| | HE MOOLELO — No — FOLORA RIKEKONA A i Ole
KE KOMOLIMA MARE POHIHIHI Ka Hoowalewaleia Ana— Ka Mare Malu Ana
i ke Kanaka Malihini — Ka Holo Makai-
kai Ana i Europa — Ka Mare Ana
me Kanaka Okoa. E hoomaka iho ana e ua ia manawa, nolaila hele aku la a kaa ma kekahi aoao o ke alanui, no kona manao o kahi malu ia e pulu ole mai ai i ka ua, oiai ka makani: ame ka ua ma ia aoao ka ikaika e pa mai ana. Aohe i liuliu iho kaalo ae la oia ma ka aoao o kekahi kaa lio oiai nae, aole oia i ike aku no ka paa i ka noe, ahiki i kona pili loa ana aku. E ku ana ia mamua mai o kekahi hale, a e hana ana ke kalaiwa i ke kaulawaha o kekahi o na lio, a ia leha ana ae iluna, ike mai la iaia. Hele iki aku la oia he mau kapuai imua, a i ka loaa ana ae o kekahi noonoo iloko ona huli hou mai la ihope a hui me ke kanaka a nonoi aku la iaia e lawe pololei iaia ahiki i kekahi alanui kokoke loa aku kahi e loaa ai iaia kekahi kaa uwila e holo ana ahiki i ke Kuea St. James. Ua hooholo oia i kona manao e hele pololei ahiki i ka hale kahiko ana i noho ai mamua, a ina no ka loaa aku o Kalo Kini ame kana kaikamahine iaia malaila, alaila, e nuku aku ana oia ia laua no ka manao ana e lawe aku i na pono apau mai iaia aku, elike me kana mea i lohe ai. Ua aneane loa no hoi oia e hiki mai i kahi o ke kaa ia manawa lohe aku la oia i ka weheia ana mai o kekahi panipuka me ka ikaika ma kekahi aoao mai o ke alanui, a lohe pu aku la oia i ka leo o kekahi kanaka e kahea mai ana: "Ea, e ke kalaiwa o kela kaa, he kaa hoolimalima anei kena? E oluolu oe e hele mai maanei no kekahi minuke, he makemake au e kamailio me oe!" I ko Monika lohe ana aku i kela leo lelele wale ae la no kona oili, no ka mea, o ka mea nona ka leo ana o ka lohe ana aku, no ke Kauka Pilina. No kona akahi no a hele ma kela wahi. a ua maopopo ole hoi ke alanui ian, i kona manawa i lohe ai i ka leo i kamaaina Ioa i kona pepeiao, hoomaka aku la oia e hele me ka awiwi loa imua, a o ka mea hilu, no kona maopopo ole i ke ano o ia wahi, ua kaapuni ae la kana hele ana ahiki i kona hoi hou ana mai ahiki no ma ia wahi ana o ka hoomaka ana aku, no ka paa no hoi kekahi i ka noe aohe maopopo iaia o kahi kupono e hele aku ai, a o ia wahi ana i hoi mai a ku, mamua pono mai no ia o ka halenoho o ke Kauka Pilina. Mamuli o ke ano o ka leo ana o ka lohe ana i maopopo iho ai iaia ua ikeia kona holo mahuka ana, a i hoea mai ke kauka ma ia wahi no ka huli ana mai iaia, a no na kanaka malama kihapai, me he mea la o laua pu kekahi e hele ana e huli ma na alanui like ole nona, o kona ike ole aku nae, aka nae, oia ka mea i maopopo loa iaia me ke kanalua ole. Heaha la kana mea e hana aku ai? Ua holo aku la oia imua i ka manawa a ke kanaka i kahea mai ai i ke kalaiwa, a i nei manawa ua kokoke loa mai Ia i ke kaa. Ina elike me mamua iho ka paapu i ka noe aole la oia e ikeia mai. Aohe ana hana pono ia manawa o ke ku malie wale no, o noonooia mai kona holo aku ia manawa o ia ke kaikamahine mahuka i holo malu mai ai mai ka halema'i mai. "Aohe keia he kaalio hoolimalima, he kaa keia no ko'u haku, a nona au e ku nei a kali o kona hoi mai; he hana pono ole 3a'u ka