Ka Oiaio, Volume VI, Number 30, 27 Iulai 1894 — Page 4

Nupepa Ka Oiaio.

"O KA PONO KA AIALII E OLA AI KA AINA"

 

NUPEPA KA OIAIO.

 

J. E. BUSH, Lunahooponopono.

J. K. Penikalaka, Puuku.

 

O KA PONO KA AIALII E OLA AI KA AINA.

 

POALIMA IULAI 27, 1894.

 

Aole i Hoopunipuni o Nawahi.  Aole No Hoi o Willis.

 

O Kamaki Spencer ka Mea i Haawi Pio.

 

            Ua hoopuka o Nawahi (e nana i KA OIAIO o Iulai 6, 1894) he mau hoakaka e pili ana no ka Protest a ka Holomua i olelo ai, ua kiolaia mai e Kuhina Willis.  Ma ia hoakaka a’u, ua olelo au me ka moakaka loa; aole no ka hoouna ana i Amerika ia Peresidena Cleveland ia palapala Protest; aka, ua kakau ia aku no ke Kuhina Willis ponoi, a penei ka olelo ana:

 

I ka Mea Mahaloia Albert S. Willis, Kuhina Noho, a Elele Kiekie o Amerika Huipuia.

 

            Ua hooia mai o Willis i ka loaa pono ana aku o ia Protest iaia, a Bush a me Nawahi ma i haawi aku ai ma ka la 10 o Mei, 1894 (e nana i na olelo a ka Hokuahiahi o Wasinetona o ka la 29 o Mei, 1894.)

            Ua olelo o Kuhina Willis ia Gresham, aole au i hoouna aku ia palapala ia oe

            Alaila, auhea ka hoopunipuni o Nawahi a Kamaki e olelo nei?  Ke olelo nei o Nawahi, ia Kuhina Willis ponoi ia palapala i haawiia aku ai, nona ponoi iho, u ke hooia ma@ la o Willis, me ka olelo aku ia Gresham; aole i hoouna aku ia palapala ia oe!  Aole i olelo o Nawahi, ua hoounaia na palapala Protest la i Wasinetona ia Cleveland, aole loa.  O oe nae e Kamaki kai haawi pio mai nei, ma kou olelo ana mai, eia no ua palapala la ianei nei ia Willis.  Alaila, ua kokua mai oe i ka Nawahi mea e olelo nei, no Willis no ia palapala, a ua loaa aku no iaia ma Honolulu nei no.

            No kou hawawa loa i ke kalai manao, a no kou hoomaopopo ole i ka Nawahi mea i hoakaka ai, nolaila ka lauwili a me ka hele-e o na kamailio ana; a o ka hopena, he haulepio iloko o ke kuhihewa.

            O na manao a pau e hoakaka ana no ua Protest la a ka Hui Aloha Aina, i hoike ia ma KA OIAIO o ka la 13 o Iulai, 1894, oia ka ka Holomua i olelo mai ai na Nawahi ia mau manao, oia ka Nawahi i hoole loa ai, aole nona ia manao, aole oia i kakau iki ia mea.  Oia ka’u i olelo ai, e hele e ninau i ka ona nona ka nupepa, oia o Mr. Bush, a nana e hoike mai i ka mea nona ia mau manao.  Aole no e loaa ia oukou, ua hooili aku @ maluna o Mr. Bush ia manao, aka, ua olelo au, ua pololei no ia hoike ana o ka mea kakau manao.

            Ke hooili kuhihewa mai nei o Kamaki no Nawahi ka hewa o ia Protest, etc., no ka mea, oia ka Peresidena Poo no ka Hui, oia ke Kapena, ke Kuhikuhipuuone, ke Alakai, a pela aku.

            O keia ka manao hawawa o ka poe ano kamalii i maa ole i na loina o na hana o ke ano naauao maoli.

            He mea hoomalu wale no ka Peresidena, a e alakai ana i na hooponopono ana o ka Hui, mamuli o ka hooholo ana a ka hapanui.  Aohe mana, a aohe he kuleana o ka Peresidena e hana aku i kekahi mea, me ka ae ole a me ka apono ole ia e ka Aha Hui.  O ka hapa nui loa o na hana, aia no mai na lala mai o ka Hui, pela ko’u ike a me ko’u maa no na makahiki loihi ma ka Ahaolelo, a ma na halawai hui e ae.

