Ka Oiaio, Volume VII, Number 28, 13 Kepakemapa 1895 — Page 2
| This text was transcribed by: | Hartwig Hermann |
| This work is dedicated to: | to Aunty Pua |
Ka Oiaio.
MA KE KAUOHA.
---
KEENA O KA PAPA OLA,
HONOLULU, SEPT. 9, 1895.
Aole kekahi mea e hoololi i kona wahi noho iloko o ka Apana o Honolulu, me ke palapala ae ole aku mai ka Papa Ola,
Ma ke Kauoha a ka Papa Ola.
WILLIAM O. SMITH,
Peresidena o ka Papa Ola.
sept 11 3ts.
---
KEENA O KA PAPA OLA.
HONOLULU, SEPT. 9, 1895.
Ua maheleia ka Apana o Kona no na hana hooponopono ola kino, iloko o iwakalua kumamakahi mahele e like me keia iho. Ua a@apuniia na mahele penei:
APANA. 1.
Na Palena. Makai o Alanui Moi mai ke alanui e oki ana o ka holo ana o ke Kaa Alanui Hao (ma Waipilopilo) a Muliwai Nuuanu
APANA 2.
Na Palena. Mauka o Alanui Moi mai Kula Kamehameha a Alanui Liliha.
APANA 3.
Na Palena. Mai ke kihi o Alanui Liliha a me Alanui Moi a ka muliwai Nuuanu, ma ka muliwai pii iuka a ke Alanui Beritania, ma ke Alanui Beritania a Alanui Nuuanu, hele i uka a Alanui Kula, mawaena o Liliha a me Alanui Nuuanu.
APANA 4.
Na Palena. Ma ka hikina o Alanui Nuuanu, mauka o Alanui Beritania, ma ke Komohana o Alanui Alapai, ma ka hikina o ka hoomau ana aku o Alanui Emma, e pii ana i luna. Puowaina makai o Alanui Kule.
APANA 5.
Na Palena. Makai o Alanui Hotele, mai Alanui Nuuanu a ka muliwai.
APANA 6.
Na Palena. Makai o Alanui Moiwahine mai Alanui Nuuanu a Alanui Alakea.
APANA 7.
Na Palena. Mai Alanui Beritania a Alanui Moiwahine, Alakea a me Puowaina.
APANA 8.
Na Palena. Mai Alanui Moiwahine a ke kai, ma Alanui Alakea a kahi o ka Pepee ma Pawaa.
APANA 9.
Na Palena. Mai Alanui Puowaina a Alanui Waikiki makai o Alanui Beritania.
APANA 10.
Na Palena. Mai ka hui ana o Alanui Waikiki a me Moi, o na wahi a pau makai o Alanui Beritania e hookomo ana ia M@hili a me Waikiki.
APANA 11.
Na Palena. Waialae a me na wahi a pau ma o aku o Laeahi a me Kaimuki.
APANA 12.
Ke Awawa o Palolo.
APANA 13.
Na Palena. Mauka o Alanui Beritania, ma ka hikina o Alanui Punahou, e hoohui pu ana ia Manoa Awawa.
APANA 14.
Na Palena. Mauka o Alanui Beritania mai Alanui Punahou a Alanui Alapai.
APANA 15.
Na Palena. Awawa o Pauoa a ma ka o Alanui Kula a me Alanui Puowaina.
APANA 16.
Na Palena. Awawa o Nuuanu mauka o Alanui Pauoa a me Alanui Kauka.
APANA 17.
Na Palena. Alanui Kula a Alanui Kauka, Alanui Nuuanu a Alanui Liliha.
APANA 18.
Na Palena. Kalihi ma o aku o Kula Kamehameha, mauka a makai.
APANA 19.
Na wahi a pau o Moanalua.
APANA 20.
Na Palena. Mai Alanui Kula a Alanui Pauoa, a me kona hooholo loa ana e pii ana ia Puowaina, a mai Alanui Nuuanu a ka hooholo loa ana o Alanui Emma e pii ana i Puowaina.
