Ka Oiaio, Volume VI, Number 47, 23 November 1894 — Page 4
| This text was transcribed by: | Kehau |
| This work is dedicated to: | I kuu papa aloha nui ʻo George Iolani Peʻa no Keaukaha. |
Nupepa Ka Oiaio.
"O KA PONO KA AIALII E OLA AI KA AINA"
NUPEPA KA OIAIO.
__________________________
J.E. BUSH, Lunahooponopono.
J.K. Penikalaka, Puuku.
O KA PONO KA AIALII E OLA AI KA AINA.
POALIMA, NOVEMABA 23 1894.
__________________________
__________________________
He Moolelo Kaulana
----No----
OPERIA.
_________
Ka Eueu o Aitiopia
----A ME----
APERODITE
Ka Mahina Piha O Iopa -- Ka Oiwi non ka ui a me ka Nani, o aku i ko
ALIOPE
___________________
Ka Moiwahine o na I ʻ a o ke Kai.
___________________
No ka mea, ua kaei na Akua iaia me na pae mauna, no lakou na aa koko he dala maemae, a o ko lakou mau iwi he mabala keokeo elike me ka hau
Aia malaila na puu i puia me ke ala o ke kupukupu a me ka pua alani, a o na aina kula hoi i paa i ka mauu me ke ala o ka vaioleta a me ka oliva, a o na manu leo lea loa e himeni mau ana i na la a pau mana wahi hihipea o na mea ulu ma ka aoao o na kahawai e kahe mau ana i ke ao a me ka po.
He umikumamalua ka nui o kona mau kulanakauhale i piha pono me na kanaka, a oia hoi na home o kekahi lahuikanaka kahiko loa, na keiki a Kekeropa ka moikane o na moa, a o ke keiki hoi a ka Makuahine Honua, ka mea e kahiko ana he mau uhini gula mawaena o kona mau wawae lauoho; no ka mea elike me na uhini pela lakou e lele ai mai ka honua aku nei, a elike no hoi me na uhini pela lakou e hime-ni mau ai i na la a pau, me ka hau-oli ana malalo o ka malu o ka la.
Pehea kou manao, e kuu Operia ina oe e lilo i moi no kekahi aina elike me ia?
Alaila, ku iho la o Operia me ka piha kahaha o ka manao, oiai oia e nana ana maluna o ke kai hulali akea, a ike aku la i na kapakai nani o Atene, mai Saniuma a Himetusa a me Poneteticu, a me na piko mauna a pau e hoopuni ana mawaho o Atene.
Aka nae, o Atene ponoi aole he hiki iaia ke ike aku, no ka mea e ku alai mai ana o Eqina mamua ona, ma ka hapalua like o ka moana.
Ia wa, o kona puuwai pehu ae la a nui iloko ona, iaia i olelo mai ai:
Ina au e lilo i moi no kekahi aina elike me ia, e rula no au iaia me ka naauao a pela hoi iloko o ka noeau a me ka mana, a ina au e make e uwe no na kanaka a pau loa malu-na o ko ʻ u he, me keia mau olelo: Auwe ke kahuhipa o kona lahui!
No keia mea olelo, minoaka iho la ua Helepona nei, iaia i olelo hou mai ai:
E lawe i keia wa, i ka pahikaua a me ka palekaua, a hele pololelo aku i ka moi Aqeusa o Atene, ka mea hoi e noho ana ma ka puu Palosa, a olelo pololei aku iaia, penei:
Ua hapaiia ka pohaku, aka nawai na makana malalo ona?
Alailai hoikeike aku oe iaia i ka pahikaua a me ka pale aua, me ke kakali ana heaha la ka na Akua mea e haawi mai ai ia oe. ina no ka po-no, aohe olelo ana oia, aka ina no ka pono ole, ua ike no oe i kau mea e hana aku ai.
Aka, uwe iho la o Operia --E he-le anei au a haalele ia oe e kuu ma-kuahine, ka mea hoi a ʻ u i aloha loa ai mamua o ko ʻ u ola iho?
