Ka Oiaio, Volume I, Number 18, 27 Ianuali 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE 1.         HONOLULU, IANUARI 27, 1896. HELU 10.

 

KA OIAIO PUKA LA

 

Ke Ala io Karisto la.

HAKUIA E MRS. E. G. WHITE.

(Hoomauia.)

            E nana ia Kalivari.  Aole anei i olelo mai o Iesu he kokua ia nou?  Aole anei i olelo mai Oia, ina e noi oe i kekahi mea ma kona inoa, e loaa no ia oe ?

            Ua hele mai oe, he lawehala mihi, i ke Akua ma o Iesu la, ke kokua mai ke Akua mai; he Makua aloha e kala ana i ka hewa, a ua manaoio oe e hana no ia e like me kona hoohiki ana.  O ka poe makemake i ka pomaikai mai ke Akua ma i, e kikeke, a e kali ma ka nohoalii o ke aloha me ka manao paa, e olelo ana, No ka mea, ua olelo mai oe, e ka Haku, "O ka mea noi ua haawiia nana; ka mea imi ua loaa no ia ia; a o ka mea kikeke ua weheia nona." (Mat. 7:8).  Ua makemake loa ka Haku i ka poe e imi ana i ke Akua, e manaoio iaia he mana no kona e hana i na mea a pau.  Ua imi oia e hoike mai i kona oluolu e lohe a e hooko i ko kakou noi ana ma keia ano i maa ia kakou.  Olelo oia, "Owai la ke kanaka o oukou e haawi aku i ka pohaku i kana keiki, ke noi mai ia i berena?  A i noi mai ia, e haawi aku anei oia i nahesa nana?  Ina paha oukou he poe hewa i ike i ka haawi aku i na mea maikai na ka oukou mau keiki, he oi nui aku ko oukou Makua ma ka lani, ma kona haawi ana mai i na mea maikai na ka poe e noi aku ana ia ia.  Ke olelo ikaika nei o Karisto ia oukou no ko ke Akua oluolu e kokua, e hoopili ana i ko ka makua maoli kokua ana i kana keiki me ke aloha.

            Owai la ka makua e kipaku ana i kana keiki, ke noi mai i berena?  A ke manao nei anei kakou e hoino i ke Akua me ka manao aole Ona hoolohe i ke noi ana o kana mau keiki?  Ke manao nei anei kakou e hiki i ka makua e hoonaukiuki aku i kana keiki, a e hoohoka ia ia ma ka hoala ana i kona manaolana a mahope hoohoka iaia ?

            E ae anei ka makua e haawi aku i ka ai maikai i kana keiki a mahope haawi aku ia ia i pohaku?  Ina o oukou, he poe hewa, i haawi i na mea maikai i ka oukou mau keiki, he oi nui aku ko oukou Makua ma ka lani ma kona haawi ana mai i na mea maikai na ka poe e noi aku ana ia ia.  Ke hooia mai nei ka Haku i ka poe noi ia ia, e haawi mai no ia i ka Uhane Hemolele.

            Ke hui mai nei o Karisto i kana pono me ka hai ana o ka lawehala mihi a manaoio, i pii ka pule o ke kanaka hewa imua o ka Makua me he mea ala la, a i hookomoia ka lokomaikai o ke Akua iloko o ka naau manaoio.  Ke olelo mai nei o Iesu i ka naau haalulu a manaoio.  "Ina e pili mai oia i kou ikaika, a hana mai ia'u ma ka mea e malu ai, e malu io no oia ia'u." (Is. 27:5.)  "E hele mai hoi, e kike kakou, wahi a Iehova : ina paha i like ko oukou hewa me na kapa ula, e keokeo auanei ia ane me he hau la : ina paha i ula loa e like me ka mea ulaula, e like anei ia me he huluhipa ala."  E ae anei oe e kike pu mai oia me oe?  E kauoha aku anei oe i kou uhane iaia, ka mea hoopono nana i hana ?  Ma ka malamalama o kona maka, a e pule e like me Davida, "E huikala mai oe ia'u me ka husopa, a e maemae no wau: e holoi mai ia'u, a e oi aku ku'u keokeo i ko ka hau." (Hal. 51:7.)  Ma ka manaoio e hoopa mai i ke koko o Karisto i kou naau; no ka mea, oia wale no ka mea e oi aku ai kou keokeo i ko ka hau.

