Ka Oiaio, Volume I, Number 1, 24 May 1889 — Page 3

Ka Oiaio.

NU HOU KULOKO.

            E lawe i "Ka Oiaio," a e loaa no na kalaimanao ku io loea a hohonu.

            Elua pule paha a oi i koe weheia ka aoao hikina o Alanui Moiwahine.

            Ua nalo aku ke kino make o S. Paniani, i ka Poakahi nei.

            Me ka mahalo i ka Lahui Hawaii, ke hoea aku nei makou no ke kakoo ana i na pono me na pomaikai o ke one Oiwi.

            He Ike Alii ma ke awakea o ka Poalua nei no na Aliimoku o ka Egepisele.

            Ke haawi aku nei makou i ko makou mahalo kiekie ia Mr. F. J. Testa, no kana mau kokua aloha ia makou.

            Ma ka hora 9 o ka Poakolu nei i holo aku ai ka moku kaua Beritania Cormorant no ka home.

            Ma ka po Poalua nei i uhola iho ai ke Alii ka Moi he papaaina na ke Kapena a me na aliimoku o ke Cormorant.

            Ma keia mau la iho nei, ua make aku la o Samu Paniani, luna paahao, no ka puni wale i na kahuna hoopunipuni.

            UA lohe mai makou, e hoi aku ana ko kakou makamaka, Mr. W. H. Daniels, ma Paia, Hamakua, Maui, e kukulu ai i halekuai nona.

            Ina ua puka hewa ka olelo no kekahi, e kala mai, a ina no hoi ua ku ma ka mahamaha, e kaanini malie no hoi paha a oluolu, alaila mihi.

            He mau Kamano hou ka i loaa aku ia John Kaulahea i keia mau la iho nei, a e kuai hoopakika mai ana oia ke kipa aku ma ka papa a ia keiki o ka aina.

            I ka Poakolu nei make aku la o Peke Pakohana, (Mrs. Colburn,) kekahi o na kamaaina wahine o Honolulu nei, a ua haalele iho i na keiki me na moopuna.

            He nui na ona o keia mau la.  No ke ano wewela iho paha o ka papa ana iho o ka la maluna o na ipuhao waiona.  He hoopai ko ka hewa, a he hune a me ka make ka hope aku.

            I ke ahiahi Poakahi aku nei, ua hookani ia iho la ka ogana o Kaumakapili e na lima menene ole o Wray Taylor.  He nui no na makahiki, a ua uleu no ke kani ana o ka ogana a me na leo o ka poe himeni.

            ME he la ma kela kaua o ka Poaono aku nei, o na Omole Bia wale no na enemi kupono i loaa aku i na koa wiwo ole a o ko lakou mau puniu a me na kani a-i ua uwi maloia.  Weliweli ka ikaika!

            Ua lohe mai makou ke paa nei ka makamaka Hoke (F. J. Testa) i ka hana unuhi olelo.  A kono ia aku nei na keiki p@@ o ka aina e kipa ae i ona la.  A e lawelaweia na hana me ka maikai.

            Me ka aloha makou i lohe ai i ka make o ka wahine opio a ka Luna Nana Paahana Iapana, Mrs. Nacayama, i ke kanakolu wale no o kona mau makahiki.  I ka Poakahi nei.  "E kiai a e pule" i manalo ai ka awahia o ka luakupapau.

            MA ko lakou one hanau kekahi poe ua like me he kui la iloko o ka pena mauu ka ike ole ia, pela wale aku ko makou hoomaopopo ana aku nei.  A oia no kekahi o lakou e uhu hoi hope mai nei i ka aina i opu ino ia e lakou.

            I ka Poakahi nei ua ulele iho la o Kapena Weir o ka Iwalani me Kapena Wilson o ka Rainabow.  Na ka mua ka iho mua, a ua hoopiiia aku oia no ia mea.  O na ilio ka ike ia i ka hana ia hana, a ke hahai aku nei hoi ke kanaka.

            Ina aole ke Kuhina Kaua e kauoha e lawe ia aku na omole e waiho ahulau la ma ke one o Waialae, a hele ae na lio a me na bipi a ka moopuna a Mr. Laiki, e noho la malaila, ke manao nei makou e haunaele mai ana ia poe holoholona i koe aku e hele la i ke kula.