Pane mai la kona makuahine: Mai uwe oe no ʻ u. No ka mea, o ko ʻ u hopena no ia. Ua piha me ke kaumaha ko ʻ u mau la opio, a ua piha no hoi me ka ehaeha ko ʻ u mau la o ke kulana wahine.
Ua piha me ke kaumaha ko ʻ u mau la opio no Beleropa ka mea nana i pepehi o Caimera, ka mea hoi a kuu makuakane i kipaku ai ma ke ano kipi i ke aupuni; a ua piha no hoi me ke kaumaha ko ʻ u mau la o ke ano wahine, no kou makuakane lokoino a me oe.
Nolaila, e piha wale ana no me ke kaumaha ko ʻ u mau la a pau o ke ola ana (no ka mea ua ike au i ko ʻ u hopena ma na moeuhane) i ka wa a na keiki a ka Nene e lawe pio ana ia ʻ u no ke awawa hohonu o Eurota, a hiki i ko ʻ u holo ana maluna o na kai ma ke ano kauwa, he wahine la-welawe hoi no ka ahulau o Helene.
Aka nae, e hoopaiia anei au, oiai na opio kaeaea lauoho aeae elike me ke gula e holo ana e kue ia Te-roe, a e luku i na halealii o Iliuma, a laila, hoopakeleia ae la au mai ko ʻ u noho kauwa kuapaa ana e kuu keiki ka mea hoi a ʻ u i hanau aku ai, a lohe iho la au i ka moolelo o ko Operia kaulana ma ke koa a me ka ika-ika.
He mea oiaio, ke ike nei au he mau ehaeha hou ma keia mua aku; aka nae ua hiki no ia ʻ u ke auamo ia lakou a pau me ka hoomanawanui elike me ko ʻ u hoomanawanui elike me ko ʻ u hoomanawanui ana i ka wa i hala.
Ma keia wahi, honi mai la oia ia Operia, me ka uwe ana maluna ona a he manawa keia no na waimaka e kahe ana me ka lanakila, he wa hoi na ka makua e puili ana i ke keiki, a o ke keiki hoi i ka makua no ka mea, ua kokoke mai ka hora no ko laua kaawale ana no ka manawa maopopo ole. a o ko laua halawai hou aku aohe he mea i ike ia mea o ke Akua wale no ka mea iaia ke ola o na mea a pau.
I ka pau ana o ka laua ike hope loa ana, huli ae la ua Helepona nei a hele aku la no ka heiau, a o keia iho la ka hopena o ka Operia ike ana iaia.
No ia mea, ku hookahi iho la o Operia ma ua oloina la, me ka piha o kona noonoo me na manaolana he nui.
I kinohi, manao iho la oia e iho i kai o ke awa no ka hoolimalima ana i moku holo, nona, a holo aku no Atene: a oia hoi ke alanui hiki-wawe ana i manao ai; no ka mea aole ia he kama na ka manu, e hi-ki ai iaia ke lele aku maluna o ko-na mau eheu a hiki i ka loaa ana o kona makuakane.
Aka nae, ma hope o ka hala ana ae o kekahi mau minute, hoomaka iho la kona puuwai e maule iloko ona; a hanu kaumaha iho la oia, me ka nalu ana iloko ona iho.
Pehea la inoa he mau keiki e ae kekahi a kuu makuakane e hoopu-ai ana iaia, ka poe hoi ana i aloha ai?
Pehea la inoa aole oia e ike mai ana ia ʻ u?
A pehea la au e hana ai i ike mai ai oia ia ʻ u?
Ua hoopoina loa oia ia ʻ u no ka wa loihi mahope koke iho o ko ʻ u hanauia ana mai; a pehea la oia e apo aloha mai ai ia ʻ u me ka pume-hana i keia wa?
Nalu iho la oia iloko ona no ka wa loihi me ke kaumaha o ka naau, a ma ka hope loa kamailio ae la oia me ka leo moakaka;
Ae! e hana no au iaia e aloha mai ia ʻ u; a e hooia aku no au ia ʻ u iho ua kupono no kona aloha.
