Ka Oiaio, Volume VII, Number 24, 16 August 1895 — Page 2

Ka Oiaio.

 

NUPEPA KA OIAIO.

J.E. BUSH, Lunahooponopono.

O KA PONO KA AIALII E OLA AI KA AINA.

Poalima, Augate 16, 1895.

 

KA MOIWAHINE LILIU.

 

            Ke ike mau ia nei ka moiwahine Liliuokalani, ma ka puka aniani o kona mau rumi e hoopaahaoia nei, e nana mai ana i kona mau makaainana me na manao aloha iloko lilo o ka iwihilo. He mea e ko makou aloha nona, a kulu iho la ko makou mau waimaka, no kona hoomanawanui wahine i na ehaeha @ ke kanawai o ke aupuni repubalika o Hawaii. O ke Akua oia ka mea nana i hooponopono i ko kakou mau kuia ma keia ao. Aloha no oia.

 

HE AO NAAUAO.

 

            Mamua ae o ka haalele ana iho o kekahi mau keonimana ia Hawaii nei, au aku la i ka loa o ka moana Pakipika, no ka ipuka gula ka pahu hopu, ua hele aku la laua e ike i ko laua hoa’loha, oiai lakou e kaawale ana a wehe ka pili hoo-kao-ia loko a haalele hoi i Puna na hoa’loha.

            Eia ke ao a ko laua hoa’loha e a’u mau hoa’loha oiaio, e kaa wale ana olua mai a’u aku, a pau hoi ko kakou hui ana he alo a he alo, a no e hoolohe mai olua.

            Ina olua e hoi a hiki i Kaleponi a i ninauia mai olua i keia ninau, he nui anei ka Pake a me ka Iapana ma Hawaii? Alaila hoike aku olua ae, he nui loa he mau tausani ko lakou huina nui he poe i paa maloko o na palapala kepa a na poe mahi-ko.

            O ka olua hoike ana pela, oia kekahi o na puupuu ikaika loa e kulai ana i ka hoohui-aina e ake nui ia nei, a o na mea e ae na olua no ia e pane aku e like me ka olua i ike ai, a mai hoonui wale aku olua i ka mea oiaio ole o ikeia mai ko olua hoopunipuni oiai, ua ike no olua ke poe kalai olelo ko ka Repubalika Nui o Amerika Huipuia.

            He mea oiaio, ua hooko i’o no keia mau keonimana, e like me ka leo ao a ko laua hoa’loha oiaio, a no ia kumu ua puka a maka ae nei ka hoike a ka hoike a ka lede Mrs. Hilborn o Okalana iloko aku nei o July, 25 a pela no hoi me kana kane Mr. Hilborn, e olelo ana, aole e hiki ke loaa ka hoohui-aina e akeia nei, a hoohui aku ia Hawaii me Amerika Huipuia oiai, he nui loa ka Pake i paa hoi malalo o na palapala kepa, a he uuku loa hoi na haole Amerika a me na haole Beretania, a he lahui Hawaii hoi kekahi poe no lakou ke kuleana paa.

            Aka, eia wale no ke kumu e manaolana iki ia ai oia hoi keia e hanaia kekahi kuikahi hemolele loa, a kaulike hoi, e hiki ai e kapae i ka mana o kekahi pauku o ke kumukanawai o Amerika Huipuia nei, a oiai hoi ma ia kumukanawai, ua oleloia aole e ae ia kekahi hookauwa kaupaa malalo o na palapala kepa, e noho ma Amerika nei, a aole no hoi e ae iki ke kumukanawai, a me na kanawai i na lahui Asia e komo mai i Amerika nei.

            Ma keia me ke olelo nei makou, aole loa e hui o Hawaii nei me Amerika, a hiki i ka hopena o ke ao nei, ke mau ke kupaa o ka lahui Hawaii oiaio mahope o ke aloha i ko lakou aina makuahine.

            Oiai hoi, aia no ia mana ia oukou, aole ia hai, he pono pilipaa ia a ke Akua i haawi mai ai, no kela a me keia mea pakahi, malalo iho o ka la.

