Ka Oiaio, Volume VII, Number 10, 8 May 1895 — Page 2

[Note:  there was no typed text in this file, and the font/ style was set as it appears]

 

NUPEPA KA OIAIO.

J.E. BUSH. Lunahooponopono.

O KA PONO KA AIALII E OLA AI KA AINA.

      POALIMA, MEI 8, 1895.

-----

KU OLE I KA MAIKAI.

      O ka hauoli ana o kekahi lahui no kona lanakila ana maluna o kona hoa paio, ma kekahi aina e i noho like ia aku e na lahui e paio kaua, aole ia he hana keonimana a Karistiano, e like hoi me na Iapana e manao nei e hauoli a e hookelakela ma Hawaii nei.

-----

AOLE E HOLO AKU.

      Wahi a kekahi alii moku o ka Piledelepia, na loaa mai hoi ia lakou he kauoha mai ke Keena Oihana Aumoku Kaua mai ma Wasinetona, aole loa lakou e haalele i ke awa nei o Honolulu a kauoha maoli la mai paha, a i ole a hiki mai he moku okoa e pani i kona noho ana maanei nei.  Heaha keia? wahi a ka ninau?

-----

E HOI HOU ANA NO.

      Mahope o ka pau ana o ka Mr. akina hana ma Hawaii nei, e hoi ana oa ma ke ano he poo no kekahi Buro Hoolaha i na Mea e pili ana ia Hawaii nei, a ma Wsinetona e noho ai.  Mahope iho keia hoi hou o Kakina no Wasinetona, o ka pau ana o kana mau hoike e pili ana i ka laina uwea teleragalapa mawaena o Honolulu a me Amerika a me kona hoomakaukau ana i kekahi mau bila kanawai e waiho ia aku ana i ke kau Ahaolelo i ka wa e noho ai oia Aha.

-----

HE MAKANA

      Ma ka halawai o ka ekalasia o Kawaiahao i ka la o nehinei, na hoike mai la ke Kahu imua o na hoahanau, oia hoi keia, na haawi manawalea mai la o T. H. Davis he kokua no ke kukulu hou ana i ka luakini he $1000 a he $500 hoi a Mrs. Davis.  He nui ae no paha na poe kuonoono e ae mawaho o keia mau inoa i hoike ia ae la, i haaawi i na kokua ana no keia luakini aole nae i hoike ia na inoa oiai, ua mahui mai makou, ua aneane no e lawa ka huina dala i manao ia no ka hoohana ana aku a na kamana i keia mau la.

-----

NA PIO ALOHA AINA.

      Ua hoike mai la ke aupuni o Amerika i kona manao ma o Kuhina Nui Gresham e pili ana i ke kulana o na Amerika i hoohiki a i komo kino e lawelawe ma ke kaua, oia hoi na pau ko lakou kuleana ia aupuni.  Eia hoi ke hoke mai nei ko Enelani Kuhina o ko na Aina e he manao okoa ko ia aupuni e pili ana i na kupa Beritania.  Mamuli o ka olelo hoohiki a W. Rickard a me T. Walker, ua kapae oia i ke kanawai Hawaii e pili ana i ka hoopuka ana.  Mamuli o ka olelo ana a keia mau kanaka ua olelo ia mai la laua i ka wa i hoohiki hookupa ai, aole i pau ko laua kupa ana no ko laua aupuni makua mamuli o ia hoohiki ana.  Nolaila, ua ano like iho la ke kulana e ka poe beritania e paa nei no ka lohe kipi, a pela aku, me ko na beritani ma Nicaragua a Beritania Nui i koi poho mai nei, a i lele maoli aku la e paa i kekahi o ko lakou kulanakauhale no ka hooko ole ia mai o kana koi poho no keia ano kanaka ona.  E ano like aku ana paha anei kakou me Nicaragua ina e koi pono mai ana o Enelani no kona mau kupa i hoohiki kupa no Hawaii nei, malalo o na kumu i hoike ia ae la.

-----

E HAALELE MAI ANA.