APANA 21.
Na Palena. Mai Alanui Beritania a alanui Hotele, alanui Nuuanu a ka muliwai.
WILLIAM O. SMITH.
Peresidena o ka Papa Ola.
sept. 3ts.
KEENA O KA PAPA OLA.
HONOLULU, SEPATEMABA. 9, 1895.
Aole kekahi mokumahu, mokupea a waapa paha o kekahi ano e haalele i ke awa o Honolulu no kekahi awa e aku o keia mau Mokupuni ke ole me kekahi palapala ae aku mai ka Papa Ola.
Aole kekahi mokumahu, mokupea, a waa paha o kekahi ano e haalele i ka Mokupuni o Oahu no kekahi Mokupuni e ae o keia Paemoku ke ole me kekahi palapala ae aku mai ka Papa Ola.
WIILIAM O. SMITH.
3. t Peresidena o ka Papa Ola.
---
KEENA O KA PAPA OLA.
Honolulu, Sept. 2, '95
Oiai na Kauka Lapaau o ka Papa Ola e noho paahana ana ma ka Halema'i Kolera no ka malama i na mai, ua like no i na mea i ma'i ke lawe i na Kauka e ae ana i makemake ai e Iapaauiara.
W. O. SMITH
Peresidena o ka Papa Ola
3 ts
---
HE MAU RULA O KA PAPA OLA
KEENA O KA PAPA OLA.
HONOLULU H. I. AUGATE. 31, 1895.
1. Aole e ae ia kekahi mea e hele aku mai ka apana o Honolulu a kekahi apana e aku o ka Mokupuni o Oahu me ka loaa ole aku o ka palapala ae mai ka Papa Ola aku.
2. Aole hoi e laweia kekahi waiwai a ukana paha mai ka apana aku o Honolulu a kekahi apana e aku o ka Mokupuni o Oahu, me ka loaa ole aku o ka palapala ae mai ka Papa Ola aku.
3. Aole e ae ia kekahi Kula aupuni a Kula a kekahi mea e ae paha, ma ka Mokupuni o Oahu, e wehe ia a loaa hou aku ke kauoha mai ka Papa Ola aku.
4. Ua papaia na halawai ana Kula Sapati, ma ka la o Sepatemaba, ma ke kulanakauhale o Honolulu.
Ma ke kauoha a ka Papa Ola.
William O. SMITH.
Peresidena o ka Papa Ola.
3t
---
KEENA O KA PAPA OLA.
HONOLULU, H. I., SEPT. 4, 1895
O ka akoakoa ana o na kanaka he lehulehu wale ma kekahi wahi iloko o ka apana o Honolulu, ua papa loa ia. Ua pili keia rula i na halawai pule, na aha mele lealea, a me na wahi e ae a pau i maa i ka akoakoa ana o na kanaka ma ke ano anaina lealea nui.
Ma ke kauoha o ka Papa Ola.
WIILIAM O. SMITH.
3t. Peresidena o ka Papa Ola
---
KEENA O KA PAPA OLA.
HONOLULU II. I., SEPT. 3, 1895.
1. O ka lawe ana o na ia na opihi, olepe, a me na mea oia ano a mea e ae paha o ke kai mai, a mai kekahi awa paha, loko paha, muliwai a kahawai paha, mawaena o ka Lae o Makapuu a me Kalaeloa, a mai na Mauna a ke Kai, eia ke papa loa ia nei.
2. O na wahi a pau loa, kahi o na waiona e kuai ia nei ma na apana o Honolulu, ke kauoha ia aku nei e hoopaaia mai ka hora 6 ahiahi a ka hora 6 kakahiaka o kela a me keia la.
Ma ke kauoha a ka Papa Ola.
WIILIAM O. SMITH.
Peresidena o ka Papa Ola.
3t.
---
NUPEPA KA OIAIO.
J. E. BUSH. Lunahooponopono.
---
O KA PONO KA AIALII E OLA AI KA AINA.
