Ka Oiaio, Volume VII, Number 12, 24 May 1895 — Page 2

 

NUEPEPA KA OIAIO.

J. E. BUSH, Lunahooponopono.

O KA PONO KA AIALII E OLA AI KA AINA.

POALIMA, MEI 24, 1895.

 E HOOMAEMAE ia ana ka mokukaua Olympia o keaumoku o Amerika Huipuia, ma ke kio hoomaemae moku ma Kapalakiko mamua o kona holo ana aku no Honolulu, wahi a ka S. F. Examiner.

 Ua lohe ia, a ua ike maka kekahi poe ua hiki hou mai nei o Hamuku Hikikoki e noho paa ma kona oihana, a e kiai i ka poe olohewa a pai hewa i na huolelo ma na nupepa.  Hewa no ka olelo, he mihi ka pakele!

 UA hui ae na Aha Hooko a me ka Aha Kuka o ke Aupuni Hawaii, ma ka hora 2 o ka auina la onehinei.  Ua hooholoia e hoopii ia ae kauku o na luna koa.  Ua hooholo pu ia no hoi @ hooliloia he $10,000 no na lilo o ka oihana kaua.

 UA hiki mai kekahi olelo hoopunipuni i ko makou Keena nei, i ka Poalua aku nei, e ia ana o hoihoi hou ia ae ana ka Moi maluna o ka noho Moi, e ke Aupuni e ku nei.  No ko makou maopopo ana na kela elemakule deakona Moremona keia olelo palaualelo, ua hoomoe iho makou ma ka papa.  Ua hala inehinei ka la i olelo ia ai e hookoia ana ia mea, a ike iho la makou, he Kaula hoopunipuni i keia haumana a Keo Kamika laua o Brigama Yana, o ka hoomana o na La Hope.

KE pii mau nei ka aie lahui, ma ka $3,000,000 a ke kiei aku la i kela huli o ka $4,000,000 ina @ mau ka haanui o na hoolilo kuikawa o ke aupuni, no na kaua a me na hoomakaukau kaua.  Ke hoomanao iho la makou, i ke kue ino ia o ke aupuni moi ke hoonuiia ae ka mana koa o ia wa.  Aka, e like me ke ano e ikea nei, he okoa ka rula o ke au o ka iliula, a he okoa hoi ko ka ilikea, a puni ka honua.  Pela iho la no e hana ai ko ke ao poe, a hiki wale i ke ku ana o ke aupuni o ka Haku, kahi e analike ai ka noho ana o na mea a pau.  E hiki koke mai ana ia au, i pono ai, oia ka makou, kalokalo i na Lani.

 ILOKO o ka helu elua o ka nupepa “KE ALOHA AINA,” ua puka mai la hoi kekahi itamu, e ai hou ana i na huaolelo i puka aku i kona helu i kekahi la aku mamua malalo o ke poo manao.  “E na hoa makaainana,” oia keia mau huaolelo “Hawaii Aupuni Alii.”  Ua hikiwawe loa ke Aloha Aina i ka mihi ana, oiai, ke ike pono la oia, “aia kakou i ka ehaeha i keia mau la e nee la.  He okoa ka olelo waha, a he okoa ka olelo aai ma ka nupepa, a he okoa hoi ka liki mua, a he okoa ka mihi hope.  “Ao i ke koa, ao i ka hohe.”  wahi a kahiko, a peia paha ke ano o keia koa kiai i ka pono o na Hawaii.

 UA like ole hoi ka manao o na nupepa e pili ana i ke ano o ke aupuni kupono no Hawaii.  Ke hooikaika nei ka Bulletin e hoomauia ke aupuni repubalika, a e kue ana i ka hoohuiaina.  Me he la, oiai maoli no ka makemake o ka poe paa oihana e noho nei, koe aku na kanaka kuokoa e like me ko Kakina a me ko Hikikoki ano.  Ua hoike mua lakou mai mua mai no ka hoohuiaina, ia wa, no ka hoohuiaina ano, a no ka hoohuiaina a mau loa.  Pela no hoi o Ha@awela, aka, eia la ke hololua nei na manao o kekahi poe a ke huli nei no na pono pilikino aole hoi no ka pono akea o na mea a pau.  Oia ke ano e ikea aku nei, a ma keia kumu i hoomauia ai o ke anoninoni o kulana o ke aupuni e noho nei.