      Ua manaoia e haalele mai ana ka mokukaua Piladelepia i keia awa, i kekahi la o keia pule. Ma ka Ausetaralia o ka Poalima nei i manao ia ai e hiki mai ana ke kauoha, aole nae ihiki mai, a me he mea la e loaa mai ana maluna mai o ka Alamida i ka Poaha ae nei.  Ua hoike ia mai ia makou na hamama hou o luna o ua haleana la i na mea a pau e makemake ana e ike i ka nani a me ka hinuhinu o kona mau mea kaua.  Ma ko makou nana iho me he la, he ano no ko keia oluolu ia ana mai i keia lahui e makaikai mau aku i kona mau oneki a nau no e ka mea heluhelu e koho iho nou iho.

-----

NA HANA KUHIHEWA.

      Ua olelo ia ua pau aku ka pouli a ua o mai ka malamalama iloko o ka naau o na kanaka Hawaii, iloko o na makahiki loihi i kaa hope aku, He oiaio, elike me ka hele ana mai a ka malamalama o ka la iwaena o ka pouli o ka po, pela la hoi e hoopueha ia ai na manao kuhihewa o na Hawaii, aka aole nae pela ma na ano a pau, a e like no hi me ke ano mau o ka naau o kanaka a pau o ke ao, ka piha ino i ka hana a me na kuko hewa, pela no kekahi poe o Hawaii e noho mai nei.  Pau ole na hana hoomanamana a kekahi poe, a pau ole no hoi ka poe pouli e puni ana ia mea hoopunipuni.  Me ka minamina makou i hoolohe aku ai i kekahi moolelo kuee i ulu ae mawaena o kekahi kaikamahine-opio a me kona kaikunane, me ko laua mua aku, he wahine.  “He ohana koko hapa keia poe, i hoonaauao pono ia e na makua i hala aku i ka make, ma ko lakou home ma Kalihi-uka.

      Ua oleloia ua ulupaniia ke kaikaina kaikuahine i na manao olalau e alakai hewa ana e kuhi a e olelo ana ua anaana ia oia, a pela aku.  A ua kokua mai la no hoi ke kaikukane opio i ka hana a kona kaikuahine.  Ua eli ia he mau lua a ua kanuia na umeke, a pela aku, o ka ohana no ka makau ia.  He mau hana hupo keia e hoike ana i ka puni o kanaka i na alakai a ka uhane o na daimonio.

-----

KA MALAMA IA ANA O NA PIO ALOHA AINA.

      Ma ka hoike mai a kekahi poe pio aloha aina i lawe ia aku e hoohana ma Hilo i hoopuka ia ae ma ka nupepa Makaamana, ua like ole ka malama ia ana o na pio ma Hilo a me ko na pio ma Oahu nei.  Maanei ua maikai ka rula a me ka malama ia ana o na pio, a ina he oiaio, ka ka nupepa Makaainana e hoike nei, alaila, na paewa na rula a me na malama ana.  Hookahi wale no mea e maopopo pono ai ka oiaio o keia mau mea, oia hoi, ko ke aupuni hoouna ana i mau keonimana kuokoa e nana ana a e imi i ka mea oiaio e pili ana i keia lohe e laulaha nei, i mea e pau ai ka hewa ina ua hewa io, a e kinai wai hoi i ka olelo, ina he hoopunipuni.  O keia ka hana kupono o ke aupuni.  Aia no ka Ilamuku ma Hilo, loaa ke kokoolua o keia Komie nana e alakai aku i kahi o na paapio e noho la.

-----

UA HOOPAUIA.

      Ma ka Poalima nei, ua hoopau ia aku o McVoy, a me Wagner, mai ka noho makai kiu ana no ke aupuni repubalika.  Aole paha i poina ko makou makamaka heluhelu i keia haole o McVoy ka inoa oiai, hoi, e ku hoike ana imua o ka Aha Hoomalu i ka wa e hookolokoloia ana o ka Lunahooponopono o KA LEO, a e hoike ana ma ka aoao o ke aupuni.