---
POALIMA ::: SEPT. 13. 1895.
---
UA AE PAHA.
---
Ke olelo nei kekahi poe ua ae ke aupuni i ma koi poho a ka poe i hoopaahaoia ai, no ka kipi, kokua kipi, a huna kipi, he mau haneri tausani dala ka nui. Ina he oiaio, keia, alaila ke hoon@eia aku nei ke aupuni a ka pukoa kahi e pukeeia ai kona iwikele a me kona kino a puka ae, a liu, a holoaia paha. Ua hoike ae la ka nupepa Avataisa, aole he oiaio o ka olelo, ua ae ke aupuni e hookaa i na koi poho.
MAKE LOA KA HOOHUI AINA.
---
Ma ka makou hoomaopopo ana na make loa ka hoohui-aina me Amerika, mamuli o na hoike e loaa mau nei ia aupuni. Ua hoike ae la o Senator Hilborn, kekahi Repubalika, kana mau olelo e pepehiia ai ka hoohui-aina, a ua holo pu aku nei no hoi kekahi mau kamaaina o Honolulu nei e kokua a e hoolaha i ka mea oiaio e pili ana i ko ka lahui Hawaii ponoi makemake ole i ka hoohui aina. He mea nui no keia, oiai e lilo ana ka ninau hoohui-aina, he kumu hana na ka aoao Repubalika e imihala ai hoi i ka aoao Demokarata.
Me he la, aia keia mau keoniaua i holo aku la, ma ka aoao Demokarata, oiai, ua loaa ia laua na mea oiaio, ua maopopo ke hui me na mea mua i loheia, aole loa kakou e hoohui ia ana. Nolaila he mea makehewa ka pani wale ana i na manao alakai e hoopuiwa ana i ka lahui no na hoohui aina ana.
---
KULANA O KA MAI AHULAU.
---
O keia ke kulana a hiki i ke au moe o ka ponei:
Huina o na ma'i.
Hoike mua ia ........71
Ma'i hou .................3
----
Huina pau 74
Hoikeia mai.
Mahope koke iho o ka loaa ana o ka ma'i .........41
E make ana........................................................18
Mahope o ka make ana .....................................15
----
Huina pau 74
---
F. ola nei.
I ola loa ................13
Ma ka Halema'i ......5 18
I make.
I hoike mua ia aku ..................55
A keia la ...................................1 56
Ke ano Lahui.
Hawaii maoli......................................................66
Hapa Hawaii ........................................................1
Europa .................................................................3
Potugala ...............................................................2
Pake ......................................................................1
Iapana ...................................................................1
---
74
Na ma'i hou loa.
Huali@, Kapalama-kai; ma'i ia 1 a. m.; hoike ia mai 6:30 a. m. make 1:30 p.m.
Lillie (w) Kalia; mai 4 a. m.; hoike 6 a.m.
Hopoe Sniffen (w) Kapalama, alanui Peterson; ma'i 3:10 p.m.; hoikeia 3:30 p.m.; na ke Kaoka Pake keia ma'i i lapaau.
---
E AKAHELE LOA.
---
Mamuli o ko makou makee nui i ke ola o ko makou mau hoa kanaka e anai ia nei e keia mai weliweli he Korela, ua manao makou, o ka wa kupono keia e ao hou aku ai i ko makou mau hoa kanaka, e akahele loa i ko oukou uhaai ana i ko oukou mau kino, ma ka ai ana a me ka inu ana i na wai huihui; pela hoi ma ka auwai a hele ana mai kekahi wahi a kahi wahi okoa aku, elike me ka mea a makou e ike nei i kekahi poe e holo hele ana io a ia nei me he poe ilio medala ole la, i ka po a me ke ao.