            Aka, no ko Kamaki naaupo ma ia mau mea, nolaila, ua lauwili kana mau manao e hoopuka nei iloko o ka Holomua.  He pili ole na kukulu manao ana; a he lele e i o a ianei, aole he moekahi maluna o ke kumumanao hookahi.  O keia ke kumu o ka hemahema nui ma na hoopuka manao ana.  Hookahi ao ana i ka mea naauao, he nui ia.  Ina e kuina ka mea naaupo a wali ma ka papa kui poi, aole loa e pau naaupo.

 

Owau iho no, me ka haahaa,

JOSEPH NAWAHI.

 

            Ua pepehiia kekahi kaikamahine e kona makuakane i ka hahai ana i ka inoa o kona makuakane a me kekahi poe e ae o Kakaako i keia poe e hele nei e kakauinoa.

 

Ki Pu Weliweli ma Makalawena Kona Akau, Hawaii.

            Ma ke ku ana mai o ka Malulani ua loaa mai la ia makou kekahi nuhou ano nui, nona hoi ke poo e kau ae la maluna, ma o kekahi leta la mai kekahi makamaka mai a e hoike ana penei.

            Ma ka la 9 o Iulai, ua ki ia iho la o Keawe (k) e Wile (k) i ka pu no elua manawa, aka, o ka mea laki nae, aole i ku o Keawe, oiai oia me kona kokoolua Kaumeleau.

            Ua loaa mai keia pu ia Wile mai a Maihui mai, me ko laua hele pu ana no hoi e ki ia Keawe, a no ke ku ole ana, ua hele aku la laua e hooweliweli iaia.

            O ke kumu o keia ki ia ana i ka pu, oia no ka lawe ia ana o ka lio o kona makuakane i make e Keawe.  A o ka mea nana i kauoha e kii o Kapela, aka, aole nae oia i kauoha aku iaia e ki i ka pu ia Keawe.  E ke aupuni a me na luna hooko o ke kanawai, e pono e huli koke aku i kela hapa karaima.

 

PAPAINOA O NA KIURE O HAMAKUA HAWAII.

            Mamuli o ka lokomaikai o kekahi makamaka i loaa mai ia makou ka papainoa pololei o na Kiure Hawaii o Hamakua, i ae ole ai e hoohikiia malalo o ke Aupuni Repubalika a na mamo mikanele i kukulu ae nei, ma ka la 4 o keia malama, no lakou keia mau inoa malalo iho:

AOLE I HIKI MAI.

            Keliikanakaole,

AE E HOOHIKI.

            Kahikina.

AOLE AE E HOOHIKI.

            Kaohimaunu, E. Wiliko, Mika Kua, S. Kapu Keliipuleole J. P. Kamakea, Mok@lohe, Kapena Kila, D. Kaula, Kahuakailoa, Kinimaka, Keawe Kanuha, E. Kauiha, John Ai, Kapololu, Kahoaka Opio, Kaona, Wm. N. Purdy, Kamakaeha, J. W. Hoopii.      (UA MAKE.)

            Ma keia papa inoa maluna ae, e ike ai ka lahui i na Hawaii oiaio i makee i ko lakou aina, no ka pono a me ka pomaikai o k@ lakou mau keiki a me na hanauna aku.

            Ke pahola aku nei makou i ko, makou mau hoomaikai ana ia oe e ka makamaka maikai, no kau i lokomaikai mai ai.

 

HE OULI KUPANAHA.

            I ka po i o Hoku, ua ike ia aku kekahi “Ouli” kupanaha e kau ana maluna o ka Mahina a oia keia.

            I ka wa a ka mea kilo ouli lani, e nana ana i na paia lani, ua ike aku la oia a me kona poe, i kekahi ouli kupaianaha, oia hoi he Hae Hawaii e kau ana maluna iho o ka Mahina.

            O ke poo o ka Hae aole i moakaka loa kona ike ia ana, aka, o kona mau kahakahana, ua hiki ke ike ia aku me ka molaelae.

            Ma keia ke hoakaka nei makou i ke ano o keia “Ouli,” a oia keia.  O ka Mahina, oia ke alii wahine o ka po, a o Liliuokalani oia ka Moiwahine o Hawaii nei.

            O ka Hae Hawaii, oia no ke Aupuni, a o ke kau ana o ka Hae Hawaii maluna o ka Mahina, ua like noia me ke kau hou ana iho o ke Aupuni maluna o ka Moiwahine Liliuokalani.