 HE mea nani ke aupuni repubalika no ke kamailioia i keia manawa, aka, i ka wa nae e hoohana aku ai no na makahiki mahope aku, he mea ano okoa loa hoi ia mea.  He uuku loa hoi na wahi hoopaa e komohia ole aku ai kekahi repukalika kuokoa ma keia aina, iloko o kekahi manawa aole no paha i mamao loa aku iloko o na kulana he lehulehu wale o ke ano aupuni moi.  O na manao pono pilikino e kapae ana i ka hoohuiaina, he mea no ia e lilo ai he mea hoopoino iaia iho i ka hopena mamuli o ia manao hupo iho. – A@ataisa.

 He mea oiaio loa keia, aole wale e pili ana i ke ano o ke aupuni repubalika, aka, ua pili hoi i na ano aupuni a pau.  I ka wa e hookele ia ai kekahi aupuni mamuli o na manao pono pilikino, ia wa ia ano hooponopono aupuni i haalele ai i ke kulana io oia mea he aupuni, ina no he aupuni moi, he repubalika, a he ano aupuni e ae paha, ua like wale no ka hopena; he huikau, he hooulu nokuahana, a he kue maoli no i ke kumu i kukuluia ai ia mea he aupuni.

 NUI na olelo kikoola a na nupepa haole o Hawaii nei o ka aoao repubalika ia Peresidena Clevelana, a i kona Aha Hooponopono aupuni, a i ka wa e ulu like ae ai kekahi kumu hana hoopaapaa a ke aupuni Enelani me kekahi o na aupuni o ka mahele poepoe honua o Amerika Akau a me Hema paha.  He nui na kumu o keia, o ka lili ia Beretania Nui a me ka huhu pilikino hoi i na poo o ke aupuni Demokarata o Amerika.  Aka, he kohu kamalii keia ano o na nupepa e hookahua ana he alakai manao no kekahi aoao o kekahi lahui, oiai, he mea maopopo loa, he mea waiwai ole no Enelani a me Amerika na lahui e alakai nei i ko ke ao ma ka naauao a me ka hoopono, ke hana i kekahi hana mokuahana mawaena o laua iho.  Ke hana laua i mea, he mea maopopo loa, oia iho la ka wa, i haule ai laua mai ko laua kulana alakai pookela i ko ke ao.  E like me ka olelo nani a ke Akua i ao mai ai i ko ke ao, i pili i ke kanaka a i ka lahui paha, oia hoi, “aole ka inaina o ke kanaka e hana i ka pono o ke Akua,” pela no e pono ole ai a e pomaikai ole ai ke lahui e haalele ana i ka manao hoopono a e kuu akea ana ia ia e alakai ia e ka manao kakauha o kekahi mahele o kona poe kanaka iho.

 E LIKE me ka hoea ana o ke aoopua, pela iho la e hoea mau nei na omamalu kaua mawaena o na lahui kanaka.  Hala ole ka olelo a ke Akua e i ana, e huhu ana na lahui kekahi i kekahi, a wahi hoa aku ana, “i ka wa e ike ai oukou i ka hiki ana mai oia mau mea, e manaoio oukou ua kokoke mai la ke aupuni o ke Akua.  Aole hoi he manawa e like me keia ke anoe o ka noho ana o na lahai kanaka.  Me he la ua haalele mai la ka Uhane Hemolele i ka lahui kanaka o ke ao, a he wahi koena wale no koe, e malama pono nei i kana mau kauoha a e manaoio nei i ka pono a me ka pomaikai o keia noho ana, a me ko kela ao aku, ma o Iesu Karisto la, a me kana mau ao ana.  He kaua ma ka hikina a ma ke komohana, o na mahele aina o keia poepoe honua, a he nune a he hoomakaukau kaua ma na wahi a pau a puni ke ao, me ka hala ole o Hawaii i noe maluhia i na kau olihi me ka mokuahana ole, a akahi wale no, a kakou e ike nei.  Heaha la ke kumu o keia?    oia ka ninau.  He hookahi no pane, oia hoi.  Ua lilo ke ao ia Satana, eia ke apuepue nei ia Mamena, no keiakumu, ke makaukau n@i, na kane a me na wahine a me na keiki e pepehi aku kekahi i kekahi, a o na lahui hoi e luku kekahi i kekahi.  Aole keia he kuko, aka, he hoike ana maopopo maoli no i ka pololei o ka olelo a ke Akua, ma o kana keiki a ma o na Kaula e pili i na mea e hoea mai ana i na la hope; a oia wa ua kokoke mai e like me ke ko ana a ka lau-piku e hoike ana i ke kokoke o ke kau.  Nolaila, e ka lahui mai ke kumu mai, mai a Papa a me Wakea, oia hoi mai a Adamu a me Ewa, eia ko oukou wa e makaale loa ai, a e kiai i ka olelo, o hiki io auanei ka mea nona ke Kihapai, e noho palaka ana.