            UA olelo ia o na lolo a me na aa o ka aina o lakou no ia, wahi a Wili Kuikele, ma kekahi o na halawai wauwau kua a mahalo aku a mahalo mai a lakou.  Aka i ka nana aku, ke hapala mai nei na hana a ke kea, ku ia i ka pono e ka ele, lilo no ia kaua ka ai ma keia mua aku.

            UA mama no na kai ana a ka puali Laipela i ka hoi ana mai Waialae mai i ke kakahiaka Poakahi iho nei.  He eha hora no eono mile.  Me he la, malalo iki mai ka holo o keia mau kai ana i ka Alekanedero ka Nui, i kona wa i hookahuliahia ai i na aupuni a me na panalaau o Media a me Peresia i ka wa kahiko.

            UA hooholo iho la ke Aupuni Geremania e hookuu aku i ka Moi Malietoa Laupepa mai na hoopaa pio ana iaia.  He nui ko ke Akua aloha i keia Alii, a ua ahonui no hoi ke alii i na hoao maluna ona.  Ua hai mua no oia, aole e nele kona ike hou ana i kona aina a me kona lahui.  Ua ko io no kona manao paa.

            Aole i lawe ia ka Laikini Loio o Akepoka, ina aku la he Kanaka, pau kahiko, no ka mea he punalua ka Hawaii i kekahi poe.  Aia no a he ai i ka lepo pakele.  He kauoha paha ke hoomau la.

            Hoene mau no hoi ka leo o ka bana i kela po paikau bataliona ai.  Mai powa ia ua pualikoa la i ka hoi ana mai, ku ia nae na powa i ka honehone o ka leo o na leo o na ohe, a pakele aku ka poe me na kanikani!

            Oiai na laina kaua kuea o na koa Raipela e hoomakakiu ana ma ka po Poaono aku nei, ua lele kaua ia mai la ka Puali Kiai Hope e na kumulaau bipi waiu, a puehi liilii nui aku la iloko o na laau ooi, a pau nui iho la i ka paholehole na maka.  Hu ka aka.

            I ka hebedoma i hala, ua hele aku la kekahi kaikamahine i ka lawaia oopu ma Waianae, Oahu.  Ua hina ia mai la oia e ka phoku a paa malalo, a hoao mai la kekahi i ike i keia poino e hoonee ae i ka pohaku, aole e hiki, ua make loa iho la ua kaikamahine la.

            Ke ao nei o Mr. Geo. Glendon ma ke kakau hoopokole.  Ua makaukau kekahi mau haumana, he pake nae, a no ia kumu, ua makemake ole ia e na Luna Aupuni.  Ke hoopunana nei no paha kahi a ka Ahaolelo i manao ai, no kekahi punahele hookamani mai na aina e mai he hoopaa moolelo kakau pokole.

            UA mahalo makou i na kahoaka o keia mau la i ka hoike mai i ka wai ua lana malie, a i ka hanu nui a me na lia o ko lakou ili no na moeuhane ino.  Ke loheia mai nei na kuaaina, a he nani na lono i hiki mai.  Hanu ia a paa.  Mai puni oe i ka pelo hoopunipuni, i ka mali a ka hookamani.

            Ua ulu ae kekahi haunaele ma Kula, Maui, i ka Poakahi o kela pule aku nei, a make aku la elua mau Iapana no Kahului mai.  Ua manaoia he dala i lawe maluia e kekahi Iapana, i hoonoho puukuia e kekahi hui Iapana, oia ke kumu o ka haunaele a hiki aku la i ka pepehikanaka ana.

            E hoomanao kakou i ka hoolaha waiu ma kekahi kolamu o ka pepa o keia la, na kekahi o ko kakou opio ponoi o ka aina, a e lawe i ka waiu o kona hale waiu.  He au keia a kakou e haanui nei e ike a e hookipa i ke aloha ia kakou iho.  E hooko kakou i keia mau manao maikai, i ike ia mai ai ko kakou oiaio.

            Mawaena o na poe i auhee mai ma ka auina la Sabati nei, mai kela kaua mai o Waialae o ke Kuhina Kaua kekahi, a o ka Auka Kopa Hoomaemoe, na mamo a na misionari, o ke kano wale no o na pu, ka Peresidena o ka Papa Ola, ke keiki a Holo me kana kakaki ua kekee, a he mau puulu wahine, a me kekahi poe he lehulehu wale i pakele mahunehune mai.  Manaonao wale!