            Aole e hiki i ke kanaka ke hoola ia ia iho.  O ko Karisto pono wale no e lawa ai no kona ola, a he makana ia mai ke Akua mai.  O keia ke kapa mare, a iloko oia kapa e hiki ai ia oe e lilo i hoaai ma ka ahaaina mare a ke Keikihipa.

            E lalau aku kou manaoio ia Karisto me ke kali ole, a e lilo o oe i mea hou iloko o Iesu, he malamalama no ka honua.

            Ua kapaia o Karisto, "O Iehova ko kakou pono."  Aia a lalau aku ka manaoio i keia makana, oia ka hoonani i ke Akua ma ko kakou mau lehelehe, a e hiki ia kakou ke olelo, "E nana i ke Keikihipa a ke Akua, nana e lawe aku na hala o ke ao nei."  (Ioane 1:29.)

            Ua maopopo anei ka nele o kou uhane?  Ua pololi a ua makewai anei oe no ka pono?  Ina pela, he hoike ana ia he hooikaika mai o Karisto me kou naau, a nana mai kou hoomaopopo i keia nele, i mea e imi ai oe iaia, a nana e hana mai ma ka haawina o ka Uhane Hemolele i na mea hiki ole ia oe iho.  Aole he mea e ae kekahi au e hana aku ai, eia wale no, e pololi oe no kona lokomaikai, e malama i kana mau ao ana, a e hahai aku mahope o kona aloha.  "E noi!"  O ka noi ana ka mea e maopopo ai, ua ike oe i kou nele ana, a ina e noi oe me ka manaoio, e loaa no ia oe.  Ua hoohiki ka Haku, aole e lilo ia mea i mea ole  O kou hoomaopopo a me kou ike ana he lawehala oe ua lawaia no kona aloha a me kona lokomaikai.  O ke ano o kou hele ana imua o ke Akua, aole no kou hemolele, aka, i noi aku oe iaia e hoomaemae mai ia oe mai ka hewa mai a pau, a mai na hala mai a pau.  No ke aha la hoi e kali hou aku ai oe?  No ke aha la e hooia ole ai oe i kana olelo, a nele,

            "Ua hewa au, ua nele no,

            Aole o'u wahi pono,

            A, me ia nele, eia wau,

            E Iesu e, eia no au."

            Ina e hele mai ana o Satana a waiho mai i kona pouli mawaena ou a me ke Akua, e hoowalewale ana ia oe e hoole i ke Akua, a e hilinai aku hoi i kona aloha, a e i aku hoi, "aole e hiki ia'u ke ae aku i kuu nawaliwali e pale aku i ke Akua; no ka mea Oia kuu ikaika.  Ke kau nei au i kuu mau hewa, oiai he lehulehu, maluna o Iesu, kuu panihakahaka a me kuu mohai mai ke Akua mai.

            "O oe ke hoole nei,

            Aole mohai hala e ae."

            Aole hiki ke nana ke kanaka iloko o kona naau a ike i kekahi mea e iloko iho ona e pono ai oia imua o ke Akua, aole i kekahi mea e ae e pono ai oia.  Ma o Iesu la wale no, ka mea a ka Makua i haawi mai ai i ola no ke ao nei, ma ona la wale no e hele ai a kokoke aku i ke Akua.  O Iesu wale no ko kakou Hoola, ko kakou Kokua a Uwao; iloko ona wale no ko kakou manaolana no ke kalai ana ka malu a me ka pono.  Ma ka waiwai o ke koko o Karisto e ola ai ka uhane lawehala O Karisto ka mea ala, ka mea ala kuni hemolele, e pono ai kou pule ana imua o ka Makua.  Alaila, ua hiki ia oe ke olelo ae,

            "Ua hewa au, ua nele no,

            A, me ia nele, eia wau

            E Iesu e, eia no wau."

            O ka hele ana ia Iesu aole me ka ehaeha loa a me na noonoo hohonu e pono ai ; eia wale no, o ka ae ana i ke ola e like me na mea i hoikeia ma ka ke Akua Olelo.  Ua waihoia a ua pomaikai oia imua o na mea a pau.

            (Aole i pau).