Ka Oiaio, Volume VI, Number 43, 26 October 1894 — E NA'I WALE NO OUKOU I KUU PONO AOLE E PAU. [ARTICLE]

E NA'I WALE NO OUKOU I KUU PONO AOLE E PAU.

MR. LUNAHOOPONOPONO, ALOHA OE: (Hoomauia.) A na ka'u mau keiki alii a hooilina o keia pae moku a me na alii e ola ana a me na makaainana. E hooko i keia huaolelo i na hanauna alii aimoku ma keia mua aku a hiki i ka hopena. No ia mea, ke waiho aku nei au i keia mau hoakaka ana i kahi i loaa mai ai keia huaolelo kaulana a Kamehameha imua o kou mau hoa lahui Hawaii ponoi; mai ke kilokilo Popolo mai no ia. E like me kona hele ana e huli i kanaka makai o Papai ma Puna no ka haiau ma Kaipalaoa Kahalaioleole ma Hilo. Ia Kamehameha i hiki ai me kona mau kanaka maluna o na waa ma kai o Papai: ua ike ia mai la oia e ka poe kanaka lawaia; a oia ka lakou i puana mai ai: Ei ae o Paiea. I ka pae ana aku o ka waa o ua Paiea nei; ua holo na kanaka a ua hahai aku o Kamehameha i kekahi mau kanaka elua: o Kauulu a me Kaluai. Oia ke kumu o ka paa ana o kona wawae i ka mawae pohaku a uhau ia kona lae i ka hoe e Kainiki; kela wahi kanaka ehu puipui a ka hoonana nui wale. Ma keia paa ana o ka wawae o Kamehameha a me kona uhau ia ana i ka hoe a hanini mai la ke koko o ke alii. Mamuli o ka ikaika o ua alii ala ua noha ae la kekahi aoao o ka mawae pohaku kahi i paa ai kona wawae. Ia manawa no hoi oia i loaa mai ai i kona poe kanaka ponoi, ua lawe ia aku oia a maloko o kekahi lanai waa e noho ai. Maloko o keia lanai waa e noho ana kekahi kanaka maka hapopo e hono upena ana, a nana i olelo mai ia Kamehameha me ka wiwo ole: E Kalani e — ua eha oe? Ae; wahi a ke alii. Kalani e—; akahi no a puni ka aina ia oe; a loaa ko kanawai he Mamalahoe; wahi a ke kanaka hono upena i pane hou aku ai. Heaha ke ano oia huaolelo kanawai he Mamalahoe? wahi a ke alii i ninau aku ai. He ola; wahi a ke kanaka i pane mai ai i ke alii. E hele ka elemakule, luahine a me keiki a moe i ke ala; ku ka maia a pala; ku a helelei; aole he mea

nana e kii; ku ke opu ko a hina; aole he mea nana e uhai. Nolaila e hoi oe a i ke kahuna a nana e kuhikuhi mai ia oe i kahi ou e kukulu ai i ka hale o ke akua; hele wale na aina aia ka ilina o Kauai; lilo wale ia aina i ka leo. Ma keia mau olelo a keia kanaka ua manao io o Kamehameha, a ua hooko pololei i ua kauoha; a me

kona hoopakele ana i na kanaka nana oia i hahau i ka hoe; ma keia kanawai he mamalahoe kanawai. Ua lawe ae la o Papolo [Popolo] he wahi upena nae a o ka hele aku la no ia a kau ana iluna o na waa a holo aku la no Hawaii. Ma ia keena la a po a ao ae, a ma ke kakahiaka nui oia la ua ike ia mai la e na alii o uka e kaalo ae ana na waa kaulua mawaho iho o Kailua, a oia ka na 'lii i hooho ae ai: Eia ae keia mau waa kaulua ke kokoke mai nei e pae. I ka lohe ana o Kamehameha i keia mau leo, ua ala pono ae la oia a noho iluna. E helu aku oukou i kanaka o luna o ka waa, a oi he 27, o Papolo pu kekahi me lakou.