            UA lohe ia mai aia'ku la ka Hon. J. A. Cummins, me kana keikikane hiapo i Geremania i keia mau la.  Ua haalele iho laua ia Kapalakiko i ka Poaono, Aperila 27, me ka manao e kau aku ma ka mokuahi o ka la 11 o keia malama mai Nu Ioka no Geremania, a mai laila ae a Parisa, i ka hoikeike nui.  Ua lea no ka hele a ka Mea Hanohano, he ala pili ia e ka opihi, a he opu waipahe.

            KE olelo la no ka Moi Mataafa e kinai i na Geremania a pau ma Samoa, ina aole lakou e hana pono a malama i ko lakou kuleana.  Maloeloe no hoi ka lahui Samoa, ina paha o lakou ma ko kakou mau kamaa, auwe ke ahi e, pau mua kekahi poe i kalua ia, aole la hoi e huki ku ka ihu i ka lewa.  Ua hiki no, he maia ka hoi ka pumaia a ka la e hua mai ai, alaila he maia no hoi ke hua mai.

            UA olelo ka Oua Miliona o Kamaomao, he eke kalena kona i keia manawa, a he uwea mimiki ko ka waha o ua eke la.  He manawa wale no koe, a e omo ia ana na wahi kauna mahiko o Hawaii e ia ma keia mua aku.  Aneane no paha he mea oiaio keia.  ke kuai liilii nei no la hoi o Bailey, Cornwell, a ke auhee nei hoi kekahi o lakou a kahi e aku e hoopunana ai i na loaa a ai e like me na manu piheetero.  Ua hiki no.

            UA wawa ia ua kuai aku o Wm. Bailey o Wailuku mamua, i kona a me ko kekahi poe e ae mau kuleana iloko o ka Wili-ko Wailuku.  no ka ii a me ka ala a oi aku, a ume aku a ma kahi e hoekepue ai.  O keia ano hana ke kumu i ilihune ai o Irelani, a i hoohaunaele mau ai ka Ailikimana, a pela no paha kakou ina he Ailikimana a he poe Samoa ko Hawaii nei.  Aole, ua like no kakou me na omole bia i omo ia e na bataliona laipele a malo, kiola ia ae i ka la e olala ai.  Aloha no hoi paha ke ao ia ana a kua-hipa e na olinolino, a laa ka haha hewa o na lima.

            Ua onou mai ka lima hema o ka Aha Hookolokolo Kiekie i wahi kamau i kekahi luna hoopuka pepa i nenea ai, a mau loa aku ka hamau ana o kana nupepa.  Ke pono la no!

            He ano kamahao ko makou ike ana'ku ia Wilikoki i keia hoi hou ana mai nei mai Kaleponi mai.  He kohu Samoa ka ioioena o ke kanaka.  Nawai ole kiu mau ia no hoi o Robata, ana e hele nei.  Ua hiki lele mau ka na lunaikehala o na powa o na la i hala, a no ia kumu, ua like paha keia hapa Hawaii ma ka hanau ana, a hapa Roma ma ke ao koa ana, me kekahi akua lapu i na kiai o kakou.

            O ke dala i manao wale ia malalo o ka mana hookele ana a W. R. Kuikele no na hana kipu, kipe, kiola, i maunu no na hana koho balota, aole i akaka i ko wai lima la i waiho ia ai ia mana.  He lohe wale no ko makou, he mau kani no kai hooliloia no na koa e puipui ai na wahi opu o ka bataliona, a e lawa pono ai hoi na kulu wai o na kileo a me kani a-i.  Ua oleloia e na Pake o ka opu ke ana o ko ke kanaka naauao, ina he oiaio ia mea, ua piha naauao ka bataliona.

            Mahalo nui makou i ka ike ana i na mamo a na misionari i hele mai ma ka olelo a Iesu, e hapai pu ana me na koa, na pu a me na pahikaua.  Ua huhu aku o Iesu ia Petero no kona kipi ana i ka pepeiao o ke kauwa a ke kahunapule, a papa aku la hoi aole e ao aku i ka hua o ke ola me na mea make, aka, ua loli ae nei ka Iesu mau hana i keia wa; he hfki no ke eleu ia ke kanaka e keia mau hoomana e like me ka na bipi mau hana.  Ola ka lahui o na alakai keia.

