Ka Oiaio, Volume I, Number 28, 10 February 1896 — Page 3
| This text was transcribed by: | Kailianu V. Michaels |
| This work is dedicated to: | In loving memory of my father, Mervin Apana Lee Kwai |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA HOOMANA KARISTIANO NAAUAO.
KO IESU EKALESIA MA KE AO NEI, AUHEA LA IA? HAINA - OIA NO KA EKALESIA O KA HOOMANA KARISTIANO NAAUAO.
BAPETIZO
MOKUNA VI.
Poha ka Olino o ka Bapetizona - Ka Meahuna Pohihihi o ka Euanelio - Ke Ki o ke Aupuni Hiwahiwa
MAHELE II.
Anuu Ekolu. PONI ANA I KA UHANA HEMOLELE.
3 - Ua kapaia oia i ka wa Kahiko loa ma ka olelo Kahiko hoi o *Hiku, a o ke Kamaaina o na Aina Elua (Honua-lani.) O keia hoailona ka mea noho pu me ke Akua Ka Makua Elohima Ka Nui. He aloha ia, he oluolu; he akahai, haahaa, akahele, kuukuu, lokomaikai, ahonui, hoomanawanui, hauolipono, hauoli mauloa; hakaka ole, paonioni ole, paio ole, kue ʻole, apuhi ole, alapahi ole, kaua ole, mokuahana ole; aka he inaina oia i ka hana hewa me ia ohana like; he makemake ole i na mea pelapela me ia ohana like:
4 - He **Aiwaiwa oia i loko, ma waho, a ma luna o na mea a pau. Aohe mea nalo i kona maka; aohe pouli i mua ona, aohe mea paa iaia; a he hiki no iaia ke komo ma na wahi a pau loa a me kahi hiki ole i na ano kino e ae. Aohe ona kanalua ia Make, ia Luakupapau a me na ohana like. He mea ole ka mana me ka ikaika o ka Po; na uhane daimonio me na uhane haumia a pau.
5 - He *** Hiapaiole oia; he kiekie, he laula a he Nuiakea: A ia oia ma na wahi a pau, a ua piha ka Lani a me ka Honua iaia. No laila mai kela olelo Hiwahiwa a Iahova penei: "I na e lele oe a kiekie me he aeto ʻla, a haka i punana nou i waena o na hoku o ke aouli; Aole oe e nalo Iaʻu:" "I na e pee oe ma luna o ka piko o ka mauna Karemela; Loaa no oe Iaʻu. Obadia 1:4. Amos. 9:3
*O keia ka helu pau i waena o ka Lahui Hebera Ma na olelo a Iesu, ua pane oia pela O Kaina no kekahi, ua olelo aku ia Iehova pela no kona pepehi ana i kona pokii O Lameka kekahi; ke kane i mare ai ia Ada me Zila: A pepehi i ke kanaka. Ua hoopiliia keia inoa no Iesu, mamuli o kona upiki ana i ka mana o ka Po, a ku wa ka Oihana Hoolapanai.
**O keia ka helu pau ma ka olelo Makuahine nei, i waena o keia Lahui a ma ka Aina Nei mai ka Po mai. Ua kulike loa me na mamo a Isaraela; he Kuokoa a he Luaole kona manao. Ua hoopili ia no Iesu e like me ko lunaʻe.
***He Pookela; aohe koa nana e paipai: ua like ke koikoi o keia olelo me ka huaolelo kiekie.
Ua hoopiliia ia Iesu wale no e like me ko lunaʻe.
E ia kekahi: - He nui loa na wahi i hoikeia o ka baibala penei; "Pohaku he ehiku maka; Keikihipa ehiku maka; na Uhane E hiku o ke Akua; a o ka Naauao he ehiku ona kia" a pela ihola. E huli aku Zekar 3:9. Hoik 1:4; 4:5; 5:6. Sol 9:1.
Aole i pau -
----------
HAPE NUIA! HAPE NUI
HAUOLI MAKAHIKI HOU!