            No ia kumu, ke hooia aku nei makou, a o kakou pu no hoi a pau, ua pololei ka leo ao o keia keonimana, he haole oia, aka, he ike nae oia i ke aloha ia oe e Hawaii iliulaula, a he hoike i ka mea oiaio loa, aole he hoopunipuni. A oia ka makou i hoomanao ae ai i ka haiolelo a Ilamuku E. G. Hikikoki imua o ka puali makai, i ka i ana aku, aia a huli mai ka lahui, alaila, hiki ka hoohui-aina e ake nui ia nei e ia nei i keia wa.

            No laila, e hoomanao oukou a o kakou pu no hoi a pau, i ka olelo a ka Haku, i kauoha iho ai i kana poe haumana, penei ke hoi nei au i ko’u makoua i ka Lani a hoouna mai ana wai i ka Uhana Hemolele e noho pu me oukou, a oia ko kakou kiai a hiki i keia la.

 

KA BANA LAHUI HAWAII.

 

            Ua ike iho makou i ka hoike a ka Nupepa Kuokoa (Independent) namu, o keia kulakauhale, e pili ana no ko kakou puali puhiohe, a me na mele oi kelakela o ka hanohano, oia keia, Hawaii Ponoi, Liliuokalani March, a me Star Spangled Banner.

            Ua olelo ia hoi o Libornio ka loea ma ke puhiohe ka mea hoi nana i hoohiolo aku i ka Bana kaulana o ke ao nei, aka, o kona kaulana, ua lilo oia he mea ole loa, aole hoi oia i heluia i na keiki Hawaii iliulaula, ai pohaku, ke poe hoi nana i lawe haaheo i kela mele kaulana loa, o ka Repubalike Nui o Amerika Huipuia, a ua olelo hou ia no hoi, o ka Bana Lahui Hawaii oia ka helu ekahi o ke ao holookoa ma ke puhi ana, aole loa e hiki i na ilikeokeo e ukali aku ia lakou.

            Ma keia, ua ikeia e pololei’o ana ka ka Leo i hoomahu’@ mua aku ai, e lilo aku ana na Hawaii uuku e rula i ke ao nei, ma na ike like ole o kela a me keia ano, a like me na ike i ao ia mai ia kakou. Nolaila, o ka lahui Hawaii ponoi, e manaolana oukou, o Hawaii ke pookela o ke ao a puni iloko o keia keneturia e hele nei o ka hanohano i loaa i na opuu pua rose o Hawaii nei, ma na aina e, ua loaa pu ia hanohano ia kakou a pau. Ma keia ano, ke manaolana nei makou, e huli hou ana ke alo o ka aina iluna, a me he mea la, ke nee awiwi mai nei ke au o ka manawa, a h@ he kau ana kakou iluna o ka puu hoomaha o ka lanakila mau loa, no ka wa pau ole.

            E ola o Hawaii i ke Akua.

 

HOPU IA O J. W. KALUA.

 

            Ma ke ku ana mai o ka mokuahi Calaudina i ka auina la o nehinei Poalua Augate 13, ua loaa mai ka moolelo pololei o ka hopu ia ana o Lunakanawai Kaapuni o Maui J. W. Kalua, i ka Poalua o ka pule i hala aku nei no ke karaima moekalohe.

            O keia karaima moekalohe i hopu ia ai o J. W. Kalua, o kekahi ia o na hewa e hoohaahaa ana i kona kulana Lunakanawai, a he kanaka hoi oia i minamina nui ia, aka, ua haule oia ma o keia hewa.

            I hewa ka honua nei ia Eva, a pela i poino ai ke ao holookoa mai o a o, a eia ka olelo kaulana o Hawaii nei, pua ka Wiliwilinanahu ka Mano, pua ke kanaka maikai, nanahu ke Kanawai, a oia kela i nahu mai la ia J. W. Kalua, ke kanaka i loaa ka hanohano i ke au P.G. aloha no.

 

O HAWAII IWAENA O KE AO HOLOOKOA.