haalele ana iaia," i lohe mai ai oia i ke kalaiwa i ka pane ana aku i ke Kauka Pilina. Me ka manao koa iloko ona o kona hoi hope mai la no ia ahiki i kahi o ka puka o ke kaa e hamama ana no, wehe malie aku la, a kokolo mai la a komo iloko, a lapee iho la maluna o ka papahele o ke kaa, i ka manawa a ke Kauka Pilina i kahea hou mai ai i ke kalaiwa i ka i ana mai: "Ea, aole anei oe i ike iho nei i kekahi kaikamahine me ka iole makue i hele mai nei ma keia alanui he mau minuke aku nei mamua?" "Ae, ua ike iho nei au," i pane aku ai ke kalaiwa kaa, he mau minuke eha a elima paha i hala aku nei ko'u ike ana, a me he mea la ma keia manawa, ua hala Ioa aku nei oia ma kekahi alanui, a manao au, ina no he mama kou i ke alualu, e loaa aku ana no oia ia oe." Upa ino mai la ke Kauka i ke panipuka o kona hale a hoomaka aku la ka hele ana me ka mama me he mea la he mau eheu kekahi i hoopiliia ae malalo o kona mau kapuai, a i ke kalaiwa hoi i huli ae ai ma kekahi alanui okoa, me kona hoohuoi ole, o ke kaikamahine a ke kanaka ana o ke kamailio pu ana mamua iho, aia oia iloko o kona kaa kahi i lapee ai me ka haalulu, no ka piha i ka maka'u no kona loaa mai. Ia manawa koke no weheia mai ana ka puka o ka hale kahi o ke kaalio i holo aku ai a ku mamua a he keonimana elemakule ka i oili mai a pii mai la iluna o ke kaa, a ia Monika hoi e pupue wale ana no ma kekahi aoao o ke kaa me ka piha loa i ka maka'u. "E Uilama, e kalaiwa hou aku oe ia'u ihope ahiki i ke keena, me ka mama loa, no ka mea, he hana ka'u malaila ma ka hora umi-kumamalua ponoi, a mai hoohala oe i keia kauoha," i nui aku ai ka leo o ke keonimana. "Ua pono ia," pela ke kalaiwa o ka pane ana mai, i ka manawa o ke keonimana o ke komo ana mai iloko o ke kaa, a pii ae la no hoi ke kahukaa no kona noho mamua o ke kaa. I ke keonimana elemakule i kau mai ai iluna o ke kaa, a i koaa ike ana iho ia Monika i ka pupue ma kuono, hooho ae la: "Ea, owai nei e pupue nei maanei ?" Ua ike iho la oia ia Monika. "O e ke keonimana maikai," me ka huli ana ae a nana i ke keonimana me na maka e hoike ae ana ua piha oia i ka maka'u, a e haawi ae ana hoi iaia malalo o ka hoopakele ana a ka mea i malihini loa iaia. ''O ko'u pakele ana mai nei no ia mai ka mana mai o kekahi | kanaka ino, a kokoke loa au e loaa iaia, aka nae, na ka noe ame keia kaa i huna ia'u. "Ua ninau mai nei oia i ko kahukaa ina ua ike oia ia'u i ka maalo ana ae a hoakaka mai nei iaia i ko'u mau ano a pau ame ko'u aahu e komo nei, a ua pane aku ke kahukaa, ua ike oia ia'u i ka maalo ana ae, a me kona ike ole mai nae, o ko'u komo mai la no ia iloko o keia kaa, a pee iho nei, elike me ia au e ike mai la. "E ke keonimana lokomaikai, e noi aku ana au ia oe e ae mai ia'u e holo pu aku me oe a kaawale mai keia wahi aku, a i kou wa e ike ai ua mamao loa au, alaila hoolele iho oe ia'u ilalo a na'u hoi ia e hele aku e huli i wahi no'u e pee ai." Ia manawa apau ana e kamailio mai ana i kona pilikia, ua hina aku la ke kanaka imua a kokoke loa iaia, i hiki ai iaia ke ike pono iho i kona helehelena, a oiai oia e nana iho ana, ke hoomaopopo iho la oia iloko ona he kaikamahine o Monika