No ia poe, na kupono i ke aupuni ke hopu i ko lakou mau kino a hoopaa ma ka halepaahao, no na hana uhauha a kue i ka makemake o ka Papa Ola. E pono mo e kau ia i mau rula oolea loa, i lohe ai ka pepeiao o ka poe hookuli a piha hookiekie, eliko me kela wahine o uka o Manoa, i lawe ia mai ai e hoopaa i ka Halewai. E kiai ia na apana a pau o na makai kau lio, i loaa ai ka poe kolohe a huna i ko lakou mau inoa a me kahi noho pu. O ka lohe ke ola o ke kuli ka make.
NA KANAKA WAIWAI O KE AO NEI.
---
E like me ka hoike a ka nupepa World, o Nu Ioka, o keia iho na kanaka oi aku o ka waiwai o ke ao nei, eono:
Li Hung Chung $ 500,000,000
John D. R@ch-feller 180,000,000
Duke o Westminister 100,000,000
Colonela North 100,000,000
Cornelins Vanderbelt 100,000,000
Woh Gua 100,000,000
-----------------
Huina $ 1,080,000,000
Aole nae he pau pono o keia helu, oiai o ka oi a makou i lohe ai, oia no kekahi Pake, nona ka helu waiwai i hoikeia, he $1,800,000,000, a aia no hoi na Rothchild, na Baneko, i hoai aku i na aupuni nui a pau, a me na Iudaio e ae he lehulehu wale.
---
HE HOKU WELOWELO HOU
---
Ua hoike ae la o Prof. A. O. Leuschner, ka mea ma ke poo o ka Mahele Ao i na ike o na Mea o ka Lewa Lani ma ke Kula Nui ma Berkley, ua houluulu oia i ke ano o ke kakai pulelo mahope, o ka Hoku welowelo i ikeia e Prof. Swift mai kona wahi ma Mauna Echo, ma Kaleponi Hema. Ua telegarapa ia aku ka Prof. Leuschner mau olelo hoakaka i na wahi kilo Hoku a pau o ke ao nei, e hoike piha ana i ke alahele a keia hoku ahi-lapa e hele ai, i kona wa e nalo ai a e hoea hou mai ai, a me ka moolelo o na hoku a pau o ka papa hoku hookahi me keia hoku malamalama nani nui. Ma ke ano hoohalike o na hoku,ua ane kokoke keia hoku i keia honua; eia hoi, he 42,000,000 mile wale no kona mamao, a o ka mea ano nui nae e pili ana i keia hoku welowelo, oia no kona hookokoke ana mai i keia poepoe honua, ma ka 23,000 mile i ka la hookahi.
Ma keia ana e hiki mai ana oia i ka makahiki 1900. Ua ae ia, ko Prof. Leuschner ike e na akeakamai a pau, ma na houluulu helu ana i na mea e pili ana i na mea a pau o ka lewa lani, a no ia mea, e laweia ana kana mau huahelu he mea oiaio. Ua lawe ae la hoi oia i ke kahua o kana mau houluulu ana, mai na huahelu o na kilokilo ana a Prof. Barnard, ma ke kahua Kilo Hoku o Mauna Hanoilton.
Wahi a Prof. Leuschner. O ka pio-iki hoi o kona welowelo mai keia welelau o keia hokuwelowelo, oia ka mea e hoike mai ana me ka maopopo loa, me he la, he hoku kaa poai hele keia i hoea ana iloko o kekahi ana manawa a nalo aku la, e like me ka hoku welowelo i ikeia no e Prof. Swift i kela makahiki aku nei. Ma ka la 16 o Augato i hala aku nei, aia hoi kona mamao mai ka la aku, manawa o 127,000,000 a 128,000,000 mile ke kaawale, a ua kuemi mai hoi oia mai ka la ma kahi o ke 90,000 mile o kela a me keia la.
