Ka Oiaio, Volume I, Number 26, 6 February 1896 — Page 2
| This text was transcribed by: | Leimaile Ku?upolialoha Barrett |
| This work is dedicated to: | Walter Kalani Barrett and Margaret Ualani Morris Barrett |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA
JOHN E. BUSH, Luna Hooponopono a me Pauku
Honolulu. Feberuali 6. 1896.
KA AINA I KUAI IA.
Ua kuai ia hoi kekahi aina i wahi noho no ka poe kanaka o ke Akua. Ma Epeso 1:13, 14, ua oleloia o ka Uhane Hemolele "oia ka hooiaio o ka kakou noho ana, a hiki aku i ke ola i kuai ia mai." I ka manawa o kekahi waiwai e kuaiia aku ai, a aole hoi h@wi koke ia mai ka mea i kuai ia, e waiho ia iho ana ke hoopaa no ka hooiaio" oia mea.
Ma keia mea e kamailio ia nei, ua loaa ia kakou kekahi "noho ana" i hooiaio ole ia hoi i keia wa, a o ka Uhane kai haawiia mai he "hooiaio o ko kakou noho ana" a hiki mai ka wa e hookoia ai. Alaila, eia ka ninau, o ka noho ana hea ka mea i kuaiia no ka poe kanaka o ke Akua? Aole hoi o ka lani, no ka mea aole oia i lilo aku e ku ai ke kuai hou ana. Aka, ina kakou e hoopili i na olelo kuai no ka noho ana no keia honua, alaila ua moakaka na mea a pau. Ua haawi mua ia keia honua ia Adamu (Hal. I15:16); aka i ka manawa i lilo ai o ke kanaka i kauwa no Satana (Rom. 6:16) ua hoololiia aku kona noho'na a i kona haku ana i hoohaku aku ai. Aole wale hoi ua lilo ke ola o na makua mua o kakou, aka ua lilo pu aku hoi me ko keia noho ana. O ka maopopo ua lilo keia noho ana ia Satana, ua hoike moakaka ia mai no ia mea e ka Baibala, a o ia manao hoi ua hookahuapau ia mai ma ka mea i hoikeia ma ka olelo a Satana e haawi ana i keia ao a pau ia Iesu Karisto ina oia e kulou a hoomana aku ia ia. E i mai ana aha auanei kekahi mea aole na aupuni o ka honua no Satana e hiki ai ia ia ke haawi aku i kekahi mea e aku. Alaila, in a he pololei ia mea, pehea hoi e lilo ai kana haawi he kumu hoowalewale? (Mat. 4:1). Ua hele mai o Karisto ma keia honua, e hoehaia a e make i mea e hiki ai iaia ke lawe hou ae i ka honua mai ka mana ae o Satana, ka mea hoi ana i powa ai mai ke kanaka aku ma na hana hoole a ua kanaka la i ka leo o ka mea honua mai kona mai kinohi mai. I mea e ko ai ia mea me ka oluolu hoike aku nei o Satana ia Iesu, i ka lua o ke kanaka, i kana alanui e hoi hou ai o keia noho ana, ma ko Karisto hookaua ana aku ia ia nona, oia na hoehaeha, na inea a me ka make ma ke alanui e hoi hou ai mai o Karisto la: he pahele nae keia e nele ai ka Karisto huakai, e like me ka haule a hoonele ia ana o ka Adamu mua i ka noho ana. Ua kuai aku nae o Karisto me ke kumukuai mohai kelakela, a e hoihoi hou ana hoi ia noho'na no kona poe kanaka me ia pu e noho ai, i kona manawa e lele hou mai ai. Ia wa hoi e hookoia ai ka wanana a Mika 4:8: "A o oe, e ka halekiai (Karisto) o ka poe holoholona, ka puu o ke kaikamahine a Ziona, e hele mai no ia @ou la, o ke alii ana mamua; e hele mai ke aupuni i ke kaikamahine o Ierusalema." Ua kulike keia me ia ma Daniela 7:27: "@ ka, o ke aupuni, a me ke alii ana, a o ka nani o ke aupuni malalo iho o na lani a puni, e haawiia mai i na kanaka haipule o ka Mea kiekie, o kona aupuni he aupuni mau loa ia." O ka honua nei i kona wa hewa ole, oia ka "noho 'na alii mua," (Kin. 1:26), a kakou i heluhelu koke iho la aia e hoi aku ana i ka "halekiai o ka pua holoholona." (Mika 4:8).
Ma Mataio 13:41, ua hoikeia o keia honua nei o ia no kahi o ke aupuni. I ka manawa o ke Keiki a ke kanaka e hoouna ai i kona mau anela, e h@l@ ana hoi lakou e hoakoakoa mailoko ae o kona au@ ai i "ka poe i hana hewa" --ke kakalaioa e ulu ana me ka hua-palaoa a hiki mai ka wa e ako'a ai. Ua hooia mai hoi o Na Solomona 11:31, e haawiia aku no "ka hooukuia o ka mea pono ma ka honua; pela no a oi aku ka mea hewa me ka ino." O kahi i ike i ka hooikaika a me na hono ia o ko ke Akua poe kanaka oia no ko lakou home hope loa.