 

            Mamuli o ka lanakila ana o na keiki puhiohe o ka Bana Lahui Hawaii maluna o ka Bana helu ekahi o ke ao nei, ua hooholo iho la lakou e nee awiwi aku a hiki i Nu Ioka, a mailaila aku no ka Hale Keokeo ma Wasinetona ka Hale a Peresidena cleveland e lua lai mai la iloko o 65,000,000; kanaka o ka Repubalika Nui o Amerika Huipuia.

            Ia lakou e hiki ai ilaila, a hoolaunaia aku hoi o Prof. Libornio e ko lakou alakai imua o ke alo o ka elele a ka Peresidena Cleveland, alaila, e noi ia aku ana ka oluolu o ka Peresidena e ae ia mai lakou e manwalea aku i kekahi mele ponoi a lakou i haku ai ma ke ano he makana ia Peresidena Cleveland.

            A ua oleloia o keia mele a lakou i haku ai, oia kekahi o na mele maikai loa, i like a like me ke mele a ka Moi Lunalilo i haku ai oia hoi Hawaii ponoi.

            O keia mele he mele hou loa, aole i loheia, a aole no hoi i puhiia ma na wahi e ae o America. O keia ka makou e olelo ae nei imua o na opuu pua rose Hawaii ponoi a lei i ka lei o ka lanakila oi kelakela.

            A mamuli o keia loea i loaa i na keiki Hawaii ponoi o ka aina kulaiwi, he hoike maopopo keia o ka noeau i loaa ia oe e Hawaii iliulaula, ka lahui hoi i oleloia, he lahui hupo, ike ole, hawawa a pela aku, aka, i keia la, ke keka ae nei makou i Hawaii kekahi i waena o ke ao holookoa. A ke manao lana nei makou aneane o Hawaii uuku e lilo i alakai no ke ao nei, ma na ike lehulehu ma keia mua aku.

            E na keiki ai pohau, i mua no ka hanohano o ka aina hanau, o ka Mana o ka Haku, oia pu me oukou no ka wa pau ole.

 

PEHEA OE E HAWAII.

 

            Ke ninau nei makou pehea oe e Hawaii repualika i keia la, i ka la apopo a i kela la aku, oi kaalo ole aku hoi ma kela huli o ka poepoe honua.

            Oiai hoi ma ko makou ano he waha olelo no ka lehulehu, he kuleana ko makou e ninau ai i na hookele o ka repubalika Hawaii pehea la ke kulana o ka aina i keia wa, he kulana hoomua anei a i ole emi hope paha, he kuleana lokahi anei, a i ole he lokahi ole paha, he kulana lana malie anei, a i ole he ooloku paha?

            Oke kahua o keia a makou e ninaunei, oia keia, ua nui na lono a makou i lohe ai no na koi poho, a me na mea hoi i ike makaia, oia ka Amerika Huipuia koi poho o $25,000 ka Beretania Nui hoi he $245,000.

            Mawaho ae o keia, ua lohe hou no makou, ke oiaio hoi oia keia, ua hiki hou mai la he koi poho hou na Amrika Huipuia i ka repubalika o Hawaii he $50,000 i na pela ana io alaila, pehea ana la ko kakou pono, e hiki ana anei ia kakou ke uku aku i keia huina nui iloko o ka wa i makemake ia ai, oiai hoi ke hoohuiia keia mau koi, ua like ia me $320,000. A oia ka makou e ninau nei, e mau ana anei ko kakou kulana aupuni hou ae, i ole ia, e pau loa ana anei ko kakou noho aupuni Kuokoa ana, a lilo aku la kakou he poe hoopilimeaai malalo o hai no ka wa maopopo ole? A he nui no hoi na kumu a makou e hopohopo nei, no ko kakou noho lahui ana, oiai hoi, mamua aku nei, ua hoike mai la ka nupepa P. C. Avataisa, eia ae he mau moku kaua Beretania a hiki mai, ma ke ala mai o Ekuakemala no Hawaii nei, no ke koi poho a na kupa Beretania i hoopaa kumu oleia me ka hewa ole i ka malama o Ianuari 1895 nei.