O ka elima keia o na loea kaulana o keia au, ma ke kilokilo hoku ana, a me ka ike akeakamai, hoike ae, he poino a he loli ano nui hoi ke loohia ana i keia poepoe honua a me na mea a pau maluna iho ona. He hookui ko ka honua me keia hoku welowelo e kaahele ana i ka lewa lani, ma kahi o ka 23,000 mile kona mama i ka la hookahi, wahi a Prof. Leuschner. A e like me ka hiki i keia poe loea kilohoku ke hoike i ka wa o na pouli ana o ka la a me ka mahina, i ka wa e kaalo ai kela kino lewa o ka lewa lani me kekahi kino, a pololei i ka sekona o ka manawa hoonoho mua ia, ma keia kumu ua hiki loa ia kakou ke hilinai he ike pololei no keia o ke kilo hoku e wanana nei.
Ua olelo oia i ka makahiki 1900 e loohia ai keia poepoe honua i keia hoku ahi lapalapa, a e he oiaio, he mea maopopo loa, ia ia e hookokoke mai ana i ka poepoe honua, e lilo ana ia he mea e hoololi ai i ka ea a me ke ano o ko lakou ola kino, mamuli o ka loli ana o na mea a pau e pili a e noho ana maluna o ka honua. Aole anei no keia mau loli ana o na mea o ka lewa e hoomaka nei e ulu mai na ano ma'i ahulau i ike ole ia mamua, a aole anei he mea e hoopihaia ai ka honua i na ea i like me ka mea maa mau, a ma ia ano e lilo ai he kumu ma'i no na kanaka o keia honua? Ua ike kakou o ka wela o ka la, o ka malamalama o ka mahina a me kona huihui, a me ke ano o na hoku, he mau mea no ia e hooponopono ana i ke ano o na mea a pau e ulu ana a e ola nei maluna o keia poepoe honua. Ke loli nui anoe nei na kau o ka makahiki i keia mau makahiki hope a kakou e noho nei, aole anei mamuli mai no ia o keia mau loli ana o na mea o ka lewa?
Ina ua manaoio kakou he Akua io o Iehova, a ua manaoia hoi makou a nana i hana na mea a pau ma kona mana, e like me ka hoike kumu, "e iho la Oia, a ua hanaia; kauoha iho la ia, a o ke kupaa mai la no ia." Pela kakou e manaoio ai e hooko ana oia i kana mau olelo a pau ana i olelo, a he palena ko kona hoomanawanui, a piha ka ipu hue i kona inaina, a nini mai la ia mea maluna o ke au nei, he oiaio, e loohia ana ko ke ao i na haawina weliweli oi ae i ko ke kai-hoee i ke au ia Noa la. E like me kona ike i kana mau mea i hana ai a me na hopena mai o na mea a pau mai kinohi mai, pela no oia i hoike mua mai ai i ko ke ao nei, ma o na kaula a me na kanaka hemolele o ka wa kahiko ma o ka hoike ana a ka Uhane Hemolele, a ma o kana Keiki Hiwahiwa hoi, i na mea a pau e hoea mai ana maluna o keia honua a me na kanaka a pau. Ua hoike mai la ke Akua i ka moolelo piha o keia poepoe honua a me na mea a pau maluna iho, ko lakou hopena a me ka manawa, a o ka la wale no a me ka hora kai koe aku e hoopauia ai na mea a pau e like me ia. Iaia i hoopai ai i na kanaka no ka nui o ka lakou mau hana hewa, koe hookahi aku o Noa a me kona ohana. Ma kana olelo hemolele, ua ikeia ke ko o na mea i oleloia e hiki mai ana ma ke ao nei, a ua kokoke mai la ka la o kona hoopai i ko ke ao nei. A wahi ana, aole au e hoopai me ka hoike mua ole ana mai i kana mea e hoohana mai ai i ko ke ao nei, mamuli o kona aloha nui ia kakou; nolaila, aole anei na ike e hoikeia nei ma kana olelo no ka piha ana o na wanana, a me ke kokoke mai o ka hopena, i ka poe naau haipule e imi ana i ka io o kana olelo, a me na mea e hoikeia mai nei ma ka lewa lani. i ke kanaka akeakamai, he mea ao ana ia kakou e hoomaemae, e kiai a e makaala, i hiki ia ia ke hoouhi mai i kona mana maluna o ka mea manaoio aku ia ia, oiai na popilikia i hoike mua ia e ilihia mai ana i ko ke ao nei?