            A oiai hoi, ke hoike mai nei kela po kela po i ka ike, a o ke la la keia la i ka naauao.

            Nolaila, e ka lahui Hawaii oiaio, aole e loihi na la i koe, a e ike no kakou a pau me ko kakou mau maka ponoi, i ka ho’i hou ana a’e o ka Moiwahine ahonui Liliuokalani, ma ka noho alii o Hawaii nei.

            O ko ke Akua makemake ke hooko ia.

 

            He Admiarala Faran@ kai lohe ia e ku mai ana i keia mau la aku a pela no hoi i lohe wale ia nei no ka Beritania.

 

            Nui ka mahalo o ka Lunahooponopono a me ka Puuku o ka LEO a me ka OIAIO, i ka hoomanao mai o ka poe e lawe nei i keia mau nupepa.  E eleu mai na hoaloha o ka lahui, i hoomau ia ai ko kakou mau kiai a alakai.

 

O KA LEO O KA LAHUI,

OIA KE KUHIKUHI PUUONE O KO HAWAII PAE AINA

            He mau la liu wale kai hala aku nei o ko kakou noho hoomanawanui ana, me ke kali aku i ka hopena o ka nuhou a ka mokuahi Arawa i lawe mai ai, e pili ana no ka poino ana o na kaahi, mamuli o ke puhi ia ana o kekahi uapo i ke ahi, a pau ai na kaa ahi i ka haule iloko o ka muliwai.

            A i ke ku ana mai nei hoi o ka mokuahi Auseteralia ma ka Poaono aku nei, ua loaa maila ka mea oiaio loa, ua poino i’o no na kaa ahi, a me na alahao, ua pau i ke amu ia e ke ahi, mamuli o na hana a ka poe luna hana.  Noia kumu, i nele ai kakou i na nuhou mai ka Hikina mai, a nele pu hoi i na nupepa.

            Nolaila ma keia hope aku, e loaa mai ana ia kakou na nuhou ma Vanecoua mai, ma ka laina moku ma@u o Kanada.

            Nolaila, e hoomanao oukou e ka Lahui Hawaii oiaio, aole he wa e haule hope ai na mea a pau a KA LEO e hoike ai.  Oiai, oia mamua, a o na hooia ana mai mahope; a eia la ua hiki @’o mai no, ka oiaio.

 

Hunahuna Mea Hou o na Pali o Koolau.

            Ma Waikane, i ka auwina la Poaono ae nei, Iulai 14, ua hookoia ka mare ana o Kamuela Kailaa liilii me Miss Kahanaiui e E. Kekoa, maikai ke anaina.  A mahope o ka pau ana o ka mare, ua hoholaia na papa ahaaina, a hoonuu iho la ka lehulehu i na i’o puaa momona ono loa helu ekahi.  O ka mea walohia loa i ka ike iho, oia hoi, aole he wahi ohana hookahi ma ka aoao o ka wahine i hiki ae ma ka wa o ka mare ia ana, a aole no hoi ma ka wa o ka paina ana.  I ka wa e haawi ia ana na olelo a’o i na mea mare e Rev. H. Kauohilo a me E. Kekoa, ua hiolo mai la na waimaka o Miss Kahanaiui, no kona nana ae iloko o ia anaina nui i haiamu mai, aole he hookahi mea ma kona aoao, oia hookahi wale no.  Ilaila ae ka u’i o Kualoa Mrs. Pane Boy Kauka, no ka ike ana i kona wahi pokii kunane.

 

KAHUA KINIPOPO.

            Aia i Kualoa ke kahua kinipopo o ko laila mau opio, a ma na Poaono a pau, i laila ke kahunapule o Waikane e hauoli pu ai me kamalii ike ole i ka helu po.

 

R. MAKA O BUTARITARI.

            Ke hookahua a hookuonoono la ka lua o Kuhaimoana i keia hoa kanaka, ua ku na hale, ua puni ka aina i ka pa uwea, ua lukuia na tausani kumu Puawa, ua hoomaemae ia na kaupapaloi, ua onouia na lau uwala, kalo, laiki, a pela aku.

 

MALOO KA MAUU.

            He kau la nui keia o na pali Koolau no ka mea, ua maloo ka manu, a he ula wale no na kula a pau ke nana aku.

 

NEONEO NA HOME.