KA LA HANAU O VICTORIA.

 O ke ahiahi keia mamua iho o ka la hanau o ka Emepera wahine o Inia, Moiwahine hoi o Beritania Nui a me Irelani, a me Panalaa i o Enelani a puni ka honua.  I ka la apopo e piha ai kona ma i makahiki he kanahikukumamaono.  Ua hanau ia oia i ka la 24 o Mei, 1819, a ua noho hope aku ma kahi o kona makuakane, pilikoko Moi Uilama IV, Iune 20, 1837.  Ua mare oia i ke Lii Alabati o Saxe-Coburg-Gotha, i make aku i ka 1861.  O ke kanalima-kumamahiku makahiki keia o kona noho moi ana.  He kanaono-kumamawalu ka nui o kana mau keiki; moopuna, a me moopuna kualua, he eiwa o lakou i make aku.  I ka la apopo e malama hoomanao ai na kupa Enelani i ka la hanau o ko lakou moi i aloha nui ia.  E hui ana hoi na Ahahui Enelani a pau ma Hale Kuokoa, ma Kewalo, e malama ai he paina a he po hula.  E mau ko ke Akua aloha me Vitoria, ke alii i noho alii me ke akeakea ole aku i na hookele aupuni ana a na moho i kohoia e ka lahui, a i hilinai ia e na mahele kanaka o ka lahui.  He aupuni moi ka olelo ana, aka he hookele ana lahui nae o Enelani malalo o ka noho moi naauao ana o ka Emepera wahine Vitoria.  E ola loihi oia @ ke Akua!

EIA AE A HIKI MAI.

 Ua lohe mai makou e hiki mai ar a ke aumoku kaua Beritania me ka Adimarala Stevenson ma keia hope iho, ma kona moku ka Royal Arthur.  I holo mai paha oia mamuli o na kue e waiho nei mawaena o ke Aupuni Moi o Beritania Nui a me ke aupuni o ka Repubalika Hawaii Uuku, e pili ana i na koi poho a me na hoohalahala o ke aupuni nui e pili ana i na mea i hana ia i kona mau kupa.

 Ua pili keia mawaena wale no o Enelani a me Hawaii Repubalika.

 

HE NUPEPA HOU.

 

 Ua hoola hou ia ae la ka inoa o ka nupepa puka pule “KE ALOHA AINA,” ma ka hoopukaia ana mai o kekahi nupepa puka la ma ia inoa hookahi malalo o ka hooponopono ana a Joseph Nawahi .

 He mau mahina aenei ka hoao ana a kekahi hui e kukulu i nupepa na lakou, a me he la, o keia paha ka hua oia hooikaika ana.  Ua manao makou, mamuli o na mea i lohe mua ia no keia nupepa, e puka mai ana la kekahi mau mea ano nui e hoolana ai i ka puuwai o na aloha aina, aka, aole makou i ike iho ia mea ikona hoea mua ana mai.  Malia paha eia ak@ ma keia mua aku.