      Ua hoike ia mai makou, i kona wa i hoopauia mai ai e ka Hope Ilamuku, ua hoea koke aku la oia no ka hale o kekahi wahine, ua pane ia mai la oia e ka mea hale, aole oia i makemake ia e komo aku i kona hale, a ua pane koke aku la ua haole ‘la, no ke aha hoi kou mea e kipaku mai nei ia’u?  Oiai he aloha aina au i keia manawa, a hoike aku la oia kona wa i hoopauia ana mai, me kona olelo iho, ina no ka Ilamuku Hichcock maanei, aole oia e pau.  No makou iho, aole makou e hilinai, oiai he mea mau keia, ma na ike ia he kiu i hoopauia mai la, e hoolimalima hou aku i kekahi, e like no hoi me ka haole wiliki o ka halewai mua o Hosmer ka inoa, i hoopau ia no kekahi hewa ana i hana ai i ke kino o kekahi wahine i hoopaaia a kii hou aku la no ke Kapena makai e hoolimalima, a oia hoi kekahi i ku hoike ma ka aoao e kue mai ana ia makou, ma ko makou hihia.  E akahele kakaou, oiai he nui loa keia mau ano e maalo nei imua o na kauhale, e hoino ana i ke aupuni, a e paipai pu mai ana no hoi i ka Hawaii e kipi, a e hakaka, alaila puka aku la kau olelo, loaa iho la kahi mauu e laawe aku ai imua o kona mea nana e hanai mai ana.

      He mea maikai ka makaukau o ke aupuni i na kiai eleu, e laa na makai kiu, oiai ma kona aoao, he mea maa ia ma na aupuni naauao a pau o ke ao nei.  Aole nae o ka hoolimalima i na kanaka lapuwale, e like ma ka mea i ike ia iho nei maanei, ka hele okoa aku a ka hae o ka hoaloha, a makamaka paha, a hookikina okoa aku e hana i na hana kue kanawai.  Aole oia ko lakou kuleana, a me ka lakou hana, oiai he mau hana imi hoopilikia wale no ia, a e oi aku ka maemae o ka inoa o ke aupuni, ke hoopauia ka hapanui o na kanaka hooimihala, a hoike hoopunipuni, e like me kekahi poe e ike ia nei e hana nei no ke aupuni.  E hana ia ka pono kaulike i na mea a pau.

-----

      E HOOKANAKA KAKOU.

      Ua hiki mai la ka manawa e hoomaopopo ai ka lahui Hawaii ponoi i ko lakou kulana, a e waiho i na manao nonohua kohu kamalii.  E nana aku kakou ia mua me na manaolana i kukuluia maluna o na hana naauao.  Ina ua nalo aku kekahi mea a kakou i manao nui ai, no ke kahiko paha, a no ka hala o kona kupono no no au a kakou e noho nei, a i ole no ka nawaliwali paha no a nui o kona mau palapu, i loohia mamuli o kona mau la ahuai a kino opio, a no ka hoomaopopo ole paha i na hoailona a me na ouli o ka manawa, a hooholomua aku iaia, alaila, he mea naauao ia kakou e waiho i ke kanikau ana no na ea i hala a e hapai ae i ka naau me ka manolana, e like me Ko ‘lii Haku Mele o ko Iseraela, mahope iho o kona kuekaa ana me ka naau luuluu imua o ke Akua, no ka minamina i ke ola o kana keiki e waiho ana iloko o ka mai, mahope iho o ka make ana o kana mea i kaunui ai,- e ala ae mai ke kuekaa ana iloko o ka lehhu, no ka mea i hala aku, hoomaemae ko kakou naau, hoohuli i na hana ana, a hoomaikai ae i ka Makua Lani, me ka naau haahaa, me ka i ana, ua hewa au a ua pono Oe, o kou makemae e ka Makua ke hana ia, aole o ko’u.

      Aia no i ka lahui Hawaii ka pono o ka aina, ke malama lakou i ka pono, a haalele i na hana hewa a pau, e like me ka olelo a Iehova.

      “Aole i kaumaha kona pepeiao i ka lohe, a o kona lima aole i pokole i ke kokua, aka no ko oukou hewa i kaupale mai ia’u a ma kekahi wa hou aku o kana olelo, ua haawi mai la i kamano hoohana ma kahi e i ana.  “Aole po ka la, ua hohola aku la au i ko’u mau lima i ka poe kanaka kipi, i ka poe i hele ma ka aoao pono ole, mamuli o ko lakou manao iho.”

