Ka Oiaio, Volume I, Number 50, 11 Malaki 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 50 keneta o ka mahina.

BUKE I.                     HONOLULU, MARAKI 11, 1896.              HELU 50

 

OIAIO PUKA LA NA

K eh na io karisto La.

HAKUIA  E  MRS  E. G. WHITE.

----------

 

KA MIHI.

(Hoomau ia).

O ke ano hewa hookahi o ka noho ana, hookahi makemake hewa, i hahai mau ia, e lilo no ia i mea e hoopau ai i ka mana o ka euanelio.  Ke hooikaika nei kela a me keia e komo iloko o ka hewa i ko ka uhane hoowahawaha ana i ke Akua.  E ohi no ke kanaka hoopaakiki ma ka aia, a me ka makemake ole i ka oiaio mai ke Akua mai, i ka hua ana i lulu ai nona iho.  Ma ka Baibala aole he leo ao oi aku o ka weliweli mamua o na hua olelo o ka ke kanaka naauao, "E puni ka mea hewa i kona hala iho, e heiia hoi oia i ka hei o kona hewa iho." Sol. 5:22.

 

Ua makaukau o Karisto e hookuu ia kakou mai ka hewa mai, aole nae oia i hoohuli aku ia kakou me ko kakou makemake ole; a ina ma ka hoopaakiki ana mamuli o ka hewa ua mau loa ke koho ana i ka hewa, aole no hoi i makemake kakou e hookuuia, ina aole o kakou ae aku i kona lokomaikai, heaha la kona mea o hana hou aku ai?  Ma ko kakou hoole ana i kona aloha ua hoopoino loa kakou ia kakou iho.  "Aia hoi, ano ka manawa e maliuia mai ai; aia hoi, ano ka la e olaʻi."  "I keia la, i ko oukou lohe ana i kona leo, mai hoopaakiki i ko oukou naau."                       2 Kor. 6:2, Heb. 3:7,8.

 

"Ke nana nei ke kanaka i na helehelena, aka, ke nana nei o Iehova i ka naau,:          1 Sam. 16:7, ka naau o ke kanaka, me ke ano paoniooni o ka olioli a me ke kaumaha, ka naau auwana, helehewa; kahi e noho nei ka paumaele a me ka hoopunipuni.  Ua ike no ke Akua i ke ano o kona makemake a me kona mau noonoo a pau.  E hele io na la me kou uhane paumaele.  E like me ka mea Hakumele, e wehe ae i na keena a pau imua o ka maka e ike ana i na mea a pau, me ka olelo, "e huli mai oe iaʻu, a e ike i koʻu naau; e hoao mai oe iaʻu, e ke Akua, a e ike i koʻu manao.  E nana mai hoi ina paha he aoao hewa iloko oʻu, a e alakai iaʻu ma ka aoao ola loa."  Hal. 139:23,24.  He nui na mea i ae aku i ka hoomana o waho, e "hookohukohu manao ana i ke Akua," aole nae i hoomaemae i ka naau.  He pono ia oe ke pule aku, "E haawi mai i naau maemae noʻu, e ke Akua; e hana hou mai hoi i uhane kupono iloko oʻu."  E hana oiaio me kou naau iho.  E hooikaika, a e hoomau i kou hooikaika ana, me he mea la malaila kou ola.  Mawaena o ke Akua a me kou uhane iho e hooponopono ai i keia mea no ka wa pau ole.  Ina he kuhihewa kou manaolana, e poino loa auanei oe.

 

E imi i ko ke Akua olelo me ka pule.  Ke hoike nei ua olelo la imua ou, iloko o ke kanawai o ke Akua a me na loina o ko Karisto ola ana, ke ano nui o ka hemolele, "aohe kanaka i nele ia mea e ike aku i ka Haku."         Heb. 12:14.  Ke hoike mai nei oia i ka hewa; ke hoike maopopo mai nei i ke ala o ke ola.

 

E hoolohe aku iaia, oia ka leo o ke Akua e kamailio nei i koʻu uhane.