 

AOLE OLELO HOOHOLO

 

 Ma ka hihia o Mr. Testa (Hoke) imua o ke jure i keia kau, ua mahae paewa ke jure ma ko lakou noonoo ana i keia hihia, e like me ka olelo hooholo i ka hoopii no J. E. Bush ohumu kipi, he ewalu ma ka hookuu, a i ka lua o ke komo a hoi hou ana mai o ke jure he ehiku no ka hookuu a he elima no ka hoopai.  Me he la o keia kulana like ole o na jure e ikea nei, oia iho la no ke ana o ke kulana manao o kanaka Hawaii e noho nei i keia la, he ehiku paa ma kekahi aoao a he eha ma kekahi aoao, hookahi moa loli o ka noonoo.  Ua noe aku la keia hihia a keia kau o Iulai, malalo o ka rula, ke ole e hoopau wale ia.

 

HE HALAWAI ME KA MOIWAHINE.

 

 Ua halawai ae la kekahi o na Kuhina me ka Moiwahine Liliuokalani ma ka Poaha iho nei o ka hebedoma i hala.  Ua lohe mai ia makou ua pili keia halawai ana no ka hookuu ana ia ia mai kona, noho pio ana, malalo o kekahi mau kumu i manaoia e ke aupuni he mea pono.

 Ua noonoo mua ia a eia ke noonoo ia nei, ke kupono o ka hookuuia o na pio aloha aina.  I ko makou manao he mea maikai io no ia i ke aupuni e hookuu i na pio aloha aina.  no na kumu lehulehu, oia hoi, he hoike ana i ko lakou hoomauhala ole, he hoike pu ana no hoi, aole lakou i kanalua i ko lakou kulana hiki ke hoomalu i ke aupuni, me ka oluolu a me ke kaulike O keia ka mea e mahalo ia ai o ke aupuni, a e oluolu ia ai e ka lahui.  O ka la eha o Iulai ka la i hanau ai o ka repubalika, ka la kupono loa e huikalaia ai i na pio aloha aina.  He leo uwalo wale no nae keia aka, he okoa paha ko na hoia uahoa o kela a me keia aoao e noho mai nei.

 

NA HOOLAHA AUPUNI.

 

 He mau la wale no koe, alaila, ku mai ka mokukaua Beritania Royal Arthur, o Adimarala Steveson,  He nu hou kona hiki mai i Hawaii nei, a he mea maopopo aole oia e holo mai ana io kakou nei e hoohala manawa wale.  He haupu wale ko makou e hiki mai ana keia moku, e like me ia i hoopuka mua ia aku ai ka “LEO,” a me “KA OIAIO.”  no ka hookui ana aku nei o ko ka Repubalika Hawaii mau manao i ko Haku Kimbale, e ke Kuhina o ko na Aina e ke aupuni o Beritania Nui e pili ana i na pio Beritania, a me na hoopii a na kupa oia aupuni i hoopaaia a e hoopii poho nei i ko kakou aupuni.  Ua holo palapala iho nei ke Komisina Hawes, ma ka aoao o kona aupuni mamuli o ke kauoha, a me ke aupuni Hawaii, a ua waiho aku la keia aupuni i kana pane, a me ho la e hiki mai ana keia mokukaua nui hewahehewa no ia mea, e like me kona hiki ana aku hoi ma Corinto, Nicaragua, e hoomalu ia a kaa mai kana mau koi poho a kona mau kupa i hopuia a i kipakuia.  He nui na pohihihi o keia mua aku.

 

KA HALEKUAI KALAHIKI OLA O KA LAHUI.

 

 Ua kono ia mai la makou, e hoike aku imua o ko makou mau oiwi ponoi o ka aina hanau, ua hiki mai la ka wa a kakou a pau e noonoo iho ai, ua hune a nele ka aina ma o na hana mikiala la e pono ai ka noho ana, e like me ka nele o na kuahiwi i na kehau ohu e hooh@a mai ai i na makaha wai ma na kuahiwi, pela hoi ko kakou noho ana.

 O ka hapai ana o kekahi kanaka Hawaii, a mau kanaka Hawaii paha, i kekahi hana e pono ai ka noho ana o ka mea hookahi, a i ole o ka lehulehu holookoa, he mea maikai ka laulima pu ana e hooholomua aku ai i ka hana a ia mea i hapai ai.