      Ua lana ko makou manao, o na hoeha ana i ko kakou mau naau i keia wa, he mau mea no ia e ao mai ai ia kakou, e hoonaauao ia kakou iho, ma ka noho akahai a me ka hooliaahaa ana.  Ke ulu hou nei ka lahui Hawaii, he poe koko opio, kino maemae, a he poe hoi i hoonaaua ia me na ao ana mai ka ike a na makua ‘lii a me na makua misionari a hoolako ai.  E Hawaii opio, aia ia oe pakahi kou hopena aku nou iho, a no ka haahaa a nalo loa aku, e like me na lahui i hookuli i ka ke Akua Olelo.

-----

HE PUUWAI ELEELE.

      Ma ke kulanakauhale o Kapalakiko, e hana mau ia ai na karaima eleele o na ano a pau.  He pomaikai ka moku e hoea mai ana i o kakou nei, e ike ole ia iho ai he pepehi kanaka, a he lawe ola, a aole paha a he mau hana hakihaki kanawai e ee.  I keia moku i ku mai nei i loaa mai ai ka makou ope pea o laila mai, a i ka nana ana iho ua halaawai mai la makou me na mano lihaliha a manaonao, oiai hookahi olelo nui e hoopiha ana i na nupepa oia hoi ka pepehi hoomainoino ia ana o kekahi mau kaikamahine opio elua.  ua loaa aku la ke kkino make o kekahi o laua iluna loa o ka puoa hele, a na piha ka pule a oi o kona waiho ana malaila, a o ke kino hope mai nei hoi, ua loaa aku la ia maloko o ka keena hookipa o ke Kahu, o ua halepule la, aole nae i ino kona kino, oiai o ka pepehi ia ana iho no ia i ka po a ao ae no loaa.  Ua hopuia, a ke hookolokoloia mai nei ka hope kumukula sabati, o ua halepule Bapetiso la, a ua ikaila loa na hoike, e hiki ai ke hoahewa ia oia no ka make ana o keia mau kaikamahine.

      Ua hana ia keia karaima a ka puuwai eleele maloko o ka halepule Emanuela, he hoomana Babetiso, a o Theodoa Durrantt oia ka mea i manao ia nana i hoowalewale kela mau kaikamahine a komo iloko o ua halepule la, a hoopoino ia ko laua kino, a mahope o ke ko ana o kona manao holona pepehi iho la a make.  ua nui na leo hoino e lohe ia ana, no ka hana ia ana o keia karaima maloko okekahi hale i hoolaa ia no ke Akua, a ua hoike ae la kekahi Pake naauao i kona manao maloko o ka nupepa e hoike ana ina ma Kina keia pepehi kanaka i hana ia ai, o ka hoopai o ka mea i ku i ka hewa, oia hoi, e lawe hele ia kona kino ma na alanui, a ehiku pahi nana e okioki i kona kino, a o ka pahuna o ka pahi hope loa ma kona puuwai no ia, a o ka halepule hoi e puhi ia ana i ke ahi me kona mau pono a pau.  Oolea no ke kanawai o keia aina.

-----

KE NEE MAU NEI IMUA.