            Ma ke kaua kuloko a na Pualikoa Raipela, ma Waialae, i ka po Poaono iho nei, ua nui na ulia a me na ehaeha i loaa, ina hoa.  Ua hoihoi ia mai kekahi mau hoa, ua ki ia i ka puupuu a ua ku a pehu a uli na helehelena.  O ka nui nae o na enemi aole i kanu ia a kekahi la ae.  O ko lakou heana ke waiho hamama la no i ka la, a ua hemo ko lakou mau pani, a ua omo ia lakou a pamalo.  A ke hele hou keia Pualikoa, he pono o Fula me na Puali Hoole Waiona kekahi e hele pu, i loaa ai na mea nana e huna na iwi omolemole wai ole e waiho la i Waihoikaea ka iwi o kamahele.

            E nana ma ka aoao eha no kekahi hoomalamalama i ka moolelo o ke ao nei i kakau ia e kekahi kaula, mai ke aupuni mai o Babulona a hiki i ka hopena o ke ao.  E hoopuka mau ia aku ana no a hiki i ka pau ana o kahi @@@ o ka wanana, e like me na hooia ana o ka moolelo o na mea i hana maoli ia.  Kekahi keia o na moolelo i akaka pau pono ole mamua aku nei i na kumu ao, aka, ua hoike mai hoi keia kumu i kona ike ana i imi ai no kanakolu makahiki me ka pule a me na waimaka i ke Akua e kokua mai.

 

            Ua hoole ke aupuni o Sepania i ke noi a Kina e hoonoho i mau Kanikela ma Manila, a ma na wahi e ae o ia Panalaau o ia aupuni Pakipika.

 

CHAS. HAAMER,

Hale Kuai Lako Ili Kaa !

KIHI O ALANUI PAPU A ME MOI.

 

UA MAKAUKAU AU  e kuai aku i na lako a pau e pili ana i kau oihana

Na Ili Kaa Lealea,

Na Ili Kaa Ukana,

Na Ili Kaa Nani i kahikoia me na wai dala !

NA KAULA-WAHA LIO,

Na Ili-poo a me na Ili-kaohi,

Na Pihi a me na Bakala,

Na Kui Humu-ili,

Na Lako Humuhumu,

A pela aku.

 

Na Noho Italia,

Na Noho Beritania,

Na Uwepa Kaa o Kela a me Keia ano !

 

Ua makaukau mau au e pahonohono i na ili kaa, i na noho lio a me na mea a pau e pili ana i ke kaa.

 

            E loaa no na iii-kaa hana mua ia no na kumukuai holopono.  1 3m

 

R. W. WILCOX

(WILIKOKI.)

He Eneginia a Mea Ana Aina.

AGENA NO NA Palulu Uwila o na puka aniani a me na Rula Kuea i huipu ia me na Ana Hi-o.  He mea paahana maikai loa keia i ike mua ole ia maanei.  Agena no na MIKINI HUMUHUMU  o na ano lehuleu, a me na KAA HEHIHEHI WAWAE o na ano like ole.

            KEENA OIHANA:--Ma ke kihi o na Alanui Moi a me Betela, ma ka papahele maluna.     1 6m

 

PAPA !  PAPA !

A ME

Na Lako Kukulu Hale!

 

E LOAA NO MA KAHI O

WILDER & CO.,

(WAILA MA,)

Kihi o Alanui Papu & Moiwahine

 

NA PAPA NOUAIKI O KELA A ME KEIA ANO:

 

NA PILI HALE O NA ANO A PAU.

 

Na Pani Puka, Na Puka Aniani,

Na Olepelepe, Na Pou, Na O-a,

Na Papa Hole, Papa ku me papa moe o na ano he nui!

 

Na Wai Hoohinuhinu Nani!

 

NA BALAKI O NA ANO A PAU

 

PEPA HALE A ME NA MOENA O NA ANO HE LEHULEHU WALE

 

E laa na Pena o na ano he nui,

Kui o na ano lehulehu wale,

LAKA, AMI, KI, a me UMII.

 

Ke pahola ia aku nei ka lono i na Makamaka a pau, ua makaukau keia mau hoa'loha kahiko o oukou e hoolawa aku ma na mea a pau e pili ana i ka lakou Oihana.

 

NO KA

UKU HAAHAA LOA!

 

E like me ka mea e holo ana mawaena o lakou a me ka mea kuai mai.

 

HELE MAI E WAE NO OUKOU.

 

HE AGENA

No na Mokumahu Holo pili aina

KINAU,

LIKELIKE,

KILAUEA HOU.

LEHUA,

MOKOLII.