            Ma kekahi mau wahi o Koolau ua neoneo maoli no i ke kanaka ole.  Aia na hale laau nani e ku ana, aohe kanaka, ua hele, ua nalo mau loa.

            O na kihapai, a me na kula uwala a me ipuaimaka i ike ia ma na wa i hala, ua noho hoomalu ia na laau ooi mikinolia.  O na aeka aloha i lehau ia e na kanaka i na la i hala ua meha pu @ maluna ae o keia mau ouli walohia a pau, aia ke aloha aina a aloha kanaka hoi, ke halialia mau mai la maluna mai o keia mau hiona.

 

ALOHA AINA.

Honolulu, July 17 1894.

 

            Aole i pilikia na kanaka o kuaaina wahi a kekahi malihini o Kona Akau mai, i ka hoohiki ole ana i ke kumukanawai a na haole i hana kapulu iho nei.  Aia no ka ia o ke kai, a me ka ai o ka aina, na hua laau a me na lau nahele, mai ke Akua mai e ola ai lakou.  Heaha hou aku ka Al@peka ma imua o ko ke Akua lokomaikai, ke hoohiki kanaka i kekahi mea a lakou i makemake ole ai.  He hookiekie a he hookae, oia ka haawina mau a keia poe, aia no a honi aku i na manamana hauna o na wai wae o lakou, alaila, loaa iho la kahaawina palulai e like me ia ia Hookano Keliinohopono, Iosepa, Kauhane ole, a me Kalua Kupapau ma.

 

Nuhou Hauoli Nou e Hawaii

            Ma ke Terepona i loaa mai ai ia makou he nuhou hauoli a oia keia.

            Ma Hamakua Hawaii, hookahi wale no wahi kanaka Hawaii i lawe i ka hoohiki ana malalo o ke Aupuni Pikake, a o ka nui aku, na hoole loa, aole e ae e hoohiki.

            A o ka lua, aole he loaa o na kiure Hawaii oia apana oiai, ua hoole loa na kanaka Hawaii Aloha Aina oiaio, aole e ae e hoohiki malalo o ke Aupuni Pikake.

            A no ia kumu, ua hoopanee ia na hihia a hiki i ka wa e loaa ai na kiure no kekahi kau hou aku.

            Auwe ke Aupuni Pikake e, eia la ke ku olohelohe nei, aohe he mau kakoo ana ia lakou.

            E ka Lahui Hawaii oiaio, paa ia a paa, mai ae, mai haawi pio, a mai kue i kou one oiwi ponoi.  E ola o Hawaii i ke Akua Kiekie Loa.

 

PUA KAUAHI O KE KOPAA MA KA MOKUAINA

O CUBA A ME INIA KOMOHANA.

            Ua loaa ae he hoike mai ka moku aina ae o Cuba, a i Nu Ioka e pili ana no ka waiwai io o ke Ko i hooulu ia ma ia mokuaina iloko o ka A. D. 1893-94 a me ka huina nui o na tona Kopaa i loaa oia hoi he 1,000,000, tona Kopaa a ua ike ia o keia iho la ka heluna kiekie loa i ike ia, a ua loaa pu ae no hoi ko Inia Komohana hoike ana.

            Ma na mahiko o Inia Komohana, ua ike ia penei ma ka la 20 o Iune, ua hiki aku ka heluna kiekie o na tona Kopaa i loaa i ka 1,017,114 i ka 1893, a i ka 1894 nei; ua loaa na tona he 1,050,000.

            O keia aela na heluna kiekie loa i ike ia.

            A no ka manawa mua hoi o ka loaa ana ia Cuba he 1,000,000, tona Kopaa, ua hoohalike ia ia me na kulu pakaua i hiolo iho maluna o Cuba, a e ike ana kakou i ka papa hoonohonoho malalo iho penei.

                        1881-82—————595,837 tona

                        1882-83—————460,397  “

                        1883-84—————558,987  “

                        1885-85—————631,967  “

                        1886-86—————731,723  “

                        1887-87—————646,578  “

                        1888-88—————656,719  “

1889-86—————560,333  “

            1890-90—————632,368  “

                        1891-91—————750,959  “

                        1892-92—————892,140  “

                        1893-93—————779,000  “

                        1894-94———— 1,050,000  “

            O keia aela ka papa hoike o na ano Kopaa, i loaa i kela a me keia kau wili Ko, o kela, a me keia ekolu makahiki, mai ka nupepa S. F. Bulletin.

