Ka Nupepa Kuokoa, Volume LXVI, Number 53, 1 Kekemapa 1927 — HOIHOI HOU IA MAI NEI KA AHUULA O KAMEHAMEHA Lawelaweia na Hana Pili i Kela Kapa Ahuula Maloko o ke Keena Kalaunu o Ka Halealii ma ka Poakahi Nei [ARTICLE]

HOIHOI HOU IA MAI NEI KA AHUULA O KAMEHAMEHA

Lawelaweia na Hana Pili i Kela Kapa Ahuula Maloko o ke Keena Kalaunu o Ka Halealii ma ka Poakahi Nei

Ma ke kakahiaka o ka Poakahi iho nei, i hoopiha ae ai oloko o ke keena kalaunu o ka halealii, i ka poe makaikai, no ka ike maka ana i ka ahuula o Kamehameha III, i haawi makana ia aku ia Komodoa James Lawrence Kernny, a i lilo mai nei i waiwai no Hawaii nei, ma o ka lokomaikai ia o Walter Dillingham, ka mea nana i kuai aku a lilo mai kela ahuula iaia. Ma ka mokuahi Malolo o ke ku ana mai i keia kulanakauhale, i hoea mai ai kela ahuula, a waihoia aku malalo o ka malu, o ka hale waiho buke o ke aupuni maanei nei, a ma kela kakahiaka Poakahi i hoihoiia ae ai noloko o ke keena kalaunu, me ka lawelaweia ana o kekahi mau hana i pili loa i ka ahuula, me ke meleia ana o ke mele lahui o Hawaii nei, pela hoi ka hoolohe ana o kela anaina i na haiolelo mai ia A. P. Taylor, o ka hale waiho buke o ke aupuni, ke Kiaaina W. R. Farrington, ame Walter Dillingham. Ua hoihoiia mai kela ahuula, a waihoia maluna o ka noho kalaunu a ma ka aoao aku ae hoi o ka ahuula ke Kamaliiwahine Kalanianaole. oiai hoi oloko o ke keena kalaunu i hoopihaia ai e na lala o ka Ahahui Mamakakaua ame na luna oihana ame ka lehulehu i hoea ae maloko o kela keena. Ka Moolelo o ka Ahuula Mahope o ka hoolohe ana i kekahi mau mele olioli no Kamehameha III, i hanaia mai e kekahi mau lede Hawaii; pela hoi ke komo like ana o na mea apau, ma ke mele ana i ke mele lahui o Hawaii nei: i hoakaka ae ai o Mr. A. P. Taylor i ka moolelo e pili ana no kela ahuula. Wahi ana, he ahuula kela i makanaia aku e Kamehameha III i ke Komodoa James Lawrence Kearny o a mokukaua Constellation i ka 1843, ka mea nana i hoopakele ae ia Hawaii nei, mai ka hoopupioia ana e George Paulet. Ua ili aku kela ahuula i ke keiki a Komodoa Kearny, a mai iaia aku i ili aku ai maluna o kona hoahanau, oia o James Lawrence Boggs o Nu Jese Mahope o ka hoakaka ana i na mea e pili ana i kela ahuula, i waiho mai ai oia imua o ke kiaaina, no na makaainana o Hawaii nei: me ka pane ana o ke kiaaina i kekahi mau olelo pokole, e haawi ana i kona hoo-

maikai ame ka mahalo, a hoihoi mai no ka malamaia ma Hawaii nei. Haawiia i ka Hale Hoikeike No ka hoihoi ana aku i kela ahuula, malalo o ka malama ana mai a ka hale hoikeike o na meakahiko, mauka ae nei o Kamehameha, i kau aku ai ka hanohano maluna o Walte Dillingham, o ka haawi ana mai i kekahi haiolelo pokole, a waiho mai la i ka ahuula malalo o ka malama ana a A. F. Judd, kekahi o na lala o ka papa kahuwaiwai o ka Waiwai o Pauahi Bihopa, a mahope o kana haiolelo, i kanaenae mai ai o Mrs. Mary Kekinookalani Padeken, i kekahi mele oli i hakuia eia, o ia ke Aalii Ku Makani.