Ka Oiaio, Volume I, Number 11, 16 Ianuali 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

BUKE I.         HONOLULU, IANUARI 16, 1896.             HELU 10.

 

KA OIAIO PUKA LA.

 

KE KUMU MUA O KA HEWA.

 

            I ka noonoo o kekahi poe lehulehu, ua lilo he mea pohihihi loa ke kumu-mua o ka hewa a me kona mau ana.  Ua ike lakou i ka hana a ka hewa he poino, a ua ninau iho pehea hoi i hiki ai keia mau mea a pau malalo o ka noho ana poo o ka Mea i piha i ke akamai palena ole, ma ka mana a me ke aloha.  Iloko o ko lakou maopopo pono ole i keia mea, ua pouli ia hoi lakou i na mea oiaio moakaka loa i hoike ia ma ka ke Akua olelo, a i kupono hoi i ka hoola ana.  He mea hiki ole ke weheweheia e hiki ai ke hoomaopopoia ke kumu o ka hewa me kakou.  Aole hoi he mea i hoike ia a oi ae ka moakaka maloko o ka palapala hemolele mamua o keia, aole mai ke Akua mai ka hewa a ua ku hoi ke koikoi oia mea maluna ona he hewa.  He mea komohewa mai ka hewa, i hiki ole hoi ke hoikeia e kekahi mea kekahi kumu o kona ike ia ana.  He mea pohihihi a he maopopo ole ia mea i kumu ai; o ka palepale ana i ka hewa o ke kokua ana no ia i ka hewa.  I na e loaa ana kekahi kumu e ae aku ai ia mea, a he kumu paha no kona ike ia ana, alaila ua pau hoi kona lilo ana he hewa.  Hookahi wale no a makou wehewehe no ke ano o ka hewa, oia no ka mea i hoakakaia ma ka olelo a ke Akua; oia hoi, he "hahaki ana i ke kanawai o ke Akua;" oia no ka hoohana ana i kekahi hana kumu e kue ana i ke kanawai kelakela o ke aloha o ke Akua, ke kahua hoi o kona aupuni.  Mamua o ke komo ana mai o ka hewa, he maluhia a he hauoli hoi ma na wahi a pau.  Ua piha ke ao i ke aloha i ke Akua, a ua kaulike ke aloha o kekahi no kekahi.  Oiai o ke aloha ke kumu o ko ke Akua aupuni, ua hilinai ia hoi ka malu a me ka oluolu o ka noho ana o ka mea i hanaia ma ka lokahi loa o na manao me ke kumu nui o ka pono.  Ua makemake hoi ke Akua i ka ke kanaka hana ana nona e hana ia me ke aloha.  Aloha he hoihoi o ke Akua i na hana hookikinaia nona, a ua haawi aku hoi oia i na mea a pau i ke kuokoa o ko lakou makemake, i haawi kaokoa aku ai lakou i ko lakou noho ana malalo aku ona.  Aka, aia hoi he hookahi mea i koho iho e hookahuli i keia noho kuokoa ana.  Ua hookumu mua mai hoi ka hewa mai a ia mai, ka mea, mahope koke aku o Karisto, i hoohanohano nui ia e ke Akua, "e ku aku ma ke kiekie ma ka mana a me ka nani" mahope koke iho hoi o Karisto.  (E nana i ka ninau elua o ka haawina heluhelu Baibala o keia helu e pili ana ia Satana, ka mea kue).  O keia uhane hookahi no nana i pa'ipa'i i ko ka Lani e kipi malaila, pela no hoi e pa'ipa'i nei ma ka honua.  Eia kona uhane ke noho poo nei iloko o na keiki o ka hoolohe ole.  (Epeso 2:2).  E like me ia pela lakou e hoao nei e hahaki i na hoomalu a ke kanawai o ke Akua, i ao aku ai e loaa ana ke kuokoa mai ia ia aku ma na hana kue i na alakai a ke kanawai.  Na Satana hoi i pa'ipa'i i ko ke ao nei e hoole ia Karisto.  Ua hooikaika hoi ke Alii o ka Hewa me kona mana a pau e kinai ia Iesu, no ka mea, ua ike aku la hoi oia e hoikeike ana hoi ka ka Hoola mau hana aloha a lokomaikai i ke ano maoli o ke Akua.  Mamuli o ko Lucifa makemake, ua alakai ia oia e olelo ae, "e hookiekie no au i ko'u noho alii a maluna ae o na hoku o ke Akua, * * * * * e like ana au me ka Mea Kiekie Loa."  (Isa. 14:13, 14).  Ua olelo hoike Akua, (Ezekiela 28: 18, 19 "e hoolilo au ia oe i lehu ma ka honua * * * aole loa aku hoi oe."

 

HAAWINA HELUHELU BAIBALA.

 

SATANA KA MEA HANAINO.

 

1.         Ma ka inoa hea e ae o Satana i kapa ia ai?  Hoik. 12:9, hapa mua.

"Kipakuia aku la ua deregona nui nei, oia hoi ka mookahiko i kapaia o Diabolo."