 

NU HOU KULOKO

            He mau kulu paka ua ko ka la Sapule nei, ka la hoomana o na pegana o Roma i ka wa kahiko.

 

            Ua hamau ka leo o na “Pigi” a i keia mau la.  E aha ana la ua poe nei, e pupue ana paha, i ka pue opala a lakou e kuko nei.

 

            Ke ai nei ka Holomua i ka luai o ka poe P. G. a me ka poe repubalika.  E ai a e pahu aku ko oukou naau e like me Juda o ke au hoomaewaewa i na la i hala.

 

            He huakai hooaunahele ka ka Luna Hooponopono me ka ohana, ma ka waonahele i uka o ka Nuku o Nuuanu.  Ua maalahi ka lakou huakai.

 

            Ke hana mau nei no na hookele a me na haku manao o ka Holomua haole iloko o na kunabia o na hale kuai waiona like ole o keia kulanakauhale.

 

            Ua ilihia iho la ka poino ia Geo. Wood’s mamuli o ka manao ino o kekahi mau haole iaia, @o ka hoopunipuni ana ka o ka mea mua i na mea hope.

 

            Ke komo aku nei ka poe hookahuli aina iloko o ke kai hohonu a me na ale kupikipiki o ka noho mokuahana ana, me ka noho kakauha ana.

 

            He pepeiao kekahi ka mea nana i haku ka manao loloiahili hoino ia Bush a me Nawahi ma ka Nupepa Holomua haole o ke ahiahi Poalima.  Ua like loa no ka leo me ko ke kekake, a ua hele a aneane i ka ai i ke a o Kapahulu.

 

Ka Makai Kiu Lau Omaomao.

 

Ke Kaeaea o na kakai pali nihoniho o Misouri.

 

KA MEA NANA E HOOHOKA KA POWA IEKE A ME KONA

PUALI HOLOKOA.

 

——: A I OLE :—

 

Ke Aka kino wailua o ke kuluaumoe

 

KA MEA NANA I HOOPAKELE NA KAMAHELE O KA PO.

 

Ka mea nona ka Ipu kukui kamahao lua oe.

 

            Ia lakou i hiki aku ai i ka hapailua like o ka ulu laau, ua kauoha aku la ka powa Ieke, i kona mau hoa, e hoomaha lakou, a ua hooluana i’o ihola ua poe powa ala, no ka hoomaha ana i na lio, a me lakou pu.

            A oi kuu pono iho ka nae, pae mai ana he leo o kekahi mea kino, i ka i ana mai.

            E Ieke, e aha ana oe maanei?

            Aole he pane i loaa aku.

            Ua pae hou maila he leo huo.

            E Ieke, he po maikai loa keia, a no ke oukou i makau wale ai, apau mai nei hoi i ka holo, hilahila maoli au ia oukou eono, i ka hohe wale, a hiki ole hoi ke paio aku i ka makai kiu Lau Omaomao.

            Ia wa koke no i ki koke ai o Ieke kana pu panapana ma kahi o ka leo e pae mai ana, me ko lakou manao aia no la malaiia, eia ka aua nei kela i ke ala iki o kahuna.

            I ka poha ana ae o ka leo o ka pu panapana, ua lohe hou ia aku la he leo hou mahope mai o lakou i ka pane ana mai.

            Ha! Ha!! Ha!!! ua moloa ia ka poka o kau pu e Ieke.

            Aole oukou i lawa no ke kahua mokomoko, he hohe wale.

            Ei ae ka Makai Kiu Lau Omaomao, wahi no a ua Kiu ala i hooho ae ai me ka leo nui.

            E holo, e holo i pakele ai ko oukou ola, ia wa no i hoolei mai ai ka Makai Kiu i ka malamalama o kana ipukukui hookalakupua, ma kahi a ua poe powa ala e noho ana, me ka naau pihoihoi.

            I kela wa koke no, i pane ae ai o Kime Kamaki:

            Ua kokoke loa oia me kakou, a ua makemake au e kii e hopu pio iaia.

            Ina e hiki ia oe ke hana pela, wahi a ka leo i pane mai.

            O! ooe a nei ka mea nana e kue mai iau, wahi a Kime Kamaki.

            Ae, wahi a ka makai kiu.

            Owau no ka hiena o Misouri nei.

            Ua makaukau au oe lawe i kou ola ano, wahi a Kime Kamaki.

