. Ua hooko mau ia na hoailona a ka Haku i kuhikuhi mai ai i ko ke ao nei, i kukui ma ka po a i hoailona i ke ao no ke alahele o ka lahuikanaka ma keia noho ana, a i ike pono ai lakou i na keehina a pau o ke au o ka manawa a hiki aku i ka hopena.
Ua hala aku la ka nui o na hoailona a ka Haku i olelo ai e hiki mai ana, ua hala aku ka pouli ana o ka la a me ka mahina, a me ka helelei ana o na hoku, a eia ke hooko ia nei keia mau olelo, Luka 21:25, hapa hope a me pauku 26.
“* * * a maluna o ka honua hoi ka pilikia ana o ka lahuikanaka, me ka pilihua; e haalulu ana ke kai o ke kupikipikio. E maule no hoi na kanaka, i ka makau a me ka manao ana i na mea e hiki mai ana maluna iho o ka honua, no ka mea e hoonaue ia ana na mea mana ma ka lani.”
He oiaio, ke noho pilihua nei kela a me keia lahui, kela a u e keia aupuni, kela a me keia ohana. Eia ke hiki mai nei na leta a na ohana i ka poe ia anei e hoi aku e komo i ka puali koa o Italia, pela no paha mai na lahui e ae. He mau hoike keia i ke kulana kupilikii o na aupuni e noho la ma Europa. O keia ano, eia ke pahola nei a puni ke ao, eia ma Hawaii nei. Ma na nuhou hope loa, aia hoi na fii o Europa ke hui olelo la ma na uwea telegarapa, e pili ana i ke kulana o ko lakou mau aupuni, a me ka hana kupono a lakou e hana ai. Aia o Rusia a me Farani, ke hoolala la a ke hana nei i na hana hoeneu poholalo, e pio ole ana a hiki i ke kaua maoli ana, oia kaua ke kaua huhamahi.
KELA ME KEIA
Nui ka inaina o na Sepania ia Amerika.
Ua hoi mai ka Moiwahine mai Waialua mai.
Apopo ka la hanau o ka Peresidena Cleveland.
Ua hoi mai o Mrs. Elezabeth J. Parker mai Amerika mai, ma ka Australia.
Hopu ia o Kluse ma Koolau, no ke puhi alekohola ma Waiahole.
Ua hoi mai o Julien D. Hayne, o ka L. H. buke puka malama “The Hawaiian.”
Ua hookuu ia o C. L. Brito e ke kiure, ma Kauai, no ka hoopii apuka i ka dala a kekahi hui hana aloha.
E hoi ana o H. A. Widemann me kona ohana no Waianae no kekahi manawa, a hoi mai kona luna mahiko.
Ua hiki mai maluna o ka Warrimoo kekahi mau hipi i lole ia, a i malama ia ma ka hale hau no keia kulanakauhale.
He noi ka Mr. Hanuna e hookomo ia $400 no ka wahine kane make Mrs. Kawainui, ma ka bila haawina. Aole i ae ia.
Mai poino hoi ke kamaliiwahine Kaiulani i ka lapa uwila iaia i eu ae ai e bele e paina awakea, oiai oia ma Parisa, i keia mau pule aku nei.
I ka hoi ana aku o ke kuke o ka moku Hackfeld iluna o ka moku i ka po Poaono nei, ua ho i ia mai la oia i ka pahi e kekahi sela ona rama, e moe ana maloko o kona rumi.
He mau hoololi kumukanawai kekahi imua o ka Ahaolelo o Amerika e ulu ai na hana hoopilikia a na hoomana i kekahi hoomana, ma ke kanawai, e kauoha ia na mea a pau, e hoomana ma ka la mua o ka hebedoma, oia hoi ka lapule.
He kii pai ia ko ka “Hawaiian News Co,” e hoike ana i ke kii o ke aumoku kaua o Enelani, i olelo ia o ka lalani palekaua mua ia o ke aupuni Enelani. Ua olelo ia aole he papu e ku nei i hiki ke hoohiolo ole ia e kekahi o na @ nui iloko o kekahi mau h@.
L. B. KERR,
MA
NAE O KA HALEKUAI O MOGAN
Alanui Moiwahine Honolulu, H.I.
KA KALEPA POLOLEI MAI NA HALE HANA MAI
E kuai ana i kekahi mea okoa a e kuai ai ma ka i-a ma ke kumukuai kukaa.
He kupono i na lede e hele mai e nana mua maanei i ko makou puu waiwai nui mamua o ke kuai.
O KA HOOKAHI DALA I KUAI IA MA KAHI
O L. B. KERR UA LIKE IA ME ELUA
MAI NA HALEKUAI E AE
OIA HOI, UA LOAA IA OE NA LOLE
nona ke kumukuai Elua Dala HOOKAHI DALA WALE NO.
NA PAPALE
Na Lipine
Na Pua Paepae
Na Hulu
Na Lihilihi
Na Mikinilima
Na Lole
Na Paku
Na Keokeo Uhi-moe
Na Kihei Huluhulu
ECT ECT
L. B. KERR,
ALANUI MOIWAHINE
Waikiki iho o ka Hale Kudala o Mogan