Ka Oiaio, Volume I, Number 33, 17 February 1896 — Page 2

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA OIAIO PUKA LA.

_____

JOHN E.BUSH, Luna Hooponopono a me Puuku

_____

HONOLULU, FEBERUARI 17, 1896.

_____

HE MAHUAHUA KA IKE.

 

            Ke hookoia nei kela olelo a ke Kaula i olelo ai, ma ka hapa hope o ka pauku 4 o Daniela 12, e i ana, "a e mahuahua ana no ka ike."  He oiaio o keia keneturia ka oi o ka holomua ma ka ike, a eia no ke puu mau nei no ka ike me ke kamahao.  O na mea nui hoi e ikea nei, oia no na ike ma na mea e pili ana i ka uwila.  Ma na mea kaua, ma na mea hoomake, ma na mea hoola, eia ke hookawa ia nei keia mea ikaika palena ole he uwila.  Ma ke ano o ka uwila, ua hiki ke pai ia a ike ia oloko o ke kanaka; oia hoi ka aole he ike ia o ka io na iwi a me na mea nae oloko ke ike ia.  O keia kekahi o na hana kamahao loa o keia au.  Aka, aole nae keia o ka palena o na mea e hoike ia ana i ka ike o ke kanaka.  He weliweli a pahaohao na mea hou a ke Akua e hoike ana i ka ike o ke kanaka iloko o keia mau makahiki pokole mamua aku nei.  E hele pu mai ana no nae hana hoopunipuni a ka hoopunipuni o ke ao.

_____

NA NUHOU HOPE LOA.

            Ma na nuhou hope loa i hiki mai i keia mau la, ke mau la no ka noho ana hoeueu o na lahui.  Ke ku hookaulua ike nei hoi na aupuni mana nui o Europa, aka, he manawa wale no.  Ke pua maopopo loa mai la na hiohiona o na hana a me na manao o na lahui o Europa, a me na wahi e ae kekahi, a ua aneane loa ua hiki mai ka manawa e hiki ole ai ke kaohi ia mai ka manao kaua iloko o lakou.  Me he la, he mana kekahi o ke ao e hoeueu nei i na lahui kanaka e luu-poo aku iloko o na inea a me na hana pilikia e hoopoino i ko ke ao a pau.  Aka, he mana no hoi kekahi e kaohi ana, e hoomanawanui ana, a hiki i ke kupono ana o ka manawa, alaila e kuu ia ae ai na hana weliweli a kekahi lahui maluna o kekahi lahui, a e like me ka hulihia aku ai na mea a pau ma keia hope aku.  Ua holo ia mea, ua ike ia mai kinohi mai, a ua paa ma ka moolelo, koe ka ike ole ia iho mamuli o ka pouli o ko ke kanaka ike i ke alakai ia e ka manao hoopouli a me ka hookiekie.

            He mea ano e no hoi ka ulu mau o ka hoopaapaa mawaena o na aupuni i keia mau la.  Ua waiho aku o Enelani i kana olelo pane ia Berezila no ka mokupuni o Ternidala.  Me ka i aku, oiai o Beritania ke noho paa la ia mokupuni, ina aole e ae mai oia no ka aha uwao e noonoo no ia mea, alaila, e paa ana oia ia mokupuni nona, a e kali ana oia no ka pane a ka la 12 o Feberuari i hala iho la.  E olelo aku ana no hoi ke aupuni Beritania, i ka wehe ia ana o ka Ahaolelo, e hoike ia aku ana hoi i ka haiolelo a ka Moiwahine, ua lawe ae ke aupuni a eia ke paa nei ia Trinidada nona ke ole he mau kumu e loli ai ia mea ma ka Berezila pane ana.

            Ua hoouna aku hoi ke Kuhina Italia ma ka Berezila, i kona aupuni, i kona manao he kupono e hoopau ia ka noho ana o ka oihana Kuhina ma Berezila, no ka hoolalau mau oia aupuni i ka pane ana i na koi poho a ke aupuni Italia no kona poe kupa i hoopoino ia ma ke kaua kuloko ana aku nei mamua.

