Ka Oiaio, Volume I, Number 5, 21 June 1889 — "Ka Oiaio." [ARTICLE]

"Ka Oiaio."

Aole i like ko makou manao me ko ka Luna Hooponopono o ka Elele, ana i hoopuka ai ma ka Poaono iho nei, malalo o keia poo ae la o kana manao pepa. Ua puhi nui oia a ua puhi mau, i kana mau Kumuhana Kalaiaina, o ka leo oi aku nae, ke koho ana o na mea a pau no na noho ana ma ka oihana. Ua kani mai hoi kana ohe, a ke palale mai nei, a oia hoi ua naha ka waha o kana ohe, a he elua leo e lohe ia nei—mamua he poe Hawaii wale no kona makemake, a ke ike ia nei he haole kekahi ana e hapai mai nei. Alaila, ke puhi-lua nei keia pu a ka Lunahooponopono o ka Elele. He ono no ke ko ma kona wahi, a he ono no hoi ka paakai ma kona wahi, a he manawahua a ono ole no hoi keia mau mea elua, ke hui ia a ai iho. Aole o ko makou Peresidena ana, e ake makou e onou a e huki i ka Hui Kalauiina ma na kumuhana Kalaiaina, elike me kona makemake e hoike mai nei. He okoa no kona manao ma ia mea, a he okoa no ko makou. Ke hoolala nei ka Hui, ma kona Komite i ke Kumuhana a waiho aku i ka halawai, a o ka mea e hooholoia ana oia iho la ka ka Peresidena e hoike ai i ke akea. Me he la o ko Kaisara manao ka ke hoa e ake mai nei e hoohana ia maluna o ka Hui Kalaiaina Hawaii. E kakali a akaka mai, alaila, ku iho kaua i ke kahua o ka paio mahope o ka ka Hui e kukulu ai, ina hoi, he aloha io kou i ka Hawaii, elike me kau e hoi mau nei maluna o ke Kumuhana hookahi, i kela a me keia pule, ma na aoao a pau o ka Elele. Hoomanawanui.