1-3ms

 

William Charles Achi,

LOIO A KOKUA MA KE KANAWAI,

Imua o na Aha a pau o keia Aupuni.  He mea Ana Aina a he Boroka ma na waiwai paa.  KEENA HANA: Helu 15, alanui Kaahumanu, Honolulu.            1-1y

 

Antone Rosa,

(AKONI)

LOIO A HE KOKUA MA KE KANAWAI.

KEENA HANA: Helu 15, Alanui Kaahumanu, Honolulu.   1 1y

 

James M. Monsaratt,

[MAUNAKEA.]

LOIO A KOKUA MA KE KANAWAI.

He Luna Hooiaio Palapala.

E hankia no na Paiapala Kuai, Palapala Hoolimalima, a me na palapala pili kanawai e ae ma ka olelo Hawaii.  Dala no ka hoaie ma ka moraki ma na waiwai paa.  KEENA HANA: Kihi-nae o ka papahele ekahi o ka Hale Uinihepa o Kakalaika, ma ka Hikina o ka Hale-wai.

1 1y

 

J. L. Kaulukou,

LOIO A KOKUA MA KE KANAWAI.

KEENA HANA:--Kihi o na Alanui Moi me Betela ma ke keena ma ka hale iluna.  1 1y

 

Joseph M. Poepoe,

LOIO A HE KOKUA MA KE KANAWAI.

 

UA MAKAUKAU E HANA I NA palapala pili Kanawai a pau, a he mea Unuhi a Mahele Olelo Beritania a Hawaii.  E paneia no na ninau e pili ana i na moohihia no na Aha Hookolokolo.  KEENA HANA; Alanui Moi, ma Ewa o ke kihi Akau Komohana o Alanui Nuuanu a me Moi.    1 1y

 

Samuel K. Ka-ne,

LOIO A HE LOEA MA KE KANAWAI.

Imua o na Aha Hookolokolo a pau o keia Aupuni.  Ua makaukau e hooko i na kauoha a pau mai na mokupuni mai.  Ua hiki ke hana i na Palapala pili Kanawai.  KEENA HANA:  Kihi o na Alanui Moi a me Betela, ma ka hale iluna.  1 1y

 

HONOLULU DAIRY!

            Ua makaukau ka Honolulu Dairy ma Nuuanu, @@@ Waiu @@@ (i paiole ia i ka wai a mea e ae,) no na kumukuai maa mau.  He hookahi makahiki o ke kukuluia ana aenei o keia Wahi Uwi Waiu, a ua nui ka mahalo ia o ka waiu mai laila mai, e ka poe e lawe nei i ka waiu.

            O ka poe e makemake ana e lawe i ka waiu e kauoha aku no i ko lakou makemake ma ka Honolulu Dairy, Nuuanu.

268-Mutual Telepona.  128-Bele,

a ma kahi Hookio Waiu, ka HONOLULU DAIRY DEPOT, Telepona, Bele 192.

            1 1y

 

PAAKAI !  PAAKAI !

E LOAA NO ma kou keena, ma Alanui Moiwahine, ma ke eke a ma ke tona paha no na kumukuai oluolu.

            J. I. DOWSETT,

            1 3m    (Kimo Pelekane.)

 

WAAPA KUAI!

HE mau Waapa kuai ko maua e makemakeia ana e hoolilo aku no ke kumu kuai makepono loa.

            Hookahi waapa hueloboti, 22 kapuai, kila ume hao, kia, pea, me na hoe, a pela aku; ua lako pono, a he kupono no ka lawaia ana.

            He waapa kapili kepa ia, he 75lb kona kaumaha, he keleawe kona kui, ua lako me na hoe a me na pine.  He waa lealea.

            He mau nea hou loa keia.  E ninau ma ka hale kapili moku ma Ewa o ka Makeke ia.           DOWER & SON.

1-1m

 

KAMANO!  KAMANO!

E NA Makamaka Hawaii, e ku a e hoomanao, eia mai na Kamano momona ma ka'u papa kuai e hiala ai ai ka puu, a e mikioi pono ai hoi na kioo poi ka-i moepoli o ka aina.  E ike ia kakou hookanaka, o kipa hewa ke aloha !a hai.

            J. KAULAHEA.

1-1M

WAIU HOOLULILULI!

AIA ma ke kihi o Alanui Likeke me Moiwahine, e loaa ai i na hoa'loha no ke kumukuai haahaa loa, oia hoi na wai lemi ono loa a me ka wai ohelo helu ekahi  Ka mea hoonopuu o ke kamahele o na la welawela o ka aina nei.

            1-1m    JAMES MAKUA.