Ka Oiaio, Volume VII, Number 45, 3 January 1896 — Page 4 Advertisements Column 6 [ADVERTISEMENT]

la aku la mamua, oia no hoi ko Mokumeha wa i hele aku ai me na makua a hiki ma kahi o na waa e kau ana me na kanaka, aole no i kaulua iho, ua haawi ae la na leo aloha hope loa me na waimaka a panee aku la na waa, aia no hoi i keia wa i ike ia aku ai ka puhi Lau- meki e oni mai ana iluna o ka ilikai me he kaelewaa la ke ano ke nana aku. I ua puhi nei i kokoke mai ai ma kaihu o na waa, aia hoi, ua lou malie kona hi u ma ka laau kea o na waa a huki aku la me he au

ikaika la no ka moana, a ua kaapono ae la lakou nei mawaho o MOkuaina (Kauwahiailana) kona inoa Hou ma Malaekahana, a ua kaalo ae la mawaho o Kahuku, a ke hele aku no Waialee, a me Pupukea, a ke hoomau nei no ka puhi i kana hana no ke ala moana a hiki lakou ma Kamalino mawaho o Waimea. kahi o ke Kala-koi, a ke nee aku la no Waialua, oiai ka ikaika o ka puhi e holo ana imua, a ua hala ke kula Pawehe o Mokuleia, a ke huli ae la o Kaena mamua a ke huli maila no Waianae, a kupono lakou mawaho o Makua, ua hoomaha iki ua puhi nei mailaila no ka hanai ana iaia a manoa elike no me ka mea mau e hana ia ai nona, a mahope iho oia wa, ua oni hou ka puhi no kamakanikaiaulu, a hala o Waianae, ua hiki maila lakou nei no Kalaeloa, a ua hookomo mala ka puhi Laumeki maloko o na poina nalu me ka pilikia ole o na waa a me na ola kino o na mea a pau a hiki i ke komo ana i Puuloa, a ua hoi aku lakou a pae ma Honouliuli me ka maalahi me ka po ole o keia la mai Laiemaloo mai a,

ua hoi aku no hoi ka puhi Laumeki no kona wahi mau o pela nohoi me na kanaka me ko lakou mau opeope mai a Pueo mai me kana wahine, a oia ka Mokumeha i olelo aku ai i kona mau makua ponoi a me kona hanau mua kaikuahine, ua hookoia ka manao o na makua no ka ia me ka holo pono ma na ano a pau ma ka lawe ana a ka puhi Laumeki. Ka hele hou ana o Mokumeha no Molokai a me Maui - a noho wahine oia ma Hana, a me kona hele ana i ke kaua - a loaa iaia na pilikia ma kona kino - a hooleiia oia iloko o kekahi Pa Puaa - ma Wananalua. Mahope iho o ka hala ana o kekahi mau la o ko Mokumeha hoi ana mai me ka Puhi Laumeki mai Laiemaloo Koolauloa mai. Ua olelo hou aku la o Mokumeha i kona mau makua a me kona mau kahu nana oia i hanai e ae mai iaia e hele hou i ka makaikai ma Molokai a me Maui, a oia ka na makua hanai i olelo mai ai iaia. Aole auanei i lawa kou manao hele e ke keiki ma kau huakai mua aku nei i kahi hoi oia mau makua ou a me ko hanau mua puhi hoi, a ke koi hou nei no oe i ka hele. Hele paha auanei oe a ko wahi e loaa ai i ka pilikia a pehea la ma- kou e ike koke aku ai ia oe? nolaila he pono no e hele iho no ma Oahu nei, aia nae ma keia mau olelo, ua paaloa ko Mokumeha manao no ka hele a ua ae laelae aku na makua a me ka ohana iaia e hele elike me kona makemake, a he mea oiaio ua hooko oia i kona manao maia hope mai me keakea ole ia. O na manao, na mea hou, na mele, na kanikau a me na hoolaha e hoouna pololei mai ma ka inoa o ka Lunahooponopono o KA LEO, aole ma kekahi inoa e ae.