na kekahi ohana kiekie a maikai ma ke ano o kana olelo ame ka helehelena pu, he lede oia. "E kuu keiki," i pane iho ai ke kanaka me ka oluolu loa, "ku ae iluna a e hoi mai maanei e noho ai, alaila hoike mai ia'u kou moolelo, a e hoomaopopo mai no hoi oe i keia, aole au e hookuu aku ana ia oe e hele ahiki i ko'u ike ana he wahi a nou e palekana ai." . Iaia no e kamailio iho ana, hopu iho la i ka lima o Monika a hapai ae la a hoonoho iho la iaia ma kona aoao, a ua lilo hoi keia hana aloha ana, me ka oluolu o kona leo, i mau mea mahalo nui nana, a no ka hiki ole iaia ke uumi iho i kona hoomaikai, helelei iho la kona mau waimaka, a ke lohe iho la hoi ke kanaka i kona ha'uha'u uwe, me ka ike pu iho i ka haalulu o kona kino. Ua maopopo i ke kanaka ka nui o kona kaumaha nolaila, aole oia i kamailio iho iaia a hala kekahi mau minuke, no kona manao o ka waiho malie ana iaia e hoomama i kona kaumaha ma ka uwe ana o ia wale no ka mea e loaa koke ai iaia ka maha o ka noonoo mamua hoi o ka noke ana iho i ke kamailio. A hala kekahi mau minuke ia Monika ma ia hookahe ana i kona mau waimaka alaila i ae la: "E, ke keonimana, e noi aku ana au ia oe, e kala mai ia'u, iloko o ka manawa a'u i ike ai ua nele au i kekahi mea nana e kokua mai ia'u, eia nae, ua hoike mai oe i kou oluolu ame kou lokomaikai ia'u, a ua lilo kau hana maikai i mea hoopiha i ko'u uhane i ke aloha, a ua hiki ole hoi ia'u ke uumi iho i ko'u mau waimaka." Alaila, hoakaka ae la oia, i kona moolelo ma ke ano pokole, mai ka manawa mai o kona loaa ana i ka ma'i ahiki i kona hoihoiia ana aku e hoopaa maloko o ka halema'i a ke Kauka Pilina, a no kekahi manawa loihi kona hoopaahaoia ana maloko olaila, a iloko o ia manawa ana e noho ana maloko o ka halema'i e hoolala mau ana no oia no kona holo mahuka aku i kekahi la, a ma ia la wale no i holopono ai kana holo mahuka ana mai. Ua hoolohe iho la ke kanaka i kana moolelo mai ka mua a ka hope me ke piha o kona naau i ka huhu no ka mea i hanaia no Monika. "Ua lohe mahui no au i kekahi mea e pili ana me kela Kauka Pilina mamua, eia nae, aole au i haawi i ko'u noonoo nui maluna o ia mau mea a'u i lohe ai nona, ua manao au malia he mau olelo hapala wale aku no paha ia iaia, elike no hoi me kekahi poe i manaoinoia, e hakuepa wale ia ana no na olelo hoino nona. "Eia nae, e ka lede opio, ke hooiaio aku nei au imua ou, mahope o ko'u lohe pono ana aku la i kau moolelo mai ka mua a i ka hope, e lilo ana ia i hana na'u ka nana ana ame ka ninaninau pono ana aku i kana mau hana pono ole, mahope iho o ka loaa ana ia'u o kekahi manawa kupono loa e haawi aku ai i ko'u noonoo ame ko'u manawa no ia hana. "He Ioio au, a o Akibolo Kikane ko'u inoa. Ua lohe aku la oe i ko'u inoa, nolaila e oluolu oe e hoike mai i ko'u." "O Monika Kini ko'u inoa oiaio, a eia nae, aia ahiki ia'u ke noho aku malalo o ka hoomalu ana a kekahi mea kupono a'u e hilinai aku ai, a e kokua mai ana hoi ia'u no ka hoopii ana i kela kauka no ka hewa ana i hana mai ai ia'u, ke manao nei au e ikeia mai au ma kekahi inoa e ae. "O kuu inoa waena o Helena, a o ka inoa o kuu makuahine mamua o kona mare ana i ke kane