            Ha, Ha, hauoli loa au ke hooko oe i kau olelo hehena e kahi ilio kawau.

            Ua manao au he hana hiki ole loa ke la ia oukou apau ke hooko, oiai i na aku no he nui o ka poe ehele mai ana e hopu pio ia oukou.

            Ia wa koke no ua hoolele akula ka makai kiu i kona leo hookala kupua mai kona kileo aku a mehe mea la he heluna kanaka nui ke hooho like ana i ka wa hookahi i keia mau olelo.

            E hopu, E hopu, E hopu, pio aku ia Ieke, a me kona mau hoa apau ewiki mai ka li, a no ka manawa.

            Na keia mau leo i kuwa mai ke kileo aku o ka kakou makai kiu hope ole i hookau aku i ka weli maluna ona poe powa ala a pi-o-o aela ko lakou noonoo a kau koke aela lakou i luna o ko lakou mau lio a pau nui akula i ka holo maluna o na lio o lakou.

            A ha e Ieke ka powa hohe wale e holo ana ka hoi oukou wahi a ka makai kiu Lau Omaomao i pane aku ai.

            A pane hou akula oia he puali powa hohe wale ka keia oia he makau wale i na uhane iapu o ka po a noia kumu aole e hiki ke ku a paio me ko lakou mau enemi.

            A oiai hoi o kahi kupono wale no keia poe oia no ke kua o na lio aole hoi maluna o ko lakou mau kapuai ponoi.

            A, aole nohoi e hiki ia lakou ke holo ma na alanui like ole, a ia wale no aholo aluka, alaila hiki, i na aole pela, alaila e pau ana lakou i ka make ma’u wale, me ka paio ole aku i kekahi mea kino.

            I kela wa, ua pelu hope aela ka makai kiu, no ke Kakela o ke kaimahine i noho ai, oiai, aia ke uwiuwiki maila ka malamalama o ka la, e pahola mai maluna o ka honua.

            Iaia i hiki aku ai ilaila ua komo, aku la oia iloko o ua Kakela ala, a hele akula oia a hui pu me ka ona o ke Kakela, a ninau akula iaia, i na paha he rumi hoolimalima kekahi o ua Kakela ala.

            A-e-he rumi hoolimalima no, wahi a ka Ona o ke Kakela i pane mai ai.

            I na pela, alaila, e oluolu ana a nei oe, e ae mai nou kekahi rumi.

            Ae, ua oluolu no au.

            Heaha la kauku hoolimalima o ka rumi i ka pule.

            He ekolu dala o ka pule, mai ka moe ana, a ka ai ana.

            Ua hiki, wahi a ka makai kiu i pane aku ai, a no e uku aku ana au ia oe, i na dala, e lawa ai no’u no eono malama mai keia la aku.

            Ua uku aku ka makai kiu ina dala apau he kanahikukumamalua, a haawi ia maila iaia kekahi rumi o ua hale Kakela ala.

            Ua noho iho ua makai kiu nei iloko olaila, no ka hooluolu ana iaia, oiai, aole i loaa iaia he wa hooluolu i ka po iho ahiki i ao ana, oiai, ua hele kona mau lihilihi maka, a po luluhi, i ka hoohihia ia e Niolopua.

            I kela wa, ua hoike aku la ka makai kiu i ka luna nui o ke Kakela e hoi ana au e hooluolu, oiai, ua luhi loa ia au, no ka loihi o ko’u ala i hele mai nei.

            Ua ae maila ka luna o ke Kakela, a hoi aku la oia hooluolu.

            Iaia e hoonipo ana i ka aina kapu a Niolopua, ua hala loa aku la kona hooniua ana ma ke la huli o kaaina moeuhane, a na ka leo kani-ke o ka bele o ua Kakela ‘la, i hoala a’e iaia, eia ka a ua nei, ke iho aku la ka La, ma kela aoao o ka poepoe honua.

            A i kona ala ana ae ua hookani akula oia i ka bele hea i na kauwa o loko o ka hale e lawe mai i wai hoomaemae no kona maka, a ua hooko koke ia mai kona makemake, a e moole ku ana i mua ona.

            A i ka pau ana o kona hoomaemae ana, ua komo ihola oia i ka aahu o ke kanaka @, a puka aku la oia iwaho o kona rumi.

