Ka Oiaio, Volume I, Number 13, 20 January 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.                     HONOLULU, IANUARI 20 1896.              HELU 13.

 

KA OIAIO PUKA LA

KE ALA IO KARISTO LA.

HAKUIA E MRS. E. G. WHITE.

(Hoomauia)

E hookukeia anei ka pule o ia ano, i hapai ia e na naau pepe?  Aole loa.  Ma ka eha a me ka make o Karisto, na hoikeia kona aloha palena ole i kanaka.  E hiki no iaia ke hoola mau loa i na mea a pau i hele aku i ke Akua ma ona la.  Nolaila e like me he keiki liilii la e hele aku ana imua o ke Akua, a kulou haahaa imua o kona mau wawae; aole he waiwai ke pii i na lani a lawe mai ia Iesu, aole e iho ilalo o ka honua a lawe mai iaia iluna, no ka mea he mau kona kokoke mai hoi ia kakou.  Ke olelo nei oia:  "Aia hoi, ke ku nei au ma ka puka e kikeke ana:  ina lohe kekahi i kuu leo, a wehe i ka puka, e komo aku au i oua la, a e ai pu au me ia, a oia pu me au."  (Hoik. 3:20).  He oluolu loa o Karisto e komo mai a noho ma ka luakini uhane ina e ae aku kakou iaia.  Ua hoikeia oia e kali ana a e kikeke ana ma ka ipuka o ka naau.  No ke aha la oia i komo ole ai?  Eia ke kumu, ua pani ia ka puka no ka makemake nui i ka hewa.  Aia a ae aku kakou e haalele kakou i ka hewa a hai aku i ko kakou hewa, ua hooneeia ka paku mawaena o ka uhane a me ka Hoola.

 

Aka i ka mihi ana no ka hewa, aole waiwai ke komo iloko o ke keena liilii, e like me Lutera, e hana ana i na hana hoomainoino kino i pau ka hewa, me ka manao, pela e maliu mai ai ke Akua.  Ua ninau ia penei, "E haawi anei au i kuu makahiapo no kuu hala, i ka hua o kuu kino no ka hewa?  Ua hoike mai no ia oe, e ke kanaka, i ka mea maikai, a he aha ka mea a ke Akua i kauoha mai ai ia oe, ke ole e hana i ka pono, a e aloha i ka lokomaikai, a e hoohaahaa i ka hele ana me ke Akua?"  (Mika 6:7,8)  Ke olelo mai nei ka mea haku halelu.  "O ka naau mihi me ka pepe, o kau ia, e ke Akua, e hoowahawahaole ai."  (Halelu 51:17).  Ke kakau nei o Ioane:  "Ina e hai aku kakou i ko kakou hewa, he oiaio mai no ke Akua a he lokomaikai i ke kala mai i ko kakou hewa."  (Ioane 1:9.)  Eia wale no ke kumu o ka holoi ole ia o ko kakou hewa, o ko kakou hai ole aku i ko kakou hewa imua ona, ka mea a kakou i hoeha ai me ko kakou hana hewa ana a i ho@ ai me ko kakou mau hala, a nolaila ko kakou nele ana i ke aloha.  O ka hai ana i ka hewa i puka mailoko mai o ka naau oia no ke komo ana iloko o ka naau aloha palena ole; no ka mea ua kokoke mai ka Haku i na mea naau pepe, a ke hoola nei i na naau haahaa.

 

Kuhihewa ka poe e manao ana e emi ana ka hanohano o ka mea hai aku i kona hewa, a e emi ana kona mana hoohuli manao iwaena o kanaka.  No ka pili ana o keia manao kuhihewa, oiai ua ike i ko lakou hewa, he nui na mea hai ole aku i ko lakou hewa, pela e hoawaawaai i ko lakou ola a e hoopouli ai i na ola o hai.  Aole e pilikia kou hanohano ma ka hai ana i kou mau hewa.  E kiola aku i na hanohano kuhihewa la!  E haule maluna o ka Pohaku i pepe, a e haawi mai o Karisto i ka hanohano oiaio mai ka lani mai.

 

Mai ae i ka haaheo, ka mahalo ia oe iho, a me kou manao i kou pono iho, e hookaawale ia oe iho mai ka hai ana aku i kou hewa, i loaa ia oe ka olelo hoopomaikai:

 

"O ka mea huna i kona hewa iho, aole oia e pomaikai; aka, o ka mea hooia a haalele hoi, e alohaia mai oia."  (Sol. 28:14).