o Poka, nolaila ke makemake nei au e kapaia mai au o Helena Poka." "Malia he inoa kupono ia i kou manao, aka, e noonoo kaua no ia inoa no ke kupono a kupono ole, no ka mea, no'u iho aohe o'u makemake i ka inoa kapakapa. E hoakaka hou mai oe no kekahi mea e pili ana i ko hoahanau, a ma ke ano hea i kailiku ae ai oia a kaa aku malalo ona ka hoomalu ana. i kou mau waiwai." Alaila hoakaka aku la o Monika i ka mea e pili ana i ko laua pili ana a pela hoi me ko Ineka ola ana i ka manawa mamua aku, a pela hoi ke koi ikaika ana mai o Kalo Kini iaia e kakau aku i kona inoa maluna o kekahi mau apana pepa, e hoolilo aku ana iaia i kahu malama waiwai nona, me ka haawi pu ana iaia i ka mana e lilo ai oia i lunahooponopono no kona mau waiwai. "Ea, e Miss Kini, ke ike aku la au ma ke ano o kau moolelo o ka hoakaka ana mai la, he mea pono e loaa kekahi mea nana e hoopakele ia oe ame kou mau waiwai, a i ole pela, e oi loa aku ana kou komo iloko o ka pilikia mamua o ko keia pilikia ou i pakele mai la mai ka halema'i mai. "E ae ana anei oe e lawe aku au ia oe i ko'u hale a imua hoi o ka'u wahine, a malaila oe e noho ai ahiki i ka maopopo ana ia'u o kou moolelo ame na mea apau e pili ana i kou waiwai, i hiki ai ia'u ke huli aku i ka mea pono e hana aku ai nou? "E loaa ana ia oe ka malama maikai loa ia malaila e kaniuhu ole iho ai oe, a no ka mea, he mau mea makemake like maua i ka poe opio; no ka maua mau keiki la ea, ua pau loa lakou i ka mare kane a mare wahine, a ua kaawale no hoi mai ia maua aku, a ua mehameha ko maua alo." Nana ae la o Monika iluna me ka helehelena hoihoi a piha mahalo no keia lokomaikai kiekie a kona kokoolua o ka hoike mai la nona, nolaila aole hana pono e ae ma kona aoao, o ka haawi wale ae no i kana hoomaikai, a i ae la: "Lokomaikai a oluolu maoli oe ia'u i like loa me ka ko'u makuakane ponoi e hana mai ai no'u," pela o Monika o ka pane ana ae me ka haalulu o kona leo," nolaila aohe a'u pane e ae ma ko'u aoao o ka haawi wale aku no i ka'u hoomaikai. a eia e lilo ana ia i mea na'u e noonoo nui ai." Aka iki iho la ke keonimana. Ia mau minuke pokole wale no ua lilo loa o Monika i mea nui nana, no ke kumu, he kaikamahine o Monika i hanaia mai me kekahi hana hewa loa. a he mea pono nana ka nana ana no kona pono. "Ua ike iho au he hana pono ma ko maua aoao ka pulama ana mai ia oe a nana aku hoi i kou mau pono, aka, ina e ike ana oe i ka ehaeha o kou noonoo no kou noho pu me maua e lilo ai ia i aie nou nau no ia e noonoo, eia nae ka'u e hoike | aku ia oe, ina e holopono ana ka'u hana ana imua o ke kanawai e hoi mai ai kou mau waiwai apau me oe, ia manawa oe e uku mai ai i ko'u uku, elike no me ka poe e ae na lakou ka hihia i lawelaweia ai mamua." "No ia uku ke hauoli loa nei au i ka haawi aku, mahope iho o ka holopono ana o kau hana imua o ka aha a hoi hou mai ko'u mau waiwai apau me a'u, a ia manawa, e hoike aku ai au ia oe, e hookaawaleia aku ana ke kaumaha mai ko'u naau aku no ka loaa ana he hoaloha i maopopo mua ole. "E Mr. Sidane, he kanaka hiki no anei ko kahukaa ke hilinaiia? Ua maopopo ia'u e haawi mai ana ke Kauka Pilina i kekahi uku makana kiekie