            Oiai hoi, ua ka i ka ai ka Beretania mau hana i keia maloko o kona moolelo, a ke manao nei makou e like aku ana kakou me Nicaragua, o kela koi poho o $75,000; a lilo ana ka Hale Dute iloko o eono hora wale no.

            A eia hou no hoi ke hoike hou mai nei no ka nupepa P. C. Avataisa no kela mau lako kaua e manaoia aku nei e hiki mai ana i Hawaii nei i ka malama ae nei o Sepatemaba o keia A. D., 1895. Mamuli o keia mau kumu, ua komo iloko o makou ka manao hopohopo a aloha hoi no ko kakou aina kulaiwi me ka minamina nui i ka aina i eka ai ka ili o ko kakou mau pukuna i ka nai ana aka, ke uhaai waleia nei no nae, me ka nana ole ia iho o kona mau makaainana kupa, a iwi kanu hoi o ka lepo aloha o Hawaii nei.

            A he mea pono hoi, e imi pono ia e na hookele o ke aupuni i keia wa, na kumu pale kupono, e pale aku ai i na poino e kau mai ana i ola ai kakou a pau.

 

KA HOOPAI O V. V. AKEPOKA.

 

            Ua waihoia aku la imua o ke aupuni repubalika o Hawaii, kekahi palapala e Comisina Hawes, mai ke aupuni mai o Bertania, no ka mea e pili ana i ka hihia o V. V. Akepoka, oia hoi, ua makemakeia e kapae loa ia kela olelo hoopai a ka Aha Koa o keia aupuni i hookau aku ai maluna ona. O ke kumu o keia koi a Beretania oia no ka hoopaiia ana o V. V. Akepoka maluna o na olelo hoike a kekahi kanaka i kokua pu e hana i ka hewa lawe ae la hoi ka Aha i na olelo hoike a keia kanaka nana i paipai maoli e hana hewa, a hoopai mai la.

            Ua hoahewa loa o Beretania i keia hana a keia aupuni maluna o kekahi o kona mau makaainana nolaila, ua noi mai la oia e kapae loa ia kela olelo hooholo a lakou nei, i hookau ai maluna o ka mea hewa ole. Ea e wili auanai paha ka huelo o ka Liona.

 

KA AHAOLELO.

 

            Mai ka hoomaka ana mai o ka Ahaolelo o keia aupuni hou e ku nei a hiki i keia la, ua piha ke kaau o na la hana, a ke hele aku la e palua, a i ole pakolu iho paha i ka huina oia mau la, a i ole kaulele iho no paha.

            Ua hoomaopopo makou, ua hele mai la kekahi poe o lakou no ke ao hou ana ia lakou iho ma na loina o ke kamailio ana, a pela aku, i mea no lakou e walea’i i na hua piapa o ka hoomaa ana i na rula o ka noho ana oia Hale.

            Hookahi wale no a makou mea e kahaha nei, oia ka haalele waleia o ka manawa hana o ka lehulehu, a holoke i Hawaii, Maui, Kauai, a pela aku, e na Senatoa a me na Lunamakaainana.

            A o kekahi hoi, ua haalele maoli paha a hoi loa no ka home, me ka manao hou ole mai no ka pono o ka poe nana oia i koho, oiai, ua pau no ka hulu o ka manu i ka hukihukiia, oia hoi kona uku hana.

            He mea keia na ke aupuni e noonoo ai, a e hanaia i kanawai e papa ana i ka uku koke ana a pau loa o ko lakou mau dala, a e hoololiia a e hoohalikeia ma ka la hana e uku ai, i ole ai e hoopalaleha ia ka pono o ka poe nana lakou i koho mai.

            Ua ikeia no keia mau kinaunau i ka wa o ke aupuni ’lii, aole no lakou mau pono iho, aka, no ka pilikia maoli no o ka ohana. He okipau keia.

 

HANAU KUPANAHA.