      Mawaho ae o na olelo houpuupuu, eia kakou ke nee malie nei malalo o na hookele ana a ke aupuni repubalika o Hawaii.  Ua maopopo loa hoi i ka nana iho na oni-paa kona ku@ana, oiai oia ke hooholo nei kona mau luna apuni i ka lakou hana me ke keakea ole ia, a hiki ole hoi ke kue ia mai.  He oiaio, he nahoa kona mau kanawai i ike ia ma na aina holomua o ka noho ana. Aka, aole ia he mea e hiki ai ke hoole ia hoi kona kulana oni paa e ikea nei iloko ona olelo a ka poe i makemake ole e hoole nei.  Hookahi wale no kumu hoopohopoia e noho nei, oia hoi ke apuepue o na haole i na oihana.  Ua nui loa ka poe makemake oihana mamua o ka lawa o na kakoo o ke aupuni i na oihana.  Ke kukulu mau ia nei na Komisina no kela a me keia hana, aka aole no e lawa ana.  E like no me ke ano o na aupuni a pau, e kue ana ka poe i nele i ka oihana i ka poe e noho oihana ana; a no ia kumu eia ke huihui nei na kokua o ke aupuni iloko o na puali koa i ike pono ia ai ka poe ilieha a i kuleana i na kaana ana o na oihana. Ma keia ano hana ke hoohalike la no na kaana ana e like me kona nai aupuni o ka wa kahiko.  He hoailona hawaliwali keia o ke aupuni, oiai he hoike ana ia he aupuni mana ma ke kaua aole me ka lokahi o na kanaka.  Ke olelo nei no nae na alakai aupuni no keia wa wale no keia mau hookele ana, a e like me ka onipaa a komohia ana mai o kela a me keia mea e hooia mai i ke aupuni repubalika Hawaii, pela e loli ae ai ka hookele ana a ke ano i ike ia he kupono no ka hooholomua ana i na pono a pau o ka lehulehu me ke kaulike.

-----

Ka Bana Lahui.

      NO KA HAUOKI O KALEPONI.

      E au i ke kai, a mai poina i ka aina.

      Ua loaa mai la ia makou na lono oiaio loa e pili ana i ka Bana lahui, ka milimili hoi a na mea a pau e hoomanao mau nei no ko lakou kupaa a naue ole, mai ko lakou wa i haalele aku ai i ka noho ana malalo o na hooponopono ana o keia aupuni hou.

      Ma ka noho ana o ka hoa o ka Bana Lahui Hawaii, ma kekahi halawai i malamaia e lakou ma ke ahiahi la Sabati nei, no na mea e pili ana i ka huakai a ka lakou kumu Prof. Libornio, i holo aku nei no Kaleponi, ua hoike mai la oia i ka holo pono o kana huakai i holo aku nei, a no ia kumu hoi kona hoi koke mai, me ka lawe pu aku i kana poe keiki hanai ma keia huli hoi ana aku no a ka Australia.

      E haawi ana lakou he umi aha mele ma ka Metroplitan no kela huina o umi maeawa e puhi ai i ka po.

      E noho ana na keiki Puhiohe Lahui ma ka Hotele Amerika Exchange o ko lakou uku moku mai ka holo ana aku a me ka hoi ana mai, aia no ia malalo o ka uku o ka Hotele kahi a lakou e noho aku ai.

      E komo pu ana ma keia huakai hele i ka aina malihini, ka Hui Himeni Quintette, ke hui ia ko lakou huina a pau, e hiki aku ana no ia i ke 42.

      I ka wa a ka mokuahi e ku aku ai i Kapalakiko i ka la 15 o keia mahina, alaila e haawi ana lakou i ka mua loa o ka lakou Aha mele ma ka Poalima, e like me ke kuhikuhi a ka Papa Hoonohonoho o ka lakou mau hana.

      Ma ka hora 3 o keia auina la, Mei 8, e akoakoa ae ai na hoa a pau o ka Puali Puhiohe Lahui Hawaii,  ma kahi noho o William Aylett, ko lakou Puuku a Luna Hoohana Nui, no ka liuliu ana ia lakou iho, no ka maki ana i kai o uapo mokuahi Oceanica kahi hoi a ka Australia e ku nei me ke puhi ana i kekahi mau loo mele e ku ai i ke aloha walania.

      No makou iho, ke hoike aku nei makou i ko makau aloha, ma ke kalokalo ana ae i na ale hakinua o Keaumiki a me Keauka mai hoao lakou e kipehi mai i ko lakou mau huna kai maluna o ko oukou mau papalina.

      A e ka eu o kaiuli, kai halanalana, kai popolohua a Kane, eia mai au milimili, ke auaku la i ka moana, nana ia ko kumu ka eu nana e hookuihe ka lakoo hana.

      Ia oe hoi o ka hauoki Kaleponi ka aina i holo ia ai ke mele a ka poo holo Kahiki. Makemake au e ike ia Kaleponi]

      Ka aina o ka nani e ka maikai]

      Maikai ke kai kuono o Hukekona]

      He nani aku o Papine me Kaliana]

Eia ka ka moi Kalakaua i make.