i mea no'u e loaa ai, a ina e ike mai ana ko kahukaa ia'u a hoomaopopo iho owau no ke kaikamahine ana i ike mai ai, i kuu wa i haalele ai i ke kaalio, e loaa iho ana ka manao kuko iloko ona no kela uku makana e haawiia mai ai, a e hoike aku ana oia ia'u, o ko'u loaa no ia, a ehia ka hoi mea aloha owau, i ka hoihoi hou ia aku e hoopaa maloko o kela halema'i kohu halepaahao," i pane ae ai o Monika. "Ua maopopo ia'u aole i ike maopopo mai ko kahu kaa i kuu helehelena, aka nae, no keia lole a'u e komo nei, manao au, aole oia e poina ana." "O ia ninau no hoi ka'u o ka ninau ana iho la ia'u iho," pela ke keonimana o ka pane ana mai. "Ua ike au a ua hoomaopopo i ko Uilama hoopono me kona hoolohe mai mua mai ahiki i keia la, eia nae, aohe i loihi ae nei kona noho ana e hana me a'u, nolaila, he mea pono no ka makaala mua ana me ka papa Ioa aku iaia aole e hoike i kahi mea e pili ana nou, oia no ka hana maikai a palekana loa. "Ke kokoke loa aku nei kaua i kuu keenahana i nei manawa, a i ka wa e ku iho ai o ke kaa, ea, ia wa au e kiei aku ai iwaho o ke kaa ma ka puka aniani, i ka wa e lilo ai ke kahukaa i ke kamailio me a'u, o kou manawa ia e oili aku ai iwaho ma kekahi puka ma ka aoao o ke kaa e hiki ole ai iaia ke ike mai ia oe, a holo aku oe a kaa ma kela aoao o ke alanui a komo aku iloko o ka halekuai buke, a malaila oe e ku ai, ahiki i kuu kauoha ana aku ia Uilama, ke kahukaa, e hoi i ka hale, alaila hele aku au a loaa oe." Wehe mai la oia i ka puka a hemo no Monika e oili aku ai iaia no e kamailio mai ana, me ke noi pu ana aku ia Monika e paa mai no i ke panipuka ahiki i ke ku ana iho o ke kaa. Aohe i liuliu loa, ku iho la ke kaa mamua o kekahi halepohaku nui, a mamua o ko ke kahukaa lele ana iho ilalo mai kona noho iho, no ka paa ana i ka puka no kona haku, kiei mua aku la o Mr. Sidane iwaho ma ka puka aniani a kahea aku la iaia. Ua lilo keia i mea koi aku i ke kahukaa e kiei mai ma ka aoao o ke kaa ma kahi a Mr. Sidane e kiei aku ana, ma ia hana ana i hiki ai ia Monika ke oili aku iwaho me ka palamimo loa, a no ka oni ole o ke kaa ia wa ana i oili aku ai aohe i loaa iki i ke kahukaa he hoohuoi nona he ohua e ae hoi kekahi maloko o ke kaa mawaho ae o kona haku. He mau kaina wawae liilii wale no ia a Monika o ka holo ana aku a ku ana maloko o ka halekuai buke, elike me ia a Mr. Sidane i kuhikuhi aku ai iaia. I ka maopopo ana i ke keonimana aohe i ike k'e kahukaa ia Monika, oili mai la oia iwaho mai ke kaa mai a lele iho la ilalo, a ku iki iho la no ka haawi ana aku i ke kauoha ana i poina ai aole i hoike ae i ke kahukaa, a i ka hala ana aku o ke kaa, hele aku la a komo iloko o ka halekuai buke. Ma keia ano hana iho la i pakele ai o Monika i ka ikeia mai e ke kahukaa, a ma ia ano hana iho la no hoi i hiki ai ia Monika ke hele pu aku me ka Loio Sidane ahiki i kona hale. Hakalia no i ke kaalio a nalowale aku, o ko Mr. Sidane hele ae la no ia a hui me Monika maloko o ka halekuai buke, a loaa aku la o Monika iaia e heluhelu ana i kekahi buke Magazine no ke kuai ana iho. Me kekahi minoaka o ka hauoli oia i haawi mai ai ia Mr. Sidane i ka hoea ana aku, a no