            Iaia i puka aku ai, ua ike koke maila kekahi kauwa lawelawe i keia kanaka, me kona hiohiona ano e ana hoi iike ole ai mamua iho oia wa.

            No keia pahaohao i loaa iaia, ua holo koke aku la oia a hoike akula i ka luna nui, i kana mea iike ai, a pane akula, i ka i ana aku, e Mr. Pilipo ko’u Haku.

            Heaha ka pilikia e ke kauwa hoolohe?

            Ua ike aku nei au i kekahi kanaka Inia, i ka puka ana mai nei, mailoko mai o ka rumi o ke kanaka malihini, i kipa mai nei i ke Kakela nei i keia la.

            Aia mahea wahi a Pilipo?

            Aia mawaho iho o ka rumi kahi i noho ai, wahi a ke kauwa.

            Ua kuhihewa paha oe, wahi a Pilipo.

            Aole au i kuhihewa, wahi a ke kauwa.

            Ua hele koke aku la o Pilipo, a me ke kauwa e nana pono i ka oiaio a me ka ole, o na mea a kana kauwa iike ai.

            Ia laua i hoea aku ai iwaho, halawai koke aku la ko laua ike, me na hiohiona ponoi no o ka malihini i kipa mai ai ia kakahiaka, aole he mea eae, oia noia.

            I kela wa, ua haawi aku la ka luna o ke Kakela i kona aloha, a pela ka kaua kiu i panai mai ai, me ka mino aka pu ana iho.

            E ka malihini, ua hoopahaohao ia ka’u kaua, a wahi ana i hoike a’e nei ia’u, he kanaka oko’a ka@ oili mai nei mailoko mai o ka rumi o ke kanaka malihini, a oia kaua i hele a’e nei e hoike ia’u, a noia kumu ko’u hele a na mai nei eike maka, eia ka hoi ooe no.

            I keia wa a ka luna hale e kamailio nei, aia ka makai kiu ke haka pono maila, me ka mino aka ana o kona mau papalina.

            A oia kana i hoike aku ai, ua kuhi hewa ia paha ka mea malama hale, oiai, oia iloko o no o ka hale, a i kona puka ana mai iwaho nei, ua ano e kona maka i ka malamalama o ka La, oia kona kumu i kuhihewa ai.

            Pela io no, wahi a ka luna hale Kakela.

            Ia lakou no e luana olelo ana, kani ke mai ana ka bele aina.

            Oia ka wa i kono aku ai ka luna malama hale i ka malihini, e hele e hoopiha i ka lua o ka inaina, ua ae maila ka kaua olali, a naue akula e paina.

            Iaia e hoopiha ana i ka lua o ka inaina, ua ike akula oia i kekahi Lede opiopio, i ke komo ana mai no ka rumi aina, me kekahi Lede a oo.

            Ua haka pono akula kona lena ike maluna o ua Lede ala, a ike iho la oia, oia no ka Lede a ka powa Ieke i upu ai e lawe aihue.

            I kela mauwa, ua hoohaule ihola ke kiu i kana pahi iluna o kona uha akau, a haule loa aku la iluna o ka moena Vereveta e uhi ana, i ka rumi aina, a oia kona wa i kulou iho ai ilalo, a hoolele akula i kona leo ma ka paia o @a rumi aina la.

            Oia ka wa i poha mai ai he leo i ka i ana mai.

            Aloha oe e ka Lede Meliaka o Misouri nei.

            I ka poha ana mai o keia leo hookala kupua iloko ponoi o @a keena aina la, ua hoopuiwa ia na mea a pau, a lilo aela i mea pi@ no kela a me keia mea e ai ana.

            A oia ka ke kanaka malihini ninau hoomaoe ae ai, heaha hoi kei a leo, a nowai la ia leo, he kiu anei keia, a pela wale aku?

            I kela wa, aia ke hekau ala maluna o kela a me keia mea na hiohiona o ke kaumaha no keia leo kupanaha, a no ka kaua kupueu nae, aole ia haawina i loaa iaia, oiai, nana ponoi no ia mau hana hoopuiwa i ka Lede Meliaka.

            Ua hoouna koke ia aku na kauwa e hele e huli ma na wahi apau o ua Kakela ala, i ka mea nona ka leo, he neo nae ka mea i loaa.

            I ka meha ana iho o na haukawewe ana o loko o ua Kakela aia ua hoi aela na mea apau, a noho luna o ko lakou mau noho, no ka hoolawa pono ana i ka waihona a o ko lakou mau opu.