I ka helu io ana aku a na alii ua pololei e like me ka Kamehameha i olelo ai I ka pae ana mai o na waa, ua hele aku o Papolo me Hoapili a hiki imua o Kamehameha a kukuli aku la oia me ka hapai ana ae i na lima o ke alii iluna o kona a-i a haule iho la kona mau waimaka; a mahope iho oia wa i pane aku ai ke alii ia Papolo: Akahi no au a pono, ua hiki mai la oe, e nana mai oe i kuu mai. Pane aku la o Papolo: Auhea na kahuna, na kilo kuhikuhipuuone a me ka poe kakaolelo ou e ke alii ? Ei ae no lakou; wahi a Kamehameha i pane aku ai ia Papolo. Ua kahea ia aku la ua poe nei, a akoakoa nui mai la imua o ke alo o ke alii; ia wa i ninau aku ai o Papolo i ua poe nei penei: Pehea ka mai oia nei? Aole he akaka o ka mai o ke alii ia makou a pau. A no ka loaa ole ia lakou ke ano mai o ke alii, ua lawe ae la o Papolo i kahi upena nae a uhi iho la maluna o kona poo. Ia wa oia i pane ae ai i keia mau huaolelo o ka wiwo ole me ka mokaka [moakaka] imua o Kamehameha, penei: E Kalani e—, ina paha i kilo lakou nei i ka hoku o ka aina nei, ina la ua ike lakou nei i ko mai, a me ko po e make ai. Ua kilo lakou nei i na hoku o ka lewa, a haalele ihola i ka hoku e waiho ae ana imua o ke alo. Nolaila, o ka'u ike, o ko ma'i no keia e ke 'lii a make oe; eha ou la e ola ai, a i ka po i o Hoku e make ai oe, oia ka lima. I ka lohe pono ana o Kamehameha i keia hoike pololei a Papolo, kulou iho la oia ilalo me na waimaka e haloi ana a pane mai la: Ia wai au e nalo ai? O ke alii no nana au i kii ae nei wahi a Papolo i pane aku ai. Ua ninau hou aku la no Kamehameha: ina e ninau iho na lii ia'u i huaolelo na lakou, pehea au e pane ae ai ? Pane aku la o Papolo; a i ninau iho na lii ia oe, alaila e pane ae oe penei : E NA'I WALE NO OUKOU I KUU PONO, AOLE E PAU. Ma keia mau olelo hoakaka o Papolo ua manao io o Kamehameha i kana mau olelo. A he mea oiaio, ma ka po i o Hoku i puana hope loa ae ai kona leo alii a lele loa ae la kona hanu, a pio iho la ke kukui o ko Kamehameha hale kino. A ma keia make ana o Kamehameha, ua kapa ia ka inoa o kekahi alii i ke au o Kalani Kaleiopapa Kauikeaouli Kamehameha III, oia hoi o— Leleiohoku oe, o Leleikamalama I o Nana, i o Kaelo, i o Kaulua. Hele ka o Manuhia.

Hele pono no iluna o na moku. Paa kuamoo o ka aina. Iwi i ka iwi o ka moku.

I na hala o Halaaniani No Wailuanuihoano ka'u lani Puka mai ai na lii laha i ke ao nei Eia la ia Leleiohoku ke-o nei. Mahope iho o ko Popolo hoakaka ana i kana mau olelo imua o ke alii Kamehameha me ka pololei. Aole no hoi ke alii i lawe ae i kona manao a huhu aku ia Popolo no kona hoike ana mai no kona po e make ai. Ua hamau kona leo alii, me ke kali aku no ka manawa a ke kilokilo i olelo ai no kona hopena e hoea mai ana. Ua like no kona manao me ko Popolo, a o kana mea wale no i olelo aku ai i ke kilokilo: Aohe o'u manao i koe e ninau hou aku ai ia oe, ua maopopo ae la no kau mau hoike, a oia ae la no hoi ua mea a'u i kau nui ai e hiki mai oe. Nolaila e makia ana au i keia mau huaolelo ae la maluna, mamua ae o ka lele loa ana ae o ko'u hanu mai ke kino ae.