 

 Pela makou e ike nei, mamuli o ka hapai ana ae nei o Moses Palau, i halekuai no na kanaka Hawaii, i kapaia hoi ma kela inoa hookalakupua a makou e haupu nei, aia ke ano nui iloko o kona poli kahi i lolii ai, a mamuli o na kuhikuhi a me na rula a ko makou Makai Kiu i waiho mai ai, ua hiki no ia makou ke hoomaikeike aku, a oia iho la paha keia.

 Kalahiki, hiki mai na pomaikai he nui wale maluna o ka mea nona ka waiwai; hiki pu mai me na ulia laki he nui, ke puka mai ka la, e halihali pu mai ana oia me na mea e hauoli ai o ka manao o ka ona waiwai, a he lehulehu wale aku na mea huna pohihihi iloko o keia inoa o ka uwepa ae la i hoopaaia iho mawaho ka makou i wehe ae la, a koe aku no oloko na ka ona waiwai.

 Nolaila, ke kona aku nei makou i na hoaloha, na makamaka a me ka pilikana hoi o ke one o Kakuhihewa, w kipa ae ma ka halekuai o ke kanaka Hawaii, ka mea i hoomakaulii e hooikaika ana me ka hou o ka lae e kukulu i puuhonua nou e ke kanaka o ke one oiwi, i makee i ke aloha hoa kanaka, ma o ka ili la o ko kakou mau kupuna, e pupukahi ana hoi ma ka hoopuka ana ae i keia huaolelo hookahi wale no, “I hookahi wai o ka like.”

 Aole ia Oahu nui pau ka makou kalahea ana, aka, o Molokai nui a Hina no kekahi, ke keiki ku’i laau, e holo mai a e ikemaka i na wehi oloko o ka halekuai o keia keiki ku’i laau o Hina.

 Ke hea mai la hoi o Kaululaau i Lanai a-ke aea, ke kanaka kumau paakai nui o ke Kaha, e laulima pu ae iloko o ka halekuai o Kalahiki i Haehae, oia, oia ka pono.

 E kamalalawalu i na Hono o Piilani, kahi hoi nona ka makani kaulana he Kauaula, eia keia milimili au ke lawelawe nei i na hana e pono ai o ka noho ana o ka lokahi, oia kou kahua o ka holomua oia kou paleumauma.

 E Hawaii o Keawenuiaumi, eia o Kalahiki, ua pae mai nei ma na auwaalalua o ka hookuonoono, ua kau ae nei kona hae no ke kahea ana aku i kona mau hoakanaka, e kipa hale wale maloko e ke hoa eia iho ka ino la o waho he anu.

 Nolaila, ina aia ke aloha hoakanaka iloko o ka poli kahi i moe ai, eia ka wa e hoala ae ai mai kona moe ana, a ku ae la a maloeloe a hele pololei ae i ka hale kuai o ke kanaka Hawaii ponoi, i hooko e like me ka makou mea i hoike mua aku ai ma na kolamu nei o KA LEO a ke hooko nei keia oiwi ponoi, e lawelawe maoli i ka hana me ka nana ole ae i na alalai mamua o kona alahele.  He oki loa hoi ko kakou lu iloko o o na halekuai o na lahui e, ka poe aohe a lakou mau ipukai a me na umeke hamama akea, nana e hoona mai i na hakoko ana o na i@e@ o ka pololi maloko o ko kakou mau waihona ai, e like la me ko kakou ano kumu, mai kinohi mai.  Nolaila, o ke lohe a malama oia ke pono, aole hoi o ke kuli a hoonanahuki i kahi e.

 

KA MOKUKAUA LEHUA.

 

 Ma ka po o ka Poalima nei, ua hookomo mai la ka mokukaua Lehua iloko nei o ke awa, a lawe ae la i kona kulana maa mau ma ka aoao o ka mokukaua P@ledelepia.

 He eha la kona kaawale ana aku mai Honolulu nei, a holo kaapuni aku la ia Molokai, Lanai, a @nki loa i Hamakua.  Ua lohe ia aole he waiwai i loaa iaia ma keia huakai hou ana, koe wale no ko lakou hui ana aku me ka moku kuna Heeia mawaho ae o Molokai, a kau aku la na koa iluna o ua wahi kuna la e imi ai mai mua a hope aole nae he opiuma i loaa.