E hoao no au e loaa ia ʻ u ka ha-nohano a me ke kaulana, a e hana hoi i na hana a Aqeusa kuu ma-kuakane e haaheo ai no ʻ u, ina no he kanalima ka nui o kana mau keiki e hoopuni ana iaia!
Aole anei i loaa ia Herecule ka hanohano oiai e hookaumahaia ana, ma ke ano he kauwa no Eureseu?
Aole anei nana i pepehi i na po-wa a pau a me na holoholona ino, a hookahe aku i na lokowai nui a me na kahawai, e hoohina ana hoi i na puu mai kana hauna laau ne-wa aku?
No ia mea, ua hoohanohano aku na kanaka a pau iaia, no ka mea ua hoopakele ae oia ia lakou mailoko ae o ko lakou mau pilikia, a ua hooliloia kona ola ana i mea oluolu no lakou a pela hoi me ka lakou mau keiki mahope o lakou.
Ihea la au e hele ai, no ka hana ana e like me ka Herecule i hana ai?
Ihea e loaa ai ia ʻ u ka ulia kama-hao o ka halawai ana me na powa, na pilikia weliweli, a me na keiki o ka luapo, ka enemi o na kanaka?
E hele aina, ma nau ma ka mauna, na kula kanaka ole, a ma waho o ka aekai o na anemoku.
Malia paha o lohe au i kekahi mau hana koa kamahao, a hana hoi i kahi mea e eo ai ia ʻ u ke aloha o kuu makuakane.
Nolaila, huli ae la oia a hele aku la ma ka aina, e pii ana hoi ma na mauna, me ka pahi a Poisedona e kaiue ana kona aoao, a hiki i kona hiki ana i na mauna o ka nu-nui Peraite i noho ai, ma ka hapalua o ka pali.
Hoomau aku ia no oia i ka pii ana iluna iloko o ka hihipea o na laau, a hiki wale i ke ahinahina ana o na aina papu malalo o kona mau kapuai.
Aka nae, hoomau aku la no oia i ka pii ana iluna no ka wa pau ole, a hiki i kona ike ana aku i ka wa-ha o kekahi ana e hamama mai ana, me ka paila pohaku nui e ku aui ana ma kekahi aoao.
E noho ana maluna o ua paila pohaku la he kanaka nui, nona ka hapa maluna i uhiia me kekahi ko-loka hulu-bea.
O ke poo o ka bea kona papale, a he mea e ke aiai a me ke keokeo o na niho o ka bea a puni kona lae kahauia, a o na wawae ua nakii ia a puni kona a-i, a o ko lakou mau maiuu hoaka mai me ke keokeo maluna o kona umauma.
A i kona ike ana mai ia Operia, ku ae la oia iluna, me ka akaaka leo nui ana a hiki i ka wa i piha ai ke awawa me ka wawalo o ko a leo halulu.
Owai oe e keia malihini, ka mea hoi i hele mai nei ma kuu alanui?
Aka, hoomau aku la o Operia i ka hele ana imua me ke kuoo a maka ʻ u ole, me ka pane ole aku.
Aka, wahi ana iaia iho iloko o kona noonoo.
He powa anei keia, a i ole o kekahi paha o na kupuna ino? Ina pela, e loaa koke ana no iaʻu ka hanohano o ka hana ana i kekahi hana kamahao.
Aka, akaaka hou mai la ua ka-naka kupanaha nei me ka leo nui pono ole, me ka olelo hou ana mai penei.
E ka opio koa a makau ole, aole anei oe i ike o keia mau awawa a me keia mau puu au i pii mai nei aole loa e hiki ia oe ke hoi hou no kou wahi e puka hou ai iwaho.
A o keia ana e hamama mai nei oia koʻu hale, a owau hoi ka mea nana e luku na mea a pau e hele mai ana maanei7
No laila, e hele mai maanei no ka hookuu ana mai iaʻu e ahaaina maluna o kou io.