      I ke ia Kaleponi he aina anu

      Hauoki i ke anu o Omaha

      Mai ini oe i ko lakou mau ili, me kau kui mageneki hoeha ili, a hiki i ko lakou wa e hoi hou ana mai i ka aina nei.

      Ke haawi aku nei KA LEO a me KA OIAIO i ko lana mau kakoo ana mahope o ka oukou huakai hele, a e hoouna pu aku ana hoi i ko makou makai Kiu eleu,, e hele pu ma ka oukou huakai malalo o na lilo o ka Papapai o KA LEO a me KA OIAIO he mea i loaa ole i kekahi mau nupepa e ae o keia kulanakauhale.  Eo no i KA LEO.

      Ma keia moku a hiki mai ana mai ka Hikina mai e hiki mai ana mai ka Hikina mai e hiki mai ai ka hoike a ka makai Kiu.

      Aloha oukou a pau loa.

-----

LAE AHI

Nani wale Lae Ahi i kau ike

Kohu manu Pikae au i ke kai

Akahi hoi kau o ka hana nui

Ke iho lua nei na poka

Ilaila makou i ke kumaka

Hookahi puuwai me ka lokahi

Hookahi Wilikoki a e alo nei

Mauna i ke ola no ka lehulehu

Lehulehu wale hoi na poka

Ahailono a ke aloha ole

Aole no hi a i hopo iho

I ka puu kuniahi kani aiapine

Pane mai Wilikoki me ka nahenahe

Aohe kakou a e lanakila

Aole pukuniahi me a’u

Ka hiapo mua hoi a o nei hana

E hana i ka hana a e na hoa

Mai no oukou a hopohopo

Kaulana Hawaii ai pohaku

E ola e Liliu a mau loa

      Haina ia mai ana ka puana

      Wilikoki e koa ola Hawaii

            Hakuia e,

                  PUUWAIALOHA.

------

NA KEIKI PUUWAI LIONA O PAKIPIKA

Hoolana ka manao e ka lahui

Ua kokua mai hoi ka makua

Imua kakou a lanakila

Ke aloha aina oiaio

Aia i ka luna a o Leahi

Kahi hana welawela a ka lahui

Ilaila hoi au ike iho ai

Ua kohu paka ua e ka poka

Aohe i hopo iho ka manao

Puuwai hao kila aloha aina

Aina alii ao Hawaii

Na mamo hoi a Kamehameha

E ala e Haunuu e Haulani

Eia ke kolohe i ka aina

Ka pua aloalo i ka ehuehu

Hooehu ka hana a na hoa

E ala e Kane me Kanaloa

Lia makou kau pulapula

Pale i ka po puka i ke ao

Ola makou a pau loa

Haina ia mai ana ka puana

No na Liona o ka Pakipika.

------

PUPU KANIOE HONE IKE KULA

Auhea wale oe ke Kaupu,

Manu au kai o ka moana.

Aoi ana iho o Uila,

O ke a iwaiwa a oluna,

 

Noluna ka pua i Poni ia,

I kukuni paa ia kaiini.

I laila wau la ike akanani.

Na kikoni wela a ka ehakoni.

 

Ehuehu ka hana a Kawaikini.

Kea iwaiwa a o ka Hikina.

Hiki mai e ka loao o Makaukiu.

Ma ke ala koi lua koi aweawe

 

O kaua Kokoola a i na moana.

O ka punoho ku i ke Kualono.

O ka mamo hulu pala weo o kauka

Oo ka manu nana e kio.

 

O ka lawe kiani a ke Kawelu.

Nawe malie ana i ke ane pah

I ka piko kaulana o maunakea

Ke pookela o na kuahiwi.

 

Ilaila wau la hooheno ai.

Me ku’u hoa alo ehuehu.

Haina ia ma ana ka puana,

Pupukanioe hone ike kula,

      HAKUIA E PUUWAIALOHA

------

HE MELE KANIKAU NO KUU MAMA ALOHA UA HALA.

