Ka Nupepa Kuokoa, Volume LXVI, Number 3, 20 Ianuali 1927 — KA HANA KI-PE AME KA PILIWAIWAI [ARTICLE]

KA HANA KI-PE AME KA PILIWAIWAI

Iloko o keia mau la mua loa o ka lawe ana ae o na luna oihana hou o ke kulanakauhale i ko lakou mau kulana, e laa ka loio kalana, i puapua'i ae ai kekahi mau lono, no ka hoao ana mai o ka poe piliwaiwai e ki-pe, i ka poe i kuleana, ma ka hooko ana i ke kanawai, ma kahi o ka hookahi kaukani elala o ka pule, no ka hoopakeleia o kela hana maloko nei o keia Kulanakauhale. O ka oiaio ame ka oiaio ole o kela lono pili i ka hoaoia o na luna oihana e ki-pe e ka puulu o ka poe piliwaiwai, he mea pohihihi no ia ke huli aku, hookahi mea pohihihi ole a kakou e nana aku nei, eia no ka hana piliwaiwai ke lawelawe mau ia nei i kela ame keia manawa, a ma na wahi like ole, mai ke au mai o na luna oihana kahiko i pau, a komo wale mai nei no i ke kau o keia mau luna oihana hou. Ina nae malalo o kekahi mau kumu a ka lehulehu, i noho pouliuli ai pela iho la i lawelawe mau aku ai ka poe piliwaiwai i kela hana hakihaki kanawai me ka hoopilika ole ia, alaila e lilo i hana ma ka aoao o ke keena o ka loio kalatvi, ka noii ame ka huli pono ana aku, i na mea oiaio; a e hookoia aku ke kanawai me ke kuio ame ka hoopilimeaai ole. O ke kinai ana i na hana piliwaiwai, ke kuai ame ke puhī n-aiona. ame na hana hoopilikia a hoopoino i na pono o ka lehulehu, o kekahi mau kahua ia i kohoia aku ai na lumi oihana ma ke poo o na oihana hooko; nolaila ua ili aku ke ko'iko'i maluna o kela mau luna oihana, ka hooko ana aku i ka lakou hana me ka ikaika; ina no ia no ka hoopuehu liilii ana i na punana ona wahi hakihaki kanawai apau: a i ole ka hului ae paha i kela poe hakihaki kanawai imua o na aha hookolokolo. _