 

            Ma Waipio Hamakua Hawaii, ua hanau mai la kekahi wahine i na keiki he eka ka nui, iwaena o keia poe keiki, he ekolu e ola nei, a hookahi i kaalo aku la ma kela huli o ka Puuohulu, a pela pu no hoi me ko lakou makuahine, ua moe aku la i ka moe kapu o Niolopua, no ka hopena o keia kino lepo.

            I ka loaa ana mai ia makou o keia mau lono, ua hoomanao ae la makou i kekahi o na moolelo a makou i ike ai iloko o na nupepa o na Aina e mai, e pili ana no kekahi wahine i loaa ia ia na keiki he 20 iloko o eono makahiki wale no, a penei ka hanau ana.

            Makahiki mua elima keiki, makahiki elua elima keiki makahiki ekolu eha keiki makahiki elima elua keiki makahiki eono hookahi keiki, huina pau 20 keiki, a ke ola nei keia poe keiki a pau.

            He mau makua ilihune ko keia poe keiki, aka, mao keia hanau kupanaha ana o kela makuahine, ua lilo laua i mau makua u-lakolako, oiai ka poe ake mea nou e hele mau mai ana e nana, me ka makana pu mai no hoi ina makua o keia poe keiki, iloko no keia o keia keneturia e nee nei, a pela hoi keia wahine, a o ka mua loa keia i ikeia ma na kapa kai o Hawaii nei.

            Ma keia e ikeia ai ko ke Akua nani a me kona aloha, o ka mea hiki ole i ke kanaka, ua hiki no ia i ke Akua, a e hoonaniia ka inoa o Iehova o na kaua.

            No ka pomaikai o ko makou poe heluhelu, a me na hoa’loha no hoi a pau, e ake ana e ike i na nuhou o kela a me keia ano, oia ka makou e pahola aku nei imua o oukou a pau.

 

NA AUI O KA MAMAWA.

(Mai ko Makou Huaa Mai.)

 

            Oiai e noho ana kekahi Aha Kiure e noonoo no kekahi hihia waiwai a i ko lakou wa i komo ai iloko o ka rumi a puka mai me ka lakou olelo hooholo e haawi ana i ka pono no ka Ona nona ia waiwai.

            Ia wa i ku ae ai ka ihu o ka loea makuahine i ka makani, oiai hoi e pa ana na kikiao makani o ka inaina ma kona mau kapuai huluhulu pepeekue, a e halulu ana hoi ka papahele oloko o ka rumi hookolokolo me he hale hulahula no ka poe hula olapa, oia paha ka hula kiihelei o na wawe.

            Iloko o keia wa ana e kukalekale nei, oiai ka pauku kino e anapau ana, ua hoopuka aela oia i keia mau huaolelo ku i ka hoonaukiuki, penei.

            Aole loa e pau kuu daloa, o ka’u hoopii iho la no ia no ka pono o kuu keiki, a hiki i kona hookuu ia ana, aohe o makou minamina i ke dala, e opala ia, he puhi i ka makani.

            I wa wa e puka la kela mau huaolelo, ua like oia me ka Pelehu kane, iho iho o na lepe o mua o ka ihu.

            Ia wa i kaomi aku ai ka loio o ka aoao hoopii, me na olelo hooheno e hoomaalili ia ae ai na manao kupikipikio o ka iuaina e hekau ana maluna ona, me ka pane ana aku.

            “E kuu dear L-----, e honi kaua.”

            O keia ka wa i pane mai ai ua wahi dear nei a keia wahi loio hooheno. “Aole loa au e ae e haawi i kuu ihu ia oukou a hiki i ka la hookolokolo hope loa o ke ao nei, i ka wa a ha Haku e pii ae ai ma ka puu o Kalavari.

            Ea! He keu no hoi ha keia o ka wahine ihu paa, ke aua ia ala a hiki i ka hopena o keia ao, me ke kupaa luli ole oia mau.

            Oia ka nani e mama, a nou paha keia mau lalani mele a ka Puulena e uwalu mai nei.

            Ua ki no au a Paa ea.

            Aohe ki e hemo ai ea.

            Ei ae ka hoi ua eu ea.

            Kapeke ana ke Po-i ea.