1.   Kanikau la he aloha

Nou no la e Mrs. P Kihei, Kuu ma-ma hele loa,

I ke ala hoi ole mai,

Nohe iho nei hoi au.

Ka olua lei hiwahiwa

Me ke aloha paumaka

No kou hala ana aku

Walohia wale hoi au

I ko’u honilona eleele

Ma ke aiai o ke kalana

Me na nuhou kaumaha

Au-we? aloha ino kuu ma-ma?

Kuu ike ole ia oe-e

2.   Kuu ma-mua i ka lai o Honokohau

ke one hanau hoi o ka olua lei

Aloha ae au ia Halehau home

I ke ku kilakila i ka lai

Ua lai no ka uhhane

O kuu mama hele loa

He loa ka uka o Makaa

Ia wahi a kaua e hele koolua ai

Hoolau kanaka i na manu

I ke kani hone mai i ka laulaau

Hoolaau mai ana ko aloha

Hoehaeha i ko’u puuwai

He waiwai nui ko aloha

A ko’u puuwai e lia mau nei

Aloha ae au ia Lipu’u

Kahi a kakou e pili ai

Elua olua e na Makua

Hookahi hoi au ka olua lei

I ha hoi i kuu lei hiwahiwa

Kuu luhi o kuu wa pilikia

Hoa pili o ke anu me ke koekoe

Au-we? aloha ino kuu mama

Kuu mama hoi-e

3.   Kuu makuahine i ka lai o Lele

I ka huikau lua o na lio

Ua lilo ka ka uhane

Me liawahine i ka uka

Auwe? walohia wale

Ka leo aloha o kuu mama

I ka pane ana mai me ke aloha

Aloha no hoi oe e kuu lei

Kuu mea poinaole i na kau a kau

Au-we kuu ma-ma

Kuu makuhine hoi-e

Elua maua kau mau lei

E ola nei i keia ao

A-i kolu no i ka hua mua

A ko mana mau pukaka

Eia au la e Lusell P. Kihei

Kuu kaikunane i aloha ia

Ua liki oe o kaua

Ua ike i ka hanu hope o mama

He nanao kaumaha kai hiki mai

A i a’u nei hoi i kou pokii

A he mea poina ole no’u ke aloha

O kuu mama ke hiki mai

A hiki mai no ko aloha e u-we no au

Kuu aloha pau ole ia oe-e

4.   Walohia ke aloha o kuu mama

O Mrs. P Kihei na hala-e

Ua pau kou ike hou ana mai

I ka hapa pulima a o kau lei nei

Aloha ka la’i o Keauhou.

I walea i ka malu lau Inia

Ilaila ka uhane o kuu mama.

I ke kui lei pua o ka ohai

Au-we, aloha ino, aloha wale

Kuu mama ua hala loa

Aloha ka leo o kuu pa-pa

I ke kaukau mai me ka waimaka

Aloha no oe la e kuu lei

E alo hookahi la i ke kai loa

E noho no oe me ke akahai

A-e pule hoi i ke Akua mana loa

I hooloihi ia mai na la

O kou noho ana me ka maluhia

A na ke akua e hoopomaikai mai ia oe

Au-we, walohia wale ke hoomanao ne

Ia mau mapuna leo aloha a o’u makua

Au-we walohia wale aloha no kaua

Kuu mama maikai loa hoi-e, a-lo-ha.

Haku ia e.

Miss Meriat Anne Kamaka Kihei.

-----

NA HIHIA O KEIA KAU

O ka nui o na hihia hewa o keia Kau 32, a he 65 hihia waiwai, a ma ka makou nana ana i ka papa hoonohonoho o na hihia hewa, ua ike iho la makou o ka hihia o na alakai o ka Lahui ke poo o na hihia hewa, oia hoi o J. E. bush a me J. Nawahi.

   Me ka nana pono ana aku i ke ane o na hiohiona o ka hoonohonoho ia ana o na hihia, aia iloko o laila he manaolana e hauoli ai o na hoaloha o na mea i hoopii ia, oiai ke ike e ia aku nei no i ula honua, oia ka oili e hiki mai ana ma o ko ke Akua kokua ana mai.