Mr. Sidane nae, he inaina ke nu ana iloko ona no kona noonoo ana iho no ka Kalo Kini hana ino a pakaha i hana ai maluna o ke kaikamahine nona ka helehelena ui ana e ike aku ana. Alakai aku la oia iaia ahiki i ka halekaa kokoke loa mai a kokua aku ma ka hoopii ana aku iluna o ke kaa, a he minuke ma ia hope iho ua laweia aku Ia laua me ka hikiwawe loa ahiki i ke alanui Kovenoa mauka loa kahi o ka hale nani o Mr. Si-dane e ku ana. MOKUNA XVIII— MALOKO O ROMA. He hapalua hora ma ia hope iho ku iho la ke kaalio mamua mai o ka puka o ka halenoho nani o Mr. Sidane. I ko laua lele ana iho ilalo lawe aku la o Mr. Sidane i kana malihini aloko o kekahi rumi hookipa, a hoonoho iho la maluna o kekahi noho mamua mai o kekahi kapuahi hoopumehana e a ana ke ahi lanahu, a noi iho la e hookuu aku iaia no kekahi mau minuke no ka hele ana aku e huli i kana wahine, no ka lawe ana mai a hoolauna ia Monika. Aneane he hapalua hora kona nalowale ana aku, i kona hoi ana mai me kekahi makuahine i emi liilii iho kona opiopio mamua ona, a nona hoi ka inoa ana o ka hoolauna ana mai ia Monika o Mrs. Sidane. Ua haawi mai la oia i kekahi hookipa oluolu loa ia Monika a hoomau mai la no hoi i kana kamailio ana e hiki ole ai e loaa i manawa no Monika e kamailio aku ai, ahiki i ka hoike ana mai o ke kuene no ka makaukau o na meaai no ka aina ahiahi, a ia manawa lakou apau i hele aku ai no ka rumiaina, a ia manawa i laha ae ai mawaena o na kauwa he kaikamahine opio ui ka ko lakou haku o ka hoihoi ana mai i ka hale, nona ka inoa o Miss Helena Poka a ua kohoia mai hoi ko lakou haku i kahu hanai nona. Ma kela auwina la no, mamuli o ka hoakaka a kana kane, laweia aku la o Monika e Mrs. Sidane i kekahi hale hoolimalima i hoolakoia me na lako hale apau o ka papa ekahi ma ke alanui Rigena, a malaila o Monika i noi aku ai e hoolakoia mai oia e ka haku o ia hale me na aahu apau ana e makemake ai, o ke ano maikai loa e loaa ana maloko o ia wahi. Ua hoahewa no o Monika iaia iho, no keia mau hoolilo nui hewahewa, e nemaia mai ai paha oia e kekahi poe i ke kaikamahine uhauha, eia nae, he mau mea kupono wale no ia nona elike me ka olelo a ka ona nona ka hale a he mau mea no hoi ia i hoolakoia mai i kupono me ko Mr. Sidane makemake a i ikeia mai ai oia he kaikamahine hanai na Mr. Sidane, a mamua o ka hiki ana mai o ke ahiahi, he elua mau pahulole i piha me na lole Iike ole i laweia mai a i makaia mawaho o ka pahu "H. P.", a hapaiia mai la iloko o ko Monika mau rumi. Iaia maloko o kela hale ua ike iho oia iaia me he manu kenerela i paa mau iloko o ka hale manu a i ka hemo ana mai ka halemanu mai ua like oia me kekahi mea lanakila? No keia loli hikiwawe loa i loaa iho la ia Monika ua hikiwawe loa ka ulu ae o kona kino i ka mohaha mai a ikeia aku la no hoi ka | lamalama mai o kona helehelena, maikai mai la kona noonoo a hoomaka mai la no hoi e loaa ka ikaika i ke kino, a he holoholona i loaa ke ola hou kana ike iaia iho. No kona mau makua hanai hoi, Mr. ame Mrs. Sidane, ua hoopihaia aku ko laua mau naau me ka hauoli no ka loaa ana o ka laua kaikamahine hanai, he ohua hoonani hou no ko laua home, a he hoolehulehu