No ka mea, he mea makehewa nou ka hoao ana e holo mai aʻu aku.
No ka mea, he nui ka maalea o ka nahele a koʻu makuakane Hepaito i hoomakaukau ai naʻu, iaia i hana ai i keia mau awawa me kona mau alanui kikeekee, a mailoko mai o laila aole loa e loaa i kekahi kanaka kona alanui no ka home.
Neenee hou aku la o Operia imua me ke kanalua ole, a olelo aku:
A owai kou inoa mawaena o na kanaka e ke kanaka kamahao?
Ia wa, akaaka hou iho la ua ka-naka ano e nei.
O koʻu inoa oia o Peraite, ke keiki a Hepaito me Anaselia ke kupua wahine o na mauna.
Aka, ua kapa mai na kanaka iaʻu o Keroneta ka mea nana ka hauna laau new poniuniu.
A laila, lalau iho la oia ma ka ao-ao he newa kepau nui a hoikeike mai la ia Operia.
O keia ka mea a kuu makuakane i haawi mai ai, ka mea hoi i bana ia eia ma ke kumu o na mauna, a me ia mea au e kaniu ai i ke poo o na mea a pau e halawai ana me aʻu a hiki i ko lakou wa e haawi pio mai ai i ko lakou io a me ko lakou momona.
No laila, e haawi mai iaʻu ano i kela pahikaua nani au, a me kou kihei aahu.
A pela hoi me ko palekaua, o pepehi aku auanei au ia oe, a ma e kekahi ulia poino ma kou aoao o kou make no ia.
Aka, owili koke ae la o Operia i kona kihei aahu a puni kona lima hema, iloko o na opi oolea, mai ko-na poohiwi mai a hiki i kona lima.
Unuhi ae la ia i kana pahikaua a olapa ae la i ka lewa, me he uwi-la la i ka maka o ka opua.
Iaia i lele aku ai maluna o ke ka-naka nunui, me kana laau newa.
A lele mai la no hoi ua nunui nei maluna o Operia me ka weliweli nui.
Pakolu na manawa a ua nunui nei i hoomoe mai ai i kana newa maluna o Operia.
Aka ua palulu ae la o Operia i kona poo me ka palekaua.
No ia mea, ua piha loa o Operia me ka huhu, oia kaua i hookokoke aku ai i ua nunui nei.
A me he imo ana la na ka maka, haalele ihola ua Operia nei i ka pahikaua a me ka palekaua.
A lele aku la e hopu i ka aʻi o ka nunui.
Ma hope o ko laua kupapa ana me ka ikaika, hina like iho la laua a elua e pii ana hoi kekahi maluna o kekahi.
Aka, ia Operia i ku ae ai iluna mai ka honua ae, ua mau no ka waiho oni ole ana o ua nunui nei malalo o kona mau kapuai.
KE KOMISINA HAWES
__________
I ka hora 11 o ka Poaha nei ua kipa ae ke Komisina Hawes o Beritania Nui, e noho nei i ke alo alii o Hawaii nei eike i ka Peresidena o ke aupuni manawa e ku nei i keia la.
I kona lele ana iho mai luna iho o ke kaa a me kona ukali ua ike ia aku kekahi wahi Leta loihi e paa ia ana e kona ukali a hookipa ia aku laua no ka rumi ike pili oihana o ke aupuni Kuikawa a no umi minute ua pau ka ike ana a maila oia a motio loa akula kona ala hele no ke keena oihana o ke Kanikela P. R. Woka.
Ma keia ike ana a ke Komisina Hawes o Beritania Nui he ike oihana ia, aole keia he ike ana i ke aupuni Repubalika i ulu kamahao ae nei.
No laila e na hoaloha a me na makamaka, mai puiwa oukou mai hopohopo a mai kanalua a mai puni wale aku ia mai no.
Oiai o makou ko kiai a kilo hoi hou e Hawaii Ponoi a me he mea ala o ka hooko ia ana keia o kela Leta a no nui a makou i hoopua mua aku ai i o la honua.