 

Aia a ike oe i ke ano ino loa o ka hewa, aia a like oe i kou ano maoli, mai hoopoho i kou manao.  Ua hele mai o Karisto e hoola i na lawehala.  Aole na kakou e hoolaulea i ke Akua, aka, no ka nui o kona aloha!  Penei a, ke hoolaulea nei ke Akua i ko ke ao nei nona iho ma o Karisto la."  2 Kor. 5:19.

 

Ina e hele mai o Satana a olelo mai ia oe he mea hewa loa oe, e nana iluna i kou Hoola, a kamailio ae ma kona lokomaikai.  O kona malamalama ka mea e kokua ai ia oe.  E hai aku i kou hewa, aka, a e i aku i ka enemi.  "Ua hele mai o Karisto Iesu i ke ao nei e hoola i ka poe hewa.  1 Tim. 1:15 a e ola no oe ma kona aloha lua ole.  Ua ninau aku o Iesu ia Simona no na mea aie elua.  Ua aie kekahi i kona Haku he mea uuku, a o kekahi he mea nui loa; aka, na kala aku la oia ia laua a i elua a ninau aku la o Iesu ia Simona.  "O ka mea nana ka aie nui."  Luka 7:43.  He mau lawehala no kakou, aka n@ make o Karisto i kala ia ai kakou.  Ua lawa ka waiwai o kona mohai ana imua o ka Makua no kakou.  E aloha oi aku ia ia ka poe i kala nui ia, a e ku kokoke i kona alii e hoolea aku ia ia no kona mohai palena ole.  Aia a hoomaopopo lea kakou i ke aloha o ke Akua e ike pono loa ai kakou i ke ano hewa loa o ka hewa.  Aia a like ae kakou i ka loihi o ke kaula hao i hookuuia no kakou, aia a hoomaopopo iki kakou i ka mohai palena ole a Karisto i kaumaha aku ai no kakou, alaila e uwe ko kakou mau naau me ka ehaeha a me ka mihi.

----------

 

KA HAI ANA I KA HEWA.

"O ka mea hana i kona hewa iho, aole oia e pomaikai; aka, o ka mea hooia a haalele hoi aloha ia mai oia.   Sol. 28:13.

 

He akaka a ku i ka pono a me ka noonoo no na mea e loaa mai ai ka lokomaikai o ke Akua.  Aole i makemake ke Akua ia kakou e hana i kekahi mea kaumaha i loaa ia kakou ke kalaia ana o ko kakou hewa.  Aole waiwai na kaahele ana he ehaeha a loihi, aole hoi na hana penetenia, i mea e hoolaulea aku ai i ke Akua o ka lani no ko kakou mau hewa; aka o ka mea hai aku i kona hewa e aloha ia mai oia.

 

Ke olelo mai nei ka lunaolelo, "E hai aku i ko oukou mau hewa kekahi i kekahi, a e pule hoi kekahi no kekahi.  i pohala ai oukou."  Iakoba 5:16.  E hai aku i ko oukou mau hewa i ke Akua, oia wale no ka mea mana e kala mai, a i ko oukou mau kina kekahi i kekahi.  Ina ua hana hewa oe i kou makamaka a i kou hoalauna paha, e hai aku oe i kou hewa, a he pono ia ia ke kala oluolu mai ia oe.  He pono no hoi ia oe ke noi aku i ke Akua e kala mai oia ia oe, no ka mea o ka hoahanau au i hoeha ai no ke Akua no ia, a i kou hana ino ana ia ia ua lawehala aku oe i kou mea nana i hana, a i kou Hoola.  Ua lawe ia mai kou hewa imua o ka mea uwao, ko kakou Kahuna Nui ka mea i "hoowahawahaiaʻku i na mea a pau me kakou la i hoowalewaleia mai ai, a me hoi ona hala;"  Heb. 4:15.  Ua aloha mai i ko kakou mau nawaliwali, a na hiki ke holoi aku i ko kakou mau hewa a pau i paumaele ai.

            Aole i pau.