ana aku no hoi i ko laua alo i mehana ha no ka wa loihi. I na manawa kaawale o Mr. Sidane e ninaninau mau mai ana oia ia Monika e pili ana i ka moolelo o kona ohana, a e loaa mau aku ana no hoi iaia i kela ame keia manawa. me kona kakau mau i na mea ano nui ana e ike ana, eia nae, ma ka mea e pili ana i ko Mr. Kini pili ana ia Kalo Kini, he liilii Ioa ka ike i loaa aku iaia, no ka maopopo ole ia Monika o ko laua pili. Eia nae ma ia wahi ua olelo aku o Monika i ua o Sidane, o Auguseto, ke kakauolelo pilikino a kona makuakane ola paha ka mea i maopopo, oiai oia ka mea pili mau me Mr. Kini, kona makuakane, aole e nele ana kona maopopo i kekahi mea e pili ana i ko laua pili ana kekahi i kekahi, a no ke kumukula o ke kula kaikamahine ma Los Angeles, oia ka mea nana e hooiaio mai he kaikamahine oia na Mr. Kini i make, a o kona hooilina wale no hoi, no ka mea he elua ona mau kii i pa'iia i kona manawa e noho ana maloko o ke kula a i hoounaia mai ia Mr. Kini mai ka halekula mai. Alaila, olelo mai la o Mr. Sidane iaia e kakau mai ana oia i leka ia Auguseto a i ke kumukula o ke kula o Los Angeles, i kekahi manawa kaawale e loaa ana iaia, a noi pu mai la ia Monika e hoopoina loa oia i kona mau manao kaumaha apau a e hoohauoli oia iaia iho, elike me ka hiki iaia, oiai oia e imi a e hana mai ana ma na ano apau no kona pono. No ka mahina ko Monika noho ana maloko o ka hale a Mr. Sidane i hoonoho aku ai iaia, me ka loaa ole o kekahi mau mea hookaumaha mai i kona noonoo, o ka hauoli ame ka malie wale no o kona noonoo kana mea i ike, a iloko o ia manawa ua maikai loa mai la kona ola kino, mohaha mai la kona helehelena, ula mai Ia no hoi kona mau papalina e hoike mai ana i kona wahine ui, me ka nui o kona mau hoaloha, a he kaikamahine hanai wale iho Ia no kona oleloia na na Sidane. Mahope mai, ma kekahi kakahiaka, olelo aku la o Mr. Si-dane iaia aohe nui loa o kana hana a e hala ana he mau la, a ma ia ahiahi iho e kakau ana oia i na leka ana i olelo aku ai iaia, ina oia e kokua mai ana iaia ma kekahi mau mea. Eia hae, aole i hookoia keia manao ona, no ka mea, ma ke ahiahi loa ana iho o kela auwina la, hoihoiia mai ana ke kino-make o Akibolo Sidane, ua loaa oia i ka ma'i lolo, a ua hoopau koke ia kana hana ma keia ao. Mamuli o ia ia make koke ana mai la o Mr. Sidane me ka ike ole ae i ka ehaeha, i hooneleia ai ke kaikamahine i hoomaauia o ka hoaloha ana i hilinai ai. No Mrs. Sidane hoi, ua ku a ma'i oia mamuli o keia puupuu ikaika loa i ike mua ole ia, a no kekahi mau pule lehulehu ma ia hope mai, i ka nana aku iaia, me he mea la, e ukali koke aku ana no oia mahope o kaha kane. Ma keia manawa i lilo ai o Monika i mea hoomama mau aku i ka noonoo o Mrs. Sidane, elike me ka maikai i hanaia mai ai iaia. Ua haawi aku oia i kona manawa ame kona noonoo apau maluna o ka mea pilikia a i hoomokumokuahuaia hoi ka noonoo no kana mea aloha i haalele koke mai iaia: ua pili mau aku o Monika ma ka aoao o ka moe o ka wahine ma'i me ka manaka ole; kakaikahi loa kona haalele i ka aoao o ka moe o ka mea ma'i, a no ko Monika makaala loa, me ke kokua mau aku i ka wahine ma'i ua lilo oia i