Aka e kali malie no kakou me ka hoomanawa nui a hiki mai ka la a me ka hora e hooko ia ai ka iini o ka Lahui.
__________________________________________________
NA KANI PAKOLU NA HO-OLE PAKOLU ANA
____________
Ma ka hora 2 a.m. o na wanao a pau e kani mua ai na moa a me ka hora 4 a.m. noi e kani pakolu ai, oia hoi ke olowalu o na kani pokolu oia ko Petero manawa i hoole ai i kona haku aloha Iesu Karisto. E ahona ia hoole ana a Petero e kau ana no ka hualu o ka maka.
Eia hoi ma Honolulu nei, he hu-ina nui o na poe aihue aina e hoole ana lakou;
Aole loa e hoihoi ia ka Moiwahine Liliuokalani ma ke kalaunu o Hawaii aole no hoi e kukulu hou ia ke Aupuni Moi o Hawaii nei, o kekahi Luna Aupuni P.G. e noho nei ma kekahi kulana kiekie o ke Aupuni Pikake.
Ua pakolu kona hoole ana imua o na hoa aloha aina, e like me keia ma Ian. 17 1893 ua olelo oia ua pau loa ka Moiwahine a me kona aupu-ni ma Feb, 1 1893 hoole hou no me kona olelo mai e lilo loa ana na pae moku e Hawaii nei ia Amerika oiai makahi e kau ai ka Hae Hoku ua paa loa e like me ka La, aole hoi e haule hou ana.
A ma Nov 17 1893 paha, hoole hou no Nelaila ua piha iho la na kani pakolu a me na hoole pakolu ana, a no hoi, ma kekahi loa o keia pule no, ua hiki hou ae ua Luna aupuni P.G. la imua o ke hoa aloha aina oiai, a hoike aku la, ua lana-kila ke aloha aina ua haulepu na hoohinahina, e hiki mai ana ka ma-nawa e hoihoi ia mai ai ke aupuni Moi a me ka Moiwahine ma keia mua aku.
Ahahana li ka io o ua poe aihue aina la, wi ka niho o ka iole, akaaka ka poe lapuwale i ka hana hewa,
______________________________
E HALAWAI HOU ANA I KEIA LA.
______________________________
I keia la Nov, 16 hora 11 a.m. e hele hou ae ana ke Kuhina A.G. S Hawes o Beritania e noho nei i ke alo alii o Hawaii ka hope Kanikela T.R. Woka a me ke Kapena o ka moku kaua H,B,M,S, Haiakina, May e hui hou me ka Peresidena Dole a me kona Aha Kuhina.
A me heala i keia la ana paha e loaa ai ka pane o kela Leta a ka Moiwahine Vicoria o Beritania a Emepera hoi o Inia a Kuhina A.G.S Hawes i lawe aku ai i mua o Pereside-na Dole a me kona Aha Ku-hina ma ka la i nehinei Nov 15. A oia ko kakou wa eike pono ai i ka manao oua Leta ala i na nae e hoolaha akea ia ana.
A ma ka makou hoomaopo-po ana mehe ala o ka hopena ana keia o Babulona Nui a hiolo aku kona mana a me kona ikaika.
Auwe! kokoke pau ka hie o ke aupuni Makaainana auhee na kinohinohi mai iaia aku. Eola a Hawaii i ke Akua.
_____________________________________
E MALAMA I KA MALUHIA
E malama ia ana he Fea ma San Anaru i ka Poaono Nov 24 ma ka hora 11;30, a.m. e haawi pu ia mai ana he paina luau no na mea a pau e hiki aku ana ilaila ma ia la.
A ua kono ia na Lede a me na keonimana e hele aku ilaila.
Ma keia Fea he mau Hawaii he mau mea hoonani na kino-hinohi o ka aina pua, na mea i hana lima ia na mea paani a na keiki na Kanake ilike me ka pua keano ke nana aku oe iluna o ke pakaukau.
