Ka Oiaio, Volume I, Number 46, 5 March 1896 — Page 2
| This text was transcribed by: | Victoria Hollinger |
| This work is dedicated to: | Awaiaulu |
Ka Oiaio Puka La
KA OIAIO PUKA LA.
-------------
JOHN E. BUSH, Luna Hooponopono ame Puuku
------------------------
HONOLULU. : : : : : : MARAKI 5, 1896.
----------------------
E KIAI A MAKAALA.
--------
He mau la nui keia o ka omaimai, mamuli o ka pa loihi ana o ka makani ma ka hema mai me ka ikiki o ka ea, a punia mai ka hope, kunu a fiva pu hoi. Ke poloai aku nei makou i ka lehulehu e kiai a makaala i keia mau la, oiai e loli ana na kau. O ka mea nui a ke kanaka e malama ai oia no kona ai ana i na mea ai maemae, aole i ka n@i ai, a i ka hoonuu ai, aka, i ka ai a me ka ia kupono. Pela hoi e makaala loa i ka mea inu, he wai a he waiu bipi paha, e hoomoa e pono ai. E waiho i ka ai nui ana i na io holoholona; ua oi aku ka lau nahele a me na hua ai mamua o na io holoholona. He emi ke kumukuai, he oi aku ka oluolu o ka opu, a he oi aku no hoi o ka ikaika o ke kino, a me ka mau o ke ola maikai ana. E waiho loa i na waiona o na ano a pau. Mai nana i ka waiona, no ka mea he hopena awahia kona, a he make maewaewa ka panina, me ka waiho hemahema iho i ka hope me ka waiona ole e pono ai ka noho ana. He nui ka nawaliwali o ka poe opio i hookiekie i ka leo ao a inu nui hoi ka waiona me ka ahuai i ke kino ma na ano lapuwale, e mauna ana i ko ke Akua lokomaikai a me kona hoomanawanui. Aia no ia kakou ke ola ana e like me ke ana o ka ikaika o ke kanaka, a me ka pahupu paha. Hookahi no nae rula kumu o ke ola, oia ka hoolohe a me ka malama ana i na kauoha a ka Makua Lani e like me ia i malama hemolele ia e Iesu ko kakou Haku a me ko kakou alakai no keia noho ana a me ka noho ana mau loa me ka Makua. He aloha no ko kakou noho ana a nalowale aku kekahi, aka, o ka mea oi loa aku o ka walohia o ka poino pu ana o ko kakou ola ke hoala hou ia mai ka make mai, no ka hookuli.
---------------------
KA PONO A ME KA HEWA.
-----------
O ka pono he pono ia, a o ka hewa he hewa ia. O keia ka mea hoomaopopo loa a ke Karistiano, i kohu ai ka inoa o ke Keiki a ke Akua iaia. Ua ao mai oia, aole e hiki ia kakou ke noho launa hewa me na mea o Kaikera no ka malama ana i ka pono. Hookahi no alanui o ke Karistiano, o ke alanui ololi pololei o ka pono, hookahi no pailaka o ka OLELO, hookahi no manaoio ma o Karisto. Ma na ninau a pau e pili ana i ka noho ana o keia ao, hookahi no rula, oia ke kanawai o ke Akua, i kakau ia ma ka pohaku ma ke Kauoha Kahiko, a i kakau ia maloko o ka naau o kanaka ma ka berita hou. O keia rula no ko ka noho ana ma ka Lani, he loli ole, he mau loa, a he hemolele, e like me ko ke Akua hemolele. E apono ana no anei ke kanawai a me ka lokomaikai o ke Akua e kuai laikiki ia ka opiuma, e laikini ia ka rama, e laikini ia ka moekolohe, ka aihue a me ka pepehi kanaka, a a me na hewa e ae i papa ia ai e ke kanawai o ka pono? E na hoa Karistiano, ke pule nei makou e o oukou, o kau mai anei ka hoopai i ilihia iho maluna o ka Iseraela, i lawe ia ai i Babulona, i hoopuehu ia ai a keia la, no ko lakou haowahawaha i ke Ola mai ke Akua mai. Aole e hiki ia lakou ka mana hooko, ka mare lehulehu, ka lawe i elua haku, a ke malama i hewa ko lakou poo. E kipaku loa aku i ka hewa me na kanawai pono, a e kiai me ka makaala loa e kinai aku i ka hewa. O ka lawe ana o ke kanaka i kekahi hana hewa i mea e emi mai ka hewa, na puni oia i na alakai hewa a ke ane-Karistiano. E koho kakou mahope o ka pono i na wa a pau!