mea alohaia e Mrs. Sidane me he mea la he kaikamahine ponoi nana. No ka elua mahina a oi kela ma'i ana o Mrs. Sidane me ka hiki ole iaia ke kokua iaia iho, a iaia i lana ae ai mai kela ma'i mai, ua hele e kona helehelena, hohoma kona mau papalina a kuku na iwi o na papalina, me ka poopoo o na maka, a he wahine nawaliwali loa oia me ka wiwi pu, i loli loa mai kona ano mau ae. I ka hiki ana iaia ke holoholo iwaho, kauoha mai la kona kauka iaia e holo i Italia e hoolanalana ai, me ke kauoha pu e hoi mai ke ike oia i ka ikaika loa o ka wela e hiki ole ai iaia ke hoomanawanui, a ua ae aku la ka wahine ma'i, me ka olelo pu ana aku nae, he ae no oia e hele, ke ukali pu nae o Monika iaia. No kekahi mau pule ko laua noho ana ma Napela, maloko o kekahi hale nani e huli pono aku ana i ke Kaikuono o Napela, me na ululaau alani, i lemi ame oliva e hoopuni mai ana i ka hale a lakou i noho ai, a o ka luapele Vesvio, me kona uwahi e puka mau ae aha i ka lewa i ka po ame ke ao mauka loa aku e kiekie mai ana, me ke kai uliuli no hoi o ka moana e waiho mai ana mamua aku o laua; malaila lakou i noho ai me ka maluhia, a ua lilo hoi ia mau mea nani a lakou e ike aku ana he mau mea hoomama mai i na naau luuluu a kaumaha. Ma keia wahi a lakou i noho ai ua ikeia ka hikiwawe Ioa o ka maikai o ko Mrs. Sidane ola kino, a ma ka aneane i ka hapalua like o ka mahina o Ianuari, hooholo iho la oia e holo i Koma, no ka hoololi ana i ka lakou wahi e noho ai, a malaila e noho ai a pau ka hoikeike nui e malamaia ana maloko o ia kulanakauhale. He mea ku no i ke aloha, wahi a ua o Mrs. Sidane i noonoo iho ai, ka hoomamao loa ia o kekahi kaikamahine opiopio a ili, elike me Monika mai kahi mai e malamaia ai na anaina hoohauoli, a e hoopaa mau ia oia me kekahi wahine hoehaehaia ka noonoo no kana kane, nolaila hooholo iho la oia no ka auamo i kona mau ehaeha apau, a e hooikaika ae oia iaia iho i hiki ai iaia ke holo i Roma ke kulanakauhale ana i ki-pa mau mai ai no na manawa lehulehu mamua aku. a o kahi nana e hoohauoli mai i ka noonoo me na mea nani like ole a ka maka e ike aku ai. I kulike me keia hooholo ana, he mau la kakaikahi ma ia hope iho, maloko o kekahi hale nani maluna o ka Puu Pinikiana lakou i noho ai ma Koma, no ka mea, mai ia wahi mai e hiki ai ia lakou ke holo aku e makaikai i na wahi kaulana lehulehu, a o kahi no hoi ia e hiki ai ia lakou ke ike pono aku i ka halepule St. Petero, ame kekahi mau wahi ano nui a kaulana o ke kulanakauhale o Koma. Ma kekahi auwina la, ia Monika ame ka wahine kauwa i hoi mai ai mai ka hale hoikeike mai o na mea kahiko, kaalo ae la laua ma kekahi aoao o kekahi mau keonimana e kau ana maluna o na lio, o ko laua oili ana mai no ia mai ka Pio nui mai i kapaia ka Pio Lanakila o Tito, a i ka ike ana mai o kekahi o na keonimana ia Monika wehe ae la oia i kona papale a kunou mai la, a ua haohao o Monika no kekahi manawa, no ke kunou ana mai oia keonimana iaia, me ka ninau ana iho iloko ona, owai la kela keonimana, a ua ike paha oia iaia mamua aole paha; malia ua kuhihewa ia Keonimana iaia i kekahi o na kaikamahine opio ana i ike ai mamua. (Aole i pau.) | |