O na ia momona o loko na loko e loii ana iloko o na pahu i hana maiau ia. Na Hau hui-hui, na pola ti, a me na pola kope, he mau mea maikai wa-le no, na mea a pau i ku pono no ke kuai ana mai.
O ka Moiwahine kane make Kapiolani iaia ke pakaukau o na mea Hawaii, he nani oe ke kilohi aku a e kokua pu ana Buckingham, o na kokua e loaa aku ana no ka pono ia o ke kula olelo Enelani.
O keia Fea no ka hooakea hou ana aku i na keena kula a me kona kumu kula.
E na puuwai Hawaii oiaio a pau ke kono ia aku nei ou-kou e hele nui ae ilaila e haawi ai i na kokua ana aole hoi he hana nui i kealu nolaila e alu ka pule ia Hakalau.
E haawi oe e like me ka mea hiki aole e koi wale ia aku ana aia no ia i kou noo-noo ana a o kapono au eike ai oia kau e hana ai.
A e malama i ka maluhia oia wahi mai hooi aku mamua o ka pono.
Hele aku hookahi hele aku no a pau a huhui aku kakou ilaila.
_____________________________________
KE AUPUNI O FARANI.
_____________________________________
I keia manawa aia ke aupuni Farani ke liuliu ala i ko-na mau aumoku kaua no ka hoonee ana aku i ka Hikina, o na moku nunui i kapili ia me ke kila wale no a i lawa hoi ke ku apaio ma ke kahua kaua.
O ka moku kaua Polynesi-an, ua haalele aku oia ia Au-seteralia, a holo aku no kahi i kauoha ia aia maluna o kona oneki he lehulehu wale o na pukuniahi nunui a me ka lako kaua e ae o na ano like ole.
A i waena oia huina he 4 pukuniahi i oi aku ka nunui a he umi pu kanialapine ma ke 56 tona o ka pu hookahi ana hiki ke kiola ia he 300 poka i kela a me keia setona, e kipa ana oia i Noumea ma Kaledonia hou no ka hoolako ana aku i ko laila poe me na lako kaua a mai ilaila aku no Kina a mai ilaila ae no Make-kakeka, ke makemake nei ke aupuni Farani e ku hou oia i ke kahua kaua no ka pa-io ana me na enemi.
Ka Waiwai o ka Hoomana-wanui
_____________________________________
Ua ike no kakou ia Ioba, ua ho-ao ia kona ahonui me na pilikia he nui ma na mea mawaho, ua anai ia a neoneo loa ma kona io a me kona koko ponoi, ua pepehi ia a make ma kona hoapili he wahine, ua hoopailua oia me ka henehene mai, ua uhau ia o Ioba me na ehaeha he nui, eia nae ua maikai mau kona manao kana olelo a me kana hana. I hala aku la ia mau ouli kauma-ha mailuna aku o Ioba, ua loaa iaia ka maha a lanakila hoi, ua hoi hou mai na pomaikai oi loa aku, pela no hoi e pili ai keia mau ouli pilikia me ke kaumaha maluna o ka lahui Hawaii a me ka Moiwahi-ne Liliuokalani.
O ka elua makahiki keia o ka lahui Hawaii a me ka Moiwahine; i kali ahonui ai i na hana pauaka-aka a ke aupuni Amerika, a malia paha o uiha a aikena paha na manao o ka poe aloha aina a manao ae e komo a kakoo aku i keia mana aupuni pikake.
E ka lahui Hawaii hoi, i nui ke aho mai paupauaho oukou; moea aku imua, e noho malie me ke kali ana ia H.A. Widemann ko ka Moiwahine elele mana nui, no ka imi ana i ka pono o ka lahui a me ka aina hanau.
Eia ka manao o na luna aupuni o Beritania Nui, oiai akahi no a waiho ia aku na hoopii ana a ka lahui Hawaii a me ka Moiwahine imua o na mana nui, oia hoi o Beritania, Farani a me Geremania, nolaila ke noonoo ia nei ka ninau o Hawaii e lakou.
