Ka Nupepa Kuokoa, Volume LXVI, Number 2, 13 January 1927 — LILO KA HOPUIA ANA O KE KEPANI NANA KA WAIONA I HANA KUE KANAWAI [ARTICLE]

LILO KA HOPUIA ANA O KE KEPANI NANA KA WAIONA I HANA KUE KANAWAI

Mamuli o ke kupono ole o ka palapala hopu ame ka hoololiia ana o ka palapala hopu i paa ka inoa o kekahi kanaka okoa aku me ke kue i ke kanawai i lilo ai i kumu na ke Komisina U. S. Ebert J. Bott e hoopau wale ai i ka hoopii e kue ana i ke Kepani i hopuia ai ma Palolo. Ma ka auwina la o ka Poaha o ka pule aku la i hala he Kepani o

Hayashi ka inoa, ka mea kue kanawai waiona i hopuia e ka Hope Ilamauku Samuel K. Liftee me kona mau paalalo ma ke Awawa o Palolo ma ka manawa i loaa pono aku ai e puhi rama ana. O ka inoa i kakauia maloko o ka palapala hopu i hopuia ai o Hayashi o John Doe Kaishi. Ua komoia kahi o Hayashi mamuli o ka ikaika o keia palahopu, eia nae, mahope mai i loaa ai ka ike i na makai o Hayashi ka inoa o ke Kepani a lakou i hopu ai, a ua hoohuiia aku ka inoa o Hayashi mahope o ka inoa mua i paa maloko o ka palapala hopu. He nui na mea i kamailioia maloko o ka hale aupuni federala ma ka Poalima i hala aku no ka hoololiia ana o ka palapala hopu e lilo ai i hana e koiia ae ai ka noonoo o ka lunakanawai o ka aha federala e nana mai maluna o keia hoololiia ana o ka palapala hopu. O kekahi hana i hoolalaia e hoihoi hou aku i na waiwai apau ia Hayashi, ina nae e hiki ana iaia ke hooiaio ae nona ia mau waiwai apau i paa ae ai i ka hopuia e na akena hopuhopu waiona.