 

Mai hana i kekahi mea mai ke Akua mai, a mai haalele i ka hai ana aku i kou mau hewa i kou mau hoahanau.  "E hai aku i ko oukou mau hewa kekahi i kekahi, a e pule hoi kekahi no kekahi, i pohala ai oukou."  (Iakoba 5:16.)  Nui na hewa i waihoia me ka hai oleia, e kue ana i ka lawehala i ka la hookolokolo hope; e aho e kue i kou mau hewa ano, a e hai aku a haalele oiai e noi ana ka mohai hoola nou.  Mai hoopanee i kaike ana i ka makemake o ke Akua no keia mea.

 

Maluna o ka mea au e hana ai ma keia mea ke kau nei ke ola o kou uhane a me ke ola o na mea e ae.  "Nolaila, e hoohaahaa oukou ia oukou iho malalo iho o ka lima mana o ke Akua, i hookiekie ae oia ia oukou i ka wa kupono.  E waiho aku i ko oukou kaumaha a pau maluna ona; no ka mea ke manao nei oia ia oukou."  (1 Pet. 5:6,7.)

 

E hiki i ka naau haahaa a pepe ke hoomaopopo i kekahi hapa o ke aloha o ke akua a me ke kumukuai o Kalivari.  He nui na pomaikai e ili mai ana i ka mea e komo ana iloko o ka pomaikai a ke Akua.

 

He pono ia kakou e haawi lilo aku i ko kakou mau naau i ke Akua, i hoohanau hou mai a hoohemolele maroia ia kakou a hoomakaukau mai ia kakou no ka lani.  Aole pono ia kakou e kali no kekahi wa e ae, aka, i keia la e haawi lilo aku ia kakou iho iaia, e hoole ana e lilo i mau kauwa no ka hewa.  Ke manao nei anei oe ua hiki ia oe ke haalele liilii i ka hewa?  Ea, e haalele ano i ka mea i ahewaia!  E inaina aku i ka mea a Karisto i inaina ai, a e aloha aku i ka mea a Karisto i aloha ai.  Aole anei i hoomakaukau oia i mea e maemae ai oe mai ka hewa mai ma kona ehaeha a ma kona make?  Aia a ike he mau lawehala kakou, aia a haule kakou maluna o ka pohahu a pepe, alaila, e apo mai ai na lima mau ia kakou, a e pili kokoke loa kakou ia ka naau o Iesu.  Alaila e hoolealeaia kakou i kona aloha a e hoopailua i ko kakou pono iho.  He pono ia kakou e hele a pili loa i ka wawae o ke kea.  E like me ko kakou hoohaahaa ana ia kakou iho malaila, pela e ike ia ai ke kiekie o ke aloha o ke Akua.  Aole e waiwai ana ke aloha a me ka pono o Karisto no ka mea i manao ua ola, a ua maikai kupono, a i walea i kona noho ana.  Aole e noho ana o Karisto iloko o ka naau makemake ole i ka malamalama a me ke kokua mai ke Akua mai.

 

Ke i mai nei o Iesu, "Pomaikai ka poe i haahaa ka naau; no ka mea, no lakou ke aupuni o ka lani."  (Mat. 5:3.)  He nui ka lokomaikai iloko o ke Akua, a e hiki no ke loaa kona Uhane a me kona mana a mahuahua.  Mai ai kakou i na ili o ko kakou pono iho, aka, e hele i ka Haku; aia iaia ka aahu maikai, ua hamama kona mau lima e apomai.  E olelo mai ana o Karisto,  "E lawe aku i na kapa i paumaele, a e hoaahu mai me na kapa hou ae."

 

E kali anei kakou a manao kakou ua maemae? - Aole; ua olelo mai o Karisto, "Ina e hai aku kakou i ko kakou hewa, he oiaio mai no ke Akua a he lokomaikai i ke kala mai i ko kakou hewa, a i ka hoomaemae mai ia kakou mai na mea pono ole a pau."  (1 Ioane. 1:9).  Ua hooiaio ia oukou e ke Akua ma kaua olelo.  Aole e hiki ia oe ke kali i na manao kupaianaha mamua o kou manaoio ana ua lohe mai ke Akua ia oe; aole o kou manao ka mea e maopopo ai, no ka mea ua lolilua kou mau manao me he mau ao la.  He pono e loaa i kamu onipaa i kahua no kou manaoio.  O ka olelo a ka Haku he olelo maua loa; malaila e hilinai ai oe; a ua olelo mai Oia "E noi a o haawiia na oukou."                Aole i pau.