Nolaila ina ua hiki i ka lahui Hawaii ka hoomanawanui ana iloko o elua makahiki i hala, e kal? hou aku no me ke ahonui ana, no na la pokole i koe, eia aku a hoea mai ka hopena o ka ninau o Hawaii, e lanakila no ka lahui a me ka Moiwahine.
Ilaila auanei e haule ai ka poe ikaika, a e pau ai hoi na mea kaua a ka poe p.g. i ka make, a e oni paa loa ai hoi ike aupuni o Hawaii mau loa.
_____________________________________
AI I KA LAAU MAKE
_____________________________________
Ma ke ku ana mai o ka mokuahi Kina i hiki mai ai ka lono i o ka-kou nei ua make ia ka makuahine o ka Emepera o Kina, mamuli o kona ai ana i ka laau make,a ma o kekahi kumu ala i maopopo ole.
Ke hoole nei nae kona mau makaainana maanei, aole ka oia i make no ka ai ana i ka laau make; aka, ua make oia no kona maʻi mau iloko o kona puuwai, oia ka lakou e olelo nei; a o ke aha la ka mea pololei a kakou e hoomaopopo ai.
_____________________________________
KE CZAR O RUSIA.
_____________________________________
Ua hiki mai ka lono i Hawaii nei, ma kamokuahi Kina mai, e hoike mai ana ua kuu mai ka Czar o Rusia i keia ola ana a hele koha-na aku la no kahi mau o na mea a pau. O kekahi keia o na ʻlii kie-kie loa o Rusia, a he kakoo ikaika hoi no ka noho alii o ka Emepera o Rusia. Ua hala aku la oia ma ke-la aoao a o kana mau hana hoi, na ka poe ola e hoomanao mau. A i ka la hope e ala mai no auanei oia i ka wa e kani ai ka pu a ke alii anela Mikaela no ka hookolokolo ana i ko ke ao nei.
_____________________________________
HALEPULE HOU
_____________________________________
Aia ma ka aoao ma Ewa iho o Halaaniani ke kukulu ia nei he hale pule hou no ka hoomana lole ulaula, a oia ko lakou kahua e haiolelo ai ma keia mua aku.
Nolaila e ike ana kakou i ka la-kou nei apu koheoheo e onou mai ai na kakou e inu aku; a nolaila e lawe e ka lahui i keia olelo kaula-na o ko kakou aina kulaiwi. "iluna no ka ua, waele e ke pulu," a pela kakou e ku ai a nana aku i ka la-kou haa mai. Oiai i poino kakou i na po hai euanelio o Amerika, kahi hoi a keia poe i hele mai nei, nolaila e hoolilo kakou a pau i ? nona ka inoa he akule, ka hookaa-wale i ka hohonu.
_____________________________________
HE LEO I NA UOA
_____________________________________
Oiai hookahi wale no mahina i koe a puehu ae keia makahiki, nolaila ke noi ia aku nei ka oluolu o na hoa aloha aina e noho ? nei i ka kakou kauwa hoolohe, ka nu-pepa Ka Oiaio, ka poe hoi nana e omo nei i kona momona iloko o 11 mahina e noho ana i kahi o na keiki Pelekane nahoa ma Puehuehu a i Honomakaʻu i ka wai kau o Pahoa, a haulani loa ae i ka hale mahu Hanakaʻuwali o Hawi, e hoo kaa koke mai i na koena aie a pau mamua ae o ka la 1 o Dekemaba o keia makahiki. I ike kakou i na hana o ka makahiki 1895 ke pau ko kakou aie mua o keia makahiki.
J.H. Kuhinapule.
Hawi Mill, N. Kohala Nov. 1894
_____________________________________
WATI HAUOLE.
$10 MAKANA
Ma ka Poakolu nei; ua haule mawaena o keia mau alanui; Mauna kea; Hotele; Kamika; Beritania a me Papu; he WATI GULA; me ka inoa o ka mea nana ia waiwai mawaho o ke poʻi. E loaa no he uku makana kupono i ka mea a mau mea paha e hoihoi pololei mai ana i ua wati ala i ka mea nona ka inoa malalo iho; ma ka Hale Hana Hao o Ulakoheo. MR. JEO. KELA.Auwaiolima Nov. 7 1894 1wd
_____________________________________
OLELO HOOLAHA.