Na Itamu Kuloko
Aia aku la ka Piladelepia i San Diego.
Ua hookohu ia o Tommy Cummins i hoa no ka Comepene B.
He elua mau keiki i lawe ia mai nei e ka Malulaui no ke Kula o Keoneula.
Laki ka hotele o ka luaopele i na malihini.
Ua ahewa piha ia o David Elia e ke kiure no ka hihia Pue. Eia na Paahao ke kue kaa mai nei i ke unu o Alanui Puowaina.
Ua kani kuilua ae na Pukuniahi i ka wa a ka Malulani i komo mai ai.
Ua loaa ia Kauka Mc Wayne kekahi u ia, ma o ke kahuli ana o kona wawae, ina Naalehu Kau.
Ua hoonaueue ae ke olai ia Kau, i kela pula aku nei.
Ua pahu ae kekahi lua eli gula ma Wales, a he 50 poe i make
I ka lele ana mai o Mr. Dole ma iuka, ua kani ka Bana ma ka uwapo.
Ua hala aku ke Coptic no Kina, me kekahi Pake me na puolo iwi o kona mau makua.
He elua mau makai nana i hapai mai o Mrs. Dole mai luna mai o ka moku, no ka eha o kona wawae.
Aia na kipi o Cuba ke anai la i na koa o ke aupuni a ua puhi aku hoi lakou i kekahi mau kaahi i ke ahi.
Ma ka huakai aku nei a ka Coptic i Kapalakiko ua holo ia he 5 la me 17 hora o ka oi keia ma ka holo mai keia awa aku.
Ua make o Generala Ewing, a me Elele Kiekie Theo Bunion ma Berelina, o Amerika Huipuia.
Ua ili aku ka mokuahi Amerika St. Paulo ma Long Branch, N. J. ma ka la 25 o Jan. He manaolana ia e pakele ana no oia.
Nui ka ino ma na awawa o Sacaramento, ma o ka pii ana o ka wai a uhi i ka aina. Ua hoopakele ia ka poe mahiai e kekahi mokuahi.
Me he la i keia la e holo aku ai ka mokukaua Boselona, oiai hoi aole he kauoha i loaa mai iaia no kona noho ana i pani ma ka makalua o ka Benington.
He $20.00 ka makana a ka nupepa Advertiser i ka mea nana e hoike mai i ka piko pau iole e lawe malu mau nei ia nupepa mai kona poe lawe mai.
Ua loaa aku he mau kini Opiuma iloko o ka poli o kekahi mau Pake o ka moku Vilocity, oiai hoi na makai e huli ana ia luna o ka moku, ua lawe ia ae laua i ka halewai.
Ua holo aku mai Nu Ioka aku kekahi mokuahi me ka poe Filibusta na Cuba, malalo Generala Gar@a. Ua @ aku la kekahi mau mokukana mahope o ka @ m@heu aole nae i loaa iki ke kolohe.
HALE KUAI KAMAA
o
MAKANANI
MA K@ KIHI MAUKA O ALANUI PAPU
A ME KALEPA.
AOLE O MAKOU MALAMA I NA KAMAA i hiki ole ia makou ke hooiaio aku i kona paa a hiki ole ke kuai no ke kumukuai makepono a i kupono hoi no keia mau la mamake o ka aina. I mea e hiki ai ia makou ke malama i na kamaa maikai wale no o na ano a pau, a e kuai aku hoi no na kumukuai haahaa loa, ua kuai ololei aku hoi makou i ko makou mau kamaa mai na hale hana kamaa nui a kaulana no ka maikai, ka paa a me ka nani.
NO KEIA KUMU UA LAKO MAU MAKOU
I NA MEA MAIKAI WALE NO
NO NA KUMUKUAI EMI LOA
E HIKI AI KE KUAI HAAHAA AKU
I NA MAKAMAKA A PAU
MAI HAWAII A NIIHAU
Eia ma keia kii kamaa aulii e ike ia iho ai na ano o na kamaa NANI ma kahi o MAKANANI
HE EKUA WALE NO DALA ME HAPALUA KO KEIA KAMAA!
Pela iho la ke ana o ke kuai ana o na ano kamaa o ko makou hale. Nolaila, e hoomanao oukou e na makamaka mai Hawaii a Niihau i kahi e loaa ai na Kamaa Paa, Na kamaa Emi, Na Kamaa helu ekahi o ka hiehie,
E LOAA NO MA KA
Ka Hale Kuai Kamaa o
MAKANANI
Honolulu, @a@ @, 1896