 He nui no na moku e ae i launa mai me lakou ma ka moana, aole nae o ka mea a lakou i manao ai a i moeuhane ai o ka po.  Ua piha pono i ka lanahu i ka Poaono nei, e hoohuli aku ana oia i kona alahele i keia manawa, no ka Mokupuni o Kauai, a e hiki loa aku ana paha i Nihoa a me Lehua, e ninau ai ia Kukaimoana, i na he mau ili keokeo kekahi i maalo iho ma kona alo.

 

KA HOPE O KA HOINO WALE.

 

 Ua hele aku la kekahi poe o Kakaako no ka makpehu nuhou, i ka nele o ka lakou nupepa i haanui mua ai e ola na iwi, a nonoi aku la e nana i ka LEO, ka nupapa a lakou i haalele ino ai, i ike i na mea hou.  Ua like keia hana me ka ka ilio, ka hoi hou e ai i  luai, aka, oia iho la no ke ano o kekahi poe Hawaii, he wikiwiki ma na olelo kaena uahoa, a me na olelo hoino a kaa pono aku la ke koikoi o ka olelo maluna pono iho lakou, ua mimiki mai la ka leo a me ka makapeni a like me ka aweawe o ka hee.  He mea lealea wale no ke kalekale olelo a me ka liki, aka, aia a kupono iho la ka hana a ke kanaka a me kana olelo ma kahi e hiki ole ai ia ia ke kapilipili ae la ia hai, e ike no anei kakou i ka like ole o ke koikoi o ke aoa kamailio pee kua me ko ka mea i haku a paiia malalo pono iho la o ko ka oiwi inoa a he okoa ke kamailio ma na kihi huina alanui i ko ka mea e kamailioia ana imua o ka Aha e hoopaa ana i na mea i hoikeia ae.  E nana aku hoi kakou ia mua, a e ike aku ana no kakou o ka mea paha i hoopunipuniia a i hoike wahaheeia, ua hoohiki, a pela aku, ke hoohiki mua ana, o ka mea paha i hoopunipuni a i hoike wahahae i kona hoalauna, ke pelu o na kuliia Mamena!

 

NA NUNE KAUA.

 

 Ma ka Poakahi i hala ua lawe mai makou, malalo o keia poo, i ka olelo paipai a ka Haku, e pili ana i ke kulana a kakou e noho nei.  Ua loaa keia manao e hookomo iho i ka leo paipai a ke Keiki Hiwahiwa a ke Akua me ka manao e lilo ia olelo i mea e hoohuli ai i ka naau o kanaka e haalele i ka iini nui no na mea pulelehua wale o ke ao, a e ho@ui ae hoi i ka noonoo i na mea e ae i oi aku ke koikoi.

 Ma ka lono i hiki mai maluna mai o ka mokumah@ China, mai Kiua mai, ua ike ia ua kuikahi keia lahui me kona hoa paio kaua.  Iapana, ma ka la 8 o Mei nei, e hoomau ana no hoi i haawi ana i ka Mokuaina o Manehuria a me Formosa na mea hoi i kue ia me ka ikaika loa, a i kue pu ia no hoi e  Farani a me Geremania.  He kumu keia e hiki ai ia kakou ke kanalua i ka holopono o na mo@ i aelike ia ma ke kuikahi hoopau i ke kaua, a e mau aku ai   He oiaio ua pau ke kaua mawaena hoa lahui Asia e kaua ana me laua iho, aka, o ke kumu i ae ia ai ke oki ana o ke kaua, ua lilo iho la hoi he mea na keia ma@ aupuni ekolu e hoimihala aku ai a lilo hou he kumu kaua hou aku.  Ma keia kakou e hoomaopopo iho ai aole i moe ke kaua ma Asia, oiai ke onou mai la o Rusia, me kona mau hoa aupuni, i ka momokuahi ia Iapana, he mea hoi e hoolilo ai i ka lahui hope i mea ole, a i ole e kono aku ana iaia e papahi i ka mahiole o ke koa a e unuhi hou ae i ka pahi-koko o ke kaua welawela.