Ua wanana ae ke kilo hoku kaulana o Enelani, Prof. Dimbleby e hulihia ana ke au o ka noho ana i ka makahiki 1898 1/4, ma ke komo ana aku o ka poepoe honua nei, iaia o kaahele ana ma kona ala poai o ka lewa, iloko o kekahi mahele o ka lewa lani i piha i na hoku helelei mau, i like me ia i oleloia ma Hoikeana. He mau Prof. e ae no kekahi, oia ano no, e hoike ana i ka popilikia e hike mai ana iloko o 1898, 1899 a me 1900. Aia i loko o keia mau makahi i e huihui nei na manawa a na kilo hoku a me na akeakamai e olelo nei, e loohia ana keia poepoe honua i kekahi o na pilikia nui i ike ole ia mamua.
---
NA HOOMALU ANA.
---
Ua hoike mai kekahi mea kakau manao i kona manao he kupono loa e hoomalu ia kekahi hapa o ke kulanakauhale o Honolulu. I keia wa, ua manao makou aole he kumu nui o ke hooko ana ia manao, no ka mea, ua malu ka ma'i i keia wa; ua hiki no nae na hoomalu o na wahi i loohia ia i ka ma'i.
NU HOU KULOKO
---
Nui ka owewela o keia mau la.
Eia no ke holapu mau nei ka ma'i i keia mau la.
He 18 ka nui o na moku e ku nei iwaho o ka nuku o ke awa.
He elima pake no Manoa i hopuia no ka piliwaiwai i ka ponei.
Eia mai ka kakou milimili me na mea hou like ole.
He 11 pake i hopu ia no ka pili waiwai i ka po Poaono nei.
Aole he haawi mea ai a ke Komite Kokua Hawaii ma nehinei.
Ua hoonuiia na la hoomalu ma'i korela a he eiwa.
Na S. M. Damon e hoolawa nei ko Moanalua mau lako ai a pau.
Ua lana mai ka manao o ke kulanakauhale e pio ana ka ma'i.
Eloaa no na hana i na kamana Hawaii ma ka hele ana i ka Papa Ola.
Ua ku aku hoi ka Auseteralia inehinei i Kapalakiko me na nu hou hope loa mai Honolulu aku.
Nui ka poe hooluana manawa ma Waikiki, ma Long Branch, a ma San Sousi.
Ua halawai ae ke Komite Waena Malama Ola, i ka hora 9 o keia kakahiaka. O na Luna pu kekahi.
He elua mau sela i au malu mai iuka nei mai ka mokumahu Ke Au Hou, Aole laua i loaa.
He hapaumi ko ka huamoa hookahi. Aole hoi he loaa o ka hualemi i keia mau la.
Ua make hoi keiki hanau hou o Mrs. Verleye, wahine kane make a ke Kanikela Farani.
He elua mau ma'i hou i lohe ia mai i keia kakahiaka, hookahi ma Leleo, a no Kapalama-kai.
He $8,000 a oi na hookupu kokua o na Hawaii. He 2000 a oi i hanai ia inehinei.
Ua halawai ae ke Komite Kuwaena o Umi, e noonoo i ke ano hou aku o ka lakou hana e hana ai.
Ua pioloke na Pake i ka po Poaono nei, i hoopuiwa ia e kekahi kanaka ona, e hele mai ana na Iapana e luku ia lakou.
O Miss Davison ka Luna o ke Komite kokua o na Hawaii, ma Manoa. Aia kona wahi ma ka hale o A. Montano.
Ma ka halawai a ka Papa Ola ua noonooia ka hoololi ia ana o ka muliwai Nuuau ma ka hookahe pololei ana ma Iwilei.
O ka Hale Kuni Kalepa o Mc Chesney, ma ka Uwapo, hookahi kai hookupu ole no na popilikia o ka lahui.