-------------------
KELA ME KEIA
-------------------
He Kona ke pa nei i keia la.
Nui a eloelo na pakaua oneihinei, a me ka ponei.
Ua ku mai ka moku kaua Amerika Adamu i ka la Kapule nei.
O na lilo o ka hoomaemae hou ana i ka hale mele hou he $25,000. Nui no kela.
E huli hoi ana o Kuhina Willis no ka hoomaha iki, i keia mahina ae o Aperila 15.
Laki ke keaka ma ka Hale Keaka Lio no ke kokua ana i ka Halema’i Hoohanau.
Ua holo aku ka Bennington no Alaska. O ka Adamu ke ku nei ma kona wahi.
E hoomaha ana ke kula Kaikamahine o Kawaiahao, no hookahi pule, no ka hooponopono hou ana.
Ua loaa aku hoi he Pake ua hikii ia me ke kaula ma ke Alanui Sheridan, Kewalo e waiho malie ana.
Ua wawahiia ka Hale pohaku ma nae iho o ka Baneko o Bihopa, a e kukuluia ana he hale pohaku nui ae malaila.
Ua hiki mai ka buke puka mahina, a J. D Hayne, me kona mau kii hoohenehene. Ma Kapalakiko i paiia ai.
Ua wawahi ia ke pi@i o ka hale kula haole mahope aku o ka halepule o Kawaiahao, no ka hana hou ana i pili hou.
Me he ala, eia o Opiuma Baraunu ma ke kua o ke kanawai Opiuma kahi i ku ai, oiai eia oia i Hawaii nei i keia mau la, pela io paha, a i ole aiaio no.
E hoomauia aku ana no ka halekuai o J. T. Waterhouse i make e kana wahine, malalo o ka hooponopono ana a Henry Waterhouse.
He nui na nema ana o ka nupepa puka kakahiaka o ka Poakolu nei ia Peresidena Kalivalana, no ke kakoo i ka Moiwahine Liliuokalani.
Wahi a ka mea hanohano o Hana Maui i hoike ae ai i kona manao o pili ana i ke kanawai opiuma mamua ike ia na wahine haole e hele ana iloko o ka hale Ahaolelo e uwe ai, i ke ino o ka opiuma, a i keia wa aohe ike ia heaha la ke kumu.
L. B. KERR,
------- ma -------
NAE O KA HALEKUAI O MOGAN.
Alanui Moiwahine, : : : : Honolulu, H. I.
_____________________
KE KALEPA POLOLEI MAI NA HALE @ANA MAI.
_____________________
E kuai ana i kekahi me okoa a e kuai ai ma ka i-a ma ke kumukuai kukaa.
He kupono i na lede e hele mai e nana mua maanei i ko makou puu waiwai nui mamua o ke kuai ana aku i kahi e aku.
O KA HOOKAHI DALA I KUAI IA MA KAHI
O L. B. KERR UA LIKE IA ME ELUA
MA NA HALEKUAI E AE.
_______________________________
OIA HOI, UA LOAA IA OE NA LOLE
nona ke kumukuai Elua Dala HOOKAHI DALA WALE NO.
NA PAPALE,
Na Lipine
Na Pua Papale
Na Hulu
Na Lihilihi
Na Mikinilima
Na Lole
Na Paku
Na keokeo Uhi-moe
Na Kihei Huluhulu
ECT ECT. (sic)
L. B. KERR,
ALANUI MOIWAHINE,
Waikiki iho @@ ka Hale Kudala o Mogan.