            Ke koi nei o Farani ia Berezila e ae no oia e hooponopono aha uwao ia kona hoopaapaa palena aina me ia aupuni ma Amapa.  Ua hoole loa oia i ka hooponopono ana i kekahi aha uwao i na mea i hana ia i ka malama o Mei i hala aku maluna o kona poe kupa.  Ua koi paa aku oia e hoopau ia na luna aupuni o ia Apana, me ke kali ole.  Ke kaua la o Italia ia Abesinia, a no ka holopono ole o na hana, he eono tausani koa hou i hoouna ia aku la e hoomau aku i ke kaua malaila.

            Ke kukulu nui nei o Iapana a me Kina ina mokukaua no laua iho.

            Ke kamailio wale nei no o Amerika i kana mea e hana ai.  He kamailio wale no nae o Amerika i kana mea e hana ai.  He mau olelo hooholo hoopaapaa kai waiho ia ae ma ka Hale Ahaolelo.  Aia ma ke kamailio kona ikaika e ikea nei.  Aole no i pio na manao lili o ka poe o ka Hema e noho la a hiki i keia wa.

_____

KELA ME KEIA.

 

            He kikipu ka na koa o ke Aupuni i ka La Kapule nei.

            Ua malama ia he Aha Mele ma ka Paka Kuokoa, i ke Sabati nei

            I keia Poaha ae e hookolokolo ia ai o Sheridan me Underwood, no ke kipi.

            Ke pii ae la ka pomaikai o ka Bana Lahui Hawaii e noho la ma Amerika.

            He paikau hoomaamaa ka ka Bataliona koa ku mau elua, i ka po Sabati nei (Poaono).

            Ua make aku la ka lio kea o Henry Agnew ma kona wahi hanai lio ma Kaleponi.  He $15,000 kona kumukuai.

            Me he la e haule ana ka laina telegarapa a Polena o Kealia, mamuli o ke Kolohe ia e ka poe imi dala kipe.

            Uha hala aku ko makou Lunahooponoopono a me kona ohana ma ka ehukai o Waikiki, ma ka auina la Kapule nei.

            Ua hoopii mai o Rudolph Spreckels i ka Puuku o kekahi Mahiko i hookele hou ia e lakou, oiai ua kaohi i ka puka o kona hapa o ka mahiko.

_____

HALE KUAI KAMAA O MAKANANI

 

MA KE KIHI MAUKA O ALANUI PAPU A ME KALEPA.

_____

AOLE O MAKOU MALAMA I NA KAMAA hiki ole ia makou ke hooiaio aku i kona paa a i hiki ole ke kuai no ke kumukuai makepono a i kupono hoi no keia mau la mamake o ka aina.  I mea e hiki ai ia makou ke malama i na kamaa maikai wale no o na ano a pau, a e kuai aku hoi no na kumukuai haahaa loa, ua kuai pololei aku hoi makou i ko makou mau kamaa mai na hale hana kamaa nui a kaulana no ka maikai, ka paa a me ka nani.

NO KEIA KUMU UA LAKO MAU MAKOU I NA MEA MAIKAI WALE NO NO NA KUMUKUAI EMI LOA E HIKI AI KE KUAI HAAHAA AKU I NA MAKAMAKA A PAU MAI HAWAII A NIIHAU.

_____

Eia ma keia kii kamaa aulii e ike ia iho ai na ano o na kamaa NANI ma kahi o MAKANANI

HE EKUA WALE NO DALA ME HAPALUA KO KEIA KAMAA!

Pela iho la ke ana o ke kuai ana o na ano kamaa o ko makou hale,  Nolaila, e hoomanao oukou e na makamaka mai Hawaii a Niihau i kahi e loaa ai na Kamaa Paa, Na Kamaa Emi, Na Kamaa helu Ekahi o ka hiehie,

E LOAA NO MA KA

Ka Hale Kuai Kamaa o MAKANANI

Honolulu, Jan 2, 1896.