            Ia lakou no e nuu ana@ pae hoi mai ana he leo hou i ka i ana ma, “E Meliaka ka pua nani iuiu o Misouri nei, eia he hoola ua hiki ma a eia i mua o kou alo oia kou hoopakele.”

            “Mai hopohopo oe e Meliaka, pela hoi oukou apau.”

            “E Pilipo-e, o Lau Omaomao ua hiki mai nei.

            Na keia mau leo kanikani aula ka hoolele hauli nui wale i hoopau koke ae i ka ai ana o na mea apau.

            A oia ka Pilipo i olelo ae ai, he mea kupanaha keia, aole mai kahi ko mai, a akahi wale no, owai ia ka mea nona keia leo a nohea mai nei la oia.

            I kela wa, aia ka kaua kiu e ka mea heluhelu ke hooluana ala, ma ka rumi hooluolu o ua Kakela ala.

            Ia wa, na hele aku la o Pilipo a luana me ka malihini, a pane aku la, e Iakekona, kau malihini maikai.

            E-o-wahi a Iakekona.

            Pehea la kou manao no keia leo?  Ka manao au, ua pa e-e-paha ko kakou lohe ana, i ka halulu o ka makani.

            Oia anei kou maoao?

            A-e, oia kou manao.

            A pehea hoi i puka mai ai ka inoa o Meliaka, ko’u inoa no hoi (Pilipo) a me ka inoa o ka makai Kiu Lau Omaomao?  Manao au, he uhane paha no kekahi poe i make iloko o keia Kakela; a no lakou keia leo; oia kou manao.

            Ka, ha, ha, wahi a Pilipo i pane aku ai, i na he uhane, alaila, aole e palua ka lohe ia ana o kona leo e like keia aole pela, alua a kakou lohe ana i ka wa hookahi, a oia ka’u e haohao nei, he aha la keia.

            I kela wa, ua pane aku la ka kaua hueu, i na pela, e pono kaua e noho hamau, a i na kaua e lohe hou ana i ka leo, alaila, he kino uhane i’o no.

            Ia wa koke no, me ka eleu nui, ua hoopuohu aela ka makai kiu, ha lo, heaha keia kino aka e maale nei, ia wa i li-o a’e ai na nanaina o Pilipo, a huli ino aku la oia i hope, ia wa koke no, i lohe aku ai ua o Pilipo i ka leo i ka pa-e hou ana mai.

            “E Pilipo, e Pilipo, e makaala nou i keia po, e hiki mai ana ka powa Ieke ia nei, me kona poe.”

            Na keia leo hookalakupua hou i kau aku i ka weli ina mea apau o ke Kakela.

            Oiai o ka powa leke oia ke Tiga inu koko o Misouri ia mau la, a he kanaka hoi oia i kau ia ka weli e na mea a pau.

            I ka wa o keia leo kanikani aula e kalahea nei, aia ka kaua kiu ke aka haaloulou ala no ka pio@ launa ole mai o Pilipo.

            Ua huli maila oia a pane maila i ke kanaka malihini i ka i ana mai, e ka hoaloha, pehea la, aole anei ou pahaohao i keia leo kupanaha i nele hoi i ke kino kanaka?

            Aole o’u hopohopo no ia leo, oiai, he aka wale noia i maalo ae, a nalo aku.

            I kela wa, ua ninau hoomaoe aku la o Pilipo i ka makai kiu, i ka i ana aku, ua ike anei oe, a i ole, ua lohe paha oe i ka inoa o keia makai kiu o Lau Omaomao.

            Ua lohe au i kona moolelo, aka, aole nae au i ike iaia, wahi a ua kiu nei i pane aku ai.

            Pane hou aku la o Pilipo, heaha kau moolelo i lohe nona?

            Ua lohe au, eia oia ke pulama mau nei i ke ola o kekahi kaikamahine, e noho nei iloko o keka@i Kakela, no ka mea, ua lohe au, ke hoao nei ka hui powa o Ieke e aihue aku i ua kaikamahine la.

            A pehea la, manao anei oe e hiki ana anei i @a makai kiu ala k@ hoopakele a@ ia ua kaikamahine ala?

            Pela kou manao, oiai, ua hilinai au i na olelo a pau au i lohe ai.

            I kela wa, ua hoike aku la o Pilipo i na mea aau ana i ike ai.