 

HE LEO PAIPAI.

 

            He leo paipai ia oukou e o’u mau hoaloha e noho ana i ka makani Kailialoha o Kipahulu. No laila, ke nonoi aku nei au i ko oukou oluolu e ka poe i hookaa ole mai i ka Hookahi Dala no ka Nupepa Ka Oiaio, no ka hapa mua o keia makahiki e nei. E wiki, mai kali, he mau helu wale no koe a pau keia hapa. Owau no ka oukou kauwa haahaa.

            L. K. Keahikaolele.

 

            E ku @au mai ana ke mokuahi hou mai Palolana mai, i ka la 9 o keia mahina ae nei, nona ka inoa Alinore, a e holo loa aku ana oia no Yokohama me Honokaona.

 

KE KULANA O KA AINA.

 

            O ke kulana o ko lakou aina i keia wa e ikeia nei oia keia, he kulana iloko o ke kupilikii, a me ka hune, a me ka ae kuapapanui oiai hoi mai ka huli ana o ke aupuni a hiki i keia la, aole loa i ikeia ka holomua ana o ka aina ma na hana ano hou e hapai ai i ka aina iluna, aka, o ka ka lahui e ike nei, oia keia ke emi hope nei ka aina, oiai ua nui ka aie o ka lahui i keia wa. Oiai hoi, ua nui na hoohiolo ana no ka puali koa ka puali makai kiu ka moku kaua hoopau a pela au, a me na ilo e ae e lu waleia nei i ka makani, me ka maopopo ole o kahi e hoi mai ai o kela puu dala nui hewahewa a ka launa ole.

            Aka, ua lohe nae makou i ka olelo a kekahi kakoo o ke aupuni repubalika o Hawaii nei, e i ana nui loa ke dala ia makou i na e makemake ai e $5,000,000 e uku aku ai i ua aie o kela a me keia ona, alaila, ua hiki ia lakou ke uku i ka wa pokole loa, pela i’o paha oole paha, a ke kanalua nei makou i ka oiaio o keia lohe o makou.

            Ke kamailio nei makou i keia ma ko ka Lahui aoao, oiai hoi he waha olelo makou no ka Lahui holookoa, mai o a o o ka aina, e ku ana hoi e pai@ no ka pono kaulike, a ku hoi i ka pono, me ke kue ole i na kanawai o ka aina a me ka noho maluhia ana.

            E apono ana no makou i ka mea ku i ka pono, a pololei hoi, a e haawi aku ana no makou i na hoomaikai ana he nui noia hana maikai, aka, e ahewa aku ana no makou i na hana hewa e hana ia ana, oiai hoi he hewa noia.

            Ma ia ano, ke ku nei Ka Leo o ka Lahui e kiai me ka makaala loa i na wa apau, elike me kona ano mai kona hookumu ia ana mai, a hiki i keia la.

 

NU HOU KULOKO

 

            Eia o W. H. Konowela i ke t ona ne i keia mau la.

            O keia ka ka la hookuu o ka Ahaolelo.

            Ua hala aku o D. B. Smith ma ka Australia o ka Poakolu nei.

            Ua hala aku no Maui o Lunakanawai Frear a me kana wahine.

            Hoku me Kamehameha ke paani ana i ka Poaono ae nei.

            O ka Monowai ke ku mai ana i ka la 22 o keia mahina, a holo loa aku no Kapalakiko.

            I ka pule mua o Sept. e paani ai ka bana mai ka hoomaha ana no hookahi mahina a oi.

            Ua aihue aku kekahi Pake he $49.25 mai ka rumi aku o kekahi haole ma Kapamoo ae nei.

            Ua huli hoi aku o Sentoa G. N. Wilcox, a me W. H. Rice no Kauai, ma ka Mikahala o nehinei.

            Ma ka Malulani ka Poalua nei i huli hoi aku ai o Lunamakaaina na Pali o Maui.

            Ua lohe ia e haalele ana o John Kidwell i ka noho Kapena ana no ka poe kiki pololei

            Ua hopu ia elua Pake no ka hoeha ana i kekahi elemakule me ka oioi o ke koilipi.