Ua hooholoia e ka Papa Ola, e hooneeia mea a piu o Waipilopilo a ka Hale hou o ka poe hoonal@ i kukuluia iho nei ma Kakaako.
O Kimo Campbell, Wm. G. Irwin & Co., Castle & Cooke, H. Hackfeld & Co., Mr. & Mrs. H. A. Widemann, ka poe i haawi pa 500.
Hookahi haneri barela palaoa a S. M. Damon i kuai ia no ka manawalea i kona mau hoaaiana, a e kalua mau ana ka bipi.
O na Kakauelelo a me na Luna Aupuni Hawaii, ka poe haahaa loa o na kokua manawalea i ka poe ilihune a pilikia.
O na ma'i a pau e hu mai nei ua hookumu mai no ia mai ka ai ana i na ia a me na mea e ae o na wai a me ke kai. He make ko ka hookuli.
Ua weheia he wahi hoomaemaeia ai na u@ana no ua kuaaina ma ka uwapo ma Ainahou o na moku o ka lama Pakipika. Malaila no e noho paa ai.
Ua noi mai na Iapana kalepa, e e ae ia lakou e hoopae mai i ka lakou ukana, malalo o no hoomalu a me na hoomaemae ana.
Hookahi haneri paona poi a Luther Wilcox i kela a me keia la, no ka poe nele. Hookahi haneri paona bipi a Waller. Hookahi omaoma palaoa a Love.
Ua hoao kekahi Pukiki e hiupalo ia W. N. Armstrong, keikikane hiapo a Limaikaika, ua alo ia ka palo, ma ka holo ana o Limaikaika iloko o kekahi hale. Ua huhu ke Pakiki no ka olelo ia ana he nika ia lahui.
Nana aku no hoi oe ia mea ma i ka po Poaono nei hele ia a luhe i ka wai ao paieie ke hele ala a niniu poahi.
He 13 mau wahi haole i hopu ia no ka piliwaiwai ma ka Hale Pahupahu Arlington, i ke keena malalo ponoi iho.
Ua haule la ma ka lio iho, o Ed. Giffard, kekahi kakauolelo o ka Baneko Spreckels i ka auwina la Poaono nei. He pohole ili, he kuia ma ka puniu, a he mau eha liilii.
Aole he pilikia o ke kama.
Ma kahi kikiki pu, ma Kalia, ka Peresidena a me ke Colonela, kahi i hakilo ai i ka hoao ia ana o ka pu wili Mons@r. Nui ka ilo kolela o Kalia i poino i ka lele makawalu a ka poka, me he ua hekili la ka ala@ine.
---
Halekuai Kamaa
- o -
MAKANANI.
Alanui Papu.
O keia iho ke Kamaa haahaa hila Kiani nani loa o na Wahine i kapaia "Oxford Tie"
O ke auo kuea a me ke ano uuku oioi o mua no $2.50 wale no.
O keia iho hoi ke kamaa ili Kao Farani o na Lede e pihi ana ma ka aoao. A he $3.00 wale no kona kumukuai.
He $4.50 ke kumukuai o keia kamaa mamua. Ma kahi keia e loaa ai o ka jun 13 tf@
---
C. E. Williams & Son
Helu 611 ::: Al. Moi
Mauka ina@ o ka pa Kuai Papa o Lui
me Kuke.
Na mea kuai ma na Lako Hale a me na Mo@ o na ano a pau ma na KUMUKUAI HAAHAA LOA.
Na mea Hana Pahu Kupapau a me laloa.
Na Pahu Kupapau hookomo ia mai iloko nei o ka aina, i oi ae ka nani mamua o na pahu kupapau hanaia maanei no ka $3.00 a pii aku iluna.
Kaa Kupapau no ka hoolimalima a o ka oi aku o ka nani ma keia kuni ma keia kulanakauhale no ka $5.
Na he kupapau a me na Kia Hoomanao.
Telepone 179.
jun 12 t@.