E ike auanei na mea a pau, owau o ka mea nona ka inoa malalo iho, ke hoike aku nei au i ke akea, a e hoolohe mai. Ma ka la 31 o Ocato-ba, 1894, ua holo mahuka aku kuu kaikamahine nona ka inoa o Miss Kamakawiwoole, a nona hoi na makahiki he 14. Ma keia ke hoike ia aku nei ka lohe oiaio ia oukou o ka mea a mau mea paha, e hoo-kipa, malama,a hanai ana hoi iaia, e hoopii ia no oia ma ke kanawai. A ke kauoha pu ia nei na luna haawi palapala ae mare, aole e haawi i kekahi palapala hooko mare, i kekahi mea a mau mea paha e hele aku ana ma ka inoa i hoike ia ae la maluna, a ina oukou e hookuli ana, e hoopii no au ia oukou. Owau no MR. NAHUINA HEKEKIA. 1wd. Honolulu, Nov. 9, 1894.
_____________________________________
HOOLAHA HOOKO O KA MORAKI A ME KUAI.
_____________________________________
Ke hoolaha ia aku ka lohe ma keia, mamuli o ka mana kuai i ha-awiia ma kekahi Moraki i hana ia ma ka la 1 o Sepatemaba M.H. 1892, e George Nakiaua a me Maraea George, kana wahine mare, no Honolulu, Mokupuni o Oahu, ia Malie Kahai, o Honolulu i oleloia i make i kope ia ma ka Buke 138, aoao 221-2-3; ke makemake nei o J.A. Cummins, Lunahoopono-pono Waiwai me ka Palapala Kau-oha i Pakuiia o ka Palapala Kauo-ha a Malie Kahai i olelo ia i make e hooko i ua Moraki la, no ka ha-hakiia o ka aelike, oia keia: O ka hookaa ole ia mai o ke kumupaa a me ka uku-panee pu i ka manawa i oleloia.
Ke hoike hou ia aku nei ka lohe, o na aina a pau i hoopaaia maloko o ua Moraki la, a i hoikeia malalo ae nei, e kuai ia aku ana ma ke kuai kudala akea, ma ka rum i ku-dala o Lewis J. Levey ma ke alanui Moiwahine, Honolulu, ke hiki aku i ka Poakolu, la 14 o Novemaba, M.H. 1894, ma ka hora 12 awakea o ia la.
Ua hoike ia malalo ae nei na aina i hoopaaia maloko o ua Moraki la, penei:
O kela apana aina e waiho la ma Pauoa, Honolulu i olelo ia, a me kela Apana Aiana e waiho la ma Au-waiolimu, Honolulu i olelo ia i ho-ikeia ma ka Palapala Sila Nui Helu 1789, kuleana Helu 3155 ia Makaiolu, i hoolilo ia mai ia Umauma opio e Umauma, kona makuakanu ma kekahi Palapala kuai i kopeia ma ka Buke 30, aoao 296-7, a i hoolilo ia mai e Umauma opio i olelo ia ia George Nakiaua ma kekahi Palapala kuai i kope ia ma ka Buke 136 aoao 307-8.
Kuike ke dala ma ke dala gula o Amerika. Na ka mea kuai mai e uku ua lilo Palapala.
No na mea i koe e ninau ia Jas. K. Kaulia a me Enoch Johnson, na Loio o ka Lunahooponopono Wai-wai me ka Palapala Kauoha a Malie Kahai i Pakuina o ka Palapala Kauoha a Malie Kahai i make, mea Moraki.
J.A. Cummins. Lunahooponopono Waiwai ma ka Palapala Kauoha i pakuiia o ka Palapala Kauoha a Malie Kahahai i make. Mea Moraki. Hanaia Honolulu, Oct. 24, 1894, 1-month ?