            Aole he nui o na ohua o ka Ausetaralia ma keia huakai aku la, o ka Ma@a, a me na hua hala kahiki nae ka mea nui.

            Ua hoole o Col. Sam Norris o kahuku, Kau, Hawaii, i ka uku ana i kona mau auhau waiwai i ke aupuni.

            E haalele iho ana kekahi mau opio ma ka Monowai, no ka holo ana aku e ao ana ke kula kanawai o Yale.

            Mawaho ae o kahi noho o John Ena ma Waikiki, ua hei iho la iloko o ka upena lawaia kekahi mano, nona ka loa he 7 kapuai a oi.

            E kukulu hou ia aku ana he hale hoonanea hou ma ke kihi o alanui Beretania me Miller, no ka hoomana Methodist. Ua lilo mai ia wahi i keia hoomana o $9000.

            Ua haalele iho la he 300 Iapana no ke kulanakauhale o Pekina.

            Ua manao wale ia e hu@ hoi mai ana o John Ena ma kona ohana no ke awa lai o Kou nei.

            I ka la 1 o September a e nei, e ku mai ai ka mokuahi S. S. Altmore, o ka laina mokuahi o T. H. Davies ma, o ka laina mokuahi hou.

            I ka la 22 o Aug nei, ku mai ai ka mokuahi Manowai i o kakou n@i a i ka la 20 aku hoi ka mokuahi Mariposa, mai ka Hikina mai laua a elua.

            Ua haalele mai o Miller ia nei nei i ka la o nehinei, a lawe pu aku la no i kana mau canade ono loa helu ekahu. O keia ka “Boss” hana canade i kamaaina ma na pipa alanui.

            I keia la hora 4 P. M. e haalele iho ai ka mokuahi Austalia i ka awa lai o Kou nei, a hiu aku no ka loa o ka moana Pakipina, aia ka pahu hopu o ka Ipuka gula.

            Ma Waipio Hamakua Hawaii na hanau maila kekahi wahine be Eha ana mau keiki, he Ekolu keiki i ola a hookahi i make a make pu me ka makuahine, ea nui ka nani o ke Akua.

            Ma keia huakai aku nei a ka Malulani, e hekau ana oia i Molokai Nui a Hina, no ka lawe ana aku nei ia C. M. Hyde, no ke kahua o na mai Lepera, a mai laila aku no ka lai a Ehu.

            E ike ia no ke kiaha o ka hui paani kinipopo Spalding, a ka Hui Kinipopo Kamehameha i lawe haaheo ai no kela mau kikina kinipopo aku nei, ma ka Halekuai o na Mea Hao Pakipika.

            No ka uku ole ana o kekahi haole i ka uku o kona ai ana ma ka hotele, nolaila, ua kaohi ia oia mai kona manao ana e holo ma ka Ausetaralia, mahope iho no nae ua puehu aku la ka manu, me ke kaumapa o ka mea i hoaie ia.

            Ua huli hoi hou mai no Haawaii nei o John Magoon, mai kana huakaika ana hoi ma o ka haiolelo hoohuiaina, ma na wahi a pau ana e kaahele ai. Me he la ua ike iho la ka waiwai ole o kana mea i ake nui ai, nolaila, huli hoi okoa i Hawaii nei.

           

E kipa nui ae e na makamaka, e kuai i na kakamaa au lii ma kahi o Makanani, alanui Papu, he oluolu ke ku kumukuai.

 

Halekuai Kamaa o Makanani,

Alanui Papu.

 

O keia iho ke Kamaa haahaa hila Kiani nani loa o na Wahine i kapaia ”Oxford Tie.”

O ke ano kuea a me ka ano uuku oioi o mua no $2.50 wale no.

O keia iho hoi ke kamaa ili Kao Farani o na Lede e pihi ana ma ka aoao.

A he $3.00 wale no kona kumukuai.

 

He $4.50 ke kumukuai o keia kamaa mamua.

Ma kahi keia e loaa ai o ka

Jun13@