 He okoa ka kakou ike i na kumu o keia mau kuee mawaena o na lahui, a he okoa hoi ka ka haumana e hoopapau ana i ka olelo ao a ke Akua, aka, he hookahi no kumu o keia mokuahana mawaena o na lahuikanaka, oia no ka hewa mole o na hana hewa a pau, he KUKO.

 “Nohea mai la na kaua a me na hakaka ana iwaena o oukou?  Aole anei no na kuko o oukou e kaua ana iloko o ko oukou mau lala?”  O ke kuko io no ke kumu i laha ai ka hewa, mai ke kuko mua ana o Ewa e lilo e like me ke Akua ka naauao, a hiki wale i keia wa.  No keia kumu kakou e hoomaopopo ai e ulu ai ke kaua mawaena o Rusia a me kekahi lahui e aku, a ma o ia kaua e ulupuni ai ke kaua e nune nei iwaena o na lahui a pau.  Aole e pio ana ke kaua, aka e ulu ana, a e kaua io aku ana no, a hoomaka na lahui ikaika e ku makaukau nei, me ko lakou mau miliona koa, a me ko lakou lahui i hoomaamaa wale ia no a pau i ka oihana kaua, e lele kekahi i kekahi ke i ae nei makou mamuli o ke alakai o ka olelo ao a ke Akua o ke kaua nui weliweli ia e hookumu ana i na la mamua pono iho o ka hoea ana mai o ke Keiki a ke Akua e hoola mai ai i ka poe i aloha ia ia a malama i ka olelo hemolele a kona Makua.  Eia ka olelo i hoike ia mai i ke kaula Dan. 12:1 e pili ana no ia kaua huliamahi.  “Ia manawa e ku mai ai o Mikaela ua lii nui la, ka mea nana e kokua i na keiki o kou poe kanaka a e hiki mai no ka manawa popilikia, ka mea like ole me ia mai ka wa o ka lahui kanaka a hiki mai ia manawa; a ia manawa no e hoopakele ia ai kou poe kanaka o kela a me keia mea i kakauia iloko o ka buke.”

 He uluaoa ma Amerika Huipuia e noho nei.  Ke ao ia nei na haumana hele kula i ka oihana koa ma na kula o ia aina.  Ke hoomaka nei o a no ka manawa mua loa e kukulu i aumoku kaua nui nona iho.  Ke hoolale @ oia i na hana akeakea aku i ke komo mai o na aupuni e aku mawaho o na aekai o ka mahele-poepoe-honua Komonana, aole e komo mai a hookuonoono iho maluna o na aupuni liilii a nunui hoi o Amerika Waena a me Amerika Hema.  Ke hoolale awiwi nei oia @ hookumu aku i ka hana nui e oki ana i ka puali o Nicaragua a lilo i ipuka a alahele e komo aku ai a komo mai kona mau moku, iloko o ka wa kaua mai ka Moana Pakipika a ka Moana Atelanika, a mai ka hope aku hoi a ka mua, a eia hoi oia ke hoomaka nei e kapae i ke kumuha@a kalaiaina kaulana aua i hahai ai no ka wa loihi, oia ka “Monroe Doctrine,” aole e lele aku e akeakea me ko na aina e ma kona komo an@ aku ma Samoa, a me kona ae ana e aihue kona luna aupuni nui, me ke kokua ana a kekahi lala o kona mana kaua, i kekahi aupuni Paeaina kuokoa me ka hewa ole, a me ka noho hoaloha no i ka wa i hana ia ai oia hoi ke Aupuni Moi o Hawaii.

 Mamuli o ke kuko loaa i ulu mai ai @ manao aihue aina pakaha aupuni a o na hakaka a me na kaua, @ ulu mai no ia malalo o keia kumu.  Ua uahoa ka naau o na lahui, ua kakauha ko lakou mau lima @ ua piha ka naau i na manao kuko a haa@@i.  Nolaila ua pololei mau ka olelo ao a ke Akua a makou i hoike mua ae la, ma o Iakoba la mailoko mai o ka naau a na lala ke kuko o ke kanaka, a ua ikemaka hoi kakou i ka hua oia mea ma na hana hewa a kanaka a puni @ @, ma na @ kaua a hana i@ @.

 

 

Aole i pau.