Oiai ke Onene kaua mai la na aupuni Mana Nui o ke ao, i maopopo ole ai ka wa e hu mai ai o ke kaua maoli ana, a ma ia kumu hoi, e pii ino ai ke kumukuai o na mea kuai, i keia makahiki hou, ma ke ano hoolaha, ke poloai aku nei au i na MAKAMAKA HAWAII e hele koke mai ano, ma koʻu halekuai.
E hoolawa koke i ko oukou makemake,
-:MA KA HALEKUAI O:-
L. B. KERR,
- ma -
NAE O KA HALEKUAI O MOGAN.
Alanui Moiwahine : : : : Honolulu H.,I.
E hoopiha mau ana aʻu i koʻu halekuai mai na Hana Lole pololei mai o Enelani, Geremania, Amerika, a me na Aina o Europa a mai Kina a me Iapana, a mai au aku a koʻu hoa kuai kukaa a me kuai liilii.
E loaa no na Lole Huluhulu nani o na ano a pana Lole Halua na Makalena a me na lihilihi Lole.
Na Lipine ano hou loa. Papale Wahine, Kane a me na Kamalii o ke ano paikini hou o na ano a pau.
Na Kihei halii moe laula, na Kawele Auau, na Pua Papale a me na Hulu. Na Lole Kane i humuhumu oleia, he oluolu loa ke Kumukuai.
E hele mai e nana i ka makou mau WAIWAI o na ano a pau a e ninau hoi i na kumukuai nana e hookahaha i kou noonoo i ka emi maoli o na ano waiwai like ole.
He mau WAIWAI HOU LOA ma na KUMUKUAI HAAHAA.
E hemo ana ka puka o koʻu Halekuai ma na Ahiahi Poaono.
L. B. KERR,
ALANUI MOIWAHINE.
Waikiki iho o ka Hale Kudala o Mogan.
----------
NA LOLE KOHUKOHU!
Oia hoi ka mea a na lede a pau a ake ana e loaa a he meahiki wale no ke hookoia.
E HELE MAI OUKOU ILOKO O KOU HALEKUAI A E HANA AKU AU I KA KA MEA KUPONO I KO OUKOU MAKEMAKE.
Ua loaa mai nei iaʻu kekahi ano piha o na
LOLE AAHU HOU LOA.
Crepon (he like me kanikau)
Na Lole Farani, Na Lole Ulana Waihooluu Like Ole, Na Lole Awiliwili Lopi Silika me Huluhulu.
Na Lole Alabatosa, Na Lole Casamia a me Huluhulu, Na Lole Hulu Kao Lama, Na Makalena
Na Lole Diminite, Na Lole Pongi, Na Lole Satina
Na Peersucker, Na Rliss, Na Lole Anuunuu Crepe
Na Keokeo Manoanoa o na ano a pau, etc, etc.,
Aia no hoi ma koʻu Halekuai ka
LOLE FABRE FABRICA.
He mea i oi aku ka maikai i ko ka LOLE NAAU HULU.
Aole no oe i kahiko piha ke ole i hoi loaa ia oe kekahi o kuu
PALEKOKI KOHU MAMALU.
A e halo iho hoi i ke Kaliki (Trilby) ano hou, i ka pono i kau e iini nui nei.
Aia hoi ma koʻu halekuai na Lole Moepoli i ka hikonoeau ia, a kupono o ka hana ana iho ma Adamu.
Na Pale ili o na kane i kupono hoi i ko Eva makemake, i huki ai ka Ulua i Malamanui. Uwese oe.
Na Kaliki o na ano maikai loa, i hiki ke hoopuanikiia ka poe aluhee, na kakini kupono no ka poe paiho a me ka poe pauhananuu o na a-u, na mikinalima, na hainaka, a pela aku.
E hauoli loa au e hoomakaikai aku i keia mau mea nani i na Lede o Honolulu.
J. J. Egan.
Alanui Papa Mei 21, 1895 me 12 tf