Ka Oiaio, Volume I, Number 27, 7 Pepeluali 1896 — Page 2
| This text was transcribed by: | Sally Vrana |
| This work is dedicated to: | for Bob and Jean Bonar |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
JOHN H. BUSH, Luna Hooponopono a me Puuku
HONOLULU, FEBERUAI 7, 1896.
NO TUREKE.
Iwaena o na nuhou hope loa i hiki mai, ma ke Coptic, ua ike iho la makou i kekahi itamu, i kakauia e ka mea kakau mea hou o ka nupepa o London Daily Press, e hoike mai ana, aia hoi ua makaukau o Rusia e nee aku maluna o Tureke i keia kau kupulau ae, e hooko aku i na hoolala ana a Petero ka Nui no ka mahele ana ia aupuni iwaena on a Mana Nui. E lawe ana o Rusia ia Amerika a me Constantinopola; e lawe o Farani ia Syria a me Palesetine; e lawe hoi o Enelani ia Aigupita a me na aina pili kahakai o ke Kaikuono o Peresia, a o ke koena aku hoi o Tureke e maheleia iwaena o na Mana e ae.
Ua hookoikoi ia hoi ke ano o keia olelo, ma ka ike ia ana, i keia mau la, ua holo aku na aumoku kauwa hope loa o Enelani, i hoolale mai nei iloko o elima la, no ke Kai-Waenakonu honua, e hoomahuahua aku i ke heluna o ke aumoku kaua kauwaenakona honua e hoopunana la ma ka mokupuni o Malata me ka makaukau e nee iloko o ka minute ma kahi a ka leo kauoha a telegarapa e olelo m ai ai.
Ma na lono hope loa mamua o keia, ua manaoia o Amerika a me Beritania, no ka hoopaapaa o Venezuela, na mea aneane e lele kaua, a o Geremania hoi me Enelani, no ka hihia e pili ana i ka Repubalika o Transvaal.
Aka, ma ka hiki ana mai nei o keia nuhou hope loa, aia hoi he helehelena okoa loa ko ke kulana o ka papa konane kaua a na aupuni mana nui o ke ao e hoolala a e hooneenee ana a loaa ke koikoi o ke kulana mamua o ka lele maka ana iloko a ka paio kaua weliweli lua ole e like me ke kuhikuhi o ka olelo wanana a ke Akua.
Mai ko makou unuhi ana i na manao i hakuia e kekahi o na Lunakahiko o ka hoomana Karistiano, i ike ia ma ka inoa La Ehiku, o Uria Kamika, e pili ana i ka Buke Wanana a ke Kaula Daniela, i hoolaha mua ia aku, ma ka puka mua ana o ka nupepa puka pule “KA OIAIO,” he ehiku makahiki a oi i hala aku, ua hoike aku makou i na mea e pili ana i ka wanana, no na aupuni, a me ka wanana e pili ana no Tureke a me kona hopena, a me ka hopena hoi o keia au a kakou e noho hoonanea nei me na naau hoomaloka. Aole i pau.
-----
Ma ke kakahiaka o ka Poaha nei, i hooipoipo iho ai makou me na nuhou hauoli e pili ana i na keiki o ka Bana Lahui Hawaii. Mamuli o ka hoike a kekahi o lakou, e hoike ana ua loaa hou ka lakou ohe e puhi ai i oi aku mamua o ka lakou ohe kahiko.
-----
Na Itamu Kuloko.
Nui ke ohohia ia o Zamloch ma Hilo.
Nui ke ino o ke alanui e moe la i Kawa.
Ua hoomalamalama ia o Hilo i ke kukui uwila i keia manawa.
Ua lilo Olaa i taona i keia manawa me na halenani, me na eka e luluu i na hana dala o ke kope.
He Lunahooponopono hou aku ana ko ka nupepa o Hilo.
He eono mau moku kaua hou e kapili ia aku ana no ke aupuni Iapana.
I ka Poaono ae nei e haawi ia mai ai ka olelo hoopai ia Elia, no ka hewa pue.
He pili heihei lio o $200 o ka aoao hookahi ke malama ia ana i keia mau la iho, mawaena o ka lio o Quinn me ko Schuman.