 

2.         Eia anei o Satana ke kue nei ia Karisto?  Hoik. 12:7.

"A he kaua no ma ka lani kaua mai o Mikaela a me kona poe anela i ka deregona, a kaua aku ka deregona a me kona poe anela."

O Mikaela o Karisto no ia.  (Hoohalikelike ia Iuda me 1 Tesa, 4:16 a me Ioane 5:22.

 

3.         Mahea la o Satana i noho ai i kekahi manawa?  Luka 10:18.

"A i mai la oia ia lakou, ua ike au ia Satana e haule ana e like me ka uila mai ka lani mai."

 

4.         He mau anela no anei kona?  Hoik. 12:9, hapa hope.

"Kipakuia'ku la ua deragona nui nei, oia hoi ka mookahiko i kapaia o diabolo, a o Satana, nana no i hoowalewale mai i ko ke ao nei a pau.  Kiolaia mai la oia i ka honua, a kiola pu ia mai la kona poe anela."

 

5.         Ua hana anei keia poe anela i ka hewa?  2 Pet. 2:4.

"Ua hele mai oukou i ona la, ka pohaku ola, ua haalele ia no nae ia e kanaka, aka, ua waeia mai e ke Akua, he maikai io."

 

6.         Heaha ka mea i hana ia no lakou?  2 Pet. 2:4.  (O Iuda 1:6 kekahi.)

"Ua hele mai oukou i ona la, ka pohaku ola, ua haaleleia no nae ia e kanaka, aka, ua waeia mai e ke Akua, he maikai io."

 

7.         Owai hoi ko Satana inoa i kona wa e noha ma ma ka lani?  Isa. 14:12

"Auwe kou haule ana mai ka lani mai, e ka Hokuloa, ke keiki a ke kakahiaka!  Ua kiolaia oe ilalo i ka honua, o oe, ka mea i hooauhee i kona aina."

 

8.         Heaha kana hana i hana'i i kipakuia ai oia mai ka lani mai?  Isa. 14:13, 14.

"Ua hookomo oia mamuli o kona ui a me kona naauao; (Eze. 28:13-17) a ua makemake hoi e hookiekie ia ae maluna o karisto a me na anela e ae a e lilo "e like me ka Mea Kiekie Loa."

"Aka, ua olelo no oe iloko o kou naau, e pii aku no au i ka lani, e hookiekie no au i ko'u nohoalii, maluna o na hoku o ke Akua; e noho no wau ma ka mauna o halawai ana, ma na aina loihi aku ma ke kukulu akau.  E pii aku no wau maluna o kahi kiekie o na ao, e like ana au me ka Mea kiekie loa."

 

9.         Ua hiki no anei ia Lucifa ke noho ma ke kulana i kulike me ko ka Makua?

"Aole.  He mea oia i hanaia a ua hiki ole no hoi ia ia ke hui pu me ke Akua ma kana naau kuka ana.  O Karisto ka mea i like me ka Makua, (Pili. 2:6) a no ia mea ua hiki ke hoomana ia (Heb. 1:6) a ke noho pu me ka Makua me kona noho-alii."  (Heb. 1:6.)

 

10.       Mahope o ko Satana kipakuia ana mai mai ka Lani mai, a haule mai i ka honua nei, pehea la oia i hoowalewale ia ai Adamu a me Eva e akenui ae e hookiekie?  Kin. 3:6.

"A ike ae la ka wahine, he ono ko ia laau i mea ai, a he maikai hoi i na maka, a he laau makemakeia i mea hoonaauao, lalau aku la ia i kona hua, ai iho la, a haawi aku la hoi na kana kane me ia, a ai iho la no hoi oia."

 

Ma ke noi ana i wahi kiekie ae i ka ke Akua i hoonoho ai ia laua, ua lilo hoi o Adamu a me kana wahine he mau lawehala.  Mahope o ko Adamu haule ana i ka hewa, mai ia wa mai ka hoao mau o kana mau keiki e hookiekie ia lakou iho maluna aku o hai, a hiki i keia la.  Ua loaa hoi ka uhane ia lakou e like me ko Satana (Epeso. 2:2.).

 

11.       Owai ke kanaka kaulana ma ka honua nei i hookiekie ae iaia maluna o ke Akua?  @ Tesa. 2:4.

"Aka, me ka haawi ana mai o ke Akua ia makou, i kauoha ia mai ka euanelio ia makou, pela hoi makou e olelo aku nei; aole me he mea hoolealea la i kanaka, aka, i ke Akua i ka mea nana ko kakou naau i hoao mai nei."

 

12.       Heaha ka mea e loohia ana i ka poe hookiekie ia lakou iho?  Luka 14:11.

"No ka mea, o ka mea i hookiekie ae iaia iho, oia ke hoahaahaaia; a o ka mea i hoohaahaa iaia iho, oia ke hookiekieia e."