Eia i ke taona nei o Rev. S. H. Davis o Kona Hema Hawaii.
Ma ka Halealii bana kahi i kani ai i ka auina la Poakolu nei.
Ua huli hoi mai o Conela C. P. Paukea mai Hawaii mai.
He eono mahina ma ka hana oolea kai kau ia aku maluna o Kaanaana no ka aihue ana i kekahi pahu waiu bata.
Ua noi aku o Makua Cenrardy i ka Papa Ola e ae ia oia e hoi i Molokai e malama ai i ka poe ma’i lepera, ma o kona mau lilo ponoi.
Ua mahalo ka poe loio i ka lunakanawai hou Carter, ma o kona akahele ma kana mau hooholo ana a malama ana i ka aha.
Ua ku mai ko moku S. C. Alani i ka po Poakolu nei, mai Kapalikiko mai.
Oia mau no ka nawaliwali o Ilamuku Brown, aole he loaa oluolu.
E ho’o aku ana Hope Kauka Eckhardt o ka Halemai Moiwahine ina aina e, no ka hoomaha ana.
Ua loaa aku kekahi mau sela holo malu iluna o kekahi kuna holo pili aina, no ka moku W. F. Babcock.
Eia o J. W. Mc. Guire ke ao mai nei i kekahi poe hawaii, ma na leo mele hawaii kahiko.
Aia ma Olaa o Makai Nui E. G. Hikikoki i keia mau la, no ka hoolana ana i kona ola ki@ho.
Hookahi no po, maloo ka mauu o ka pa o ka hale hookolokolo o Hilo i ka nui launa ole o na wawae nana i hehiku i ka wa a ka bana e kani ana.
Ua manao ia e ku aku ana he halepule hou ma Hilo, i keia mua koke iho, he halepule hoomana Pelekane,
Aia ke nomo hala ole la na huila o na hale wiliko o Kohala.
Ua pau a makaukau ka hoike no ke ana ana i ke awa o Hilo a Waiakea, a e lawe ia mai ana no ke kaua Ahaolelo ae nei.
E noi ia ana i ka Ahaolelo, e hoihoi ke kau kiure o Honokaa a i Hilo, oiai o Hilo ka ke awa ku moku maikai.
He nui na ulia poino i ke kaaahi ma Kaleponi, a me ka lilo ana o ke ola o na limahana, e like aku ana paha kakou me laila.
-----
HALE KUAI KAMAA
O
MAKANANI
MA K KIHI MAUKA O ALANUI PAPU
A ME KALEPA.
AOLE O MAKOU MALAMA I NA KAMAA i hiki ole ia makou ke hooiaio aku i kona paa, a hiki ole ke kuai no ke kumukuai makepono a i kupono hoi no keia mau la mamake o ka aina. I @ ea e hiki ai ia makou ke malama i na kamaa maikai wale no o na ano a pau, a e kuai aku hoi no ka kumukuai haahaa loa, ua kuai pololei aku hoi makou i ko makou mau kamaa mai na hale hana kamaa nui a kaulana no ka maikai, ka paa a me ka nani.
NO KEIA KUMU UA LAKO MAU MAKOU
I NA MEA MAIKAI WALE NO
NO NA KUMUKUAI EMI LOA
E HIKI AI KE KUAI HAAHAA AKU
I NA MAKAMAKA A PAU
MAI HAWAII A NIIHAU.
-----
Eia na keia kii kamaa aulii e ike ia iho ai na ano o
na kamaa NANI ma kahi o MAKANANI
HE EKUA WALE NO DALA ME HAPALUA
KO KEIA KAMAA!
Pela iho ia ke ana o ke kuai ana o na ano kamaa o ko makou hale. Nolaila, e hoomanao oukou e na makamaka mai Hawaii a Niihau i kahi e loaa ai na
Kamaa Paa, Na Kamaa Emi,
Na Kamaa helu Ekahi o ka hiehie,
E LOAA NO MA KA
Ka Hale Kuai Kamaa o
MAKANANI.
Honolulu, Jan. 2, 1896.